1. Waut velangt Jehowa von ons?

 EENT von de scheenste Tiet fa een Poa Lied es, wan äa jesundet Bäbe jebuaren es. Wan de Elren daut Bäbe uk väl räakjnen, wellen dee oba nich, daut et kjlien blift. Dee wudden sikj sea väl Sorjen moaken, wan daut nich wudd wieda waussen. Krakjt soo es Jehowa uk sea schaftich, wan wie aunfangen, von am to lieren. Oba hee well nich, daut wie em Jeisteljen stonen bliewen un nich wieda waussen (1. Kor. 3:1). Hee velangt von jieda Christ, “riep” to woaren (1. Kor. 14:20, JHF).

2. Waut woa wie disen Artikjel seenen?

² Waut es doa met en, een riepa Christ to sennen? Woo kjenn wie riepe Christen woaren? Woo halpt de stoakje Kost ons, em Jeisteljen to waussen? Un wuarom sell wie ons wieda aunstrenjen, riepe Christen to sennen? En disen Artikjel woa wie dise Froagen beauntwuaten.

WAUT ES DOA MET EN, RIEP TO SENNEN?

3. Woo kaun eena een riepa Christ woaren?

³ Daut griechische Wuat, waut enne Bibel met “voljewossen” äwasat es, kaun uk “riep”, “volkomen” un “volstendich” bedieden (1. Kor. 2:6). a Soo aus een Bäbe wieda waust, bat daut een groota Mensch es, soo mott wie em Jeisteljen waussen,  bat wie riep sent. Un wie sellen uk wieda veraunkomen, mau rajcht wan wie aul riep sent (1. Tim. 4:15). Wie aula kjennen em Jeisteljen riep sennen, uk dee, waut noch mau junk sent. Woo kjenn wie daut weeten, aus wie aul riep sent?

4. Waut deit een riepa Christ?

⁴ Een riepa Christ deit aules, waut Jehowa von am velangt un läst sikj nich bloos dee Sachen ut, waut am paussen. Secha es dee onvolkomen un moakt doawäajen Fäla. Oba dee prooft jieda Dach sien Bastet, daut hee soo denkjt un haundelt, aus Jehowa daut jefelt. Een riepa Christ haft sikj uk de niee Natua aunjetrocken un prooft, emma dolla soo to denkjen, aus Jehowa deit (Efs. 4:22; 4:23-24, NW). Dee haft daut uk jelieet, goode Entscheidungen to moaken, wäajen hee sikj emma no Jehowa siene Jesazen un Gruntsauzen recht. Am fält daut nich aun eene groote Häad Räajlen, waut hee aules doonen saul. Un wan hee sikj to waut eenich woat, dan strenjt hee sikj sea aun, daut notokomen (1. Kor. 9:26-27).

5. Woo kaun daut met eenen Christ romkomen, waut nich riep es? (Efeesa 4:14-15).

⁵ Oba een Christ, waut nich riep es, jeit leicht to veleiden derch “Errlieren”, haulwe Woarheiten, Pludarie, oppjemoakte Jeschichten ooda von de Aufjefolne (läs Efeesa 4:14-15). b Veleicht es dee uk aufjenstich, jleich to strieden, es leicht beleidicht ooda jeft no, wan dee aufjeprooft woat (1. Kor. 3:3).

6. Met waut jeit daut to vejlikjen, em Jeisteljen riep to woaren? (See uk daut Bilt.)

⁶ Soo aus wie aul jeseenen haben, vejlikjt de Bibel em Jeisteljen riep woaren met eenen Mensch, waut oppwaust. Doa sent väl Sachen, waut een Kjint nich weet. Doawäajen brukt daut Kjint daut, daut een utjewosna Mensch am beschizt un halpt. Saj wie mol, eene Mutta un äare kjliene Dochta wellen äwa eene Gauss gonen. Secha wudd de Mutta ar aune Haunt nämen. Oba wan de Dochta ieescht ella es, woat de Mutta ar loten auleen äwa de Gauss gonen, oba see woat ar denkjen halpen, daut see ieescht no beid Sieden kjikjen saul, aus doa waut kjemt. Un wan de Dochta ieescht groot es, dan woat see ut sikj selfst  oppaussen. Kjinja fält daut, daut utjewosne Menschen äant halpen, Jefoaren utem Stich to gonen. Krakjt soo fält soone Christen, waut nich riep sent, daut aun riepe Christen, waut äant halpen, jeistelje Jefoaren utem Stich to gonen un goode Entscheidungen to moaken. Oba wan een riepa Christ waut entscheiden mott, dan denkjt dee äwa biblische Gruntsauzen no, om to weeten, woo Jehowa äwa de Sach denkjt, un dan deit hee daut Rajchte.

7. Fält riepe Christen daut uk aun Help?

⁷ Bediet dit, daut riepe Christen daut kjeenmol aun Help fält? Nä. Soone, waut riep sent, motten eenjemol uk no Help froagen. Eena, dee noch nich riep es well, daut aundre am sajen, waut hee doonen saul ooda fa am entscheiden. Oba wan een riepa Christ eenen aundren no Help frajcht, waut veleicht weisa ooda erfoarna es, dan vejat hee daut nich, daut hee selfst siene Entscheidunk moaken saul un daut Jehowa von am velangt, “siene ieejne Laust [to] droagen” (Gal. 6:5).

