1-2. Woo wia daut, aus Jesus de latste Wieed ver sienen Doot säd?

WAUT beläwd Jesus dän 14. Nissan aune 33? Hee wort ojjerajcht beschulcht un fa waut veuadeelt, waut hee goanich jedonen haud. Dan wort hee vespott, sea jekjwält un aun eenen Pol jehongen. Hee haud Näajel derch siene Henj un Feet. Un jiedatsmol, wan hee odmen ooda waut sajen deed, deed am daut sea wee. Oba hee must doawäajen räden, wiels hee waut wichtjet to sajen haud.

² Well wie mol seenen, waut Jesus ver sienen Doot noch säd un waut wie doavon lieren kjennen un woo wie no am horchen kjennen (Mat. 17:5).

3. Von wäm räd Jesus woomäajlich, aus hee säd: “Voda, vejeff an”?

³ Waut säd Jesus? Aus se Jesus aun dän Pol noagelden, bäd hee un säd: “Voda, vejeff an”! Wäm sull hee vejäwen? Daut wiesen de Wieed, waut Jesus daut näakjste säd: “See weeten nich waut see doonen!” (Luk. 23:33-34). Woomäajlich räd Jesus von de reemische Soldoten, waut am Näajel en de Henj un en de Feet nenkjielden. Dee wisten nich, wäa Jesus en Werkjlichkjeit wia. Veleicht docht hee uk aun eenje, waut sienen Doot velangt hauden, oba waut lota aun am jleewen wudden (Apj. 2:36-38). Jesus haud daut nich vedeent, daut se am dootmuaken, oba hee wort doawäajen nich doll ooda vebettat (1. Pet. 2:23). Enne Städ daut fruach hee Jehova om Vejäwunk fa dee, waut am dootmoaken wudden.

4. Waut kjenn wie doavon lieren, daut Jesus reed wia, siene Jäajna to vejäwen?

 ⁴ Waut kjenn wie von Jesus siene Wieed lieren? Wie motten reed sennen aundre to vejäwen, soo aus Jesus (Kol. 3:13). Ons Frintschoft ooda aundre sent veleicht jäajen ons, wiels dee nich vestonen kjennen, waut wie jleewen un woo wie läwen. Veleicht vetalen dee Läajes äwa ons, beleidjen ons ver aundre, moaken onse Bieekja twei ooda sajen mau rajcht, daut see ons waut aundoonen woaren. Oba wie bliewen nich doll äwa dee. Wie froagen Jehova doano, daut dee an mucht de Uagen opmoaken, daut dee de Woarheit uk kjanen lieren kjennen (Mat. 5:44-45). Eenjemol kaun daut schwoa sennen, to vejäwen, besonda wan se ons sea ojjerajcht behaundelt haben. Oba wan wie doll ooda vebettat bliewen, dan schod wie ons selfst. Eene Sesta säd: “Wan ekj wäm togood hool, dan bediet daut nich, daut daut rajcht es, waut dee jedonen haft, ooda daut ekj mie von aundre utnutzen lot. Daut bediet eefach, daut ekj opphia, dän doll to bliewen” (Psa. 37:8). Wan wie wäm vejäwen, dan woa wie ons eenich nich doll to bliewen äwa daut schlajchte, waut wie beläft haben (Efs. 4:31-32).

5. Waut vespruak Jesus eenen von de Reiba, waut met am toop dootjemoakt worden, un wuarom?

⁵ Waut säd Jesus? Met Jesus toop worden uk twee Reiba dootjemoakt. Aum Aunfank deeden dee uk äwa am spotten (Mat. 27:44). Oba lota endad sikj eena von dee. Hee wort en, daut Jesus “nuscht ojjeschekjtet jedonen” haud (Luk. 23:40-41). Un hee bewees uk, daut hee doaraun jleewd, daut Jesus wudd vom Doot oppjewakjt woaren un irjentwanea aus Kjennich rejieren. Hee säd to Jesus: “Har, denkj aun mie, wan du en dien Rikj nenn kjemst!” (Luk. 23:42). Wiest daut nich grooten Gloowen? Doawäajen säd Jesus to am: “Ekj vespräakj die vondoag: ‘Du woascht met mie em Paradies sennen [oba nich en daut Kjennichrikj]’” (Luk. 23:43, NW). Daut es oppfaulent, daut Jesus hia de Wieed “ekj”, “die” un “mie” brukt, wiels daut wiest, daut daut een Vespräakjen tweschen dee beid wia. Jesus kunn disen Reiba Hopninj jäwen, wiels hee wist, woo väl Metleet sien Voda haud (Psa. 103:8).

