Rajcht jesajcht läw wie aula opp eene Städ, wua soo to sajen een groota Storm oppkjemt. Jesus nand daut een grootet “Älent”, eene sea schwoare Tiet (Matäus 24:21). Wie kjennen dise schwoare Tiet nich bloos utem Stich gonen. Oba wie kjennen waut doonen, om ons en Sechaheit to brinjen. Waut es daut?

En Jesus siene Prädicht oppem Boajch jeef hee dän Rot: “Sieekjt daut ieeschte no Gott sien Rikj un no siene Jerajchtichkjeit” (Matäus 6:33). Woo kjenn wie daut doonen?

Sieekjt daut ieeschte no Gott sien Rikj. Daut meent, daut wie Gott sien Kjennichrikj sellen fa wichtja talen, aus aulet aundre (Matäus 6:25, 32-33). Wuarom? Wiels de Trubbel enne Welt sent väl too groot, daut de Menschen dee fiksen kjennen. Bloos Gott sien Kjennichrikj kaun daut.

Sieekjt no siene Jerajchtichkjeit. Wie sellen ons aunstrenjen, ons no Gott siene jerajchte Jesazen to rechten un no sienen Rot. Wuarom? Wiels wan wie selfst entscheiden wellen, waut rajcht un orrajchte es, dan woat daut schlajcht utkomen (Spricha 16:25). Oba wan wie ons em Läwen aun Gott siene Jesazen hoolen, dan woa wie am schaftich moaken un ons woat daut scheen gonen (Jesaja 48:17-18).

Sieekjt wieda no Gott sien Kjennichrikj un no siene Jerajchtichkjeit. Jesus woarnd de Menschen, daut dee sikj nich sullen auflenkjen loten un denkjen, daut daut Jelt an beschitzen wudd. Dee sullen uk nich soo beduat sennen, om äa Läwen to moaken, daut dee nich mea Tiet hauden toom no Gott sien Kjennichrikj sieekjen (Matäus 6:19-21, 25-32).

 Oba Jesus vespruak, daut dee, waut Gott sien Kjennichrikj unjastetten, emma wudden daut needichste haben toom läwen. Un dan wudden dee lota noch mol fa emma jesäajent woaren (Matäus 6:33).

Wan de Jinja to Jesus siene Tiet uk daut ieeschte no Gott sien Kjennichrikj un no siene Jerajchtichkjeit sochten, kjrieejen dee daut oba nich to seenen, daut sikj aulet Lieden un schlajchte opphieed. Oba dee fungen doawäajen Schutz. Woo?

Wiels dee sikj no Gott siene jerajchte Jesazen rechten, beschizt dee daut von aule Schwierichkjeiten, waut soone hauden, waut Gott nich jehorchten. Dee äare Hopninj opp daut Kjennichrikj holp an uthoolen. Mau rajcht dan wan dee daut sea schwoa hauden. Un see kjrieejen uk de “jeistliche Krauft von Gott”, om met aulet schwoare foadich to woaren (2. Korinta 4:7-9).

De ieeschte Christen kjeemen Jesus sien Jeboot no, daut ieeschte no daut Kjennichrikj to sieekjen. Dee muaken aulawäajen de goode Norecht vom Kjennichrikj bekaunt (Kolossa 1:23). Deit daut vondoag dän Dach uk noch wäa?

Secha! Jehova siene Zeijen weeten, daut de Tiet sea port, wiels Gott sien Kjennichrikj woat met dise Welt boolt een Enj moaken. Dee doonen aules, waut dee kjennen, om daut notokomen, waut Jesus säd: “Daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen” (Matäus 24:14).

Waut woascht du nu doonen, wan du von de goode Norecht hieescht? Wie roden die too, uk soo to sennen, aus de Menschen don von de Staut Beria en Mazedonien. Aus dee de goode Norecht äwa daut Kjennichrikj von dän Apostel Paulus hieeden, neemen dee “daut Wuat gaunz wellich opp”. Dee “forschten aule Dach en de Schreft”, om to seenen, aus daut stemd, waut see hieeden un dan kjeemen see daut uk no (Aposteljeschicht 17:11-12).

Soo kaust du daut uk doonen. Wan du daut ieeschte no Gott sien Kjennichrikj un no siene Jerajchtichkjeit sieekjst, dan woascht du nu aul Schutz finjen un lota noch mol fa emma en Fräd un Sechaheit läwen.