1. Waut mott wie aula doonen?

WURSCHT du wellen en eenen langen Rees ranen, besonda wan du krank ooda meed wieescht? Secha nich. Oba de Apostel Paulus säd, daut aule woare Christen en eenen Rees ranen (Heb. 12:1). Un wan wie dän Pries kjrieen wellen, waut Jehova ons vesproaken haft, dan mott wie aula batem Enj uthoolen, endoont woo oolt wie sent ooda woo väl Krauft wie haben (Mat. 24:13).

2. Wuarom kunn Paulus no Filippa 3:14 no aundre Rot jäwen?

² Paulus kunn aundre Rot jäwen, wiels hee selfst bie dän Rees metjemoakt un utjehoolen haud (läs Filippa 3:14). Oba waut fa eenen Rees meend hee krakjt?

3. Von waut von Rees räd Paulus?

³ Paulus brukt eenjemol soont aus een Jlikjnis, waut se ieeschtemma bie de groote Sport-Späls en Griechenlaunt deeden (1. Kor. 9:25-27; 2. Tim. 2:5). Biejlikj vejlikjt hee de Christen äa Läwen met eenen Rees (1. Kor. 9:24). Dee fangen aun to ranen, wan dee sikj Jehova hanjäwen un sikj deepen loten (1. Pet. 3:21). Un de Rees es to Enj, wan Jehova dee daut eewje Läwen jeft (Mat. 25:31-34, 46; 2. Tim. 4:8).

4. Waut woa wie en disen Artikjel seenen?

⁴ Wuarom likjent ons Läwen aus Christen sikj met eenen langen Rees? Daut jeft veschiednet, oba well wie mol dreeatlei seenen. Ieeschtens mott wie opp dän rajchten Wajch bliewen. Tweedens mott wie no daut Ziel kjikjen. Un dreddens mott wie wiedaranen, wan wie uk Schwierichkjeiten haben.

5. Opp waut von Wajch mott wie bliewen, un wuarom?

⁵ Daut soone, waut bie eenen Rees ranen, dän Pries kjrieen kjennen, motten dee krakjt opp dän Wajch ranen, wua de Rees es. Un wan wie daut eewje Läwen kjrieen wellen, dan mott wie krakjt opp dän Wajch bliewen, waut Gott fa rajcht talt (Apj. 20:24; 1. Pet. 2:21). De Soton un dee, waut opp siene Sied sent, wellen nich, daut wie opp dän Läweswajch bliewen. Dee wellen, daut wie met an toop “en äare Gottloosichkjeit” metranen (1. Pet. 4:4). Dee spotten äwa ons Läwen un sajen, daut et väl bäta es, soo to läwen, aus see daut doonen, wiels eena doa väl mea Frieheit haft. Oba daut es nich soo! (2. Pet. 2:19).

6. Waut kjenn wie von Brian siene Jeschicht lieren?

⁶ Deejanje, waut soo läwen, aus dän Soton siene Welt daut fa rajcht talt, motten boolt enwoaren, daut see doaderch nich mea Frieheit haben. Enne Städ daut woaren dee veskloft (Reem. 6:16). Daut see wie aun Brian siene Jeschicht. Siene Elren rooden am too, opp dän christeljen Läweswajch to bliewen. Oba en siene Jugentjoaren beduad hee, aus am daut werkjlich schaftich moaken wudd. Brian wort sikj eenich, soo to läwen aus de Menschen enne Welt. Hee sajcht: “Ekj haud mie daut nich jedocht, daut dee Frieheit, wua ekj no hinjaraun wia, mie en eene Sklowarie nenbrinjen wudd. Ekj funk aun veschiedne Droggs to brucken un to supen un een orreinet Läwen to fieren. De näakjste poa Joa brukt ekj dan emma stoakjre Droggs un von väle kjeem ekj goanich mea loos. . . . Ekj funk aun Droggs to vekjeepen toom daut aules betolen.” Met de Tiet wort Brian sikj eenich, daut hee soo läwen wull, aus Jehova daut fa rajcht tald. Hee endad sien Läwen un leet sikj aune 2001 deepen. Un nu es hee sea schaftich, daut hee wada opp dän christeljen Läweswajch es. *

7. Von woone twee Wäaj rät Matäus 7:13-14?

⁷ Wie motten sea oppaussen, daut wie opp dän rajchten Wajch ranen! De Fient well, daut wie von dän schmaulen Wajch raufgonen, “dee toom Läwen fieet”, un opp dän breeden Wajch noppkomen, wua de mieeschte Menschen von dise Welt bowen gonen. Daut es leicht, doa bowen to gonen, un de Menschen jleichen daut. Oba dee fieet “en daut vedoawen” (läs Matäus 7:13-14). Daut wie ons nich auflenkjen loten un opp dän rajchten Wajch bliewen kjennen, mott wie ons opp Jehova veloten un no dän horchen.