6. Waut lia wie von daut, waut Jesus to dän Reiba säd?

⁶ Waut kjenn wie von Jesus siene Wieed lieren? Jesus es krakjt soo aus sien Voda (Heb. 1:3). Jehova es wellich reed ons to vejäwen un Metleet to wiesen. Oba daut hee daut deit, mott ons daut schlajchte, waut wie jedonen haben, opp iernst leet sennen un wie motten aun Jesus Christus sien Opfa jleewen (1. Joh. 1:7). Eenje kjennen daut meist nich jleewen, daut Jehova an wudd kjennen togood hoolen. Waut kaun die halpen, wan die daut mol soo jeit? Du wurscht kjennen doaräwa nodenkjen, daut Jesus ver sienen Doot dän Reiba Metleet wees, waut veuadeelt wia un noch mau jroz aunjefongen haud, aun am to jleewen. Woo väl ea wudd Jehova dan nich siene true Deena Metleet wiesen, waut sikj sea aunstrenjen, siene Jebooten notokomen! (Psa. 51:3; 1. Joh. 2:1-2).

7. Waut säd Jesus no Johanes 19:26-27 no to Maria un to Johanes, un wuarom?

⁷ Waut säd Jesus? (Läs Johanes 19:26-27.) Jesus siene Mutta wia woomäajlich aul eene Wätfru un Jesus wia om  ar bekjemmat. Sien Jeschwista haud secha kunt em tieteljen fa ar sorjen. Oba wäa wudd ar em jeisteljen halpen? Daut späat sikj soo, daut Jesus siene Breeda to jane Tiet noch nich aun am jleewden. Oba Johanes wia een trua Apostel un eent von Jesus siene baste Frind. Fa Jesus wieren deejanje, waut met am toop Jehova deenden, siene jeistelje Famielje (Mat. 12:46-50). Un wiels Jesus Maria leewd un om ar todoonen wia, säd hee, daut Johanes sikj om ar kjemren sull. Hee wist, daut dee uk em jeisteljen fa ar sorjen wudd. Doawäajen säd hee to siene Mutta: “Fru, kjikj emol, daut es dien Sän!” Un to Johanes säd hee: “Kjikj emol, daut es diene  Mutta!” Von doa aun wia Johanes fa Maria soo aus een Sän un kjemmad sikj soo om ar, aus wan see siene Mutta wia. Jesus wees groote Leew fa de feine Fru, waut am to Welt jebrocht haud un waut uk noch bie am wia, aus hee storf.

8. Waut kjenn wie von daut lieren, waut Jesus to Maria un to Johanes säd?

⁸ Waut kjenn wie von Jesus siene Wieed lieren? Veleicht feel wie ons met onse Gloowesbreeda dolla vebungen aus met onse Famielje. Ons Frintschoft es veleicht jäajen ons ooda lat ons em Stäakj, oba Jesus vespruak je, daut wie “100 mol sooväl” trigjkjrieen wudden, wan wie ons aun Jehova un aun siene Organisazion hoolen wudden. Wie woaren een deel leeftolje Säns, Dajchta, Mitta ooda Vodasch kjrieen (Mar. 10:29-30). Freist du die nich, daut du to eene veeende jeistelje Famielje jehieren kaust, waut dänselwjen Gloowen haben? Dee haben Leew fa Jehova un uk unjarenaunda (Kol. 3:14; 1. Pet. 2:17).

