1. Woo kjenn wie met wäm Frind woaren?

WAN wie met eenen Mensch wellen goode Frind woaren, dan mott wie jeweenlich met dän toop sennen un ons unjarenaunda sajen, waut wie denkjen un feelen. Oba wan wie met Jesus wellen goode Frind woaren, dan es daut goanich soo leicht. Wuarom nich?

2. Wuarom es daut nich soo leicht, Frind met Jesus to woaren?

² Ieeschtens hab wie Jesus noch kjeenmol bejäajent. Bie väl Christen en de Aposteltiet wia daut krakjt soo. Oba de Apostel Petrus säd: “Wan jie Jesus uk nich jeseenen haben, jie sent am doch goot. Un wan jie am nu uk nich seenen, doawäajen jleew jie doch aun am” (1. Pet. 1:8, Fn.). Daut wiest, daut wie kjennen Frind met Jesus woaren, wan wie am uk kjeenmol bejäajent haben.

3. Wuarom es daut nich soo eefach, Frind met Jesus to woaren?

³ Tweedens es daut nich soo eefach, wiels wie nich met Jesus räden kjennen. Wan wie bäden, dan räd wie to Jehova. Secha bäd wie en Jesus sienen Nomen, oba wie räden je nich to am. Jesus well daut nich mol, daut wie daut doonen. Wuarom nich? Wäajen daut Jebäd to onse Aunbädunk jehieet un wie sellen bloos Jehova aunbäden (Mat. 4:10). Oba wie kjennen doawäajen bewiesen, daut wie Jesus leewen.

4. Waut es daut dredde, wuarom daut nich leicht es, Frind met Jesus to woaren, un waut woa wie nu seenen?

⁴ Dreddens es daut nich soo leicht, wäajen Jesus em Himmel es un wie nich met dän toop sennen kjennen. Oba wan  hee uk wiet auf es, kjenn wie am doawäajen goot kjanen lieren. En disen Artikjel woa wie veatlei seenen, woo wie met am jratre Frind woaren kjennen. Oba ieeschtlich well wie seenen, wuarom wie daut doonen sellen.

5. Wuarom sell wie Frind sennen met Jesus? (See uk de Kaustes “ Wäa Frint es met Jesus, woat uk Frint sennen met Jehova” un “ Rajcht äwa Jesus denkjen”.)

⁵ Wie motten Frind sennen met Jesus, daut wie kjennen Frind met Jehova sennen. Wuarom? Well wie mol tweeatlei seenen. Ieeschtlich säd Jesus to siene Jinja: “De Voda selfst . . . es junt goot, wiels jie mie goot sent” (Joh. 16:27). Hee säd uk: “Kjeena kjemt nom Voda buta derch mie” (Joh. 14:6). Wan doa wäa wudd wellen met Jehova Frint sennen, oba nich met Jesus, dan wudd daut soo sennen, aus wan doa wäa wudd wellen en een Hus nengonen, onen derch de Däa to gonen. Jesus brukt sea soon Jlikjnis, aus hee säd, daut hee “de Däa fe de Schop” wia (Joh. 10:7, Friesenbibel). Tweedens mott wie Frind sennen met Jesus, wiels dee krakjt soo es aus sien Voda. Hee säd je to siene Jinja: “Wäa mie jeseenen haft, haft uk dän Voda jeseenen” (Joh. 14:9). Wan wie mea äwa Jesus sien Läwen lieren, dan es daut eene groote Help toom Jehova kjanen lieren. Un wie woaren dan uk Jesus dolla leewen. Un je jratre Frind wie met Jesus woaren, je mea woa wie uk sienen Voda leewen.

6. Ut waut vont haulwen mott wie noch Frind sennen met Jesus? Laj daut ut.

⁶ Wie motten uk Frind sennen met Jesus, daut Gott no onse Jebäda horcht. Daut es nich jenuach, daut wie bloos  emma opp Enj von onse Jebäda “en Jesus sienen Nomen” sajen. Wie motten uk vestonen, woo Jehova Jesus brukt toom no onse Jebäda horchen. Jesus säd to siene Apostel: “Waut jie en mienen Nomen bäden woaren, daut woa ekj doonen” (Joh. 14:13). Jehova Gott es deejanja, waut onse Jebäda hieet un dee beauntwuat, oba hee jeef Jesus de Macht, Gott sienen Wellen uttofieren (Mat. 28:18). Un ea Gott onse Jebäda erhieet, kjikjt hee uk, aus wie Jesus sienen Rot nokomen. Jesus säd je biejlikj: “Wan jie Menschen daut vejäwen, wan dee sikj jäajen junt vesindjen, woat jun himlischa Voda junt uk vejäwen. Oba wan jie aundre Menschen äare Sinden nich vejäwen, woat jun Voda junt june Sinden uk nich vejäwen” (Mat. 6:14-15). Daut wiest, woo iernst daut es, daut wie aundre krakjt soo leeftolich behaundlen, aus Jehova un Jesus ons doonen.

