Woo wie aundre Menschen kjennen Leew bewiesen
Wiels wie aula von dän ieeschten Mensch Adam aufstaumen, sent wie eene Famielje. Enne Famielje wudden se sikj aula leewen sellen, oba daut es bie dise Tiet lang nich aulawäajen soo. Daut es nich, waut ons leeftolja Gott well.
WAUT DE HEILJE SCHREFT VON DE LEEW SAJCHT
“Du saust dienen Noba soo goot sennen aus die selfst” (3. MOSE 19:18)
“Siet june Fiend goot” (MATÄUS 5:44)
WAUT DAUT MEENT, AUNDRE MENSCHEN TO LEEWEN
Kjikjt mol, waut Gott en sien Wuat en 1. Korinta 13:4 bat 7 äwa de Leew sajcht:
“Leew es jeduldich, Leew es frintlich”
Toom nodenkjen: Woo feelst du die, wan aundre jeduldich un frintlich sent, enne Städ fuaz doll woaren, wan du eenen Fäla moakst?
“Leew woat nich iewrich”, ooda aufjenstich
Toom nodenkjen: Woo feelst du die, wan aundre die sea mestrusch un aufjenstich sent?
Leew “es nich nosikj”
Toom nodenkjen: Woo feelst du die, wan aundre diene Meeninj achten un nich bloos opp äa Stekj stonen bliewen?
Leew “es nich nodroagent”, ooda schmitt nich väa
Toom nodenkjen: Gott vejeft de Sinden wellich, wan de Menschen een Leetsennen haben. “Hee woat nich emma schellen, un woat nich eewich oajalich bliewen” (Psalm 103:9). Wie freien ons, wan aundre ons daut togoodhoolen, wan wie dee beleidicht haben. Soo wudd wie daut bie aundre dan uk sellen moaken (Psalm 86:5).
“Leew freit sikj nich to daut waut orrajcht es”
Toom nodenkjen: Wan ons waut schlajchtet passieet, jeit daut nich scheen, wan aundre sikj doaräwa freien. Dan well wie ons uk nich äwa aundre äa schwoaret freien, nich mol, wan dee ons schlajcht behaundelt haben.
Om daut Gott ons säajnen kaun, mott wie aundre krakjt soo leewen, aus wie daut hia jeseenen haben, endoont wäa daut es. Daut kjenn wie biejlikj, wan wie soone uthalpen, waut daut fält.
