Wuarom jeft daut soo väl Hauss?
Wuarom jeft daut soo väl Hauss enne Welt? Toom daut utfinjen, mott wie weeten, waut Hauss es, wuarom Menschen aunfangen, aundre to haussen un wuarom daut aulawäajen Hauss jeft.
Waut es Hauss?
Hauss es, wan wäa eenen Mensch ooda eene Grupp sea schlajcht lieden kaun un sea spietich es äwa dee. Daut es oaja aus mol een Stootskje doll äwa wäm sennen.
WUAROM FANGEN MENSCHEN AUN, AUNDRE TO HAUSSEN?
Daut haft väl Jrind. Menschen woaren nich onbedinjt jehaust, wäajen waut dee doonen oba foaken wäajen wäa dee sent. Eenje jleewen dan, daut sent beese Menschen, dee wellen aundre waut aundoonen, dee kjennen nich bätre Menschen woaren ooda dee talen dee fa läaja. Daut Menschen aundre haussen, haft foaken doamet to doonen, daut an selfst waut schlajchtet aunjedonen wort ooda daut see orrajcht behaundelt worden.
WUAROM JEFT DAUT AULAWÄAJEN HAUSS?
Eena kaun aundre haussen, onen dee jeemols kjanen jelieet to haben. Toom Biespel kaun eena leicht soo denkjen aus eenem siene Famielje ooda Frind – onen daut entowoaren. Un soo passieet daut haustich, daut eene gaunze Häad Menschen eene aundre Grupp haussen deit.
Wan wie utfinjen, woo leicht Hauss sikj vespreet, es ons daut kloa, wuarom soo väl Menschen Hauss en sikj haben. Oba toom met dän Hauss oppe gaunze Welt een Enj moaken, mott wie utfinjen, woo daut met dän Hauss mol aunfunk. Doabie halpt ons de Schreft.
DE SCHREFT SAJCHT ONS, WOO DAUT MET DÄN HAUSS AUNFUNK
DE HAUSS KJEEM NICH VON DE MENSCHEN HÄA. Daut funk doamet aun, daut een Enjel em Himmel sikj jäajen Gott stald. Hee woat Soton, de beesa Fient, jenant un “hee es von Aunfank aun een Merda jewast”. Hee haft bat nu doaropp jeschauft, daut et mea Hauss un Fientschoft enne Welt jeft, “wiels hee een Lieeja es un de Voda äwa aule Läajes” (Johanes 8:44; 1. Johanes 3:11-12). De Bibel sajcht, hee es bees, doll un fientlich jesonnen (Hiob 2:7; Openboarunk 12:9, 12, 17).
ONVOLKOMNE MENSCHEN KJENNEN AUNDRE LEICHT HAUSSEN. De ieeschta Mensch, Adam, deed Soton no. Doawäajen haben aule Nokomen von Adam Sind un Onvolkomenheit metjeorwen (Reema 5:12). Adam sien ieeschta Sän Kain brocht sienen Brooda Abel om, wiels hee dän haust (1. Johanes 3:12). Daut stemt, väl Menschen haben Leew un Metjefeel, oba wiels wie de Sind metjeorwen haben, woa wie leicht ekjich, aufjenstich un stolt. Un doaderch jeft daut noch mea Hauss (2. Timotäus 3:1-5).
AUNDRE SCHLAJCHT LIEDEN KJENNEN BRINJT HAUSS. Wiels de Menschen en onse Welt emma weinja Metleet haben, to aundre schlajcht enjestalt sent ooda dee mau rajcht schlajchtet aundoonen, jeft daut emma mea Hauss. Väl Menschen kjennen aundre nich lieden, moaken eenen Unjascheet manke Menschen, sajen aundre domm ooda sent domm to dee un doonen dee Schoden aun. Daut sull ons nich wundren, wiels de Bibel sajcht, daut “de gaunze Welt vom beesen beharscht woat”, aulsoo von dän Soton (1. Johanes 5:19).
Oba de Bibel sajcht ons nich bloos, waut de Uasoak fa dän Hauss es, oba uk, waut eena doajäajen doonen kaun.
