1. Woo wia daut, aus Jesus sien ieeschtet Wunda deed?

 DENKJ mol han, daut es aum Enj von daut Joa 29 un Jesus fangt met sienen Deenst aun. Jesus un siene Mutta Maria un eenje aundre sent to eene Kjast en Kana enjelot. Daut wia een kjlienet Darp em Nuaden von Nazaret. Daut schient soo, daut Maria met de Jast halpen deit, wäajen see woomäajlich bekaunt es met de Famielje. Oba dan woaren se met eemol en, daut de Wien aula es. Wan de Jast daut wudden enjeworden sennen, wudd daut eene Schaund fa de Famielje jewast sennen un uk fa daut junge Poa Lied. b Woomäajlich wieren doa mea Jast jekomen, aus see jedocht hauden. Maria jinkj no äaren Sän un säd: “Dee haben nich mea Wien” (Joh. 2:1-3). Aus Jesus daut hieet, deit hee waut gaunz besondret: Derch een Wunda moakt hee von jeweeneljet Wota “gooden Wien” (Joh. 2:9-10).

2-3. (a) Waut vonne Wunda muak Jesus? (b) Woo komen ons dee togood?

² Jesus wudd en sienen Deenst noch väl mea Wunda moa ken. c Hee brukt siene Macht, om dusende Menschen to halpen. Biejlikj jeef hee opp eene Sauz 5000 Mana to äten un lota 4000 – aules toop wieren daut äwa 27000 Menschen, waut to äten kjrieejen, wan wie de Frues un Kjinja doa met entalen (Mat. 14:15-21; 15:32-38). Un opp deeselwje Jeläajenheiten heeld hee uk noch de Kranke (Mat. 14:14; 15:30-31). Stal die väa, woo besonda daut fa dise Häad wia, daut see derch een Wunda to äten kjrieejen un jeheelt worden!

³ Komen ons Jesus siene Wunda vondoag dän Dach uk noch togood? Gaunz secha. En disen Artikjel woa wie een deel von dee lieren, un daut woat ons em Gloowen stoakjen. Wie woaren uk seenen, woo wie Jesus siene Deemoot un sien Metjefeel nodoonen kjennen, waut hee derch siene Wunda wees.

4. Von wäm lia wie derch Jesus siene Wunda?

⁴ De Wunda lieren ons nich bloos waut äwa Jesus, oba uk äwa sienen Voda, wäajen de Krauft en Werkjlichkjeit von Jehova kjeem. En Aposteljeschicht 10:38 rät daut doavon, “woo Gott dän Heiljen Jeist un siene Krauft äwa Jesus von Nazaret jeeten deed, dee dan omhäa jinkj un goodet deed un aul dee heeld, dee vom beesen Fient unjadrekjt worden, wiels Gott wia met am”. Denkj mol doaräwa no, daut aul de Wunda, waut Jesus deed, un uk aul daut, waut hee säd un deed, krakjt wiest, woo sien Voda denkjt un feelt (Joh. 14:9). Unjasto wie ons mol dreeatlei, waut wie von Jesus siene Wunda lieren kjennen.

5. Waut brocht Jesus bat doa, Wunda to moaken? (Matäus 20:30-34).

⁵ Ieeschtens: Jesus un sien Voda leewen ons sea. Aus Jesus oppe Ieed wia, wees hee de Menschen siene groote Leew doaderch, daut hee deejanje derch een Wunda heeld, waut lieden musten. Opp eene Sauz kjeemen twee Blinje no Jesus un schrieejen no Help (läs Matäus 20:30-34). Kjikj mol, waut Jesus doamet deed. Hee schieed an ut Metleet äwa de Uagen. Daut griechische Tietwuat, waut hia met “Metlieden”, ooda Metleet, äwasat wort, es soo waut aus een grootet Jaumahoat deep en ons. Daut hee soon grootet Metjefeel haud, kjeem von siene Leew, un daut brocht am bat doa, de Hungaje Äten to jäwen un eenen Lepra to heelen (Mat. 15:32; Mar. 1:41). Wie kjennen ons secha sennen, daut dee Gott, dee “leeftoljet Metleet” haft, un sien Sän ons sea leewen un met ons metlieden (Luk. 1:78; 1. Pet. 5:7). Dee freien sikj aul sea doatoo, wan see woaren kjennen met aul daut schlajchte een Enj moaken, wua de Menschen nu unja lieden!