9. Waut jäwen Jesus siene Wieed en Matäus 27:46 auntovestonen?

⁹ Waut säd Jesus? Ea Jesus storf, roopt hee: “Mien Gott, mien Gott, wuarom hast du mie veloten?” (Mat. 27:46). De Schreft sajcht nich, wuarom Jesus daut säd. Waut jäwen dise Wieed auntovestonen? Eent es, daut sikj derch dise Wieed de Profezeiunk en Psalm 22:2 erfeld. * Dise Wieed wiesen uk, daut Jehova sienen Sän “nich von jieda Jefoa beschizt” haft (Hiob 1:10). Jesus wist, daut sien Voda am gaunz aun siene Fiend äwajäft haud, daut dee am batem Doot aufproowen kunnen. Kjeen aundra Mensch wort jeemols soo sea aufjeprooft. Un dise Wieed wiesen uk, daut Jesus nuscht jedonen haud, wuafäa hee stoawen must.

10. Waut kjenn wie von de Wieed lieren, waut Jesus to sienen Voda säd?

¹⁰ Waut kjenn wie von Jesus siene Wieed lieren? Eent es, daut wie nich doamet räakjnen sellen, daut Jehova ons von jieda Proow beschitzen woat. Krakjt soo aus Jesus mott wie uk reed sennen, batem Doot tru to bliewen (Mat. 16:24-25). Oba wie kjennen ons secha sennen, daut Gott nich tooloten woat, daut wie schwanda aufjeprooft woaren, aus wie vedroagen kjennen (1. Kor. 10:13). Wie kjennen uk lieren, daut wie woomäajlich uk ojjerajcht lieden motten, soo aus Jesus (1. Pet. 2:19-20). Onse Jäajna vefoljen ons nich, wäajen wie waut orrajchtet jedonen haben, oba wäajen wie nich Poat von de Welt sent un fa de Woarheit enstonen (Joh. 17:14; 1. Pet. 4:15-16). Jesus wist, wuarom Jehova daut tooleet, daut hee lieden must. Oba aundre true Deena von Gott haben eenjemol beduat, wuarom Jehova jewesset tooleet (Hab. 1:3). Ons leeftolja un jeduldja Gott weet, daut soone nich em Gloowen schwak jeworden sent. Dee fält bloos Troost von am (2. Kor. 1:3-4).

11. Wuarom säd Jesus de Wieed von Johanes 19:28?

¹¹ Waut säd Jesus? (Läs Johanes 19:28.) Wuarom säd Jesus: “Mie darscht”? Hee säd daut, “doamet de Schreft erfelt wort”. En Psalm 22:16 wia je verutjesajcht: “Miene Krauft es soo aus drieeje Schoawels, un de Tung bakt mie  aum Bän aun”. Jesus fäld daut uk aun Help, daut dee waut drinkjen kunn, wiels hee aul väl jeläden haud un doa aum Pol groote Weedoag haud.

12. Waut kjenn wie doavon lieren, daut Jesus säd: “Mie darscht”?

¹² Waut kjenn wie von Jesus siene Wieed lieren? Jesus schämd sikj nich, aundre to sajen, woo hee sikj feeld, un wie sellen daut uk nich. Eenje jleichen daut woomäajlich nich, aundre no Help to froagen. Oba wan ons Help fält, dan sell wie ons nich trigjhoolen, aundre daut to sajen. Wan wie biejlikj ella ooda krank sent, dan mott wie veleicht eenen Frint froagen, daut dee ons nom Stua ooda nom Dokta fieet. Un wan wie mootloos ooda betriept sent, dan mott wie eenen Eltesten ooda eenen aundren erfoarnen Frint froagen, daut dee ons toohorcht ooda treest (Spr. 12:25). Denkj doaraun, daut diene Gloowesbreeda die leewen un daut dee die “em Trubbel biestonen” wellen (Spr. 17:17). Oba dee weeten nich, waut du denkjst un woo du die feelst. Veleicht woaren dee nich en, daut die Help fält, wan du dee daut nich sajchst.

13. Waut fa goodet brocht daut, daut Jesus batem Doot tru bleef?

¹³ Waut säd Jesus? Aun dän 14. Nissan rom Klock dree no Meddach säd Jesus: “Nu es aules foadich jebrocht!” (Joh. 19:30). Ea Jesus storf, wist hee, daut hee aules jedonen haud, waut Jehova sikj von am wenscht. Daut brocht väl goodet, daut Jesus batem Doot tru bleef. Ieeschtlich bewees hee, daut de Soton een Läajna wia. Jesus bewees, daut een volkomna Mensch Jehova en aules tru bliewen kunn, endoont waut de Soton dän aundeed. Tweedens jeef Jesus sien Läwen aus een Leesjelt. Doaderch wort daut mäajlich, daut onvolkomne Menschen kunnen Frind met Gott woaren un daut eewje Läwen kjrieen. Dreddens bewees Jesus, daut Jehova een jerajchta Harscha wia, un muak dän eenen gooden Nomen.

