Rajcht ooda orrajcht? De Schreft kaun die halpen
De Schreft haft millionende Menschen bie veatlei sea jeholpen.
1. Ehestaunt
De Menschen denkjen sea veschieden äwa dän Ehestaunt un waut fa eenen gooden Ehestaunt needich es.
WAUT DE SCHREFT SAJCHT: “Jie Mana sellen june Frues jrod soo goot sennen, aus junt selfst, un de Frues sellen soo sorjen, daut see äare Mana achten” (Efeesa 5:33).
WAUT DAUT BEDIET: Gott weet krakjt, waut doa fa eene Lied needich es, daut dee kjennen schaftich sennen, wiels hee haft daut met dän Ehestaunt enjerecht (Markus 10:6-9). Eene Lied sent schaftich, wan jieda eena von dee doaropp schauft, daut et em Ehestaunt jlei rant, enne Städ bloos aun sikj to denkjen. Wan een Maun siene Fru leeft, woat hee sikj goot om dee kjemren un dee uk fein behaundlen. Un eene Fru, waut äaren Maun achten deit, woat dän unjastetten un leeftolich to dän räden.
DE BIBLISCHA ROT HALPT WERKJLICH: Quang un Thi von Vietnam hauden nich eenen gooden Ehestaunt. Quang wia foaken nich leeftolich to siene Fru. Hee sajcht: “Ekj jeef doa nuscht om rom, woo Thi sikj feeld un wia foaken domm to ar.” Thi wull sikj scheeden loten. See sajcht: “Mie späad sikj daut soo, daut ekj nich mea opp am vetruen kunn ooda dän achten.”
Met de Tiet lieeden Quang un Thi, waut de Schreft sajcht un woo see kunnen Efeesa 5:33 en äaren Ehestaunt nokomen. Quang vetalt: “Dis Bibelvarsch holp mie to seenen, woo wichtich daut es, leeftolich to sennen, un daut ekj Thi wiesen mott, daut ekj ar leew un waut om äare Jefeelen romjäw un uk fa ar sorjen well. Wan ekj daut soo aus dit doo, leeft un acht see mie noch mea.” Un Thi sajcht: “Wan ekj mie dolla aunstrenj, Efeesa 5:33 notokomen un mienen Maun Respakjt wies, dan wiest hee mie uk dolla Leew un ekj feel mie beschizt un secha.”
Wan du mea äwa dän Ehestaunt läsen west, dan läs daut Woat waka! Num. 2 2018 met daut Teema “12 Sachen fa een scheenet Famieljenläwen” opp jw.org.
2. Woo wie met aundre omgonen
De Menschen behaundlen aundre foaken schlajcht, wiels dee von een aundret Launt ooda Volkj sent, aundasch loten, eene aundre Jemeent haben ooda biejlikj homosexuell sent.
WAUT DE SCHREFT SAJCHT: “Jäft aule Menschen Respakjt” (1. Petrus 2:17).
WAUT DAUT BEDIET: De Schreft lieet nich, daut wie sellen Menschen haussen, waut von een aundret Launt ooda Volkj sent ooda homosexuell sent. Dee lieet, daut wie aule Menschen sellen Respakjt wiesen, endoont von wua dee häastaumen ooda aus dee rikj ooda oam sent (Aposteljeschicht 10:34). Mau rajcht wan wie nich met daut äwareenstemmen, waut dee jleewen ooda doonen, mott wie dee doawäajen leeftolich un respakjtvoll behaundlen (Matäus 7:12).
DE BIBLISCHA ROT HALPT WERKJLICH: Eenen Maun, waut Daniel heet, hauden se jelieet, daut de Menschen von Asien eene Jefoa wieren fa sien Launt. Doawäajen kjrieech hee eenen Hauss fa aul dee Menschen, waut von Asien staumden un deed dee foaken ver aundre tonuscht moaken. Daniel sajcht: “Fa mie wia daut nuscht Schlajchtet, wiels ekj deed je bloos fa mien Launt strieden. Ekj docht nich mol, daut et kunn orrajcht sennen, soo to sennen.”
Dan lieed Daniel, waut de Schreft sajcht. Hee sajcht: “Ekj must mien Denkjen gaunz endren. Ekj must daut lieren, de Menschen soo to seenen, aus Gott dee sitt: fa am sent aule Menschen äwareen, endoont wua dee häakomen.” Woo jeit Daniel daut nu, wan hee Menschen bejäajent? Hee sajcht: “Nu jleich ekj aule Sorten Menschen un mie es daut endoont, wua dee häastaumen. Un ekj hab mau rajcht goode Frind von aulawäajen oppe Welt.”
Wan du mea weeten west, dan läs daut Woat waka! Num. 3 2020 met daut Teema “Woaren de Menschen emma eenen Unjascheet moaken?” opp jw.org.
