Du kaust opphieren met schmieekjen!

NU ES de Tiet jekomen: “Sie stoakj un doo daut” (1. Chronik 28:10, JHF). Waut kaust du noch doonen, daut du daut uk secha woascht kjennen?

Sat dän Dotem faust. The U.S. Department of Health and Human Services rot deejanje too, waut doa wellen opphieren met schmieekjen, daut wan dee sikj ieescht sent eenich jeworden, daut see nich mea wellen schmieekjen, dan sellen dee nich lenja aus twee Wäakj vebiegonen loten, bat dee opphieren met schmieekjen. Wuarom? Wiels dan woaren dee noch Lost doatoo haben. Tieekjen daut oppem Kalenda, woon Dach daut es, un saj diene Frind daut un dan hool die doaraun, mau rajcht wan sikj doa uk Sachen em Läwen endren.

Moak die eene Koat. Du wurscht doa kjennen soont noppschriewen, waut die halpt, stoakj to bliewen soo aus dit:

● De Uasoak, wuarom du west opphieren met schmieten

● Een Fonnumma von dänjanjen, waut du fonen kaust, wan die daut opp eenst sea foddat

● Iedeeen, waut die halpen, die eenich to bliewen, soo aus de Bibelvarzhen Galata 5:22-23

Droag dee Koat emma met un läs dee mieremol dän Dach, mau rajcht wan du aul oppjehieet hast met schmieekjen. Nemm dee Koat emma to Help, wan die daut foddat.

Moak die reed. Ea dee Dach kjemt, wua du west opphieren met schmieekjen, doo aul Jewanheiten endren, wua du emma schmieekjen deetst. Wan du biejlikj fuaz nom oppstonen schmieekjen deetst, dan doo daut nu eene Stund lota ooda doarom. Wan du verem äten ooda nom äten emma schmieekjen deetst, dan doo daut nu to eene aundre Tiet. Go soone Städen utem Stich, wua aundre schmieekjen. Un wan du auleen best, dan saj emma wada opp ludes toom daut eewen: “Nä, dankscheen. Ekj hab oppjehieet met schmieekjen.” Wan du daut soo aus dit deist, dan woascht du die aul doaropp reedmoaken, daut wan dee Dach ieescht kjemt, daut du west opphieren met schmieekjen. Un daut woat die uk denkjen halpen, daut du werkjlich kaust een Mensch woaren, waut nich schmieekjt.

Fang doamet aun. Wan dee Dach noda kjemt, wua du west opphieren met schmieekjen, dan see doano, daut du Sachen hast soo aus Jalmäaren, Schiekle, Näten un soo wieda. Halp diene Frind un Famielje uk noch eemol denkjen, woonen Dach du west opphieren un saj dee daut uk, woo dee die unjastetten kjennen. Un ver dän Dach, wua du west opphieren, doo aules aufstonen, waut du hast. Daut kunnen Auschkomkjes sennen, Leitasch ooda waut aundret, waut die daut kunn schwoa moaken, soo aus de Zegoaren, waut bie dien Hus romligjen ooda enne Koa sent ooda enne Fupp ooda oppe Oabeit. Eena woat nich soo leicht wada aunfangen to schmieekjen, wan eena eenen Frint ieescht saul no eene Zegoa froagen ooda dee foaren kjeepen, aus wan eena dee wudd tus romligjen haben! Bäd Gott uk wieda no Help, besonda nodäm daut du diene latste Zegoa oppjeschmieekjt hast (Lukas 11:13).

Een deel Menschen haben kunt de Zegoa tochloten, waut soo aus een faulscha, laustja Frint wia. Du kaust daut uk! Du woascht die jesunda un väl loosjelotna feelen.

[Bilt]

Droag dee Koat emma met un läs dee mieremol dän Dach