6. Waut vonne Macht haft Gott Jesus jejäft?

⁶ Tweedens: Gott haft Jesus de Macht jejäft, de Trubbels von de Menschheit to leesen. Derch de Wunda wees Jesus, daut hee de Macht haud, met soone Trubbels een Enj to moaken, waut wie selfst kjeenmol wudden kjennen. Biejlikj haft hee uk de Macht, de metjeorwne Sind uttoroden, wua aule Menschen unja lieden un wua uk de Krankheiten un de Doot met en sent (Mat. 9:1-6; Reem. 5:12, 18-19). Derch siene Wunda kjenn wie seenen, daut hee “jieda Krankheit” heelen kaun un mau rajcht de Doodes oppwakjen (Mat. 4:23; Joh. 11:43-44). Hee haft uk de Macht, eenen stoakjen Storm to kontrollen un beese Jeista uttodriewen (Mar. 4:37-39; Luk. 8:2). Es daut nich scheen to weeten, daut Jehova sienen Sän soone groote Macht jejäft haft?

7-8. (a) Äwa waut kjenn wie ons derch Jesus siene Wunda secha sennen? (b) To waut fa een Wunda freist du die aul?

⁷ Dreddens: Wie kjennen ons doa gaunz opp veloten, daut aul daut goode, waut Gott vesproaken haft, sikj en Gott sien Kjennichrikj erfellen woat. De Wunda, waut Jesus muak, aus hee oppe Ieed wia, wiesen ons, waut hee noch doonen woat, wan hee ieescht  de Kjennich en Gott sien Kjennichrikj es. Waut woa wie dan beläwen? Wie woaren volkomne Jesuntheit haben, wäajen hee woat aule Krankheiten äwatsied schaufen un aul de Behindade jesunt moaken (Jes. 33:24; 35:5-6; Opb. 21:3-4). Wie woaren kjeenmol mea brucken hungrich schlopen gonen ooda wäajens een Owwada lieden (Jes. 25:6; Mar. 4:41). Wie woaren groote Freid haben, onse leewe Vestorwne opptonämen, waut nu noch “en de Jräwa ligjen” (Joh. 5:28-29). To waut fa een Wunda freist du die aul besonda sea?

⁸ Aus Jesus de Wunda muak, wees hee, woo deemootich hee wia un waut von Metjefeel hee haud. Daut sent Ieejenschoften, waut wie uk nodoonen wellen. Well wie mol daut Wunda seenen, waut hee en Kana oppe Kjast muak, un dan woa wie noch een aundret seenen.

9. Waut deed Jesus opp eene Kjast? (Johanes 2:6-10).

⁹ Läs Johanes 2:6-10. Wia Jesus bemott, irjentwaut to doonen, aus de Wien oppe Kjast aula wort? Nä, nich onbedinjt. Daut wia nich verutjesajcht, daut de Messias derch een Wunda wudd Wien moaken. Oba woo wudd die daut jegonen haben, wan daut opp diene Kjast soo romjekomen wia?  Jesus wees de Famielje un uk de junge Lied Metjefeel, wäajen hee wull nich, daut dee sikj schämen musten. Doawäajen muak hee äwa 390 Lieta (103 Galoon) scheenen Wien von jeweeneljet Wota, soo aus wie aum Aunfank aul jeseenen haben. Veleicht muak hee soo väl, daut dee noch waut äwahilden ooda daut dee daut lota vekjeepen kunnen. Woo dankboa de junge Lied nich motten jewast sennen!

10. Äwa waut vonne Eenselheiten rät Johanes, Kapitel 2? (See uk daut Bilt.)

