1. Äwa waut sent wie ons gaunz secha?

 WÄAJEN wie Jehova deenen, weet wie, daut hee ons sea väl räakjent un daut hee haben well, daut wie daut scheenste Läwen haben, waut nu mäajlich es (Reem. 8:35-39). Wie weeten uk, daut daut emma goot es fa ons, wan wie ons no biblische Gruntsauzen rechten (Jes. 48:17-18). Oba waut es, wan doa haustich waut oppkjemt, wua wie nich met jeräakjent haben?

2. Met waut vonne Trubbels mott wie veleicht foadich woaren, un waut wunda wie dan?

² Dee, waut Jehova deenen, motten aula met Trubbels foadich woaren. Eenje worden veleicht von wäm enne Famielje aunjeschmäat. Aundre haben groote Trubbels met de Jesuntheit un kjennen nich mea soo väl fa Jehova doonen. Noch aundre haben must beläwen, waut von grooten Schoden een Owwada aunrechten kaun. Un noch aundre woaren wäajen äaren Gloowen vefolcht. Wan wie soont beläwen motten, dan wunda wie veleicht: “Wuarom es mien Läwen soo aus dit? Hab ekj irjentwaut orrajcht jedonen? Meent daut, Jehova säajent mie nich?” Hast du die mol soo aus dit jefeelt? Wan jo, dan woa nich mootloos. Väle von Jehova siene true Deena haben aul must met soone Jefeelen kjamfen (Psa. 22:2-3; Hab. 1:2-3).

3. Waut kjenn wie von Psalm 34:20 lieren?

³ Läs Psalm 34:20. En disen Psalm sent twee wichtje Lieren bennen. Ieeschtens: De Jerajchte haben Trubbels. Tweedens: Jehova rat ons ut onse Trubbels. Woo deit Jehova daut? Eent es, daut hee ons halpt to vestonen, daut wie nu noch nich een  Läwen onen Trubbels haben kjennen. Hee vesprakjt, daut wie Freid haben woaren, wan wie am deenen, oba hee vesprakjt nich, daut wie nu aul een Läwen onen Sorjen haben (Jes. 66:14). Hee well, daut wie onse Hopninj em Uag hoolen – daut scheene Läwen, waut wie fa emma haben woaren (2. Kor. 4:16-18). Bat dan woat hee ons jieda Dach biestonen (Klg. 3:22-24).

4. Waut woa wie en disen Artikjel seenen?

⁴ See wie mol, waut wie von Jehova siene true Deena lieren kjennen, waut enne Bibeltiet läwden, un uk von soone, waut en onse Tiet läwen. Soo aus wie seenen woaren, kaun doa onverhofs irjentwaut oppkomen, oba Jehova woat ons emma halpen, wan wie opp am vetruen (Psa. 55:23). Wan wie äwa dee Biespels räden, dan denkj äwa dit no: “Waut wudd ekj en soone Loag jedonen haben? Woo halpen dise Biespels mie, een jratret Vetruen opp Jehova to kjrieen? Waut lia ekj doarut?”

5. Waut fa Schwierichkjeiten must Jakob derchmoaken wäajen Laban? (See daut Bilt oppe väaschte Sied.)

⁵ Eenje von de Bibeltiet muaken soont derch, wua dee nich met jeräakjent hauden. Eena von dee wia Jakob. Sien Voda säd, daut hee sikj sull met eene von Laban siene Dajchta befrieen un daut Jehova daut beloonen wudd. Laban wia eena von äa Frintschoft un deed uk Gott aunbäden (1. Mo. 28:1-4). Daut, waut Jakob deed, wia aulsoo daut rajchte. Doawäajen veleet hee Kanaan un muak de Reis no Laban, waut twee Dajchta haud: Daut wieren Lea un Rahel. Jakob funk aun, sikj aun Laban siene jinjre Dochta Rahel to veleewen, un hee wia reed, säwen Joa fa äaren Voda to schaufen, ea hee sikj met ar befrieen kunn (1. Mo. 29:18). Oba daut jlekjt aula nich soo, aus Jakob sikj daut jewenscht haud. Laban schmäad am aun un jeef am siene elre Dochta Lea. Eene Wäakj lota kunn Jakob sikj uk met Rahel befrieen, oba hee must fa ar noch eemol säwen Joa schaufen (1. Mo. 29:25-27). Laban wia uk onopprechtich to Jakob en Jeschaftssachen. Hee deed Jakob 20 Joa sea utnutzen! (1. Mo. 31:41-42).

