Een faulscha Frint

Du hast en diene Jugentjoaren eenen “Frint” jefungen. Un wäajen dän Frint späat sikj die daut mau rajcht soo, daut du aul jrata best. Wäajen dän jleichen aundre die uk dolla. Un wan du waut schwoaret derchjeist, dan kaust du emma no dän Frint gonen toom die daut “leichta” moaken. Un wan doa irjentwaut oppkjemt, dan velatst du die opp dän.

Oba met de Tiet sitst du dän siene schlajchte Sieden. Hee meent, daut hee emma met die toop es mau rajcht opp soone Städen, wua die daut rajcht jesajcht em Wäaj es. Un wan du die wäajen dän uk jrata feelst, haft dee die oba de Jesuntheit jeschot. Un dan haft dee noch von dien Jelt jestolen.

Du hast nu aul jeprooft, dän Frint loostowoaren, oba dee lat die nich toch. Dee es soo to sajen aul dien Wieet jeworden un nu wenschst du die, daut du dän kjeenmol hautst kjanen jelieet.

SOO haft väl Schmieekja daut aul jegonen met äare Zegoaren. Eene Fru, waut Earline heet un aul 50 Joa jeschmieekjt haft, sajcht: “Schmieekjen halpt mie dolla, aus eenen aundren Frint to haben. Eenjemol wia daut nich bloos een oola Frint, oba mien eensja Frint.” Earline wort en, daut de Zegoa een faulscha Frint wia un uk een jefäadelja. See kaun sikj krakjt soo jefeelt haben, aus doa bowen aul von jerät wort. Bloos eenatlei wia aundasch: Aus see ieescht lieed, daut Gott schmieekjen nich jleicht un daut et dän Kjarpa schoden deed, dan hieed see opp (2. Korinta 7:1).

Een Maun, waut Frank heet, wort sikj uk eenich, opptohieren met schmieekjen, daut hee Gott jefaulen kunn. Oba een poa Doag nodäm daut hee siene latste Zegoa oppjeschmieekjt haud, kroop hee unjarem Hus un socht no oppjeschmieekjte Zegoaren. “Doa jroz dakjt mie daut op”, säd Frank. “Ekj kroop mie doa opp Kjneees rom un socht doa oppe Ieed no oole Zegoaren. Daut äakjeld mie un ekj schmieekjt kjeenmol mea.”

Wuarom es daut soo schwoa, met schmieekjen opptohieren? Forscha haben miere Jrind doafäa jefungen: (1) Tobbak kaun eenen Mensch krakjt soo sea fodren aus Droggs. (2) Wan eena daut Nikotin, waut enne Zegoaren es, oppholt, dan dieet daut mau säwen Sekund, bat et bat daut Vestaunt es. (3) Een Mensch es foaken soo faust aun Zegoaren, wäajen daut uk met Frind to doonen haft ooda met äten ooda drinkjen ooda wan eena daut schwoa haft un soo wieda.

Waut Earline un Frank beläft haben, haft ons jewäsen, daut et mäajlich es, met dise schlajchte Jewanheit opptohieren. Wan du schmieekjen deist un proofst opptohieren, dan läsd dise näakjste Artikjels. Veleicht kaun daut krakjt daut jroz sennen, waut die fält toom een nieet Läwen aunfangen.