¹⁰ See wie mol noch mea Eenselheiten von ut Johanes, Kapitel 2. Hast du jemoakjt, daut Jesus de steenane Krucken nich selfst voll Wota muak? Enne Städ de Oppmoakjsomkjeit opp sikj to lenkjen, säd hee to de Deena, dee sullen dee vollmoaken (Varsch 6-7). Aus Jesus dän Wien ieescht jemoakt haud, brocht hee dän Aunjestalden nich selfst dän Wien, oba säd to de Deena, daut dee sullen (Varsch 8). Jesus neem uk nich een Kuffel Wien un hilt daut ver de Jast no Hecht un säd: “Prooft mol disen Wien, dän ekj hia jroz jemoakt hab!”

11. Waut kjenn wie von Jesus sien Wunda lieren?

¹¹ Waut kjenn wie von Jesus sien Wunda lieren, daut hee Wota to Wien muak? Wie lieren, daut hee deemootich wia. Jesus pucht nich met siene Wunda, un hee pucht uk kjeenmol met irjentwaut, waut hee deed. Hee jeef emma sienen Voda aule Iea (Joh. 5:19, 30; 8:28). Wan wie Jesus nodoonen, dan woa wie nich too väl von ons selfst hoolen un wie woaren uk nich met daut puchen, waut wie em Deenst fa Jehova aules jedonen kjrieen. Wie wellen ons leewa brow doonen, daut wie Gott deenen kjennen (Jer. 9:22-23). Well wie dän de Iea jäwen, dän de Iea traft, wiels waut wudd wie onen siene Help volbrinjen kjennen? (1. Kor. 1:26-31).

12. Woo kjenn wie Jesus siene Deemoot noch nodoonen? Jeff een Biespel.

¹² Woo kjenn wie Jesus siene Deemoot noch nodoonen? Denkj mol han, doa es een Eltesta, waut sikj een deel Tiet nemt, om eenen jungen Deenstaumthelpa to halpen, sikj fa siene ieeschte Räd reedtomoaken. Dan kaun de junga Brooda eene feine Räd hoolen, wua de Vesaumlunk sikj sea äwa freit. No daut Toopkomen kjemt eena no dän Eltesten un sajcht: “Jan Brooda hilt eene sea feine Räd, nich soo?” Nu haft de Eltesta twee Mäajlichkjeiten, waut doatoo to sajen. Hee kaun sajen: “Jo, oba ekj hab dän sea jeholpen!” Ooda hee sajcht deemootich: “Jo, ekj sie gaunz brow met am!” Wan wie waut fa aundre doonen un nich Iea velangen, dan wies wie, daut wie deemootich sent. Wie weeten, daut Jehova daut väl räakjent, wan wie waut fa aundre doonen, un daut moakt ons sea tofräd. (See uk Matäus 6:2-4; Heb. 13:16.) Jehova freit sikj sea äwa ons, wan wie Jesus siene Deemoot nodoonen (1. Pet. 5:6).

13. Waut sach Jesus dicht bie de Staut Nain, un waut deed hee dan? (Lukas 7:11-15).

¹³ Läs Lukas 7:11-15. Denkj mol han, woo daut es, aus Jesus rom eentunhaulf Joa prädjen deit. Hee reist no Nain, eene galiläische Staut, waut nich wiet auf von Schunem es, wua de Profeet Elisa ojjefäa 900 Joa trigj de Fru äaren Sän vom Doot oppjewakjt haud (2. Kjen. 4:32-37). Aus Jesus dicht bie de Stautspuat kjemt, sitt hee doa eene Häad  Menschen rutkomen, waut eenen Dooden nom Grauf droagen. Daut es besonda truarich, wiels daut es daut eensje Kjint von eene Wätfru. Oba de Mame es nich auleen – doa es eene Häad Menschen rom ar. Jesus helt dise Häad Menschen opp un deit waut besondret fa dise Mutta: Hee wakjt äaren Sän opp. De Evangelien räden von dreemol, wua Jesus wäm vom Doot oppwakjt, un dit es daut ieeschte von dee.