6. Waut haud Jakob noch fa Trubbels?

⁶ Oba Jakob haud uk noch aundre Trubbels. Hee haud eene groote Famielje, un mank siene Junges rand daut lang nich emma jlei. Dee vekoften äaren ieejnen Brooda Josef aus eenen Sklow! Simeon un Levi, twee von Jakob siene Junges, brochten Schaund äwa de Famielje un mau rajcht äwa Jehova sienen Nomen. Jakob siene leewe Fru Rahel storf bie de Jeburt, aus see äa tweedet Bäbe hauden. Un dan wia doa noch eene groote Hungaschnoot, un Jakob must no Ägipten trakjen, wan hee uk aul sea oolt wia (1. Mo. 34:30; 35:16-19; 37:28; 45:9-11, 28).

7. Woo wees Jehova Jakob, daut hee eenen Jefaulen aun am haud?

⁷ Wan Jakob dit uk aula derchmuak, hieed hee oba kjeenmol opp, opp Jehova un siene Vespräakjungen to vetruen. Un Jehova wees Jakob emma wada, daut hee eenen Jefaulen aun am haud. Biejlikj aus Laban soo hinjarigjsch wia, jeef hee Jakob een deel em tieteljen. Jakob wia Jehova secha uk sea dankboa, aus hee entlich wada met sienen Sän Josef toop sennen kunn, von dän hee soo lang docht, daut dee doot wia! Doaderch, daut Jakob een gooda Frint met Jehova wia, kunn hee aul siene Schwierichkjeiten derchstonen (1. Mo. 30:43; 32:9-10; 46:28-30). Wan wie goode Frind met Jehova sent, kjenn wie uk met jieda Schwierichkjeit foadich woaren, wan dee uk onverhofs oppkjemt.

8. Waut wull de Kjennich David doonen?

 ⁸ De Kjennich David kunn nich aules fa Jehova doonen, waut am jankad. Hee säd biejlikj to dän Profeet Natan, daut hee dän grooten Wensch haud, eenen Tempel fa Jehova to buen. Un Natan säd to am: “Aules, wua du die em Hoat met beschaftjen deist, daut doo; Gott es met die” (1. Chr. 17:1-2). Stal die mol väa, woo väl Moot David daut jeef! Veleicht funk hee mau rajcht fuaz aun, Plons to moaken, woo hee daut aula doonen wull.

9. Waut deed David, aus se am säden, daut nich hee dän Tempel buen wudd?

⁹ Daut dieed nich lang un Natan kjeem trigj no David, wäajen “en dee selje Nacht” haud Jehova to Natan jesajcht, daut nich David dän Tempel buen wudd, oba eent von siene Säns (1. Chr. 17:3, JHF; 17:4, 11-12). Waut deed David, aus hee daut hieed? Hee paust sikj aun de niee Loag aun un neem sikj väa, aul dän Toorot un daut Jelt tooptoschaufen, waut sienen Sän Salomo fälen wudd, wan dee ieescht dän Tempel buen wudd (1. Chr. 29:1-5).

10. Waut deed Jehova fa David?

¹⁰ Fuaz nodäm daut Jehova to David säd, daut nich hee dän Tempel buen wudd, muak Jehova eenen Bunt met am. Hee vespruak David, daut eent von siene Nokomen fa emma harschen wudd (2. Sam. 7:16). Denkj mol han, woo schaftich David sennen woat, wan hee ieescht en daut dusentjoasche Rikj es un enwoat, daut Jesus sien Kjennich es, waut von siene Famielje aufstaumt. Jeit die daut uk noch mol soo, daut du nich emma soo väl fa Jehova doonen kaust, aus du wurscht wellen? Dan woat die de Jeschicht von David halpen to seenen, daut Gott ons aundre goode Sachen jeft, wua wie kjeenmol met jeräakjent hauden.

