1. Waut sitt Jehova bie siene Deena?

JEHOVA GOTT “freit sikj to sien Volkj” (Psa. 149:4). Daut moakt ons sea schaftich! Jehova sitt onse goode Sieden un daut goode, waut wie doonen kjennen, un trakjt ons no sikj. Wan wie am tru bliewen, dan woat hee fa emma ons Frint bliewen (Joh. 6:44).

2. Wuarom kjennen eenje daut schia nich jleewen, daut Jehova an waut räakjent?

² Eenje sajen veleicht: “Ekj weet, daut Jehova sien Volkj väl räakjent. Oba woo weet ekj, daut hee uk mie waut räakjent?” Wuarom denkjen dee soo? Oksana * haud eene schwoare Kjintheit. See sajcht: “Ekj wia sea schaftich, aus ekj mie deepen leet un met dän Pioniadeenst aunfunk. Oba 15 Joa lota docht mie wada von aul daut schwoare, waut ekj beläft haud. Ekj docht, Jehova jleicht mie nich un ekj haud daut goanich vedeent, daut hee mie leewd.” Yua es eene Pionia-Sesta, waut uk nich eene leichte Kjintheit haud. See sajcht: “Ekj jeef mie Jehova han, wiels ekj am schaftich moaken wull. Oba ekj wia mie gaunz secha, daut hee mie kjeenmol wudd leewen kjennen.”

3. Waut woa wie en disen Artikjel seenen?

³ Jeit die daut uk soo aus dise beid true Sestren? Leefst du Jehova sea un twiewelst oba een bät, aus hee die waut räakjent? Wuarom motst du die secha sennen, daut Jehova werkjlich om die todoonen es? Un waut kaun die halpen, wan du beduascht, aus hee die leeft? Well wie mol seenen.

4. Wuarom es daut nich goot, aun Jehova siene Leew to twiewlen?

⁴ De Leew kaun väl aun ons doonen. Wan wie ons secha sent, daut Jehova ons leeft un biesteit, dan woa wie am mau rajcht en schwoare Tieden von gaunzen Hoaten deenen wellen. Oba wan wie doaraun twiewlen, daut Gott om ons bekjemmat es, dan woa wie “mau weinich Krauft haben” (Spr. 24:10, NW). Un wan wie mootloos woaren un beduaren, aus Gott ons leeft, dan woat de Soton mea bie ons aunfangen kjennen (Efs. 6:16).

5. Waut es met eenje jeworden, wiels dee aun Gott siene Leew twiewelden?

⁵ Eenje true Christen sent em Gloowen schwak jeworden, wiels dee Twiewel hauden. Een Eltesta, waut James heet, sajcht: “Ekj wia em Betel un uk en eene Vesaumlunk opp eene aundre Sproak un mie jinkj daut sea scheen, met dee toop to prädjen. Oba ekj beduad doawäajen, aus Jehova daut waut räakjend, waut ekj deed. Daut kjeem mau rajcht bat doa, daut ekj beduad, aus Jehova verheipts no miene Jebäda horcht.” Eva, waut uk em Voltietdeenst es, sajcht: “Daut es sea jefäadlich, wan eena doaraun twiewelt, aus Jehova eenem leeft, wiels daut schot eenem sea em jeisteljen. Eenem jankat daut dan goanich mea, waut fa Jehova to doonen, un eena velist siene Freid.” Michael, waut een Pionia un Eltesta es, sajcht: “Wan eena daut nich jleeft, daut Gott om eenem bekjemmat es, dan woat eena soo bie sacht von dän aufkomen.”

6. Waut sell wie doonen, wan wie aunfangen, aun Gott siene Leew to twiewlen?

⁶ Daut, waut dise Breeda sajen, wiest, woo sea ons daut em jeisteljen schoden kaun, wan wie denkjen, daut Gott ons nich leeft. Oba waut sell wie doonen, wan wie doch oppem Twiewel komen? Wie motten doa fuaz waut met doonen! Bäd Jehova, daut hee die doamet halpt un daut “sien Fräd” dien Hoat un diene Jedanken bewoaren kaun (Filip. 4:6-7; Psa. 139:23). Un denkj doaraun, daut du nich auleen best. Väl true Breeda un Sestren haben met dautselwje to kjamfen un mau rajcht eenje von Jehova siene Deena en de Bibeltiet. Well wie mol seenen, waut wie von dän Apostel Paulus lieren kjennen.

7. Waut fa Trubbels haud Paulus?

⁷ Hast du eenjemol soo väl to doonen, daut die daut schwierich schient, daut aula notokomen? Dan jeit die daut biejlikj soo aus Paulus. Hee wia nich bloos om eene Vesaumlunk besorcht, oba om aule Vesaumlungen (2. Kor. 11:23-27; 11:28, NW). Hast du Trubbel met de Jesuntheit, waut die foaken de Freid wajchnemt? Paulus haud uk eenen Trubbel, wua hee sea unja lieden must. Veleicht wia daut eene Krankheit, waut soo wia aus “een Stachel en daut Fleesch” un waut hee sea jieren wull looswoaren (2. Kor. 12:7-10). Best du mootloos wäajen diene ieejne Fäla? Dan jeit die daut soo aus Paulus. Hee nand sikj selfst een “älendjet Wrak”, wiels hee sikj sea aunstrenjen must, jäajen siene Onvolkomenheit to kjamfen (Reem. 7:21-24).

