1. Waut kjenn wie ons em jeisteljen väanämen?

 AUS woare Christen leew wie Jehova sea. Wie wellen am en onsen Deenst daut baste jäwen. Toom daut doonen, mott wie ons em jeisteljen waut väanämen, soo aus aun christelje Ieejenschoften schaufen, ons goode Sachen lieren un no Jeläajenheiten sieekjen, waut fa aundre to doonen.

2. Wuarom sell wie ons em jeisteljen waut väanämen un daut uk proowen notokomen?

² Wuarom well wie ons em jeisteljen vebätren? Hauptsechlich doawäajen, wiels wie onsen leeftoljen himlischen Voda jefaulen wellen. Jehova freit sikj, wan wie onse Fäichkjeiten brucken, om am to deenen. Buta daut kjenn wie onse Gloowesbreeda bäta halpen, wan wie ons em jeisteljen vebätren (1. Tess. 4:9-10). Wie aula kjennen ons em jeisteljen vebätren, endoont, woo lang wie aul enne Woarheit sent. See wie mol, woo daut schauft.

3. Waut rod de Apostel Paulus Timotäus too, soo aus 1. Timotäus 4:12-16 wiest?

³ Timotäus wia een junga Maun, aus de Apostel Paulus sienen ieeschten Breef aun am schreef, un hee haud aul een schoof Erfoarunk aus Eltesta. Oba Paulus rod am doawäajen too, em jeisteljen wieda verauntokomen (läs 1. Timotäus 4:12, 14-16; 4:13, JHF *). Wan wie äwa Paulus siene Wieed nodenkjen, dan felt ons opp, daut hee von Timotäus haben wull, daut hee aun christelje Ieejenschoften schaufen sull, soo aus aune Leew, Gloowen un Reinheit un sikj en Sachen vebätren sull, soo aus em väaläsen, vemonen un lieren. Wie  woaren äwa Timotäus sien Biespel räden un seenen, woo ons daut halpt, wan wie ons em jeisteljen waut väanämen. Wie woaren uk eenje Mäajlichkjeiten seenen, woo wie mea em Deenst fa Jehova doonen kjennen.

4. Wuarom kunn Jehova Timotäus no Filippa 2:19-22 no soo goot brucken?

⁴ Wuarom kunn Jehova Timotäus soo goot brucken? Wäajen hee besondre christelje Ieejenschoften haud (läs Filippa 2:19-22). Soo aus de Apostel Paulus von Timotäus schrift, kjenn wie seenen, daut hee deemootich, flietich, tru un opp to veloten wia. Hee wia leeftolich un sea om de Breeda bekjemmat. Doawäajen jleicht Paulus Timotäus soo sea, un hee hilt sikj nich trigj, am schwoare Oppgowen to jäwen (1. Kor. 4:17). Wan wie uk aun soone Ieejenschoften schaufen, waut Jehova jleicht, dan woat hee ons leewen un wie woaren mea en siene Organisazion doonen kjennen (Psa. 25:9; 138:6).

5. (a) Waut kaust du doonen, om aun eene jewesse christelje Ieejenschoft to schaufen? (b) Woo schauft de junge Sesta doaropp, mea Metjefeel fa aundre to haben, soo aus daut Bilt wiest?

⁵ Nemm die waut väa, waut du krakjt doonen west. Bäd un denkj doaräwa no, woo du die vebätren kaust. Läs die ut, aun woone Ieejenschoft du schaufen west. Wurscht du biejlikj kjennen mea Metjefeel haben fa aundre ooda eenen jratren Wensch haben, diene Gloowesbreeda to halpen? Motst du doaraun schaufen, dolla no Fräd to sträwen un ea reed sennen toom vejäwen? Daut kaun fa die uk eene Help sennen, aundre erfoarne Breeda to froagen, aun waut du schaufen kaust (Spr. 27:6).