8. En woone Stekjen kjennen riepe Christen veschieden sennen?

⁸ Utjewosne Menschen lat nich aula äwareen. Krakjt soo haben nich aule riepe Christen äwareene Ieejenschoften. Eenje sent biejlikj sea weis un aundre sea äwanäment, eenje sent sea friejäwrich un aundre sea metfeelent. Un dan noch – twee riepe Christen, waut en deeselwje Loag sent, kjennen gaunz veschiedne Entscheidungen moaken, waut oba beid no de Schreft no rajcht sent. Dauts foaken soo, wan daut om Sachen jeit, waut met daut Jewessen to doonen haben. Oba dee seenen doano, veeent to bliewen, enne Städ sikj unjarenaunda to rechten, wäajen dee veschieden entscheiden (Reem. 14:10; 1. Kor. 1:10).

WOO KJENN WIE RIEPE CHRISTEN WOAREN?

9. Woa wie von veselfst riepe Christen? Laj daut ut.

⁹ Een Kjint waust met de Tiet opp, oba kjeen Mensch woat em Jeisteljen riep, onen sikj auntostrenjen. Biejlikj de Breeda un Sestren en Korint neemen de goode Norecht aun, leeten sikj deepen, kjrieejen dän heiljen Jeist un lieeden väl von daut, waut de Apostel Paulus lieed (Apj. 18:8-11). Oba eenje Joaren no äare Doop, wieren väle noch nich riepe Christen (1. Kor. 3:2). Waut kjenn wie doonen, daut wie nich opphieren met em Jeisteljen waussen?

10. Waut mott wie doonen, daut wie riep woaren? (Judas 20).

¹⁰ Daut wie em Jeisteljen riepa woaren, mott wie ieescht dän Wunsch doatoo haben. Deejanje, waut daut “jleichen, onerfoaren to sennen” un doa stonen to bliewen, wua see sent, woaren kjeenmol riepe Christen woaren (Spr. 1:22, NW). Eenje Menschen sent aul gaunz groot, oba dee kjennen nich fa sikj selfst entscheiden – de Elren motten daut fa äant doonen. Wie wellen nich soo sennen. Wie wellen selfst de Veauntwuatunk äwanämen, em Jeisteljen wieda to waussen (läs Judas 20). Wan du doa wieda opp schaufst, een riepa Christ to woaren, dan bäd doarom, daut Jehowa die beides jeft, “daut wellen un daut foadich moaken” (Filip. 2:13).

11. Waut haft Jehowa ons jejäft, daut wie kjennen riepe Christen woaren? (Efeesa 4:11-13).

¹¹ Jehowa velangt nich von ons, daut wie auleen em Jeisteljen waussen. Hee haft ons Hoads un Lierasch enne Vesaumlunk jejäft, waut ons halpen, “volstendje Menschen” em Jeisteljen to woaren (läs Efeesa 4:11-13). Jehowa jeft ons uk sienen heiljen Jeist, waut ons halpt, “Christus . . . siene Jesennunk” to haben (1. Kor.  2:14-16). Gott haft uk loten vea Evangelien oppschriewen, waut ons wiesen, woo Jesus docht un räd un waut hee deed, aus hee oppe Ieed wia. Wan wie Jesus en dän Stekj nodoonen, woo hee docht un waut hee deed, kjenn wie riepe Christen woaren.

WOO HALPT DE STOAKJE KOST ONS, EM JEISTELJEN TO WAUSSEN?

12. Woont sent de Gruntlieren äwa Christus?

¹² Om riep to woaren, mott wie mea lieren aus bloos de Gruntlieren von Christus, waut wie daut Ieeschte lieeden. Mank dise Sachen sent biejlikj de Lieren von een Leetsennen haben, Gloowen, sikj deepen loten un daut Oppstonen von de Doodes (Heb. 6:1-2). Aun dise Lieren jleewen aule Christen. Dauts, wuarom de Apostel Petrus to de groote Häad von dise Lieren räd, waut hee doa aum Pinjsten prädjen deed (Apj. 2:32-35, 38). Wie motten dise Gruntlieren aunnämen, wan wie wellen eent von Jesus siene Nofolja woaren. Paulus lieed biejlikj gaunz dietlich, daut wan wäa nich aun daut Oppstonen jleeft, kaun nich sajen, daut hee een woara Christ es (1. Kor. 15:12-14). Doawäajen sell wie nich tofräd sennen, bloos de Gruntlieren von de Woarheit to vestonen.

