Stierns dieden es eene Sort Woasajarie, wua de Stierns, de Mon un de Planeeten minkj waut met daut Läwen von de Menschen oppe Ieed to doonen haben. Stierndieda jleewen, daut doano wua de Mon ooda de Stierns aun dän Dach sent, wua eena jebuaren es, doano woat to seenen sennen, woo eena es un waut en eenem sien Läwen passieren woat.

Stierns dieden kjemt aul von de ieeschtemmasche Staut Babel un daut es noch emma Mood. Aune 2012 fruagen se Menschen enne Stäts, waut see äwa Stierndiedarie dochten un eena von dree Menschen säd, daut Stierns dieden eene Sort Wissenschoft wia un 10% von dee säden, daut daut Wissenschoft wia, wua eena sikj opp veloten kaun. Oba es daut werkjlich soo? Nä. Well wie mol seenen, wuarom nich.

• De Planeeten un de Stierns kjennen nuscht doonen, waut daut Läwen von de Menschen veendren kaun.

• Stierndieda sajen Sachen foaken soo verut, daut daut fa aulem wudd paussen kjennen.

• Stierndieda stetten äa verutsajen opp de ieeschtemmasche Iedee, daut de Planeeten romme Ieed dreien. Oba en Werkjlichkjeit dreien de Planeeten romme Sonn.

• Waut veschiedne Stierndieda äwa dänselwjen Mensch verutsajen, es nich äwareen.

• Stierndieda sajen daut jeft 12 veschiedne Stiernbilda. Doano woonen Dach eena jebuaren es, woat eenem sien Läwen von een jewesset Stiernbilt bestemt. Oba met de Tiet haft sikj de Städ een bät jeendat, wua de Ieed em Weltaul es, un doawäajen paussen dise Stiernbilda nich mea met de Dotems toop, waut Stierndieda sajen.

Doa woat jesajcht, daut Stiernbilda krakjt sajen, woo een Mensch daut haft. Oba wan twee Menschen uk aun dänselwjen Dach jebuaren sent, haben dee daut doawäajen gaunz veschieden. Aun woonen Dach eena jebuaren es, haft nuscht doamet to doonen, woo eena daut haft. Oba Stierndieda rechten aundre no äare Iedeeen, enne Städ Menschen soo to seenen, aus dee werkjlich sent. Wudd daut werkjlich rajcht sennen?

Aul ieeschtemma wieren de Menschen to Woasajarie nieschierich. Eenje Woasaja proowden Sachen to dieden derch daut bennaschte von een Tia ooda von eenen Mensch siene Doarm. Ooda dee kjikjten doano, woo een Hon Kjieena pikjen deed. Aundre kjikjten no daut Grus, waut doa enne Tauss Koffe ooda Tee jebläwen wia. Vondoag dän Dach brucken dee wesse Koaten, Glauskuagels, Kjlaz un aundret toom wäm waut verutsajen. Oba kaun eena sikj opp soont werkjlich veloten? Nä. Well wie mol seenen wuarom nich.

Wan Woasaja äwa deeselwje Sach waut verutsajen, paust daut nich toop – endoont aus dee dautselwje brucken ooda waut veschiednet. Oba rajcht jesajcht, wudd daut sellen tooppaussen. Biejlikj wan eena twee Woasaja dautselwje frajcht un dee brucken uk deeselwje Koaten toom daut utlajen, sajen dee oba gaunz waut veschiednet. Daut wiest, daut eena sikj nuscht opp dee veloten kaun.

Woo Woasaja waut verutsajen ooda wuarom dee daut doonen, wiest aul, daut doa nich opp to veloten es. Eenje sajen, Woasaja brucken Koaten un Glauskuagels bloos toom väajäwen, om waut veruttosajen, oba en Werkjlichkjeit kjikjen dee doano, woo de Menschen sikj vehoolen. Biejlikj een Woasaja, waut daut sea fein vesteit, wudd die een deel Froagen stalen un wudd krakjt kjikjen, woo du die vehelst toom seenen, waut hee sikj äwa die dietlich moaken kunn. Un met dit wudd de Woasaja sikj soo doonen, aus wan daut aules von am kjeem un hee aul aules äwa die wist. Soo proowen de Woasaja de Menschen opp äare Sied to kjrieen. Un eenje haben doaderch sea väl Jelt enjenomen.

Wan daut soo wia, aus Stierndieda ooda Woasaja sajen, dan wudd daut meenen, daut aules en ons Läwen aul verutbestemt wia. Oba es daut soo? De Schreft sajcht, daut wie selfst utwälen kjennen, waut wie jleewen ooda doonen. Un dee sajcht uk, daut ons Läwen doano sennen woat, waut wie entscheiden (Josua 24:15).

Jehova Gott a siene Deena haben noch eenen Grunt, wuarom dee nuscht met Stierndieda un Woasaja to doonen haben. Un daut es wiels Gott aules, waut doamet to doonen haft, fa sea schlajcht ooda oppscheislich talt. En de Schreft sajcht daut: “Kjeena saul derch Tieekjens sajen, waut noch emol woaren woat, ooda von Hakjsen forschen, met de Jeista räden, een Fluch opp eenen aundren saten, ooda von vestorwne Menschen no Rot froagen. Soont sent bie däm HARN aules oppscheiselje Dinja” (5. Mose 18:10-12).