6. Waut kaun die halpen, die en eene jewesse Ieejenschoft to vebätren?

⁶ Proow daut to volbrinjen, waut du die väajenomen hast. Woo kaust du daut doonen? Eent wudd sennen, die de Ieejenschoft goot to unjastonen, aun woone du schaufen west. Saj wie mol, du west doaraun schaufen, ea reed sennen toom vejäwen. Doatoo wurscht du ieescht mol kjennen soone Biespels enne Schreft läsen, waut reed wieren toom vejäwen un soone, waut daut nich wieren. Denkj wie mol aun Jesus. Hee wia wellich reed, aundre to vejäwen (Luk. 7:47-48). Hee kjikjt nich no dee äare Fäla, oba no dee äare goode Sieden. Oba de Farisäa kjikjten “opp aundre rauf” (Luk. 18:9). Wan du die dan  soone Biespels unjasocht hast, wurscht du kjennen äwalajen: “Woo see ekj aundre? No waut vonne Ieejenschoft von dee kjikj ekj?” Wan die daut schwoa felt, aundre to vejäwen, dan schriew die von dee soo väl goode Ieejenschoften opp aus du kaust. Dan äwalaj: “Woo denkjt Jesus äwa dänjanjen? Wudd hee reed sennen, am to vejäwen?” Wan wie äwa soone Sachen studieren, woat ons daut halpen, ons denkjen wada trajchttostalen. Aum Aunfank woat ons daut veleicht nich leicht sennen, soone to vejäwen, waut ons weejedonen haben. Oba wan wie wieda doaraun schaufen, dan woat ons daut met de Tiet leichta sennen.

7. Woo brukt Jehova vondoag dän Dach soone Breeda, waut sikj fein met Sachen vestonen, soo aus Spricha 22:29 wiest?

⁷ Eena kaun sikj uk väanämen, sikj waut goodet to lieren. Denkj doaraun, woo väl Breeda doa needich sent, om Betels, Kongresshiesa ooda Vesaumlungshiesa to buen. Väl von dise Breeda haben sikj soont jelieet, wäajen dee met aundre toopschauften, waut sikj doa fein met vestunden. Soo aus opp daut Bilt jewäsen woat, lieren Breeda un Sestren daut, Kongresshiesa un Vesaumlungshiesa to unjahoolen. En dise un en aundre Stekjen kaun Jehova Gott, de eewja Kjennich, un Jesus Christus, “de Kjennich äwa aule Kjennichs,” väl volbrinjen derch Breeda, waut daut brucken, wua see sikj met vestonen (1. Tim. 1:17; 6:15; läs Spricha 22:29). Wie wellen ons aunstrenjen un onse Fäichkjeiten brucken toom Jehova lowen un nich ons selfst (Joh. 8:54).

8. Waut kaust du doonen, wan du die waut lieren west?

⁸ Nemm die väa, waut du krakjt doonen west. Waut wurscht du die lieren kjennen? Froag de Eltestasch von diene Vesaumlunk un veleicht dän Kjreisoppsechta, waut du die wurscht lieren kjennen. Wan dee biejlikj sajen, daut du die doarenn vebätren kaust, een bätra Rädna un Liera to woaren, dan froag dee, aun waut du krakjt schaufen kaust. Un dan strenj die aun, daut uk notokomen. Woo krakjt wurscht du daut doonen kjennen?

9. Waut kaun die halpen, daut du die waut nieet lieren kaust?

⁹ Proow daut to volbrinjen, waut du die väajenomen hast. Saj wie mol, du west doaraun schaufen, een bätra Liera to woaren. Du wurscht kjennen daut Heft Eew die em läsen un lieren fein studieren. Wan du eene Oppgow kjrichst en daut Toopkomen enne Wäakj, dan froag eenen erfoarnen Brooda, aus dee die toohorchen well, wan du de Oppgow eefst un die sajen saul, wua du die vebätren kaust. Moak die emma enne Tiet reed fa diene Oppgowen. Dan woaren aundre seenen, daut du die aunstrenjst un opp to veloten best (Spr. 21:5; 2. Kor. 8:22).