7. Wäm woat Jesus sien Opfa togood komen?

⁷ Jesus sien Opfa woat bloos dee togood komen, waut siene Frind sent. Woo weet wie daut? Jesus säd, daut hee “sien Läwen fa siene Frind” jäwen wudd (Joh. 15:13). Deejanje, waut Jehova deenden, ea Jesus no de Ieed kjeem, woaren am uk motten kjanen lieren un leewen. Soone Mana un Frues aus Abraham, Sara, Moses un Rahab woaren vom Doot oppstonen. Oba mau rajcht dee motten Frind woaren met Jesus, daut dee kjennen daut eewje Läwen kjrieen (Joh. 17:3; Apj. 24:15; Heb. 11:8-12, 24-26, 31).

8-9. Waut kjenn wie no Johanes 15:4-5 no doonen, wan wie Frind met Jesus sent, un wuarom bruck wie siene Help?

⁸ Fa ons es daut eene Freid, daut wie kjennen met Jesus toopschaufen un de goode Norecht von daut Kjennichrikj prädjen un lieren. Aus Jesus oppe Ieed wia, deed hee de Menschen lieren. Un nu es hee wada em Himmel un deit noch emma daut prädjen un lieren leiden, wiels hee daut Haupt äwa de Vesaumlunk es. Hee sitt daut, wan wie ons aunstrenjen, soo väl Menschen aus mäajlich to halpen am un sienen Voda kjanen to lieren, un daut es bie am väl wieet. Un dit Woakj kjenn je wie uk bloos doonen, wiels Jehova un Jesus ons halpen (läs Johanes 15:4-5).

⁹ Gott sien Wuat moakt ons daut dietlich, daut Jehova mau dan eenen Jefaulen aun ons haft, wan wie nich opphieren Jesus to leewen. Well wie nu mol veatlei seenen, waut wie doonen kjennen toom Jesus siene Frind woaren.

10. Waut es daut ieeschte, waut wie doonen motten, om Frind met Jesus to woaren?

¹⁰ 1. Lia Jesus kjanen. Daut doo wie, wan wie de Bibelbieekja Matäus, Markus, Lukas un Johanes läsen. Wan wie äwa daut nodenkjen, waut et doa von Jesus sien Läwen sajcht, dan see wie, woo leeftolich hee met de Menschen omjinkj, un dan woa wie am noch mea leewen un achten. Jesus wia biejlikj de Har äwa siene Jinja, oba hee behaundeld an nich soo, aus wan see siene Deena wieren. Enne Städ daut säd hee to an, waut hee docht un feeld (Joh. 15:15). Wan dee truarich wieren, dan wia Jesus uk truarich un road mau rajcht (Joh. 11:32-36). Soogoa siene Jäajna säden, daut hee met deejanje Frind wia, waut no de goode Norecht horchten (Mat. 11:19). Wan wie met  aundre krakjt soo omgonen, aus Jesus met siene Jinja deed, dan woa wie bäta met dee foadich woaren. Un wie woaren dan uk schaftja sennen un Christus noch mea räakjnen.

11. Waut es daut tweede, waut wie doonen motten, om Frind met Jesus to woaren, un wuarom es daut needich?

¹¹ 2. Sie soo jesonnen aus Jesus un vehool die soo aus hee. Je bäta wie Jesus siene Jesennunk kjanen un nodoonen, je jratre Frind woa wie met am woaren (1. Kor. 2:16). En waut fa Stekjen kjenn wie Jesus nodoonen? Hee wia biejlikj dolla doarom todoonen, aundre to halpen, aus sikj selfst toom Jefaulen to läwen (Mat. 20:28; Reem. 15:1-3). Doawäajen jeef hee wellich waut opp fa dee un hilt dee togood. Hee wia nich leicht beleidicht, wan doa wäa waut äwa am säd (Joh. 1:46-47). Un hee docht nich schlajcht äwa aundre, wan dee lang trigj mol waut orrajchtet jedonen hauden (1. Tim. 1:12-14, NW). Jesus säd: “Wan jie Leew unjarenaunda haben, woat aulemaun seenen, daut jie miene Jinja sent” (Joh. 13:35). Wie wudden mol kjennen äwalajen: “Go ekj en Jesus siene Footspoaren un doo aules, waut ekj kaun, toom met miene Gloowesbreeda Fräd hoolen?”

