1. Wuarom doo wie bie de Toopkomes Auntwuaten jäwen?

 WUAROM wank wie no de Toopkomes? Ieeschtens toom Jehova lowen (Psa. 26:12; 111:1). Un dan uk toom ons unjarenaunda Moot toospräakjen, besonda en dise schwoare Tiet (1. Tess. 5:11). Wan wie bie de Toopkomes Auntwuaten jäwen, dan kjenn wie beides doonen.

2. Bie woone Poats von de Toopkomes kjenn wie Auntwuaten jäwen?

² Wie haben jieda Wäakj de Jeläajenheit, bie onse Toopkomes Auntwuaten to jäwen. Biejlikj utgangs Wäakj kjenn wie bie daut Woaktorm-Studium von de Vesaumlunk metmoaken. Un bie daut Toopkomen enne Wäakj kjenn wie bie de jeistelje Schaza Auntwuaten jäwen, bie daut Bibelstudium von de Vesaumlunk ooda bie aundre Poats.

3. Waut kunn doa oppkomen biem Auntwuaten jäwen, un woo kaun Hebräa 10:24-25 ons halpen?

³ Wie aula wellen Jehova lowen un onse Breeda un Sestren Moot toospräakjen. Oba waut kunn doa oppkomen biem Auntwuaten jäwen? Na, veleicht woag wie ons daut meist nich, ooda wie jleichen daut sea, oba dee nämen ons nich soo foaken, aus wie wudden wellen. Woo kjenn wie doamet omgonen? En dän Apostel Paulus sienen Breef no de Hebräa finj wie Rot. Hee räd doavon, woo wichtich daut es, daut wie sellen toopkomen, un säd, daut daut besonda doawäajen wia, daut wie ons kjennen “unjarenaunda Moot toospräakjen” (läs Hebräa 10:24-25). Wan wie doaraun denkjen, daut aundre bie de Toopkomes uk derch korte Auntwuaten  kjennen Moot kjrieen, kaun ons daut leichta sennen. Un wan wie nich foaken jenomen woaren, kaun ons daut schaftich moaken, wan wie em Denkj hoolen, daut aundre dan de Jeläajenheit haben, Auntwuaten to jäwen (1. Pet. 3:8).

4. Woone dree Sachen woa wie en disen Artikjel seenen?

⁴ En disen Artikjel woa wie seenen, woo wie ons kjennen unjarenaunda Moot moaken en eene kjliene Vesaumlunk, wua mau weinich sent toom Auntwuaten jäwen, un uk en eene groote Vesaumlunk, wua väle sent, waut auntwuaten wellen. Un dan woa wie noch seenen, woo wie ons kjennen Moot moaken derch daut, waut wie biem Auntwuat jäwen sajen.

5. Woo kjenn wie ons Moot moaken, wan doa nich soo väle enne Vesaumlunk sent?

⁵ En eene kjliene Vesaumlunk ooda eene Grupp jeft daut nich soo väle, waut doa kjennen Auntwuaten jäwen. Veleicht mott de Leida bieaun lang wachten, bat doa wäa de Haunt opphäft. Daut Toopkomen kaun sikj ons dan enoolent späaren un daut moakt ons nich Moot. Waut kaust du dan doonen? Proow, foaken diene Haunt opptohäwen. Dan kaust du veleicht aundre bat doa brinjen, uk dolla mettomoaken.

6-7. Waut kaun ons halpen, wan wie ons nich woagen, eene Auntwuat to jäwen?

⁶ Waut, wan du die nich woachst, eene Auntwuat to jäwen? Du best nich de eensja, waut sikj soo feelt. Oba denkj doaraun, daut du diene Breeda un Sestren dolla Moot toospräakjen kaust, wan du proofst, diene Angst to äwakomen. Woo kaust du daut krakjt doonen?

⁷ Du kaust em Woaktorm gooden Rot finjen. b Een Rot es biejlikj, fein väatostudieren (Spr. 21:5). Je bäta du weetst, om waut daut jeit, je leichta woat daut fa die sennen, Auntwuaten to jäwen. Un dan noch, doo korte Auntwuaten jäwen (Spr. 15:23; 17:27). Daut kaun die daut leichta moaken, wan du bloos eent ooda twee Saza sajchst. Un daut kaun uk de Breeda un Sestren halpen, dolla mettokomen, aus wan du eene lange Auntwuat jefst un von een deel Sachen tojlikj rätst. Wan du eene korte Auntwuat met diene ieejne Wieed jefst, wiest daut, daut du goot väastudieet hast un vesteist, om waut daut jeit.