8. Waut mott eena, dee en eenen Rees rant, doonen, wan dee sikj vestaupt?

⁸ Dee, waut en eenen langen Rees ranen, motten no dän Wajch kjikjen, waut ver an es, daut dee sikj nich vestaupen. Oba daut kaun doawäajen passieren, daut een aundra dee mol aunhoakt ooda daut dee en een Loch nenstaupen. Un wan dee hanfaulen, dan motten dee wada oppstonen un wiedaranen. Wan dee jewennen wellen, dan kjennen dee nich daut ieeschte no daut kjikjen, waut an baudat. Dee motten no daut Ziel kjikjen un no dän Pries.

9. Waut sell wie doonen, wan wie ons mol vestaupen?

⁹ En onsen Rees aus Christen kjenn wie ons uk foaken vestaupen, wiels wie waut orrajchtet sajen ooda doonen. Ooda onse Gloowesbreeda doonen waut, waut ons weedeit. Daut brukt ons nich wundren, wäajen wie aula onvolkomen sent un opp dän schmaulen Wajch ranen, waut toom Läwen fieet. Doawäajen kjenn wie ons leicht unjarenaunda aunhoaken. Paulus säd je, daut wie aula eenjemol “eene Kloag jäajen dän aundren” haben wudden (Kol. 3:13). Oba wie wellen nich daut ieeschte no daut kjikjen, waut ons baudat, oba no dän Pries, waut wie jewennen wellen. Un wan wie doch mol hanfaulen, dan well wie oppstonen un wiedaranen. Wan wie ons soo sea oajren, daut wie nich wada oppstonen wellen, dan woa wie kjeenmol batem Ziel komen un nich dän Pries kjrieen. Un wie kjennen dan uk leicht een Hindanis woaren fa dee, waut doa uk opp dän schmaulen Wajch ranen wellen.

10. Waut kjenn wie doonen, daut wie fa onse Breeda nich “een Hindanis” sent?

¹⁰ Woo wudd wie noch kjennen fa onse Breeda “een Hindanis” sennen? Wan wie dee emma wullen väasajen. Wie wellen dee nich bemotten, daut dee aules krakjt soo doonen sellen aus wie (Reem. 14:13, 19-21; 1. Kor. 8:9, 13). Wuaemma daut mäajlich es, well wie dee toom Jefaulen läwen. En disen Stekj sent wie gaunz aundasch aus dee, waut en eenen werkjeljen Rees ranen. Dee wellen de aundre jewennen, daut see dän Pries kjrieen. Dee strieden mieeschtens bloos fa sikj un schupsen aundre veleicht tosied, daut see selfst daut väaschte  ranen kjennen. Wie sent nich soo, wiels wie nich fa ons selfst “no Iea un aunseenen sieekjen” (Gal. 5:26; 6:4). Wie wellen soo väl aus mäajlich halpen, daut dee met ons toop nom Ziel komen un daut eewje Läwen kjrieen. Doawäajen well wie, soo aus de Apostel Paulus sajcht, “nich bloos no daut kjikjen, waut . . . [ons] selfst intressieet, oba uk no daut, waut dän näakjsten intressieet” (Filip. 2:4).

11. Waut mott eena bie eenen Rees em Uag hoolen, un wuarom?

¹¹ Dee, waut en eenen Rees ranen, kjikjen nich bloos no dän Wajch ver an. Dee motten uk daut Ziel em Uag hoolen. Veleicht kjennen see daut noch nich seenen, oba dee stalen sikj aul väa, woo daut sennen woat, wan see doa aunkomen un dän Pries kjrieen. Daut halpt an aunhoolent to ranen.