11. Woo säajend Jehova de ieeschte Christen, wan daut Kjennichrikj uk nich dan aunfunk to rejieren, aus see dochten? (Aposteljeschicht 6:7).

¹¹ Fa de ieeschte Christen wia daut schwoa, daut dee nich wisten, wanea Gott sien Kjennichrikj komen wudd. Dee dochten, daut et boolt komen wudd, oba daut wia nich soo (Apj. 1:6-7). Waut deeden dee doamet? Dee hilden sikj drock un deeden wieda prädjen. Aus de goode Norecht emma wieda vebreet wort, kunnen dee daut kloa seenen, woo Jehova an doafäa säajend (läs Aposteljeschicht 6:7).

12. Waut deeden de ieeschte Christen, aus doa eene Hungaschnoot kjeem?

¹² En dee Tiet kjeem eene groote Hungaschnoot “äwa de gaunze Welt” (Apj. 11:28). De ieeschte Christen musten doa uk unja lieden. Stal die mol väa, woo an daut jinkj, aus doa meist nich mea Äten wia. De Elren wieren secha sea besorcht doaräwa, woo see fa de Famielje Äten towäaj brinjen wudden. Un waut von de junge Menschen hauden veleicht aul jeplont, mea em Deenst to doonen, un dan kjeem de Hungaschnoot. Dochten dee veleicht, daut see daut bloos aula oppschuwen musten? Endoont woo de Omstend krakjt wieren, dise Christen pausten sikj aun. Dee deeden wieda prädjen, wuaemma daut mäajlich wia, un see deelden sikj daut, waut see hauden, wellich met äare Gloowesbreeda en Judäa en (Apj. 11:29-30).

13. Woo worden de Christen en de Hungaschnoot jesäajent?

¹³ De Christen kunnen en de Hungaschnoot aula Gott sienen Säajen späaren, endoont aus dee Help kjrieejen ooda halpen deeden. Dee, waut Help kjrieejen, kunnen daut späaren, woo Jehova an unjastetten deed, un secha haben dee sikj äare Gloowesbreeda dolla no aun jefeelt (Mat. 6:31-33). Un dee, waut Gowen jeewen ooda opp eene aundre Wajch metholpen, sent  enjeworden, daut jäwen schaftja moakt aus nämen (Apj. 20:35). Jehova säajend dee aula, wäajen dee sikj aun de niee Loag aunpaussen deeden.

14. Waut passieed met Barnabas un dän Apostel Paulus, un woo kjeem daut ut? (Aposteljeschicht 14:21-22).

¹⁴ De ieeschte Christen worden uk foaken vefolcht, un eenjemol to soone Tieden, wua dee nich met jeräakjent hauden. Kjikj mol, waut dän Apostel Paulus un Barnabas passieed, aus dee en de Jäajent en Liestra prädjen deeden. Ieeschtlich neemen de Menschen an opp un horchten an too. Oba lota kjrieejen de Jäajna “daut Volkj opp äare Sied”, un waut von dise Menschen deeden Paulus steenjen un leeten am aus doot ligjen (Apj. 14:19). Oba Barnabas un Paulus prädijden bloos aundatwäajen wieda. Woo kjeem daut ut? Daut sajcht, daut dee “väl Jinja jemoakt hauden”, un äa Biespel un daut, waut see säden, haud äare Gloowesbreeda em Gloowen jestoakjt (läs Aposteljeschicht 14:21-22). Daut Barnabas un Paulus nich opphieeden to prädjen, wan doa uk onverhofs Vefoljunk oppkjeem, kjeem sea väle togood. Wan wie nich oppjäwen un wieda daut doonen, waut Jehova von ons haben well, woa wie jesäajent woaren.

