19. ARTIKJEL FA DAUT STUDIUM
Woo kjenn wie onsen Gloowen stoakjen aun daut Vespräakjen vonne niee Welt?
“Sull . . . [Jehova] waut sajen un daut nich doonen?” (4. MO. 23:19)
LEET 142 Ons aun de Hopninj hoolen
WAUT WIE SEENEN WOAREN a
1-2. Waut mott wie en dee Tiet doonen, wäarent wie no de niee Welt luaren?
WIE sent sea dankboa fa Jehova sien Vespräakjen, daut hee von dise Welt eene niee, jerajchte Welt moaken woat (2. Pet. 3:13). Wie weeten nich krakjt, wanea daut bat doa es. Oba doano, woo daut enne Welt dreit, es to seenen, daut daut aul gaunz dicht bie es (Mat. 24:32-34, 36; Apj. 1:7).
2 Bat daut bat doa es, mott wie onsen Gloowen aun dit Vespräakjen stoakjen, endoont woo lang wie aul enne Woarheit jewast sent. Wuarom? Wäajen soogoa een stoakja Gloowen kaun schwak woaren. De Apostel Paulus räd von de “Sind . . ., dee ons soo leicht aunhenjt”, aulsoo em Gloowen schwak woaren (Heb. 12:1). Daut ons Gloowen nich schwak woat, mott wie foaken doaräwa nodenkjen, waut wie fa Bewies haben, daut de niee Welt boolt komen woat (Heb. 11:1).
3. Von waut haundelt dis Artikjel sikj?
3 En disen Artikjel woa wie von dree Sachen räden, woo wie onsen Gloowen aun de niee Welt stoakjen kjennen. 1. Wan wie äwa daut Leesjelt nodenkjen. 2. Wan wie äwa Jehova siene Krauft nodenkjen. Un 3. wan wie em jeisteljen drock sent. Dan woa wie seenen, woo daut, waut Jehova to Habakuk säd, ons vondoag dän Dach em Gloowen stoakjen kaun. Oba daut ieeschte räd wie mol von eenjet, wua daut needich es, daut wie eenen stoakjen Gloowen aun de niee Welt haben.
WANEA WIE EENEN STOAKJEN GLOOWEN HABEN MOTTEN
4. Bie waut vonne Entscheidungen mott wie eenen stoakjen Gloowen haben?
4 Jieda Dach moak wie soone Entscheidungen, wua daut aun eenen stoakjen Gloowen fält. Biejlikj mott wie Entscheidungen moaken äwa onse Frind, Tietvedrief, School, Oabeit, onse Ehe un de Kjinja. Daut es goot, wan wie äwa dit nodenkjen: “Wiesen miene Entscheidungen, daut ekj mie secha sie, daut dise Welt woat oppjeriemt woaren un daut Gott siene niee Welt boolt komen woat? Ooda wäl ekj mie soont to doonen aus dee, waut nich aun daut eewje Läwen jleewen?” (Mat. 6:19-20; Luk. 12:16-21). Wie woaren de baste Entscheidungen moaken kjennen, wan wie onsen Gloowen stoakjen, daut Gott siene niee Welt gaunz dicht bie es.
5-6. Wuarom fält ons daut aun eenen stoakjen Gloowen, wan wie derch waut schwoaret gonen? Met waut jeit daut to vejlikjen?
5 Ons fält daut uk aun eenen stoakjen Gloowen, wan wie derch schwoaret gonen – biejlikj wan ons vefolcht woat, wan wie sea krank woaren ooda doa irjent sestwaut es, waut ons kaun mootloos moaken. Aum Aunfank feelt sikj ons daut veleicht soo, daut wie daut uthoolen kjennen. Oba soone Trubbels hoolen foaken lang aun un dan fält ons daut aun eenen stoakjen Gloowen toom daut uthoolen un Jehova wieda met Freid deenen (Reem. 12:12; 1. Pet. 1:6-7).
