Waut sajcht de Schreft doatoo?

Jefäadeljen Sport – Wurscht du die sellen en Jefoa jäwen?

“BIE DISE TIET DOONEN VÄL VON ONS MEA AUS BLOOS TOOKJIKJEN, WIE DOONEN NU SELFST MET EENEN FAULSCHORM VON ÄARPLÄNS RUTSPRINJEN, AUN EENEN STRANK VON HUAGE BOAJ RAUFKLAUTREN, MET KJLIENE BOOTS VON EENE WOTAFAUL RAUFJOAGEN OODA MET HEIFESCH TOOP SCHWAMEN” (DE WILLOW GLEN RESIDENT POST).

WAUT dise Post sajcht, wiest, waut vondoag dän Dach emma dolla Mood woat: Emma mea Menschen jleichen daut, jefäadeljen Sport to spälen. Dee doonen uk jefäadelje Sachen met Beisikjels, Foot-Woachkjes (Skateboards) ooda wan dee oppem Schnee von Boaj raufrutschen. No de Tietschreft Time no, wellen de Menschen doawäajen soone jefäadelje Sachen doonen, wiels dee doaderch wellen äare Angst äwakomen un een intressauntet Läwen haben, waut nich toom enoolent woaren es.

Oba wäajens soon jefäadelja Sport emma dolla Mood woat un de Menschen uk jeweeneljen Sport opp eene jefäadelje Wajch moaken, komen emma mea doabie tosplät. Aune 1997 musten enne Stäts mea Menschen nom Hospitol jefieet, wäajens dee Ojjlekjs hauden biem Sport. Biejlikj 33 Prozent mea wäajens Skateboard foaren, 31 Prozent mea wäajens Snowboard foaren un 20 Prozent mea wäajens Boaj klautren. Un eenjemol stoawen de Menschen uk. Deejanje, waut soone Sports jleichen, weeten goot daut daut jefäadlich es. Eene Fru, waut soonen Sport jleicht, wua se opp twee Bräda von eene Boaj met Schnee raufjoagen, sajcht: “Ekj hab dän Doot emma ver de Uagen.” Un eena, waut utjelieet haft toom Snowboard foaren, sajcht, wan “du die nich velazt, dan deist du nich jenuach eewen”.

Nu, daut wie jeseenen haben, woo jefäadlich soon Sport es, sull een Christ dan bie soone Sachen metmoaken? Woo kaun de Schreft ons halpen, daut to entscheiden? Toom dise Froagen beauntwuaten, well wie mol seenen, woo wieetvoll daut Läwen fa Gott es.

Woo denkjt Gott äwa daut Läwen?

No de Schreft no es Jehova Gott “dee, von däm aulet Läwen kjemt” (Psalm 36:10, PB). Hee muak ons un jeef ons uk välet toom daut ons daut Läwen kaun scheen gonen (Psalm 139:14; Aposteljeschicht 14:16-17; 17:24-28). Daut es kloa to seenen, daut hee haben well, daut wie no daut Läwen, waut hee ons jeef, sea oppaussen sellen. Hee jeef daut Volkj Israel Jesazen toom wiesen, woo wichtich daut Läwen fa am es.

Daut jeef uzhent Jesazen doafäa, woo de Israeliten daut Läwen von aundre achten sullen. Wan een Israelit dise Jesazen nich nokjeem un derch daut een Mensch todood kjeem, wort dänjanjen bestroft. Biejlikj must een Israelit eenen Tun rom de Kaunt von daut plaute Dak von sien nieet Hus buen. Wan hee daut nich deed un doa wäa rauffoll un storf, dan wia dee, dän daut Hus jehieed, veauntwuatlich doafäa (5. Mose 22:8). Wan een Boll onverhofs eenen Mensch dootmuak, dan wia de Ieejendeema von dän Boll nich veauntwuatlich doafäa. Oba waut, wan de Israelit wist, daut hee eenen dollen Boll haud, un aundre am daut uk aul jesajcht hauden, un dee dän doawäajen oba nich bemuak? Wan de Boll dan wäm dootmuak, wia de Israelit veauntwuatlich doafäa un kunn mau rajcht dootjemoakt woaren (2. Mose 21:28-29). Jehova jeef de Israeliten soone Jesazen, wäajens daut Läwen sea wieetvoll es fa am un hee wull haben, daut de Menschen no daut oppaussen sullen.

True Deena von Gott kunnen derch dise Jesazen vestonen, daut et uk krakjt soo orrajcht wia, sien ieejnet Läwen opp Spell to saten. En eene biblische Jeschicht kjenn wie biejlikj läsen, woo David mol darscht no “Wota ut däm Borm waut bie daut Stautspuat en Betlehem” wia. To jane Tiet wia Betlehem oba von de Filista beloagat. Aus dree von David siene Soldoten David sienen Wunsch hieeden, brochten dee sikj derch de Filista äa Loaga derch, bat no Betlehem un schapten Wota von dän Borm un brochten David daut. Waut deed David dan? Hee wull daut opp kjeene Wajch drinkjen. Enne Städ daut goot hee daut oppe Ieed. Hee säd: “Doa mucht Gott mie von wajchhoolen, daut ekj soont doo, wiels daut wudd je jrod soo sennen aus wan ekj daut Bloot von dise Mana drunk, waut äa Läwen opp Spell saden om dit Wota to holen” (1. Chronik 11:17-19, PB). David wull daut nich haben, daut siene Mana sullen äa Läwen en Jefoa brinjen toom am waut jäwen, waut am jankad.

Jesus wull sien Läwen uk nich opp Spell saten. Aus de beesa Fient am vesocht un säd, hee sull vom Tempel raufsprinjen toom seenen, aus de Enjel am wudden raden, säd Jesus to dän Fient: “Du saust Gott dienen Harn nich vesieekjen” (Matäus 4:5-7, PB). Jo, David un Jesus wisten beid, daut Gott daut nich haben wull, daut see jefäadelje Sachen deeden, waut äa Läwen ooda aundre äa Läwen opp Spell sad.

Wan wie dise Biespels em Denkj hoolen, dan denkj wie veleicht: “Woo kjenn wie weeten, woon Sport jefäadlich es? Un wäajen eenje Menschen mau rajcht jeweeneljen Sport sea hunjsch ooda jefäadlich spälen, woo kjenn wie dan weeten, woo daut secha es to spälen?”

Es daut de Jefoa wieet?

Toom eene goode Entscheidunk moaken, sell wie jeneiw äwalajen, waut von Sport wie spälen wellen. Wie kjennen biejlikj äwalajen: Woo foaken velazen de Menschen sikj bie disen Sport? Sie ekj jenuach utjelieet doafäa un hab ekj aule Sachen toom mie beschitzen, waut daut brukt, om nich to veojjlekjen? Waut kunnen de Foljen sennen, wan ekj wudd faulen ooda orrajcht hupsen ooda wan miene Sechaheitssachen nich rajcht schauften? Wudd ekj mie bloos een beskje velazen ooda wudd ekj mie kjennen sea velazen ooda mau rajcht stoawen?

Wan een Christ met Fliet jefäadeljen Sport spält, kunn am daut von Jehova aufbrinjen un hee wudd nich een goodet Biespel sennen fa aundre en de Vesaumlunk (1. Timotäus 3:2, 8-10; 4:12; Titus 2:6-8). Mau rajcht wan wie bloos Scheengonen haben, sell wie emma aun Jehova denkjen un woo wichtich daut Läwen fa am es.