DAUT latste Joa worden mank Jehova siene Zeijen oppe gaunze Welt dusende Mana Eltestasch un Deenstaumthelpa. Wan du eent von dise leewe Breeda best, dan best du secha sea schaftich met diene niee Oppgow en Jehova sienen Deenst.

Oba veleicht best du uk een bät besorcht. Jason, een junga Eltesta, sajcht: “Aus ekj Eltesta wort, feeld sikj mie daut soo, daut dise Veauntwuatunk too groot wia fa mie.” Un aus Jehova Moses un Jeremia eene niee Oppgow jeef, dochten dee uk, see kunnen daut nich (2. Mo. 4:10; Jer. 1:6). Wan du die uk soo feelst, waut kaust du dan doajäajen doonen un em jeisteljen wieda veraunkomen? Timotäus sien Biespel von de Bibeltiet kaun die halpen (Apj. 16:1-3).

Timotäus wia woomäajlich romme 20, aus de Apostel Paulus am fruach, aus hee met am toop reisen wull. Wiels dee noch junk wia, feeld dee sikj aum Aunfank veleicht onsecha un wuach sikj nich soo rajcht aun siene niee Oppgow naun (1. Tim. 4:11-12; 2. Tim. 1:1-2, 7). Oba tieen Joa lota kunn Paulus to de Vesaumlunk en Filippi sajen: “Wan de Har Jesus daut soo well, räakjen ekj Timotäus boolt hantoschekjen, . . . wiels ekj hab sest kjeenem, waut deeselwje Enstalunk haft aus hee” (Filip. 2:19; 2:20, NW).

Waut holp Timotäus, soon feina Eltesta to woaren? Well wie mol sas Dinj seenen, waut wie von dän lieren kjennen.

1. Timotäus wia sea om aundre bekjemmat. Paulus säd to de Breeda en Filippi: “[Timotäus es] opprechtich om jun gootgonen besorcht” (Filip. 2:20). Timotäus wia werkjlich om aundre bekjemmat. Dee wia doarom todoonen, daut dee em jeisteljen goot auf wieren, un jeef sien bastet toom dee biestonen.

Wie wellen nich soo sennen aus een Bossfoara, waut dolla doarom todoonen es, daut hee emma enne Tiet es aus doarom, daut hee de Menschen metnemt. William es aul mea aus 20 Joa een gooda Eltesta un hee rot niee Eltestasch un Deenstaumthelpa too: “Leeft de Breeda. Siet dolla om daut todoonen, waut dee fält, aus om de Sachen, waut organisieet motten.”

2. Fa Timotäus wia daut jeistelje daut ieeschte. Paulus vejlikjt Timotäus met aundre un säd: “De aundre sieekjen äaren ieejnen nutzen, un nich Jesus Christus siene Sach” (Filip. 2:21). Paulus schreef disen Breef en Room. Hee sach, daut de Breeda doa too drock met äare ieejne Sachen wieren. En eenje Stekjen strenjden dee sikj em jeisteljen nich jenuach aun. Bie Timotäus wia daut aundasch. Wan doa eene Jeläajenheit wia, de goode Norecht wiedatobrinjen, wia hee soo enjestalt aus Jesaja, waut säd: “Ekj sie hia. Du kaust mie schekjen” (Jes. 6:8).

Woo kaust du utjejlikjt sennen met diene ieejne Drockichkjeiten un met dee von de Vesaumlunk? Ieeschtens äwalaj, waut daut wichtichste es. Paulus säd: “Jie [sellen] fauststalen lieren, waut daut aulabaste es” (Filip. 1:10). Tal daut fa daut wichtichste, waut fa Gott daut wichtichste es. Tweedens: Moak dien Läwen eefacha. Lot  soont toch, waut die onneedich Tiet un Krauft nemt. Paulus säd to Timotäus: “Go de Jugentlost ut däm Wajch, un sträw no Jerajchtichkjeit, Gloowen, Leew un Fräd” (2. Tim. 2:22).