8. Woo denkjt Jehova doaräwa, wan du dien bastet jefst?

⁸ Waut, wan du proofst, disen Rot notokomen, oba die noch emma nich woachst, mea aus eent ooda twee Auntwuaten to jäwen? Dan hool em Denkj, daut Jehova daut sitt, woo sea du die aunstrenjst, un daut schazt (Luk. 21:1-4). Dien bastet jäwen meent nich, daut du die selfst sea unja Druck satst (Filip. 4:5, NW). Äwalaj, waut dien bastet es, un nemm die väa, daut uk to doonen. Bäd, daut Jehova die kaun halpen, ruich to bliewen. Veleicht kaust du die ieescht mol väanämen, bloos eene korte Auntwuat to jäwen.

9. Waut kaun en eene groote Vesaumlunk schwoa sennen?

⁹ Wan en diene Vesaumlunk een deel Vekjindja sent, kaun doa veleicht eene aundre Schwierichkjeit oppkomen. Veleicht jleichen een deel Breeda un  Sestren daut, Auntwuaten to jäwen, un doawäajen kjemst du nich soo foaken naun. Soo jinkj daut biejlikj Danielle. c See jleicht daut emma sea, bie de Toopkomes Auntwuaten to jäwen. See talt daut aus Poat von äaren Deenst fa Jehova un see kaun aundre doaderch Moot toospräakjen un uk äaren Gloowen stoakj hoolen. Oba dan trock see no eene jratre Vesaumlunk un doa kunn see nich mea soo foaken Auntwuaten jäwen, foaken nich mol eene bie een Toopkomen. See säd: “Ekj wia gaunz vedrislich. Mie späad sikj daut soo, aus wan ekj een Väarajcht veloaren haud. Un wan daut emma wada soo es, dan wundat eena, aus dee eenem nich nämen wellen.”

10. Waut kjenn wie doonen, daut wie leichta kjennen eene Auntwuat jäwen?

¹⁰ Haft die daut uk mol soo aus Danielle jegonen? Wan jo, dan denkjst du veleicht, du west goanich mea bie de Toopkomes Haunt opphäwen un leewa bloos noch toohorchen. Oba hia nich opp to proowen, eene Auntwuat to jäwen. Waut wurscht du kjennen doonen? Du wurscht die kjennen miere Auntwuaten reedmoaken fa een Toopkomen, un wan du nich aum Aunfank jenomen woascht, dan woat daut noch aundre Jeläajenheiten jäwen. Wan du die fa daut Woaktorm-Studium reedmoakst, dan denkj doaräwa no, waut jieda Varsch met daut Teema von dän Artikjel to doonen haft. Wan du daut deist, woascht du secha kjennen bie daut Studium goode Auntwuaten jäwen. Du wurscht uk kjennen proowen, die bie soone Varzhen eene Auntwuat reedtomoaken, wua daut om biblische Lieren jeit, waut nich sea leicht sent (1. Kor. 2:10). Wuarom? Wiels bie soone Varzhen veleicht nich soo väle woaren Haunt opphäwen. Oba waut, wan du dit aul nojekomen best un dan noch bie miere Toopkomes nich hast kunt eene Auntwuat jäwen? Dan wurscht du kjennen ver daut Toopkomen met dän Leida räden un am sajen, bie woone Froag du wurscht wellen eene Auntwuat jäwen.

11. Waut fa eenen Rot jeft Filippa 2:4 ons?

¹¹ Läs Filippa 2:4. De Apostel Paulus rod de Christen enne Schreft too, no daut to kjikjen, waut de aundre intressieet. Woo kjenn wie disen Rot enne Vesaumlunk nokomen? Wan wie doaraun denkjen, daut de aundre uk wellen metmoaken.

12. Woo kjenn wie aundre bie de Toopkomes Moot moaken? (See uk daut Bilt.)

 ¹² Denkj mol äwa dit no: Wan du met diene Frind vetalst, wurscht dan bloos du dän Tiet äwa räden un dee nich eemol waut sajen loten? Secha nich! Du west je die met dee unjahoolen. Krakjt soo es daut uk bie de Toopkomes. Wie wellen, daut soo väl aus mäajlich de Jeläajenheit kjrieen, eene Auntwuat to jäwen. Daut es mau rajcht eent von de baste Wajch, onse Breeda un Sestren Moot to moaken, wan wie dee loten äwa äaren Gloowen räden (1. Kor. 10:24). Well wie mol seenen, woo wie daut doonen kjennen.

13. Waut kjenn wie doonen, daut miere bie eenen Varsch kjennen Auntwuaten jäwen?

¹³ Eene Sach es, wie kjennen korte Auntwuaten jäwen. Soo woaren uk noch aundre kjennen auntwuaten. Besonda Eltestasch un soone Vekjindja, waut aul väl Erfoarunk haben, kjennen een goodet Biespel doarenn sennen. Uk wan du eene korte Auntwuat jefst, proow nich, äwa too väl Sachen to räden. Wan du aules von eenen Varsch sajchst, dan blift doa nuscht mea fa aundre to sajen. En disen Varsch biejlikj jeit daut om tweeatlei. Eemol, daut wie sellen korte Auntwuaten jäwen, un dan, daut wie nich sellen von too väl Sachen räden. Soo, wan du de ieeschte Auntwuat von disen Varsch jefst, dan räd bloos von eent von dise Sachen.