15. Waut kaust du von Brooda A. H. Macmillan lieren?

¹⁵ Ver daut Joa 1914 räakjenden Jehova siene Deena aul doamet, daut doa waut besondret passieren wudd. See wie mol, woo Brooda A. H. Macmillan daut jinkj. Hee docht, daut hee boolt wudd nom Himmel komen, krakjt soo aus daut to jane Tiet väle aundre uk dochten. Aus hee em Septamba 1914 eene Räd haud, säd hee: “Daut es meist secha de latste Räd, waut ekj noch haben woa.” Oba daut wia nich soo. Brooda Macmillan schreef lota: “Eenje von ons dochten veleicht een kjlienet beskje too schwind, daut wie fuaz wudden nom Himmel komen.” Un hee schreef uk noch: “Waut wie werkjlich doonen musten, wia, ons drock hoolen em Deenst fa dän Harn.” Un Brooda Macmillan deed krakjt daut. Hee wia sea flietich em Deenst un kunn sea väl Breeda Moot moaken, waut enjestopt wieren, wäajen dee nich nom Kjrich jinjen. Un mau rajcht aus hee aul ella wia, wia hee emma bie de Toopkomes. Woo holp Brooda Macmillan daut, daut hee sikj emma fa Jehova ensaten deed en dee Tiet, aus hee no siene Beloonunk luad? Een Stootje ea hee aune 1966 storf, schreef hee: “Mien Gloowen es vondoag noch krakjt soo stoakj aus ea.” Wie wellen uk krakjt soone Enstalunk haben, un besonda wan wie en eene sea schwoare Loag sent, waut veleicht lenja dieet, aus wie denkjen! (Heb. 13:7, JHF).

16. Waut vonne Schwierichkjeit kjeem bie Herbert Jennings un siene Fru onverhofs opp? (Jakobus 4:14).

¹⁶ Väle kjamfen doamet, daut doa onverhofs een Trubbel met de Jesuntheit oppkjemt. Brooda Herbert Jennings b vetald biejlikj en siene Läwesjeschicht, woo hee un siene Fru aus Missionoaren en Ghana deenden. Oba irjentwanea must hee nom Dokta un dee säden, daut hee sea narfenkrank wia. Wiels daut soo onverhofs wia, brukt Brooda Jennings de Wieed von Jakobus 4:14, aus hee säd: “Wie worden en, daut wie kjeenmol wisten, ‘waut morjen sennen woat’” (läs). Hee schreef: “Wie musten de Loag aunnämen, soo aus dee wia, un doawäajen muak wie ons reed, Ghana to veloten un uk onse goode Frind, waut wie doa hauden. Wie reisden trigj no Kanada, [om doa to doktren].” Jehova holp Brooda Jennings un uk siene Fru, daut dee am wieda tru deenen kunnen, wan dee dit schwoare uk derchmusten.

17. Woo holp Brooda Jennings siene Erfoarunk aundre?

 ¹⁷ Daut Brooda Jennings en siene Läwesjeschicht soo op äwa siene Trubbels räden deed, holp uk aundre sea. Eene Sesta schreef: “Mie es noch kjeenmol een Artikjel soo sea to Hoaten jegonen aus disa. . . . To läsen, daut Brooda Jennings siene Toodeelunk oppjäwen must wäajen siene Krankheit, holp mie, miene Loag rajcht to seenen.” Un een Brooda schreef: “Ekj deend fa tieen Joa en eene Vesaumlunk aus Eltesta, oba dan kunn ekj daut nich mea, wäajen ekj narfenkrank wort. Ekj feeld mie soo schuldich un dol, daut mie daut nich mea jankad, Läwesjeschichten to läsen. . . . Oba von Brooda Jennings sien Uthoolen to läsen, muak mie väl Moot.” Wan daut en ons Läwen uk nich soo dreit, aus wie ons daut wudden jewenscht haben, kjenn wie oba uk een Biespel fa aundre sennen. Wan wie onverhofs Trubbels haben, oba doawäajen tru bliewen, woaren aundre Moot kjrieen, wiels dee onsen Gloowen un ons Uthoolen seenen (1. Pet. 5:9).