10. Waut fa een Biespel wiest, daut eena sikj waut lieren kaun, wan daut uk nich leicht es?

¹⁰ Waut, wan du die waut lieren west, waut die nich leicht es? Dan woa nich mootloos! Eenen Brooda, waut Garry heet, foll daut sea schwoa to läsen. Hee weet noch, woo hee sikj schämd, wan hee bie een Toopkomen proowd waut väatoläsen. Oba hee strenjd sikj wieda sea aun. Wäajen aundre am holpen, sajcht hee, kaun hee nu bie de Toopkomes un Kongressen Räden hoolen!

11. Waut kaun ons halpen, mea en Jehova sienen Deenst to doonen soo aus Timotäus?

¹¹ Wort Timotäus een besondra Rädna un Liera? De Bibel sajcht daut nich. Oba secha kunn hee siene Oppgowen bäta doonen,  wäajen hee sikj aun Paulus sienen Rot hilt (2. Tim. 3:10). Krakjt soo kjenn wie uk mea en Jehova sienen Deenst doonen, wan wie ons doarenn eewen, waut wie lieren.

12. Woo es die aundre äaren Deenst togood jekomen?

¹² Ons aula kjemt de Deenst von aundre togood. Wan wie biejlikj em Hospitol sent, dan sent wie sea dankboa, wan de Eltestasch, waut en de Hospitol-Vemedlungs-Kommitees sent ooda bie de Besuchsgruppen fa Kranke em Hospitol, ons besieekjen. Wan wie waut schwoaret em Läwen derchmoaken, dan räakjen wie daut väl, wan een Eltesta ons toohorcht un Moot toosprakjt. Wie sent uk schaftich, wan een erfoarna Pionia bie ons Studium met bie es un ons gooden Rot jeft. Aul dise Breeda un Sestren sent schaftich, daut dee ons halpen kjennen. Wie kjennen uk dise Freid beläwen, wan wie reed sent, onse Breeda to halpen. Jesus säd: “Jäwen es seelja [ooda moakt schaftja] aus nämen”(Apj. 20:35). Waut woat die halpen, wan du en dit ooda en aundre Stekjen noch mea em Deenst fa Jehova doonen west?

13. Aun waut mott eena denkjen, wan eena sikj waut väanemt?

¹³ Nemm die krakjt väa, no waut du sträwen west. Veleicht denkjst du soo: “Ekj wudd jleichen mea enne Vesaumlunk mettohalpen.” Oba dit sajcht die noch nich, waut daut krakjt es un doawäajen kaun daut schwoa sennen to weeten, woo du daut doonen kaust. Du woascht veleicht nienich krakjt weeten, aus du daut aul nojekomen best. Doawäajen es daut bäta, sikj krakjt väatonämen, waut eena well. Du wurscht die daut mau rajcht oppschriewen kjennen, waut du die väanemst un woo du daut doonen west.

14. Wuarom mott wie ons aunpaussen, wan wie ons waut väanämen?

¹⁴ Wie motten ons uk aunpaussen, wan wie ons waut väanämen. Wuarom? Wiels wie nich de gaunze Kontroll haben äwa de Omstend. Paulus holp Biejlikj opp eene Sauz met, en de Staut Tessalonich eene niee Vesaumlunk opptostalen. Un secha haud hee sikj väajenomen, doa to bliewen un de niee Christen to halpen. Oba Jäajna brochten daut bat doa, daut hee veloten  must (Apj. 17:1-5, 10). Wan Paulus doa jebläwen wia, wudd hee siene Breeda haben en Jefoa jebrocht. Oba hee hieed doawäajen nich opp, siene Breeda to halpen. Hee paust sikj aun de Omstend aun un schekjt Timotäus no de Staut Tessalonich, daut dee de niee Christen em jeisteljen biestonen kunn (1. Tess. 3:1-3). Woo schaftich de Breeda doa nich motten jewast sennen, daut Timotäus reed wia, doa mettohalpen, wua daut fäld.

