Stoakj dienen Wellen

“Eena mott sikj opp iernst eenich sennen, daut eena well opphieren met schmieekjen. Dit es daut wichtichste, waut Menschen jeholpen haft” (“Stop Smoking Now!”).

WAN du west opphieren met schmieekjen, dan motst du oppet weinichste eenen stoakjen Wellen haben. Woo kaust du soonen stoakjen Wellen kjrieen? Denkj doa mol aun, woo sea daut wudd toom gooden sennen, wan du wurscht opphieren met schmieekjen.

Du woascht Jelt spoaren. Een Pakje dän Dach kaun dusende Dola daut Joa sennen. “Ekj haud doa kjeenmol aun jedocht, woo väl Jelt ekj verieekjat haud” (Gyanu, von Nepaul).

Dien Läwen woat väl scheena sennen. “Von dan, aus ekj opphieed met schmieekjen, wort mien Läwen bloos emma bäta” (Regina, von Sied-Afrika). Wan Menschen opphieren met schmieekjen, dan kjennen dee bäta rikjen uk schmakjen. Un dan kjrieen dee uk väl mea Lost un dee fangt aun, väl jesunda to loten.

Diene Jesuntheit kaun sikj vebätren. “Wan een Mensch opphieet met schmieekjen, dan woat dee sikj fuaz väl bäta feelen, krakjt endoont en waut von Ella dee es” (The U.S. Centers for Disease Control and Prevention).

Du woascht tofrädna sennen met die selfst. “Ekj hieed opp met schmieekjen, wäajen ekj nich haben wull, daut Tobbak sull mien Wieet sennen. Ekj wull selfst mienen Kjarpa kontrollen” (Henning, von Dänemark).

Daut woat fa diene Famielje un Frind goot sennen. “Schmieekjen . . . es nich jesunt fa dee, waut rom die sent. . . . Menschen haben rutjefungen, daut dusende Menschen jieda Joa stoawen aun Lungenkjräft un Hoatkrankheit, wäajen dee sikj aundre äaren Ruak enholen” (American Cancer Society).

Gott woat daut jefaulen. “Leewe Frind, … well wie ons nu von aules reinjen waut Kjarpa un Jeist besudelt” (2. Korinta 7:1, PB). Jie sellen “junen Kjarpa Gott … jäwen aus een heiljet, läwendjet Opfa, daut Gott aunnämen kaun” (Reema 12:1, PB).

“Aus ekj daut enwort, daut Gott daut nich jleicht, wan wie onsen Kjarpa enschwienen, dan wort ekj mie eenich, opptohieren met schmieekjen” (Sylvia, von Spaunien).

Bloos wellen opphieren met schmieekjen, rieekjt foaken nich too; eenjemol bruck wie uk noch de Help von Frind ooda Famielje. Woo kjennen dee die halpen?