14. Waut kaun ons halpen to entscheiden, woo foaken wie wellen Haunt opphäwen? (See uk daut Bilt.)

¹⁴ Äwalaj uk goot, woo foaken du woascht Haunt opphäwen. Wan du too foaken deist, dan feelt de Leida sikj veleicht bemott, die de Auntwuat jäwen to loten un nich aundre, waut veleicht noch nich de Jeläajenheit hauden. Daut kunn deejanje mootloos moaken un dan woaren dee veleicht nich mea wellen Haunt opphäwen (Liera 3:7).

15. (a) No waut mott wie oppaussen, wan wie nich kjennen eene Auntwuat jäwen? (b) Woo kaun de Leida doano seenen, daut de mieeschte kjennen metmoaken? (See dän Kausten “ Wan du de Leida best”.)

¹⁵ Wan een deel Breeda un Sestren äare Haunt opphäwen, kom wie veleicht nich soo foaken naun, aus wie wudden jleichen. Un eenjemol nemt de Leida ons veleicht verheipts nich. Daut kunn ons mootloos moaken, oba wie wellen ons doawäajen nich beleidicht feelen (Liera 7:9).

16. Woo kjenn wie aundre Moot toospräakjen, waut Auntwuaten jäwen?

¹⁶ Wan du nich soo foaken kaust Auntwuaten jäwen, aus du wurscht jleichen, dan kaust du doano horchen, wan de aundre äare Auntwuaten jäwen, un dee dan no daut Toopkomen doafäa lowen. Diene Breeda un Sestren kaun daut krakjt soo väl Moot jäwen, aus wan du wurscht eene Auntwuat jejäft haben (Spr. 10:21). Wan wie aundre lowen, es daut noch eene Wajch, woo wie ons unjarenaunda Moot toospräakjen kjennen.

17. (a) Woo kjennen Elren äare Kjinja halpen, paussende Auntwuaten reedtomoaken? (b) Woone vea Sachen kjennen ons no daut Video no halpen, eene Auntwuat reedtomoaken? (See uk de Footnoot.)

¹⁷ Woo kjenn wie ons noch bie de Toopkomes Moot toospräakjen? Wan jie Kjinja haben, kjenn jie dee halpen, daut dee fa äa Ella paussende Auntwuaten reed haben (Mat. 21:16). Bieaun jeit daut bie de Toopkomes om sea iernste Sachen, soo aus Trubbels em Ehestaunt ooda soo waut; oba  secha woaren uk doa eent ooda twee Varzhen sennen, wua june Kjinja kjennen Auntwuaten jäwen. Halpt june Kjinja uk vestonen, daut dee veleicht nich jiedatsmol jenomen woaren, wan dee Haunt opphäwen. Soo woaren dee nich soo leicht vedrislich woaren, wan dee seenen, daut aundre jenomen woaren (1. Tim. 6:18). d

18. Waut kjenn wie doonen, om nich too sea von ons selfst to räden? (Spricha 27:2).

¹⁸ Wie aula kjennen ons feine Auntwuaten reedmoaken, waut Jehova ieren un onse Breeda Moot moaken (Spr. 25:11). Wie kjennen uk mol von waut vetalen, waut wie beläft haben, oba daut saul nich emma bloos om ons gonen (läs Spricha 27:2; 2. Kor. 10:18). Enne Städ daut saul daut dolla om Jehova, sien Wuat un sien Volkj gonen (Opb. 4:11). Wan daut oba eene Froag es, wua ons toojerot woat, von ons to räden, dan wudd daut uk goot sennen, daut to doonen. En dän näakjsten Varsch von disen Artikjel woa wie soon Biespel seenen.

19. (a) Woo woat daut utkomen, wan wie proowen, ons en de aundre äare Städ to stalen? (Reema 1:11-12). (b) Waut jeit die scheen biem Auntwuaten jäwen?

¹⁹ Daut woat ons nich krakjt väajeschräwen, woo wie onse Auntwuaten sellen jäwen, oba wie wellen aula doano sträwen, daut wie aundre Moot moaken derch daut, waut wie sajen. Daut bediet, daut wie bieaun proowen, foakna Auntwuaten to jäwen, ooda daut wie tofräd sent met de Jeläajenheiten, waut wie haben, un ons freien, daut aundre dit Väarajcht uk krakjt soo väl räakjnen aus wie. Wan wie aun de aundre en de Vesaumlunk denkjen, dan woat ons daut aula scheen gonen un wie woaren aula toop kjennen “mootja woaren” (läs Reema 1:11-12).