WAN wie Angst haben, kaun ons daut oppem Hoaten sea schwoa sennen (Spr. 12:25). Best du en dien Läwen mol groote Angst un Sorjen derchjegonen? Hast du mol jedocht, daut du wurscht unja dien schwoaret toopbräakjen? Wan jo, dan best du nich de eensja. Eenje sorjen veleicht fa eenen Kranken enne Famielje. Aundre haben must wäm begrowen, dän see väl jeräakjent haben. Noch aundre lieden veleicht wäajen een Owwada ooda wäajen an waut aundret sea toosat. Waut kaun ons dan halpen, met soone Angst un Sorjen foadich to woaren? *

Wie kjennen väl lieren, woo wie kjennen met onse Angst foadich woaren, wan wie ons dän Kjennich David sien Biespel unjastonen. Hee beläwd sea väl schwoaret, un eenjemol wia soogoa sien Läwen opp Spell (1. Sam. 17:34-35; 18:10-11). Woo kunn David met dise Angst foadich woaren? Un woo kjenn wie am nodoonen?

David haud miere Trubbels opp eemol. Denkj mol doaraun, waut don wort, aus hee sikj fa dän Kjennich Saul fuatbrinjen must, waut am wull dootmoaken. Aus David un siene Mana opp eene Sauz no Hus no Ziklag kjeemen, worden see en, daut äare Fiend an aules fuatjestolen hauden un äare Hiesa vebrent un äare Famieljes metjenomen hauden. Waut deed David dan? Daut sajcht: “David un siene Mana schrieejen un hielden, bat see nich mea Krauft toom hielen hauden.” Butadäm räden siene Mana “von am steenjen” (1. Sam. 30:1-6). David haud dree groote Trubbels opp eemol: Siene Famielje wia en Jefoa, hee haud Angst, daut siene ieejne Mana am wudden dootmoaken un hee must sikj uk noch fa dän Kjennich Saul vestäakjen. Denkj mol han, woo schwoa daut fa David mott jewast sennen!

Waut deed David dan? Hee stoakjt sikj fuaz “en däm HARN sienen Gott”. Woo deed David daut? Na jo, wie weeten, David fruach Jehova emma no Help un docht doaräwa no, waut Jehova ea aul fa am jedonen haud (1. Sam. 17:37; Psa. 18:3, 7). David wist, daut hee Jehova no Rot froagen must, un hee deed daut uk. Fuaz nodäm aus David von Jehova Aunwiesungen jekjräajen haud, kjeem hee dee no. Un wiels Jehova met am wia, kunnen hee un siene Mana aulet Jestolne un de Famieljes wada trigjholen (1. Sam. 30:7-9, 18-19). Hast du jeseenen, woone dree Sachen David deed? Hee bäd Jehova om Help, docht doaräwa no, waut Jehova aul fa am jedonen haud un kjeem daut fuaz no, waut Jehova fa Aunwiesungen jeef. Woo kjenn wie am nodoonen? See wie mol dreeatlei.

1. Bäden. Wan wie Angst haben, kjenn wie Jehova emma no Help un Weisheit froagen. Ons woat daut sea väl halpen, wan wie Jehova aules vetalen, waut wie oppem Hoaten haben. Wie kjennen uk opp stelles een kortet Jebäd sajen, doano woo onse Loag jroz es. Emma, wan wie to Jehova bäden un am om Help froagen, wies wie, daut wie krakjt soo sea opp am vetruen, aus David deed, waut doa säd: “De HAR es miene von Steen bebude Staut, mienen sechren Schutz, un dee, dee mie raden deit. Mien Gott es mien Steen, hinja dän ekj secha sto” (Psa. 18:3). Kaun bäden  werkjlich waut doonen? Eene Pioniasesta, waut Kahlia heet, sajcht: “Nodäm daut ekj jebät hab, hab ekj wada ennalich Fräd. Bäden halpt mie, daut ekj soo denkj, aus Jehova deit un dolla opp am vetru.” Daut Jebäd haft väl Macht un es een Jeschenkj von Jehova, waut ons halpt, wan wie groote Sorjen haben.

2. Nodenkjen. Wan du soo trigjdenkjst, hast du mol waut beläft, wua du denkjst, daut du daut bloos hast kunt uthoolen, wiels Jehova die jeholpen haft? Wan wie doaräwa nodenkjen, daut Jehova ons krakjt soo halpt, aus hee siene Deena ieeschtemma deed, dan kjrie wie wada Krauft un noch een jratret Vetruen (Psa. 18:18-20). Joshua, een Eltesta, sajcht: “Ekj hab mie eene List jemoakt, woo Jehova miene Jebäda emma beauntwuat haft. Daut halpt mie, daut ekj doa nich von vejät, om waut ekj Jehova fruach, un woo hee mie emma krakjt daut jejäft haft, waut ekj brukt.” Soo, wan wie doaräwa nodenkjen, waut Jehova aul aules fa ons jedonen haft, dan jeft ons daut wada Krauft, jäajen onse Angst un Sorjen to kjamfen.

3. Waut doonen. Ea wie entscheiden waut to doonen, wudd wie kjennen en Gott sien Wuat no Rot sieekjen, wua wie werkjlich opp vetruen kjennen (Psa. 19:8, 12). Väle haft daut jeholpen, wan dee sikj äwa eenen Bibelvarsch waut nosieekjen, daut dee bäta vestonen, woo see dän en äa Läwen nokomen kjennen. Een Eltesta, waut Jarrod heet, sajcht: “Mie waut notosieekjen haft mie jeholpen, mea Eenselheiten äwa dän Varsch to vestonen un waut Jehova mie doamet sajen wull. Dit halpt mie werkjlich, opp daut to vetruen, waut ekj läs un dän Rot notokomen.” Wan wie en de Schreft no Jehova siene Aunwiesungen sieekjen un dee nokomen, woat ons daut halpen, bäta met onse Angst un Sorjen foadich to woaren.

David wist, daut hee Jehova siene Help brukt, om met siene Angst un Sorjen foadich to woaren. Hee räakjend Jehova siene Help soo väl, daut am daut bat doa brocht to sajen: “Met mienen Gott kaun ekj äwa de Waunt sprinjen. Daut es Gott, dee mie met Krauft vesorcht” (Psa. 18:30, 33). Veleicht hab wie eenjemol daut Jefeel, daut onse Trubbels soo groot sent, daut wie dee nich mea uthoolen kjennen. Oba met Jehova siene Help kjenn wie met onse Trubbels un Sorjen foadich woaren! Wan wie Jehova om Help bäden un doaräwa nodenkjen, waut hee aul fa ons jedonen haft un siene Aunwiesungen nokomen, dan kjenn wie ons secha sennen, daut hee ons de Krauft un Weisheit jäwen woat, waut wie brucken toom met onse Sorjen foadich woaren!