STAL die väa, du kjikjst een Video von eenen sea aunjeseenen Mensch, veleicht eene Fru, waut Musikj spält un waut du sea jleichst. Aum Aunfank haundelt daut Video sikj von äare Kjintheit; woo see lieet, een Instrument to spälen, un emma wiedalieren mott. Dan sitst du, woo see ver een deel Menschen spält un aulawäajen romreist un oppe gaunze Welt bekaunt woat. Irjentwanea sent de scheene Joaren vebie un daut Video jeit to Enj – see stoaft.

Dit Video wiest eene woare Jeschicht von wäm, waut nich mea läft. Daut wudd sikj jlikjbliewen, aus dit nu een Musikjspäla, een Forscha, eena, waut Sport moakt ooda sest een Aunjeseena jewast wia. Dis Mensch haft veleicht väl volbrocht, oba woo väl mea wudd dee nich haben kunt doonen, wan dee nich haud brukt oolt woaren un stoawen.

Daut es truarich to seenen, daut wie daut aula derch motten (Liera 9:5). Wan wie uk noch soo sea proowen, wie kjennen daut Ella un dän Doot nich utem Stich gonen. Wie kjennen uk plazlich derch een Ojjlekj ooda eene schlemme Krankheit stoawen. De Schreft sajcht, wie sent soo aus een Näwel, waut zemorjes “oppkjemt un boolt wada veschwinjt” (Jakobus 4:14).

Eenje Menschen denkjen soo, wan wie aulmols irjentwanea stoawen motten, dan “well wie äten un drinkjen, wiels morjen sent wie doot” (1. Korinta 15:32). Dee denkjen soo, wäajen dee weeten, daut see irjentwanea stoawen woaren; dee haben kjeene Hopninj fa lota. Oba irjentwanea em Läwen, besonda wan dee schwoaret derchgonen, wundren dee veleicht: “Es dit aules, to waut wie läwen?” Wua kaun eena de Auntwuat finjen?

Väle denkjen, daut Forscha de Auntwuat weeten. Doktasch un Forscha haben Sachen jefungen, daut Menschen lenja läwen kjennen. Un eenje Forscha proowen, daut wie noch lenja läwen sellen. Woo emma daut nu utkjemt, doa es doawäajen de Froag: Wuarom woa wie oolt un stoawen? Es doa Hopninj, daut de Doot noch mol opphieren woat? De näakjste Artikjels woaren äwa dit räden un de Froag beauntwuaten: “Es dit aules, to waut wie läwen?”