8. Woo kunn Paulus met siene Schwierichkjeiten foadich woaren?

⁸ Paulus wort sea aufjeprooft un haud väl Schwierichkjeiten. Oba hee deend Jehova wieda. Wua kjrieech hee de Krauft häa? Hee wist goot om siene Fäla om, oba hee jleewd faust aun daut Leesjelt. Hee wist uk, daut Jesus vesproaken haud, “daut aul dee, dee aun am jleewen, . . . daut eewje Läwen haben” wudden (Joh. 3:16; Reem. 6:23). Un Paulus jleewd opp iernst aun daut Leesjelt. Hee wia sikj gaunz secha, daut Jehova mau rajcht soone vejäwen wudd, waut growe Sinden jedonen hauden, wan dee daut werkjlich leet wia (Psa. 86:5).

9. Waut lia wie von daut, waut Paulus en Galata 2:20 säd?

⁹ Paulus wia sikj uk secha, daut Gott am väl räakjend, wiels hee wist, daut dee Jesus jeschekjt haud toom fa am stoawen (läs Galata 2:20). Doawäajen säd hee: “Ekj [läw] em Gloowen aun Gott sienen Sän, dee mie goot wia un sikj selfst fa mie hanjeef.” Paulus docht nich, daut hee soo schlajcht wia, daut Gott am goanich leewen kunn, un hee säd uk nich: “Daut es mie dietlich, wuarom Jehova miene Gloowesbreeda leeft, oba mie wudd dee kjeenmol leewen kjennen.” Paulus säd to de Reema: “Christus [storf] fa ons . . ., aus wie noch Sinda wieren” (Reem. 5:8). Gott haft opp iernst eene groote Leew fa ons!

10. Waut lia wie von Reema 8:38-39?

¹⁰ Läs Reema 8:38-39. Paulus wist, woo groot Gott siene Leew wia. Hee schreef, daut ons nuscht “von Gott siene Leew scheeden” kunn. Paulus wist, woo jeduldich  Jehova met daut Volkj Israel jewast wia. Un hee wist uk, woo väl Metleet Jehova am jewäsen haud. Doawäajen säd hee soo to sajen: “Hab ekj irjenteene Uasoak, aun Gott siene Leew to twiewlen, wan hee doch sienen ieejnen Sän jeschekjt haft toom fa mie stoawen?” (Reem. 8:32).

11. Wuarom wia Paulus sikj secha, daut Gott am leewd, wan hee no 1. Timotäus 1:12-15 no uk groote Sinden jedonen haud?

¹¹ Läs 1. Timotäus 1:12-15. Secha haud Paulus daut eenjemol schwoa met daut, waut hee ea jedonen haud. Hee säd, daut hee “de oajchsta” Sinda wia, un daut es uk nich toom wundren. Ea Paulus de Woarheit kjanen lieed, haud hee de Christen en eene Staut no de aundre sea vefolcht un eenje enjestopt un met daut Jerecht metjestemt, wan se dee dootmoaken wullen (Apj. 26:10-11). Waut jleefst du, woo jinkj Paulus daut, wan hee eenen jungen Christ bejäajend, dän siene Elren se met siene Help dootjemoakt hauden? Paulus wia daut sea schod, waut hee jedonen haud, oba hee wist, daut hee doa nuscht mea aun endren kunn. Hee jleewd, daut Christus fa am jestorwen wia, un doawäajen kunn hee schriewen: “Derch Gott siene Jnod sie ekj, waut ekj sie” (1. Kor. 15:3, 10). Waut kjenn wie doavon lieren? Jleew doaraun, daut Christus fa die jestorwen es un die daut mäajlich jemoakt haft, daut Jehova kaun dien groota Frint sennen (Apj. 3:19). Jehova kjikjt doano, waut wie von nu aun doonen un nich no de Fäla, waut wie ieeschtemma jedonen haben, endoont aus wie am to dee Tiet aul deenden ooda nich (Jes. 1:18).

12. Woo kaun 1. Johanes 3:19-20 ons halpen, wan wie jleewen, daut wie nuscht wieet sent ooda kjeene Leew vedeent haben?

¹² Wan du doaraun denkjst, daut Jesus fa diene Sinden storf, dan sajchst du  veleicht: “Ekj feel mie daut goanich wieet!” Wuarom späat sikj die daut soo? Wiels ons onvolkomnet Hoat ons leicht enbillen kaun, daut wie nuscht wieet sent un kjeene Leew vedeent haben (läs 1. Johanes 3:19-20). Dan mott wie doaraun denkjen, daut “Gott jrata [es] aus ons Hoat”. Wie motten ons daut secha moaken, daut ons himlischa Voda ons väl räakjent un ons vejäwen well. Daut wie vestonen kjennen, woo Jehova äwa ons denkjt, mott wie foaken sien Wuat studieren un emma wada to am bäden un pinkjlich met siene true Deena toop sennen. Wuarom es daut soo wichtich?