14. To waut sell wie ons jieda Dach eenich sennen? Laj daut ut.

¹⁴ Waut kjenn wie von Jesus siene Wieed lieren? Wie motten ons jieda Dach eenich sennen tru to bliewen. Well wie mol seenen, waut Brooda Maxwell Friend säd, waut een Liera bie de Gilead-Bibelschool wia. Opp eenen internazionalen Kongress räd dee äwa tru sennen un säd: “Wan du vondoag waut sajen ooda doonen kaust, dan schuw daut nich opp. Woo weetst du, aus du morjen noch läwen woascht? Läw jieda Dach soo, aus wan daut diene latste Jeläajenheit es, daut eewje Läwen to kjrieen.” Well wie jieda Dach soo läwen, aus wan daut onse latste Jeläajenheit es, tru to bliewen. Un wan wie dan wudden stoawen motten, dan wudd wie kjennen sajen: “Jehova, ekj hab mien bastet jedonen, om die tru to bliewen un to bewiesen, daut de Soton een Läajna es, un om fa dienen Nomen un fa diene Harschoft entostonen!”

15. Waut fa een Vetruen haud Jesus no Lukas 23:46 no?

¹⁵ Waut säd Jesus? (Läs Lukas 23:46.) Met een vollet Vetruen säd Jesus: “Voda, ekj befäl mienen Jeist en diene Henj!” Jesus wist, daut sien Läwen nu en Jehova siene Henj wia. Un hee wia sikj gaunz secha, daut dee am vom Doot oppwakjen wudd.

16. Waut hast du von dän 15-joaschen Joshua jelieet?

 ¹⁶ Waut kjenn wie von Jesus siene Wieed lieren? Sie reed, Jehova batem Doot tru to bliewen. Daut du daut kaust, motst du “met dien gaunzet Hoat” opp am vetruen (Spr. 3:5). See wie mol, waut de 15-joascha Joshua säd. Hee haud eene schlemme Krankheit un deed nich met soont doktren, waut jäajen Gott sien Jesaz wia. Een Stoot ver sienen Doot säd hee to siene Mame: “Mame, ekj sie gaunz en Jehova siene Henj. . . . Ekj sie mie gaunz secha, daut Jehova mie wada toom Läwen brinjen woat. Hee weet, waut ekj em Hoat hab, un ekj leew am opp iernst.” * Jieda eena von ons wudd sellen nodenkjen: “Wudd ekj reed sennen, batem Doot tru to bliewen un mie doaropp to veloten, daut Jehova mie vom Doot oppwakjt, wan ekj wudd aufjeprooft woaren?”

17-18. Waut hab wie jelieet? (See uk dän Kausten “ Waut lia wie von Jesus siene latste Wieed?”)

¹⁷ Woo väl wie nich von Jesus siene latste Wieed lieren kjennen! Dee wiesen ons, daut wie aundre vejäwen sellen un doaropp vetruen, daut Jehova ons uk vejäwen woat. Wie freien ons, daut wie een deel Gloowesbreeda un Sestren haben, waut emma reed sent ons to halpen. Oba wan ons Help fält, dan sell wie dee uk doano froagen. Wie weeten, daut Jehova ons halpen woat, met aule Schwierichkjeiten foadich to woaren. Un wie haben uk jeseenen, daut wie jieda Dach soo läwen sellen, aus wan daut onse latste Jeläajenheit wia, Jehova tru to bliewen, un daut wie ons doaropp veloten sellen, daut Jehova ons mau rajcht vom Doot oppwakjen kaun.

¹⁸ Von de Wieed, waut Jesus doa aum Pol säd, kjenn wie werkjlich väl lieren! Wan wie daut nokomen, waut wie lieren, dan jehorch wie uk Jehova. Hee säd je von sienen Sän: “Horcht no am!” (Mat. 17:5).