Boolt woat Jehova siene Jedult äwa dise Welt aufjerant sennen. Dan woaren aule faulsche Gloowes venicht woaren, Velkja woaren sikj toopstonen toom Gott sien Volkj aunjriepen un tolatst woat Jehova aul de schlajchte Menschen en Harmagedon venichten. Aus Christen frei wie ons aul, wan aul dit besondre passieren woat.

Wie weeten nich, woo daut krakjt sennen woat en de groote Triebsaul, ooda groote Liedenstiet. Wie weeten biejlikj nich krakjt, wanea dee aunfangen woat. Wie weeten nich, waut de polietische Machten sajen woaren, wuarom dee de Gloowes aunjriepen. Wie weeten nich, woo lang de Velkja Gott siene Deena aunjriepen woaren un waut doa aules met en es. Un wie weeten uk nich, woo krakjt Jehova de schlajchte Menschen en Harmagedon venichten woat.

Oba de Schreft lat ons aules weeten, waut ons fält, daut wie kjennen Vetruen haben un met Moot daut entjäajengonen, waut doa kjemt. Wie weeten biejlikj, daut wie gaunz aum Enj von “de latste Doag” läwen (2Ti 3:1). Wie weeten, daut de Tiet woat “vekjart woaren”, wan de Velkja de Gloowes aunjriepen, soo daut de woara Gloowen bestonen bliewen kaun (Mat 24:22). Wie weeten, daut Jehova sien Volkj raden woat (2Pe 2:9). Un wie weeten, daut deejanja jerajcht un majchtich es, dän Jehova utjewält haft, om de schlajchte Menschen en Harmagedon to venichten un de groote Häad to raden (Opb 19:11, 15-16).

Doa woaren noch Sachen passieren, waut de Menschen bat doa brinjen woat, daut an woat “en äare Angst daut Hoat vesajen”. Oba wie kjennen met Vetruen daut doonen, waut de Schreft sajcht: “Häft de Kjap opp un kjikjt, wiels sikj june Radunk nodat” (Lu 21:26, 28). Daut kjenn wie, wan wie doaräwa nodenkjen, woo Jehova en de Vegonenheit siene Deena jerat haft un waut hee ons doaräwa weeten lat, waut noch komen woat.