6 Wan wie derch waut schwoaret gonen, feelt sikj ons daut veleicht soo, daut Gott siene niee Welt nienich komen woat. Meent daut dan, daut ons Gloowen schwak es? Nich onbedinjt. En eene jraslich kolde Winta denkj wie veleicht soo, daut de Somma kjeenmol komen woat. Oba de Somma kjemt wada! Krakjt soo es daut, wan wie sea mootloos sent. Ons späat sikj daut veleicht soo, daut de niee Welt kjeenmol komen woat, oba wan ons Gloowen stoakj es, weet wie daut doch, daut Gott siene Vespräakjungen sikj aula erfellen woaren (Psa. 94:3, 14-15; Heb. 6:17-19). Met soon Vetruen kjenn wie dän Deenst fa Jehova doawäajen emma aune ieeschte Städ stalen.
7. Fa waut sell wie oppaussen?
7 Em Prädichtdeenst fält ons daut uk aun eenen stoakjen Gloowen. Väl Menschen, dee wie de goode Norecht “von Gott sien Rikj” prädjen, jleewen nich, daut daut eene niee Welt jäwen woat (Mat. 24:14; Hes. 33:32). Oba wie wellen doa nich aun twiewlen, bloos wäajen dee twiewlen. Daut et nich bat doa kjemt, mott wie wieda onsen Gloowen stoakjen. See wie mol dreeatlei, waut ons doabie halpen kaun.
DENKJ ÄWA DAUT LEESJELT NO
8-9. Waut kaun daut aun onsen Gloowen doonen, äwa daut Leesjelt notodenkjen?
8 Äwa daut Leesjelt nodenkjen kaun onsen Gloowen uk stoakjen. Daut Leesjelt jeft ons de Sechaheit, daut Gott siene Vespräakjungen sikj erfellen woaren. Wie sellen doa goot äwa nodenkjen, wuarom Jehova daut Leesjelt jeef un waut doa aules met en wia. Daut woat onsen Gloowen stoakjen, daut Gott sien Vespräakjen von eene niee Welt sikj erfellen woat. Wuarom kjenn wie daut sajen?
9 Waut wia bie daut Leesjelt aules met en? Jehova schekjt sienen leewen ieeschtjebuarnen Sän vom Himmel aus Mensch no de Ieed. Aus Jesus oppe Ieed wia, must hee uk väl schwoaret beläwen. Un dan must hee sea lieden un stoawen. Met aul dit haft Jehova eenen huagen Pries betolt. Ons leeftolja Gott wudd daut nich jeloten haben, daut sien Sän lieden un stoawen must, wan wie bloos fa een Stootje een bätret Läwen haben kunnen (Joh. 3:16; 1. Pet. 1:18-19). Wiels Jehova soonen huagen Pries betolt haft, woat hee doano seenen, daut wie enne niee Welt fa emma läwen kjennen.
DENKJ ÄWA JEHOVA SIENE KRAUFT NO
10. Waut kaun Jehova no Efeesa 3:20 no doonen?
10 Daut tweede, waut onsen Gloowen stoakjt, es, daut wie äwa Jehova siene Krauft nodenkjen. Hee haft de Macht, aules to doonen, waut hee vesprakjt. Väl Menschen jleewen nich, daut daut mäajlich es, daut wie fa emma en eene niee Welt läwen kjennen. Oba Jehova vesprakjt foaken soont, waut fa Menschen ommäajlich lat. Hee es je de aulmajchtja Gott (Hiob 42:2; Mar. 10:27). Wuarom wudd hee bloos eefache Sachen vespräakjen? (Läs Efeesa 3:20.)
11. Waut fa besondre Vespräakjungen muak Gott? Jeff een Biespel. (See dän Kausten “ Besondre Vespräakjungen, waut sikj erfelt haben”.)
11 See wie mol eenjet, waut Jehova ieeschtemma vespruak un oba fa de Menschen ommäajlich leet. Hee vespruak Abraham un Sara, daut dee en äare oole Joaren een Kjint haben wudden (1. Mo. 17:15-17). Hee säd to Abraham, daut siene Nokomen daut Launt Kanaan oawen wudden. Oba Abraham siene Nokomen, de Israeliten, wieren fa väl Joaren Sklowen en Ägipten. Daut mott soo jeloten haben, aus wan daut kjeenmol passieren wudd! Oba daut deed. Väl Joaren lota säd Jehova, daut Elisabet een Kjint haben wudd, wan see uk aul oolt wia. Un hee säd uk, daut Maria, eene Junkfru, sienen ieejnen Sän to Welt brinjen wudd. Soo erfeld sikj daut, waut Jehova aul dusende Joaren trigj em Goaden Eden vesproaken haud! (1. Mo. 3:15).
