WAN du mol wäajen een Owwada Schoden beläft hast, weetst du veleicht, woo aundre daut jeit, waut uk soont beläwen. Dee kjennen daut nich foten, sent vetwiewelt, derchenaunda, veschrocken un haben schwoare Dreem. Väle, waut soont beläwen, sent soo mootloos un meed, daut dee to nuscht mea Lost haben.

Wan du derch een Owwada aules veloaren hast, feelst du die veleicht uk meist batem toopbräakjen. Veleicht fangst du mau rajcht aun to denkjen, daut sikj daut nich mea loont to läwen. Oba de Schreft sajcht, daut loont sikj, un du kaust die secha sennen, daut doa bätre Tieden komen.

Liera 7:8 sajcht: “Waut foadich moaken es bäta aus waut aunfangen.” Wan daut Owwada noch mol korz jewast es, dan lat veleicht noch aules onen Hopninj. Oba wan eena jeduldich es un sikj aunstrenjt, dan kaun daut Läwen wada bäta gonen.

De Schreft rät von eene Tiet, wua “kjeen hielen to hieren sennen [woat], un kjeena woat fa Angst schrieen” (Jesaja 65:19). Dit woat sikj erfellen, wan Gott sien Rikj de Ieed to een Paradies moaken woat (Psalm 37:11, 29). Doa woat daut kjeenen Schoden mea derch Owwadasch jäwen. Aule Weedoag un schwoaret, waut wie beläft haben, woat fa emma aufjelascht sennen, wiels de aulmajchtja Gott vesprakjt: “Waut verhäa wia, woat nich mea aun jedocht woaren, un woat nich mea em Jeräd komen” (Jesaja 65:17).

Denkj mol han, de Schepfa haft jeplont, die “eene Tookunft un Hopninj” to jäwen – een frädeljet Läwen unja Gott siene volkomne Rejierunk (Jeremia 29:11). Dit to weeten kaun eenem halpen, daut sikj daut wada loont to läwen. Sally, von dee wie en dän väajen Artikjel aul räden, sajcht: “Äwa aul daut wundascheene notodenkjen, waut Gott sien Kjennichrikj noch mol doonen woat, kaun ons halpen, daut to vejäten, waut wie beläft haben, un verwoaz to kjikjen.”

Wurscht du jleichen mea doaräwa to lieren, waut Gott sien Rikj boolt fa de Menschen doonen woat? Wan jo, dan kaust du die secha sennen, daut sikj daut fa die loont to läwen, endoont waut fa schwoaret du beläft hast. Du kaust die to de Tiet freien, wua daut kjeenen Schoden derch Owwadasch mea jäwen woat. Oba fa nu haft de Schreft gooden Rot, waut die halpen kaun, met dän Schoden von een Owwada foadich to woaren. See wie mol waut Biespels.