12. Waut fa feinet woat Jehova ons jäwen?

¹² En dän Rees, waut wie ranen, woat Jehova ons gaunz secha eenen Pries jäwen. Wan wie batem Enj ranen, dan woa wie daut eewje Läwen em Himmel ooda em Paradies oppe Ieed kjrieen. Om daut wie ons daut väastalen kjennen, sajcht de Schreft aul een bät, woo wundascheen daut dan sennen woat. Wan wie äwa daut goode nodenkjen, waut Jehova ons vesproaken haft, dan woa wie ons noch eenja sennen batem Enj to ranen.

13. Waut hab wie, waut de Menschen en eenen werkjeljen Rees nich haben?

¹³ Dee, waut ieeschtemma en Griechenlaunt bie eenen Rees metmoaken wullen, worden mol meed ooda hauden Weedoag. Woo kunnen dee met soone Schwierichkjeiten foadich woaren? Dee musten sikj bloos reedmoaken un eewen un sikj opp äare ieejne Krauft veloten. Krakjt soo aus dee kjenn wie ons uk fa onsen Rees eewen. Oba wie haben eene Help, waut dee ieeschtemma nich hauden. Wie kjennen von Jehova Krauft kjrieen un daut jeft nuscht, wua hee ons nich met halpen kaun. Wan wie ons opp am veloten, dan woat hee ons fa onsen Rees reedmoaken. Un hee vesprakjt ons mau rajcht, daut hee ons stoakjen woat (1. Pet. 5:10).

14. Woo halpt 2. Korinta 12:9-10 ons, met Schwierichkjeiten foadich to woaren?

¹⁴ Paulus haud een deel Schwierichkjeiten. Hee wort beleidicht un vefolcht un eenjemol feeld hee sikj uk schwak un must met eenen “Stachel en daut Fleesch” foadich woaren (2. Kor. 12:7). Un doch wull hee nich oppjäwen. Fa am wieren dise schwoare Omstend eene goode Jeläajenheit, sikj opp Jehova to veloten (läs 2. Korinta 12:9-10). Doawäajen holp Jehova Paulus, met aul daut foadich to woaren.

15. Waut woa wie utfinjen, wan wie Paulus nodoonen?

¹⁵ Veleicht woa wie wäajen onsen Gloowen uk beleidicht ooda vefolcht. Ooda wie haben Trubbel met de Jesuntheit ooda feelen ons sea meed. Oba wan wie soo äwa onse Schwierichkjeiten denkjen aus Paulus, dan woa wie uk utfinjen, daut Jehova ons leeftolich biesteit.

16. Waut kaun eena mau rajcht dan doonen, wan eena ella ooda krank es?

¹⁶ Best du oppem Foastool ooda gaunz em Bad? Hast du Trubbel met de Kjneeen ooda kaust du nich mea goot seenen? Kaust du dan met soone toop ranen, waut junk un jesunt sent? Gaunz secha! Väle, waut aul ella ooda krank sent, ranen en dän Rees fa daut Läwen. Dee kjennen daut nich met äare ieejne Krauft, oba  dee kjrieen Krauft von Jehova, wan see äwa Fon ooda äwa Video de Toopkomes horchen ooda kjikjen. Un dee moaken uk bie daut Prädichtwoakj met, wan see Doktasch, Nursen un Frintschoft Zeichnis jäwen.

17. Woo denkjt Jehova äwa dee, waut nich mea soo jesunt sent?

¹⁷ Wan du wäajen diene Jesuntheit nich aules doonen kaust, waut du west, dan woa nich mootloos. Du kaust doawäajen en dän Rees fa daut Läwen uthoolen. Jehova räakjent die väl, wäajen du aun am jleefst un am aul lang tru jedeent hast. Un nu fält die daut sea needich aun siene Help un hee woat die nich em Stäakj loten (Psa. 9:11). Enne Städ daut woat hee die emma noda komen. Eene Sesta, waut veschiedne Trubbels met de Jesuntheit haft, sajcht: “Wäajen daut met miene Jesuntheit emma oaja woat, kaun ekj nich mea soo foaken met aundre von de Woarheit räden. Oba ekj weet, daut Jehova sikj äwa daut bät freit, waut ekj noch doonen kaun. Un daut moakt mie schaftich.” Wan du mootloos best, dan denkj doaraun, daut Jehova die biesteit. Denkj uk aun dän Apostel Paulus. Hee säd je: “Doawäajen sie ekj mootich wan ekj . . . schwak sie, . . . wiels wan ekj schwak sie, dan sie ekj stoakj” (2. Kor. 12:10).