13. Woo kaun ons daut halpen, wan wie Gott sien Wuat studieren? (See uk dän Kausten “ Woo Gott sien Wuat dee halpt”.)

¹³ Studia jieda Dach Gott sien Wuat, daut du Jehova siene wundascheene Ieejenschoften noch bäta kjanen lieescht. Dan woascht du enwoaren, woo väl hee die räakjent. Wan du die jieda Dach met Gott sien Wuat aufjefst, dan kaun die daut halpen, kloara to denkjen un die selfst rajcht to seenen (2. Tim. 3:16). Een Eltesta, waut Kevin heet un sikj nuscht wieet feeld, säd: “Psalm 103 to läsen un doaräwa notojreblen haft mie jeholpen, mie selfst rajcht to seenen un to vestonen, woo Jehova werkjlich äwa mie denkjt.” Eva, wua wie ea aul von räden, sajcht: “Ekj jleich daut, mie zeowes to äwalajen, woo Jehova denkjt. Daut jeft mie Fräd em Hoat un stoakjt mie em Gloowen.”

14. Woo kaun daut bäden ons halpen?

¹⁴ Bäd foaken (1. Tess. 5:17). Wan wie met wäm Frind sennen wellen, dan mott wie foaken un gaunz op met dän räden. Krakjt soo es daut uk bie Jehova. Wan wie am sajen, waut wie denkjen, feelen un waut ons Sorjen moakt, dan bewies wie, daut wie opp am vetruen un daut wie weeten, daut hee ons väl räakjent (Psa. 94:17-19; 1. Joh. 5:14-15). Yua, wua wie ea aul von räden, sajcht: “Wan ekj bäd, dan saj ekj Jehova nich bloos, waut ekj dän Dach aules beläft hab. Ekj saj am aules, waut ekj denkj un waut ekj feel. Nu es Jehova fa mie nich mea soo aus een Wieet von eene groote Kompanie, oba soo aus een Voda, waut siene Kjinja opp iernst väl räakjent.” (See dän Kausten “Hast du daut jeläst?”)

15. Woo wiest Jehova, daut hee om ons bekjemmat es?

¹⁵ Sie met goode Frind toop. Soone Frind sent eene Gow von Jehova (Jak. 1:17). Wiels ons himlischa Voda om ons bekjemmat es, jeft dee ons Gloowesbreeda, waut “emma Leew bewiesen” (Spr. 17:17). Un Paulus räd en sienen Breef aun de Kolossa von eenje Christen, waut am biejestonen hauden un fa am “een Troost jewast” wieren  (Kol. 4:10-11). Mau rajcht Jesus Christus fäld daut eenjemol, daut siene Frind oppe Ieed ooda de Enjel am holpen, un hee wia doa uk dankboa fäa (Luk. 22:28, 43).

16. Woo kjennen goode Frind ons halpen, Jehova noda to komen?

¹⁶ Latst du die von de goode Frind halpen, waut Jehova die jejäft haft? Wan wie met eenen erfoarnen Frint äwa onse Sorjen räden, kaun daut een Schutz sennen. Daut bediet oba nich, daut wie schwak sent. James, wua wie ea aul von räden, sajcht: “Daut haft mie aul sea jeholpen, daut ekj erfoarne Christen to Frind haud. Wan ekj mie schlajcht feel, dan horchen dise leewe Frind mie jeduldich too un sajen mie, daut see mie väl räakjnen. Doaderch woa ekj en, daut Jehova mie leeft un om mie bekjemmat es.” Daut es sea wichtich, daut wie met onse Gloowesbreeda goode Frind woaren un uk bliewen.

17-18. No wäm sell wie horchen, un wuarom?

¹⁷ De Soton well, daut wie oppjäwen un ons nich mea aunstrenjen, daut rajchte to doonen. Hee well ons enbillen, daut Jehova ons nuscht räakjent un daut wie daut goanich wieet sent, jerat to woaren. Oba soo aus wie jeseenen haben, es daut plaut jeloagen!

¹⁸ Jehova leeft die. Du best väl wieet bie am. Un wan du am jehorchst, dan woat hee die fa emma “goot sennen”, krakjt soo aus hee Jesus goot es (Joh. 15:10). Horch nich no dän Soton un lot die uk nich von dien onvolkomnet Hoat enbillen, daut Jehova die nich leeft. Enne Städ daut horch no Jehova, waut en jiedrem eenen daut goode sitt! Un sie die gaunz secha, daut hee “sikj to sien Volkj [freit]”, un doa best du uk met en.