En onse Tiet jeft daut emma mea Owwadasch. Doawäajen es daut wichtich, daut doa goode Plons sent toom bosich un oppe baste Wajch halpen. Daut se daut doonen kjennen, es de Väastaunt sikj eenich jeworden, en jieda Betel eene Nootfaul-Aufdeelunk entorechten.

Wan de Breeda von dise Aufdeelunk daut enwoaren, daut doa wua een Owwada wia, dan froagen dee fuaz de Eltestasch von doa, waut de Vekjindja fa Help brucken. Wan de Schoden soo groot es, daut de Vekjindja doa selfst nich met foadich woaren, dan woat daut Betel Breeda utwälen, waut goode Plons moaken kjennen un sikj de Sach äwanämen. Dise Breeda froagen veleicht no friewelje Oabeida ooda no jewesse Sachen ooda daut kaun uk sennen, daut dee doa jroz jewesse Sachen kjeepen un utdeelen.

Opp dise Wajch to halpen, brinjt väl goodet. Daut spoat ons väl Oabeit, daut es nich soo derchenaunda un Jelt un Sachen kjennen bäta utjenuzt woaren. Oba wan jieda Brooda selfst Plons moakt, es doa väl mea Derchenaunda un onneedje Oabeit un doa woat väl mea wajchjeschmäten.

De Breeda, waut vom Betel aunjestalt sent, sajen dan, woo väl Jelt un friewelje Oabeida doa needich sent. Dee kjennen uk doa, wua daut Owwada wia, met de Beaumte räden, wiels daut halpt foaken, daut doa kaun bosja jeholpen woaren. Eenselne sellen nich selfst Jelt toopkollakjten ooda aundre Sachen doahan schekjen ooda doahan foaren, wan dee nich doano jefroacht woat, daut to doonen.

Oba wie wellen wellich halpen, wan doa een Owwada es (Heb 13:16). Wie leewen je onse Breeda! Waut kjenn wie doonen? Daut wichtichste, waut wie fa dee doonen kjennen, es bäden – fa dee, waut von dän Schoden betroffen sent un fa dee, waut doa methalpen. Wie kjennen uk Gowen jäwen fa daut weltwiede Woakj. De Betels weeten daut baste, wua dit Jelt daut mieeschte halpen kaun, un dee woaren von dän Väastaunt aunjeleit. Wan du waut met diene ieejne Henj doonen west, dan kaust du die aunmalden un dän Boagen fa friewelje LDC-Buoabeida (DC-50) utfellen.

KJIKJ DAUT VIDEO ÄWASCHWAMUNK EN BRASILIEN, UN DAN BEAUNTWUAT DISE FROAG:

Waut wia fa die besonda, woo Jehova siene Zeijen aune 2020 en Brasilien uthalpen deeden, nodäm doa eene Äwaschwamunk wia?