18. Waut kaun fa eenje besonda schwoa sennen?

¹⁸ Eenje, waut en dän Rees fa daut Läwen ranen, haben noch eenen aundren Trubbel. Dise true Breeda motten met Schwierichkjeiten foadich woaren, waut fa aundre nich fuaz to seenen sent un waut dee nich krakjt vestonen kjennen. Veleicht sent dee narfenkrank ooda haben äwamotich väl Angst. Wuarom kaun soont besonda schwoa sennen? Wan sikj doa wäa dän Oarm aufjebroaken haft ooda oppem Foastool es, dan kjennen aundre daut seenen un wellen dänjanjen halpen. Oba soone, waut met de Narfen rauf sent, es daut woomäajlich goanich auntoseenen. Dee haben daut uk schwoa – krakjt soo aus soone, waut waut aufjebroaken es. Oba dee kjrieen woomäajlich nich soo väl Leew un Help von aundre.

19. Waut kjenn wie von Mefi-Boschet lieren?

¹⁹ Wan du Schwierichkjeiten hast un denkjst, daut aundre die nich rajcht vestonen kjennen, dan kaun Mefi-Boschet siene Jeschicht die Moot jäwen (2. Sam. 4:4). Hee wia nich jesunt un de Kjennich David behaundeld am nich rajcht. Mefi-Boschet haud nich Schult doaraun, oba hee vebettad sikj nich. Hee wia dankboa fa daut goode, waut hee haud, un doafäa, daut David ea soo leeftolich to am jewast wia (2. Sam. 9:6-10). Aus Mefi-Boschet orrajcht behaundelt  wort, docht hee nich bloos aun siene ieejne schwoare Loag. Hee leet sikj derch David sienen Fäla nich veoajren un jeef uk nich Jehova de Schult doafäa. Enne Städ daut docht hee doaraun, woo hee dän Kjennich unjastetten kunn, waut Jehova aunjestalt haud (2. Sam. 16:1-4; 19:25-31). Un Jehova sach doano, daut Mefi-Boschet siene Jeschicht en de Schreft oppjeschräwen wort, daut wie doa waut von lieren kjennen (Reem. 15:4).

20. (a) Woo jeit eenje daut, waut groote Angst haben? (b) Äwa waut kjennen dee sikj secha sennen?

²⁰ Eenje Breeda un Sestren haben soone groote Angst, daut see sikj mank Menschen sea bleed un onsecha feelen. Daut es schwoa fa dee, oba dee sent doawäajen bie de Toopkomes un opp de Kongressen. Dee es daut nich leicht, met Framde to räden, oba dee gonen doawäajen prädjen. Wan die daut uk soo jeit, dan best du nich de eensja. Daut jeit noch väl mea soo. Denkj emma doaraun, daut Jehova sikj sea freit, wan du dien bastet deist. Daut du bat nu utjehoolen hast, wiest, daut Jehova die säajent un die de needje Krauft jeft (Filip. 4:6-7; 1. Pet. 5:7). * Wan du krank best ooda Narfentrubbel hast un Jehova doawäajen wieda tru deenst, dan kaust du die gaunz secha sennen, daut hee sikj äwa die freit.

21. Waut kjenn wie aula met Jehova siene Help doonen?

²¹ Daut es goot, daut de Rees, wua Paulus von räd, nich krakjt soo es aus een werkjelja Rees. Wan en de Bibeltiet een Rees wia, dan kjrieech doa mau eena dän Pries. Oba en dän Rees fa daut eewje Läwen woaren aule dän Pries kjrieen, waut batem Enj uthoolen (Joh. 3:16). En eenen werkjeljen Rees kunnen bloos dee metmoaken ooda jewennen, waut jesunt un stoakj wieren. Väle von ons sent nich jesunt un stoakj, oba wie hoolen doawäajen ut (2. Kor. 4:16). Met Jehova siene Help kjenn wie aula dän Rees batem Enj ranen!