3. Timotäus strenjd sikj em Deenst fa Gott sea aun. Paulus säd to de Filippa: “Jie weeten, woo Timotäus sikj hanjestalt haft, un woo hee aus een Sän met däm Voda met mie toop aum Evangelium jedeent haft” (Filip. 2:22). Timotäus wia nich ful. Hee un Paulus wieren toop sea flietich em Deenst un doaderch worden dee emma jratre Frind.

En Gott siene Organisazion jeft et nu uk väl Oabeit. Dise Oabeit moakt werkjlich tofräd un kaun die met diene Breeda un Sestren noch dolla veeenjen. Doawäajen nemm die daut väa, emma tootonämen “en . . . [diene] Oabeit fa dän Harn” (1. Kor. 15:58).

4. Timotäus kjeem daut no, waut hee lieed. Paulus schreef aun Timotäus: “Du best . . . miene Leah nojefoljd . . ., mien Läweswaundel . . ., mien Sträwe, mienem Gloowe, miene Langmoot, miene Leew, miene Jeduld” (2. Tim. 3:10, Friesenbibel). Wäajen hee daut nokjeem, waut hee von Paulus lieed, kunn hee mea Veauntwuatunk kjrieen (1. Kor. 4:17).

Kjanst du eenen erfoarnen Brooda, von dän du lieren west? Wan nich, dan wurscht du die kjennen eenen sieekjen. Tom es aul Joaren Eltesta un hee vetalt, woo daut bie am aum Aunfank wia: “Een erfoarna Eltesta wia om mie bekjemmat un lieed mie fein ut. Ekj fruach am foaken no Rot un kjeem daut dan no, waut hee säd. Daut aules holp mie, daut ekj mie boolt mea tootrud.”

5. Timotäus eewd emma wieda. Paulus säd to dän: “Eew die en jetliche Dinja” (1. Tim. 4:7). Eena, waut biejlikj well Footbaul spälen ooda bie eenen Rees metmoaken, haft veleicht eenen Liera, oba hee mott uk selfst eewen. Paulus säd to Timotäus: “Hool aun, de Schreft to läsen, to prädjen un to lieren . . . Eew die en diene Oabeit, un jeff die soo doarenn han, daut de Menschen seenen, daut du doarenn toonemst” (1. Tim. 4:13-15).

Du motst die uk emma wieda eewen. Bliew em jeisteljen nich stonen un kjikj doano, daut du krakjt om de Aunwiesungen omweetst, woo aules en de Vesaumlunk jedonen saul. Velot die uk nich too sea opp die selfst. Denkj nich, wiels du soo väl Erfoarunk hast, kaust du aul met irjenteene Loag omgonen, onen die daut ea goot to unjastonen. Pauss no die selfst opp un no “diene Lia”, soo aus Timotäus deed (1. Tim. 4:16).

6. Timotäus vetrud opp Jehova sienen Jeist. De Apostel Paulus docht äwa Timotäus sienen Deenst no un säd: “Bewoa daut scheene aunvetrüde Goot derjch dem Heiljen Jeist, dee enn ons wohnt” (2. Tim. 1:14, Friesenbibel). Toom sienen Deenst bewoaren, ooda dän tru doonen, must Timotäus sikj opp Gott sienen Jeist veloten.

Donald, waut aul väl Joaren Eltesta es, sajcht: “Breeda, waut een Aumt haben, motten oppaussen, daut see Frind met Gott bliewen. Soo woaren dee ‘emma stoakja’ woaren. Wan dee om Gott sienen Jeist bäden un dän siene Frucht haben, dan woaren dee een Säajen fa de Breeda sennen” (Psa. 84:8; 1. Pet. 4:11).

Daut es sea scheen to seenen, daut soo väl Breeda, waut soo aus du korz Deenstaumthelpa ooda Eltesta jeworden sent, em jeisteljen wiedakomen. Jason, von dän wie ea aul räden, sajcht: “En de Tiet, waut ekj aul Eltesta sie, hab ekj väl jelieet un ekj feel mie nich mea soo onsecha. Mie jeit daut nu scheen, Eltesta to sennen, un daut es eene Iea fa mie.”

Woascht du em jeisteljen wieda veraunkomen? Nemm die daut väa, von Timotäus to lieren. Dan woascht du uk een Säajen fa Gott sien Volkj sennen.