18. Waut lieescht du von de Wätfru von Nigeria, soo aus opp de nojemoakte Bilda to seenen es?

¹⁸ Wan doa waut schlemmet passieet, soo aus de COVID-19-Krankheit, motten uk väle von onse Breeda un Sestren lieden. En Nigeria biejlikj wia eene Wätfru, waut bloos noch een kjlienet beskje Äten un Jelt haud. Eenen Zemorjes fruach äare Dochta ar, waut see äten wullen, wan see ieescht äa latstet beskje Ries jekoakt hauden. De Sesta säd, daut see nich mea Jelt hauden un uk nuscht mea to äten hauden, oba daut see bloos de Wätfru von Zarpat nodoonen wullen. Soo, see wudden dan äa latstet Äten reedmoaken un dan wudden see bloos opp Jehova vetruen (1. Kjen. 17:8-16). Oba noch ea dee doaräwa nodochten, waut see to Meddach moaken wullen, kjrieejen see een Pak met needje Sachen von äare Gloowesbreeda. Doa bennen wia jenuach Äten fa äwa twee Wäakj. De Sesta säd, daut see daut ea nich enjeworden wia, woo krakjt Jehova toohorchen deed, wan see to äare Dochta räd. Daut wiest ons, wan wie opp Jehova vetruen, dan kjennen soone Trubbels ons am noch noda brinjen (1. Pet. 5:6-7).

19. Waut vonne Vefoljunk must Aleksey Yershov derchmoaken?

¹⁹ En de latste Joaren haben väl Breeda un Sestren Vefoljunk beläft, wua dee nich met jeräakjent hauden. See wie mol, woo Brooda Aleksey Yershov daut jinkj, waut en Russlaunt läft. Aus hee sikj aune 1994 deepen leet, hauden Jehova siene Zeijen en dee Jäajent jewesse Frieheiten. Oba en de lotre Joaren endad de Loag sikj en Russlaunt wada. Aune 2020 kjeemen se en Brooda Yershov sien Hus nenn un sochten daut gaunz derch un neemen väl von siene Sachen met. Een poa Moonat lota wort hee dan von de Rejierunk beschulcht, daut hee daut Jesaz jebroaken haud.  Un waut noch schlemma wia: Een Mensch haud fa äwa een Joa väajejäft, daut am daut intressieed, de Bibel to studieren, oba haud en Werkjlichkjeit Videos oppjeschnakt, wuaderch se dän Brooda nu beschuljen kunnen. Woo hinjarigjsch daut nich wia!

20. Woo kunn Brooda Yershov noch een jratra Frint met Jehova woaren?

²⁰ Haud daut noch irjentwaut goodet, daut Brooda Yershov soo vefolcht wort? Jo. Hee es nu noch een jratra Frint met Jehova. Hee vetalt: “Ekj un miene Fru doonen nu foakna toop bäden. Ekj weet nu, daut ekj onen Jehova siene Help nich wudd met dise Loag foadich woaren.” Un hee sajcht uk noch: “Daut perseenelje Studium halpt mie, met Mootloosichkjeit foadich to woaren. Ekj denkj äwa de Biespels von ieeschtemma no. En de Bibel sent väl Erfoarungen oppjeschräwen, waut wiesen, woo wichtich daut es, daut wie ruich bliewen un opp Jehova vetruen.”

21. Waut hab wie en disen Artikjel jeseenen?

²¹ Wie haben en disen Artikjel jeseenen, daut wie eenjemol onverhofs Trubbels haben. Oba wautemma doa passieet, Jehova halpt siene Deena emma, wan dee sikj opp am veloten. En dän Teemavarsch sajcht daut: “De jerajchta mott väl lieden, oba de HAR halpt am ut aulem rut” (Psa. 34:20). Proow wie, wieda doano to kjikjen, waut vonne groote Macht Jehova haft, un nich no onse Schwierichkjeiten. Dan woa wie uk krakjt soo aus de Apostel Paulus sajen kjennen: “Fa aules sie ekj stoakj derch dän, dee mie de Krauft jeft” (Filip. 4:13, NW).