12. Waut wiesen Josua 23:14 un Jesaja 55:10-11 ons äwa Jehova siene Macht?
12 Wie stoakjen onsen Gloowen aun Jehova siene Macht, wan wie doaräwa nodenkjen, waut hee aules vesproaken haft un woo hee daut erfelt haft (läs Josua 23:14; Jesaja 55:10-11). Dan sent wie bäta reed, aundre halpen to vestonen, daut de niee Welt nich bloos een Droom es ooda waut utjedochtet. Jehova selfst säd äwa dän nieen Himmel un de niee Ieed: “Dise Wieed sent woarhauftich un opp to veloten!” (Opb. 21:1, 5).
EM JEISTELJEN DROCK SENNEN
TOOPKOMES
Woo kaun die aul dit halpen, dienen Gloowen to stoakjen? (See Varsch 13)
13. Woo kjennen de Toopkomes onsen Gloowen stoakjen? Laj daut ut.
13 Daut dredde, waut onsen Gloowen stoakjt, es, daut wie em jeisteljen drock sent. Denkj biejlikj mol doaraun, woo de Toopkomes ons togood komen. Anna b, dee aul fa väl Joaren em Voltietdeenst jewast es, sajcht: “Derch de Toopkomes blift mien Gloowen stoakj. Mau rajcht wan de Rädna nich een sea gooda Liera es ooda nich von waut nieet rät, hia ekj doawäajen emma waut, waut mie halpt, de Schreft bäta to vestonen. Un daut stoakjt mienen Gloowen.” Ons Gloowen kaun uk stoakja woaren, wan wie no onse Breeda un Sestren äare Auntwuaten horchen (Reem. 1:11-12; 10:17).
PRÄDICHTDEENST
Woo kaun die aul dit halpen, dienen Gloowen to stoakjen? (See Varsch 14)
14. Woo stoakjt de Prädichtdeenst onsen Gloowen?
14 De Prädichtdeenst halpt ons uk, eenen stoakjen Gloowen to haben (Heb. 10:23). Barbara, dee Jehova aul fa äwa 70 Joa jedeent haft, sajcht: “De Prädichtdeenst haft mienen Gloowen noch emma jestoakjt. Je mea ekj met aundre äwa Jehova siene scheene Vespräakjungen räd, je stoakja woat mien Gloowen.”
PERSEENLICH STUDIEREN
Woo kaun die aul dit halpen, dienen Gloowen to stoakjen? (See Varsch 15)
15. Woo stoakjt ons daut em Gloowen, wan wie fa ons perseenlich studieren? (See uk de Bilda.)
15 Fa ons perseenlich studieren stoakjt uk onsen Gloowen. Susan sajcht, daut ar daut halpt, wan see daut plont, wanea see studieren well. See sajcht: “Sindach moak ekj dän Woaktorm reed fa näakjste Wäakj. Mondach un Dinjsdach moak ekj mie fa daut Toopkomen enne Wäakj reed. De aundre Doag doo ekj fa mie perseenlich studieren.” Wäajen see daut jeplont haft, wanea see studieet, kaun Susan äaren Gloowen emma wada stoakjen. Irene es eene Sesta, dee aul fa Joaren em Betel enne Stäts jedeent haft. Waut äaren Gloowen stoakjt, es, biblische Profezeiungen to studieren. See sajcht: “Daut es toom bewundren, woo Jehova siene Profezeiungen sikj aula erfellen, mau rajcht de kjlanste Eenselheiten.” c
“DAUT WOAT GAUNZ SECHA WOA WOAREN”
