Wuarom fält ons daut aun Gott sien Kjennichrikj?
Aus de ieeschte Menschen jemoakt worden, wia Gott, dee Jehova heet, de eensja, waut rejieed. Aules, waut hee fa de Menschen deed, wia ut Leew. Hee muak een sea schmocket Tus fa an, dän Goaden Eden. Doa kunnen de Menschen läwen un hee jeef an äwajenuach to äten. Dan jeef hee an uk noch eene scheene Oabeit opp (1. Mose 1:28-29; 2:8, 15). De Menschen wudden haben kunt en Fräd läwen, wan dee sikj hauden von onsen leeftoljen Gott rejieren loten.
De ieeschte beid Menschen wullen nich von Gott rejieet sennen
De Schreft wiest, daut sikj doa een Enjel jäajen Gott stald. Dee wort lota Soton, de beesa Fient, jenant. Dee säd, daut Gott nich daut Rajcht haud, äwa de Menschen to rejieren un daut de Menschen daut onen Gott wudd bäta gonen. Daut es sea truarich, oba Adam un Eva, de ieeschte beid Menschen, jleewden dän Fient un stalden sikj uk jäajen Gott (1. Mose 3:1-6; Openboarunk 12:9).
Wäajen Adam un Eva nich wullen von Gott rejieet sennen, veluaren see äa Tus em Paradies un vespälden de Hopninj, eewich to läwen un gaunz jesunt to sennen (1. Mose 3:17-19). Äare Entscheidunk brocht uk Schoden opp de Kjinja, waut see lota hauden. De Schreft sajcht, daut “de Sind en de Welt nenn kjeem un derch de Sind de Doot”, wäajen Adam sindijd (Reema 5:12). De Sind brocht noch eenen aundren Trubbel opp: “Wan eena äwa dän aundren rejieet”, dan jeft et doaderch Schoden (Liera 8:9). Daut meent, daut wan Menschen äwa Menschen rejieren, dan jeft daut emma Trubbel.
MENSCHELJE REJIERUNGEN KOMEN OPP
Nimrod stald sikj jäajen Jehova
De ieeschta Mensch, waut äwa aundre rejieed, wia Nimrod. De Schreft sajcht, hee stald sikj jäajen Jehova un wull nich haben, daut Gott äwa de Menschen rejieren sull. Un von dan aun haben väl Menschen äare Macht orrajcht jebrukt. Bie 3 000 Joa trigj säd de Kjennich Salomo: “Dee, dee daut schlajcht hauden, hielden, oba kjeena treest an. Dee waut de Jewault eewden, wieren too stoakj” (Liera 4:1).
Vondoag dän Dach es daut noch krakjt soo. Aune 2009 schreef daut en een Buak von de Veeende Nazionen, daut et emma dolla doano handiet, daut de schlajchte Rejierungen “eent von de jratste Uasoaken sent fa de Trubbels oppe Welt”.
DOA MOTT WAUT JEDONEN!
De Menschen fält daut needich aun bätre Rejierungen. Un daut es, waut Gott ons uk vesproaken haft!
Nich mol de baste menschelje Rejierungen haben kunt de groote Trubbel äwatsied schaufen, waut de Menschen ploagen
Gott haft een Kjennichrikj, ooda eene Rejierunk, oppjestalt, waut en de Menschen äare Städ rejieren woat un “opp emma bliewen” woat (Daniel 2:44). Krakjt om dit Kjennichrikj haben millionende Menschen jebät (Matäus 6:9-10). Oba Gott woat nich selfst rejieren. Hee haft wäm doatoo aunjestalt, waut mol aus Mensch jeläft haft. Wäa es daut?
Veleicht jleichst du uk dit
WAUT SAJCHT DE SCHREFT ÄWA ...?
Es Gott sien Kjennichrikj en dien Hoat?
Waut bediet daut, wan daut sajcht, daut “daut Gottesrikj en junt es”?
