De goode Norecht von Gott sien Kjennichrikj woat nu äwa de gaunze Welt jeprädicht, krakjt soo aus Jesus säd (Matäus 24:14). Daut Buak Daniel wiest, daut dit Rikj Gott siene Rejierunk es. En Kapitel 2 rät daut von eenje stoakje Rejierungen, ooda Kjennichrikjs, waut von daut ieeschtemmasche Babel aunfungen bat onse Tiet. Daniel 2:44 sajcht verut, waut noch komen woat:

“Gott em Himmel [woat] een eewjet Rikj oppstalen. Kjeena woat daut jeemols äwamajchtjen. Daut woat aule aundre Kjennichrikjs en Bieta bräakjen un venichten, oba woat selfst opp emma bliewen.”

Dise un uk aundre biblische Profezeiungen wiesen, daut aule menschelje Rejierungen nich mea sennen woaren, oba bloos noch Gott siene Rejierunk. Dan woat oppe Ieed aules frädlich un ordentlich sennen. Woo woat daut Läwen dan krakjt sennen? Hia sent eenje besondre Vespräakjungen, waut sikj boolt erfellen woaren.

• KJEEN KJRICH MEA

  Psalm 46:10: “[Gott,] dee en aule Welt met aulem Kjrich een Enj moakt; dee de Boages tweibrakjt un de Spiessen tweischleit un de Kjrichswoages met Fia vebrent.”

  Denkj mol han, woo fein daut wudd sennen, wan de Menschen äa Jelt un daut, waut dee weeten, doatoo brucken wudden toom de Menschen halpen, enne Städ fa Kjrichsjereetschoft toom dee dootmoaken! Wan Gott sien Kjennichrikj ieescht rejieet, dan woat werkjlich kjeen Kjrich mea sennen.

• KJEENE KRANKHEITEN MEA

  Jesaja 33:24: “Kjeena von june Menschen woat sajen: ‘Ekj sie nich jesunt’”.

  Denkj mol han, woo scheen daut woat sennen, wan daut kjeene Hoattrubbels, Kjräft, Malaria ooda aundre Krankheiten jäwen woat. Ons woat daut nich mea aun Hospitols un Medizien fälen. De Menschen oppe Ieed woaren dan aula gaunz jesunt sennen.

• KJEENE HUNGASCHNOOT MEA

  Jesaja 30:23: “Daut Sot, waut jie opp daut Launt jeseit haben, woat hee met Räajen wesren, soo daut jie goot to äten haben woaren, von daut waut jun Aka junt drajcht.”

  Doa woat fa jiedrem eenem jenuach Äten oppe Ieed sennen. Kjeena woat mea hungren brucken ooda prost to äten haben.

• KJEEN LIEDEN, WEEDOAG OODA DOOT MEA

  Openboarunk 21:4: “Gott woat an aule Tronen von de Uagen weschen. Doa woat kjeen Doot ooda Trua ooda Hielen ooda Weedoag mea sennen, wiels waut verhäa wia, es veschwungen.”

   Daut bediet, daut wie woaren fa emma kjennen em Paradies oppe Ieed läwen un uk volkomen sennen! Daut es, waut ons leeftolja Schepfa, Jehova Gott, vesproaken haft.

Hieet sikj daut too scheen, daut daut soo kunn sennen? De mieeschte hieet sikj de Vespräakjungen von de Bibel scheen, oba väle kjennen sikj daut nich väastalen, mol eewich to läwen. Daut es uk nich toom wundren, wäajen daut haft noch kjeen Mensch beläft, daut dee ons daut sajen kaun, woo soont es.

De Menschen sent noch emma aun de Sind un Doot jebungen jewast. Dee haben daut noch emma schwoa jehaut, haben musten sea lieden un schlemmet derchmoaken. Un doawäajen jleewen väle, soo mott daut Läwen sennen. Oba ons Läwen es lang nich soo, aus ons Schepfa, Jehova Gott, daut fa de Menschen wull.

Daut wie ons kjennen secha sennen, daut sikj aules woat soo romnämen, aus Gott vesproaken haft, haft hee dit loten en sien Wuat oppschriewen: “Daut [waut ekj jesajcht hab] woat nich ladich no mie trigjkomen; daut woat daut doonen, waut ekj haben wull, un daut doonen, wuatoo daut jejäft es” (Jesaja 55:11).

De Schreft sajcht, daut Jehova Gott “nich lieejen kaun” (Titus 1:2). Hee haft ons soo väl scheenet vesproaken, un doawäajen wudd daut goot sennen, äwa dise Froagen notodenkjen: Kunn daut werkjlich mäajlich sennen, fa emma em Paradies oppe Ieed to läwen? Waut mott ekj doonen, daut ekj daut beläwen kaun? Oppe näakjste Sieden woascht du de Auntwuaten fa dise Froagen finjen.