16. Wuarom weet wie, daut Jehova siene Wieed to Habakuk uk met ons to doonen haben? (Hebräa 10:36-37).
16 Eenje von Jehova siene Deena haben sikj daut aul lang jewenscht, daut daut Enj von dise Welt mol kjeem. Eenje Menschen denkjen, Gott siene Vespräakjungen wudden sikj aul lang haben sult erfellen. Jehova weet, woo siene Deena daut jeit, un doawäajen säd hee to Habakuk: “Wiels de Vision woat sikj ieescht mau dan erfellen, wan de bestemde Tiet ieescht doa es, un dise Vision rant nom Enj opptoo un dee woat sikj secha erfellen. Wan daut uk siene Tiet nemt, jäft nich Hopninj opp! Daut woat gaunz secha woa woaren. Daut woat nich too lot komen!” (Hab. 2:3, NW). Säd Gott dise Wieed bloos, om dän Gloowen von Habakuk to stoakjen? Nä, wiels Jehova leet dän Apostel Paulus oppschriewen, daut dise Wieed uk met de Christen to doonen haben, dee nu no de niee Welt luaren (läs Hebräa 10:36-37). Wie kjennen ons secha sennen, daut Gott sien Vespräakjen sikj nich vetrakjen woat, wan sikj daut uk soo späat, wiels daut sajcht: “Daut woat gaunz secha woa woaren. Daut woat nich too lot komen!”
17. Woo es eene Sesta dän Rot nojekomen, waut Jehova Habakuk jeef?
17 Väle von Jehova siene Deena sent Jehova sienen Rot nojekomen, nich Hopninj opptojäwen, un dee haben daut fa väle Joaren jedonen. Louise biejlikj funk Jehova aune 1939 aun to deenen. See sajcht: “Don docht ekj, daut Harmagedon ea komen wudd, ea ekj met de School derch wia. Oba daut wia nich soo. Äwa de Joaren haft mie daut em Gloowen jestoakjt, Jeschichten to läsen von Jehova siene Deena, dee uk luaren musten, bat sikj daut erfeld, waut Jehova an vesproaken haud – biejlikj Noah, Abraham, Josef un aundre. Nich Hopninj opptojäwen haft mie un uk aundre jeholpen, ons secha to sennen, daut de niee Welt aul gaunz dicht bie es.” Väle, waut Jehova uk aul lang jedeent haben, denkjen krakjt soo.
18. Woo kaun daut onsen Gloowen aun de niee Welt stoakjen, wan wie ons de Schepfunk beseenen?
18 Daut stemt, noch kjenn wie de niee Welt nich seenen. Oba denkj wie mol aun eenjet, waut wie nu seenen kjennen, soo aus de Stierns, de Beem, de Tieren un de Menschen. Kjeena wudd daut vestrieden kjennen, daut daut dise Sachen nich jeft, bloos wiels doa eene Tiet wia, wua daut aul daut nich jeef. Daut jeft daut bloos, wiels Jehova daut jemoakt haft (1. Mo. 1:1, 26-27). Gott haft sikj daut väajenomen, eene niee Welt to moaken, un hee woat daut uk doonen. En de niee Welt woaren de Menschen fa emma läwen kjennen un dee woaren uk volkomen jesunt sennen. Krakjt soo goot aus daut nu de Schepfunk rom ons jeft, krakjt soo secha woat daut to de rajchte Tiet eene niee Welt jäwen (Jes. 65:17; Opb. 21:3-4).
19. Woo kaust du dienen Gloowen stoakjen?
19 Bat daut bat doa es, nemm aule Jeläajenheiten woa, dienen Gloowen to stoakjen. Sie dankboa fa daut Leesjelt. Denkj äwa Jehova siene Krauft no. Sie em jeisteljen drock. Wan du dit deist, dan woascht du eena von dee sennen, dee derch äaren Gloowen un “derch äa jeduldich sennen, daut jekjräajen haben, waut an vesproaken wia” (Heb. 6:11-12; Reem. 5:5).
LEET 139 Stal die de niee Welt väa
a Bie dise Tiet jleewen väle nich aun Jehova sien Vespräakjen, daut hee eene niee Welt moaken woat. Dee jleewen, daut daut bloos een Droom ooda waut utjedochtet es. Oba wie sent ons secha, daut Jehova siene Vespräakjungen sikj aula erfellen woaren. Wan wie onsen Gloowen hoolen wellen, dan mott wie dän emma wada stoakjen. Woo kjenn wie daut? Dis Artikjel woat ons daut wiesen.
b Eenje Nomes hab wie hia jeendat.
c Een deel von de Artikjels äwa biblische Profezeiungen kaun eena en dän Index der Wachtturm-Publikationen bie “Prophezeiung[en]” finjen, biejlikj dän Artikjel “Was Jehova voraussagt, trifft immer ein” em Wachtturm vom 1. Jaunewoa 2008. Du kaust uk Artikjels opp Plautdietsch finjen en de Help toom nosieekjen fa Jehova siene Zeijen, wan du doa “Profezeiungen” sieekjst.
