Jesus sien latstet Passafast wudd besonda sennen. Wäajen hee boolt stoawen wudd, wull hee daut Passamol met siene Apostel toop äten. Doa wudd hee waut nieet enfieren, waut see jieda Joa fieren sullen: dän Harn sien Owentmol. Jesus schekjt Petrus un Johanes, de Stow reedtomoaken (Luk 22:7-13; see daut Bilt oppe väaschte Sied). Dit halpt ons, doaraun to denkjen, daut et needich es, daut wie ons uk fa daut Owentmol reedmoaken, waut dän 27. Moaz sennen woat. De Vesaumlungen haben sikj secha aul doarom jekjemmat, wäa de Räd hoolen woat, om daut Broot un dän Wien, un soo wieda. Oba waut kjenn wie aula perseenlich doonen toom ons fa daut Owentmol reedmoaken?

Moak dien Hoat reed. Go daut Bibelläsen fa daut Owentmol derch un denkj doaräwa no. Een Bibelläsplon doafäa es en daut Heft Täglich in den Schriften forschen bennen. En daut 16. Poat von daut Heft Help fa daut Bibelstudium es een Bibelläsplon met noch mea Eenselheiten (see uk daut Schoolheft fa Läwen un Deenst von Aprell 2020). Jieda Famielje kaun sikj waut doaräwa nosieekjen, woo wichtich daut Leesjelt es, un daut en äa Famieljenstudium studieren. Dee kjennen doatoo dän Index der Wachtturm-Publikationen ooda de Help toom nosieekjen fa Jehova siene Zeijen brucken.

Lod aundre en. Lod soo väl aus mäajlich to daut Owentmol en. Äwalaj, wäm du wurscht kjennen enloden, biejlikj diene Wadabesuchs, dee, met waut du ea mol de Bibel studieet hast, Bekaunde un Frintschoft. De Eltestasch woaren soone enloden, waut nich mea prädjen. Denkj doaraun: Wan du wäm enlotst, waut nich en diene Jäajent wont, kaust du daut noseenen, wua un woonen Klockentiet daut Owentmol en dän siene Jäajent sennen woat, wan du opp de Aunfangssied opp jw.org bie MEA ÄWA ONS drekjst un “Aundenkjen” utwälst.

Waut kjenn wie noch doonen toom ons reedmoaken?