12. Opp waut vonne Wajch kjenn wie noch Jesus siene Frind woaren, un woo kjenn wie daut doonen?

¹² 3. Sto Christus siene Breeda bie. Wan wie siene jesaulwde Breeda biestonen, dan sitt Jesus daut doafäa aun, daut wie daut fa am doonen (Mat. 25:34-40). Wie kjennen de Jesaulwde besonda doaderch biestonen, daut wie biem prädjen un lieren ons bastet doonen, soo aus Jesus daut säd (Mat. 28:19-20; Apj. 10:42). Christus siene Breeda kjennen dit groote Prädichtwoakj oppe gaunze Welt bloos derchfieren, wiels de “aundre Schop” an unjastetten (Joh. 10:16). Wan du eent von dee best, dan wiest du jiedatsmol, wan du prädjen deist, daut du de Jesaulwde leefst un uk Jesus.

13. Woo kjenn wie daut nokomen, waut Jesus en Lukas 16:9 säd?

¹³ Wie kjennen uk Frind met Jehova un Jesus woaren, wan wie ons Jelt brucken, om daut Woakj to unjastetten, waut dee leiden (läs Lukas 16:9). Wie kjennen biejlikj Gowen jäwen fa daut Woakj oppe gaunze Welt. Dee woaren biejlikj jebrukt toom wiet auf prädjen ooda toom Vesaumlungshiesa un aundre Jebieda buen un unjahoolen ooda toom soone halpen, waut derch een Owwada Schoden jekjräajen haben. Wie kjennen uk Gowen jäwen fa onse Vesaumlunk un deejanje halpen, waut daut fält (Spr. 19:17). Derch aul dit kjenn wie Christus siene Breeda unjastetten.

14. Waut es no Efeesa 4:15-16 no daut vieede, woo wie met Jesus kjennen Frind woaren?

¹⁴ 4. Halp bie daut met, waut Jehova siene Organisazion deit. Jesus es daut Haupt von de Vesaumlunk, un wie kjennen jratre Frind met am woaren, wan wie met deejanje toopschaufen, waut hee aunjestalt haft, om fa ons to sorjen (läs Efeesa 4:15-16). Nu kjikjen de Breeda biejlikj doano, daut aule Vesaumlungshiesa fein jenuzt woaren. Doawäajen haben dee eenjemol von miere Vesaumlungen eene jemoakt un daut uk aundasch enjedeelt, wua dee prädjen sellen. Doaderch haft de Organisazion kunt väl Gowen spoaren. Oba eenje Vekjindja musten sikj to waut nieet wanen. Dise true Breeda wieren woomäajlich joarenlank  en eene Vesaumlunk un hauden doa een deel Frind. Oba nu wort an jesajcht, daut see to eene aundre Vesaumlunk jehieren wudden. Secha freit Jesus sikj sea, daut dise leewe Breeda daut soo tru unjastetten, waut de Organisazion deit!

15. Wuarom kjenn wie lota noch jratre Frind met Jesus woaren?

¹⁵ Dee, waut met dän heiljen Jeist jesaulft sent, woaren met Jesus toop en Gott sien Rikj rejieren. Dee haben de Hopninj fa emma met Christus toop to sennen un kjennen am seenen un met am räden (Joh. 14:2-3). Oba waut es met dee, waut de Hopninj haben oppe Ieed to läwen? Jesus woat an uk siene Leew wiesen un fa an sorjen, wan see am uk nich seenen kjennen. Dee woaren noch jratre Frind met Jesus woaren, wan dee ieescht daut scheene Läwen haben, wua Jehova un Jesus fäa oppkjeemen (Jes. 9:5-6).

16. Waut vonne Säajnungen woa wie kjrieen, wan wie met Jesus Frind sent?

¹⁶ Wan wie ons woaren aunstrenjen Jesus siene Frind to sennen, dan woa wie väl Säajnungen kjrieen. Biejlikj kjemt ons siene Leew un Help nu aul togood un wie haben de Jeläajenheit noch mol fa emma to läwen. Oba daut es noch nich aules, waut wie kjrieen, wan wie Jesus siene Frind sent. Daut wichtichste es, daut wie kjennen goode Frind sennen met Jesus sienen Voda, Jehova. Daut es werkjlich eene groote Iea, daut wie kjennen Jesus siene Frind sennen.