3. Jelt
Een deel Menschen wellen rikj woaren, soo daut dee kjennen schaftich sennen un een bätret Läwen haben.
WAUT DE SCHREFT SAJCHT: “Soo aus Jelt eenem Schutz jeft, soo beschizt uk de Weisheit. Daut Väadeel oppe lenjd es, daut de Weisheit däm Weisen daut Läwen behelt” (Liera 7:12).
WAUT DAUT BEDIET: Ons fält daut aun Jelt. Oba Jelt es nich de Garantie doafäa, daut wie emma woaren schaftich sennen un een scheenet Läwen haben (Spricha 18:11; 23:4-5). Bloos wan wie dän weisen Rot von Gott nokomen, waut wie enne Schreft finjen, woa wie kjennen werkjlich schaftich sennen un eene sechre Hopninj haben (1. Timotäus 6:17-18; 6:19, JHF).
DE BIBLISCHA ROT HALPT WERKJLICH: Cardo, een Maun en Indoneesien, schauft sea doaropp, rikj to woaren. Hee sajcht: “Ekj haud aules, waut de Mieeschte sikj wenschen. Ekj kunn reisen un mie diere Sachen, Koaren un Hiesa kjeepen.” Oba met eemol endad sikj daut. Hee sajcht: “Ekj wort unjagonen un aul daut Jelt, wuafäa ekj joarenlank jerakat haud, wia eefach wajch.” Cardo sajcht noch: “Ekj schauft mien gaunzet Läwen lank doaropp, rikj to sennen, oba ekj must mie sea aunschmäaren doamet. Ekj haud nuscht mea un feeld mie wieetloos.”
Dan funk Cardo aun, dän Rot ut de Schreft notokomen. Hee wia nich mea doano ut, rikj to woaren un sikj een deel Sachen auntogonen, oba met weinja tofräd to sennen. Hee sajcht: “Nu feel ekj mie opp iernst rikj, wiels ekj Gott toom Frint hab. Ekj kaun jieda Nacht sondasorj schlopen un sie opp iernst schaftich.”
Wan du mea doaräwa weeten west, waut de Schreft äwa daut Jelt sajcht, dan läs dän Artikjel “Kjennen Schoolen un Jelt die een bätret Läwen vesechren?” em Woaktorm Num. 3 2021 opp jw.org.
4. Sex
Wan daut om Sex jeit, denkjen de Menschen sea veschieden doaräwa, waut rajcht un orrajcht es.
WAUT DE SCHREFT SAJCHT: “Jie sellen . . . junt von sintelje Sorten Sex wajchhoolen. Jieda eena von junt saul weeten, woo hee sienen ieejnen Kjarpa kontrollen kaun, met Heilichkjeit un Iea, un nich met bejieeje, onbandje Lost, soo aus daut bie de Velkja es, waut Gott nich kjanen” (1. Tessalonicha 4:3-5, NW).
WAUT DAUT BEDIET: Enne Schreft finj wie Räajlen äwa Sex. Bie de Wieed “sintelje Sorten Sex” es met en, de Ehe bräakjen, sikj fa Jelt veläwen, Sex tweschen soone, waut nich befriet sent, ooda Mana met Mana un Frues met Frues un Sex met Tieren (1. Korinta 6:9-10). Sex es een Jeschenkj von Gott, bloos fa eenen Ehemaun un dän siene Fru (Spricha 5:18-19).
DE BIBLISCHA ROT HALPT WERKJLICH: Eene Fru en Australien, waut Kylie heet, sajcht: “Aus ekj onbefriet wia, docht ekj soo, daut wan ekj Sex haud, dan wudd ekj mie jeleeft un secha feelen. Oba daut wia krakjt daut Jäajendeel. Ekj feeld mie nich jeleeft un onsecha.”
Lota lieed Kylie, waut de Schreft äwa Sex sajcht un see kjeem daut uk no. See sajcht: “Ekj kaun vestonen, daut Gott ons derch siene Räajlen fa Schlajchtet un Weedoag beschitzen well. Nu läw ekj soo, aus Jehowa daut haben well. Ekj sie befriet un feel mie jeleeft un secha. Mien Hoat wudd aul sennen soo foaken tweijebroaken, wan ekj dän Rot ut de Schreft nich wia nojekomen!”
Wan du mea weeten west, dan läs dän Artikjel “Waut sajcht de Schreft äwa onbefriet toopläwen?” opp jw.org.
Ons Schepfa halpt ons vestonen, waut rajcht un waut orrajcht es. Daut notokomen, waut hee sajcht, es veleicht nich emma leicht, oba daut loont sikj. Wan wie daut nokomen, kjenn wie ons doaropp veloten, daut wie oppe Lenjd emma woaren schaftich sennen.