14. Waut vonne Eenselheiten finj wie en Lukas, Kapitel 7? (See uk daut Bilt.)

¹⁴ See wie mol, von waut vonne Eenselheiten daut en Lukas, Kapitel 7 rät. Es die oppjefollen, daut Jesus dise Mutta “sach” un dan “jaumad am daut äwa ar”? (Varsch 13). Veleicht sach hee de Mutta ver dän Dooden gonen un roaren. Dan kjrieech hee een grootet Metjefeel. Oba Jesus haud nich bloos een Jaumahoat äwa ar; hee wees daut, daut hee metlieden deed. Hee säd dan met eene leise Stemm to de Mutta: “Hiel nich!” Un dan deed hee noch waut – hee wuak dän opp un “jeef de Mutta äaren Sän” (Varsch 14-15).

15. Waut kjenn wie von Jesus sien Wunda lieren?

¹⁵ Waut kjenn wie von Jesus sien Wunda lieren, daut hee de Wätfru äaren Sän oppwuak? Wie kjennen lieren, met soone mettofeelen, waut truaren. Wie woaren dän Dooden nich oppwakjen kjennen, soo aus Jesus deed. Oba wan wie aundre beoobachten, kjenn wie dee Metjefeel wiesen, waut truaren. Wie kjennen fuaz proowen, een bät waut to sajen ooda waut fa dee to doonen, waut dee treest (Spr. 17:17; 2. Kor. 1:3-4; 1. Pet. 3:8). d Mau rajcht eefache Wieed kjennen väl aun dee doonen.

16. Waut kaust du von de Sesta un von de Mutta lieren, waut truad, soo aus daut opp daut nojemoakte Bilt to seenen es?

¹⁶ See wie mol eene Erfoarunk. Eenje Joaren  trigj sach eene Sesta, daut eene Mutta aunfunk to roaren, aus se em Vesaumlungshus daut Leet sungen, waut sikj von de Hopninj haundeld, daut de Doodes oppstonen woaren. De Mutta haud korz äare Dochta em Doot veloaren. De Sesta wist daut, un doawäajen jinkj see no ar, foot ar om un sunk daut Leet met ar toop. De Mutta säd lota: “Ekj kjrieech eene groote Leew fa de Breeda un Sestren.” See wia soo dankboa, daut see wia no daut Toopkomen jekomen. See sajcht wieda: “Wua wie Help kjrieen, es bie daut Vesaumlungshus.” Wie kjennen ons secha sennen, daut Jehova daut moakjt, wan wie met soone metfeelen, waut eenen “bedrekjten Jeist haben” (Psa. 34:19).

17. Waut hab wie en disen Artikjel jelieet?

¹⁷ Ons kaun daut werkjlich em Gloowen stoakjen, wan wie de Jeschichten en de Bibel studieren, woo Jesus Wunda muak. Dee lieren ons, woo sea Jehova un Jesus ons leewen un daut Jesus de Macht haft, de Menschen äare Trubbels to leesen, un daut wie ons gaunz opp de Säajnungen veloten kjennen, waut Gott sien Kjennichrikj brinjen woat. Dee sent aul gaunz dicht bie! Wan wie dise Jeschichten studieren, kjenn wie doaräwa nodenkjen, woo wie Jesus siene Ieejenschoften nodoonen kjennen. Wuarom moak wie ons nich mol eenen Plon, daut fa ons selfst ooda em Famieljenstudium derchtogonen, waut vonne Wunda Jesus noch muak? Acht doaropp, waut du jelieet hast, un vetal aundre daut. Stal die väa, waut vonne feine Unjahoolunk du met aundre haben woascht, wan du daut deist! (Reem. 1:11-12).

18. Waut woa wie en dän näakjsten Artikjel seenen?

¹⁸ Aum Enj von sienen Deenst wuak Jesus noch eenen Mensch vom Doot opp – daut wia sien leewa Frint. Oba ditmol wieren de Omstend gaunz besonda. En dän näakjsten Artikjel woa wie ons daut unjastonen, waut wie von dit Wunda lieren kjennen. Un wie woaren uk seenen, woo wie onsen Gloowen stoakjen kjennen aun de Hopninj, daut de Doodes oppstonen.