15. Waut kjennen de Omstend aun daut doonen, waut wie ons väajenomen haben? Jeff een Biespel.

¹⁵ Wie kjennen von daut lieren, waut Paulus en Tessalonich beläwd. Veleicht sträw wie no eene Oppgow, oba de Omstend loten daut nich too, daut wie dee kjrieen (Liera 9:11). Wan daut bie die soo es, dan nemm die soont väa, waut fa die mäajlich es. Krakjt dit beläwden eene Lied, waut Ted un Hiedi heeten. Wäajen de Jesuntheit kunnen see nich lenja em Betel bliewen. Oba äare Leew fa Jehova brocht an bat doa, daut see no aundre Mäajlichkjeiten sochten, woo see mea em Deenst doonen kunnen. Daut ieeschte fungen see met dän Pioniadeenst aun. Met de Tiet worden see dan Sondapionia un Ted wort utjelieet aus Kjreisoppsechta-Veträda. Oba dan endad sikj daut Ella, bat woo lang eena kunn Kjreisoppsechta sennen. Ted un Hiedi worden en, daut et fa an wäajen daut Ella nich mea wudd mäajlich sennen. Wan dee uk mootloos wieren, kunnen dee oba vestonen, daut et noch aundre Mäajlichkjeiten jeef, woo see Jehova deenen kunnen. Ted sajcht: “Wie haben jelieet, daut et veschiedne Wäaj jeft, woo eena Jehova deenen kaun.”

16. Waut lia wie von Galata 6:4?

¹⁶ Wie haben nich de Kontroll doaräwa, waut en ons Läwen aules aunjeit. Doawäajen es daut wichtich, daut wie nich denkjen, daut Jehova ons wäajen onse Oppgowen leeft. Wie sellen ons uk nich met daut vejlikjen, waut aundre doonen kjennen. Hiedi sajcht: “Eena velist sienen Fräd, wan eena sien Läwen met daut vejlikjt, waut aundre beläwen kjennen” (läs Galata 6:4). Daut es wichtich doano to kjikjen, waut wie em Deenst fa Jehova doonen kjennen. *

17. Woo kaust du doaropp schaufen, Oppgowen en Jehova sienen Deenst to kjrieen?

¹⁷ Du woascht en Jehova sienen Deenst mea Oppgowen kjrieen, wan du een eefachet Läwen fieescht un die nich onneedich enne Schult endukst. Nemm die kjlandre Sachen väa, waut die halpen, no jratret to  sträwen. Wan du die biejlikj väajenomen hast, noch mol Pionia to woaren, wurscht du dan kjennen doamet aunfangen, jieda Moonat Pioniahelpa to sennen? Un wan du west Deenstaumthelpa woaren, wurscht du dan kjennen mea em Prädichtdeenst sennen un de kranke un elre Breeda vonne Vesaumlunk besieekjen? Daut woat die halpen, lota mea Oppgowen en Jehova sienen Deenst to kjrieen. Sie die aulsoo eenich, de Oppgowen soo goot aus mäajlich to doonen, waut du kjrichst (Reem. 12:11).

18. Waut lieescht du von Beverley, waut opp daut Bilt to seenen es?

¹⁸ Eena es nienich too oolt, sikj em jeisteljen waut väatonämen. Näm wie mol daut Biespel von eene Sesta, waut Beverley heet un aul 75 Joa es. See haud iernste Trubbels met de Jesuntheit, un doawäajen kunn see meist nich gonen. Oba see wull jieren soo väl aus mäajlich methalpen, de Menschen toom Owentmol enloden. Doawäajen neem see sikj waut väa. Un aus see daut dan kunn volbrinjen, wia see sea schaftich. Äa Biespel holp mau rajcht aundre, em Deenst uk äa bastet to jäwen. Jehova schazt daut sea, waut de elre Breeda un Sestren doonen kjennen, wan daut wäajen äare Omstend uk nich väl es (Psa. 71:17-18).

19. Waut kjenn wie ons em jeisteljen väanämen?

¹⁹ Nemm die soont väa, waut du uk volbrinjen kaust. Schauf aun Ieejenschoften, waut Jehova jefaulen. Lia die soone Sachen, daut du noch mea fa Gott un siene Organisazion doonen kaust. Sieekj no Jeläajenheiten, woo du diene Gloowesbreeda noch bäta halpen kaust. * Met Jehova siene Help woascht du kjennen soo aus Timotäus noch doarenn toonämen, soo daut aundre daut veleicht mau rajcht seenen woaren (1. Tim. 4:15).