13. Waut mott wie doonen, daut ons de stoakje, jeistelje Kost togood kjemt, wua Hebräa 5:14 von rät? (See uk daut Bilt.)

¹³ Bie de stoakje, jeistelje Kost es mea met en aus bloos de Gruntlieren. Doa sent Jehowa siene Jesazen un siene Gruntsauzen met en, waut ons halpen to vestonen, woo hee denkjt. Daut ons dit jeistelje Äten togood kjemt, mott wie Gott sien Wuat studieren, nodenkjen un ons aunstrenjen, daut notokomen. Wan wie daut doonen, dan woa wie lieren, soone Entscheidungen to moaken, waut Jehowa jefaulen (läs Hebräa 5:14). c

14. Woo holp Paulus de Korinta, em Jeisteljen to waussen?

¹⁴ Soone Christen, waut nich riep sent, haben daut sea schwoa, wan dee waut entscheiden sellen, wua daut enne Bibel kjeene Räajel fäa jeft. Eenje denkjen veleicht, daut see aules doonen kjennen, waut see wellen, wan daut nich eene biblische Räajel jeft. Aundre wada froagen veleicht no  eene Räajel, wuafäa kjeene needich es. Biejlikj schient daut soo, daut de Christen en Korint Paulus no eene Räajel fruagen, aus see daut äten kunn, waut se de Jetta jeopfat hauden. Paulus säd dee nich, waut see doonen kunnen un waut nich. Hee säd bloos, daut jieda eena de “Frieheit” haft to entscheiden, doano aus sien Jewessen daut toolat. Hee räd von Gruntsauzen, waut jiedrem eenen halpen kunnen, sikj soo to entscheiden, daut see een frieet Jewessen hauden un aundre nich toom stolpren brochten (1. Kor. 8:4, 7-9). Paulus lieed de Korinta, selfst tweschen Goot un Schlajcht to unjascheeden, enne Städ sikj bloos opp aundre to veloten ooda no eene Räajel to froagen. Opp dee Wajch lieed hee de Korinta, riepe Christen to woaren.

15. Woo holp Paulus de hebräische Christen em Jeisteljen verauntokomen?

¹⁵ Wie lieren een deel Wieetvollet von daut, waut Paulus aun de hebräische Christen schreef. Eenje von dee wieren em Jeisteljen nich veraunjekomen. Dee must rajcht jesajcht “wada . . . Malkj jejäft woaren un noch nich stoakje [jeistelje] Kost” (Heb. 5:12). Dee hauden de niee Lieren nich aunjenomen, waut Jehowa äant soo bie sacht derch de Vesaumlunk jelieet haud (Spr. 4:18). Biejlikj väl judische Christen hilden sikj noch emma aun daut Jesaz Moses, wan Jesus sien Opfa met daut uk aul rom 30 Joa trigj een Enj jemoakt haud (Reem. 10:4; Tit. 1:10). Soo, daut wia nich too väl velangt von de Juden, daut dee daut en dise 30 Joa hauden sult vestonen kjennen, daut see sikj nich lenja musten aun daut Jesaz Moses hoolen! Doawäajen wull Paulus de Hebräa nu halpen, de deepe Lieren von de Woarheit to vestonen. Sien Breef holp dee to seenen, daut et väl bäta wia, Jehowa opp dee Wajch auntobäden, aus Jesus daut enjefieet haud. Dis Breef jeef dee uk dän Moot, wieda de goode Norecht to prädjen, wan see uk Jäajenstaunt hauden von de Juden (Heb. 10:19-23).

ONS WIEDA AUNSTRENJEN, RIEPE CHRISTEN TO SENNEN

16. Waut mott wie doonen, wan wie uk aul riepe Christen sent?

¹⁶ Wie motten ons nich bloos aunstrenjen, riepe Christen to woaren, oba daut uk bliewen. Wie wellen kjeenmol soo denkjen,  daut wie ons nich brucken aunstrenjen, bätre Frind met Jehowa to woaren (1. Kor. 10:12). Wie sellen ons selfst unjasieekjen toom seenen, daut wie wieda em Jeisteljen veraunkomen (2. Kor. 13:5).

17. Woo wiest Paulus sien Breef aun de Kolossa, daut et needich es, em Jeisteljen riep to bliewen?

¹⁷ En Paulus sienen Breef aun de Kolossa säd hee wada, daut et needich es, riepe Christen to bliewen. Wan see uk aul riepe Christen wieren, woarnd Paulus äant doafäa, sikj doavon veleiden to loten, woo de Menschen enne Welt dochten (Kol. 2:6-10). Un Epafras, waut de Breeda en de Vesaumlunk doa woomäajlich goot kjand, bäd foaken, daut dee “muchten voljewossen em Gloowen stonen”, aulsoo riep sennen (Kol. 4:12). Wauts de Lia? Paulus un Epafras wia daut kloa, daut Gott eenem halpen mott, wan eena well een riepa Christ bliewen, un daut wie ons selfst aunstrenjen motten. Dee wullen, daut de Christen en Kolossä riepe Christen bleewen, krakjt endoont waut fa Schwierichkjeiten dee beläwen musten.

18. Waut wudd kjennen met eenen riepen Christ woaren? (See uk daut Bilt.)

¹⁸ Paulus woarnd de Hebräa doafäa, daut een Christ wudd kjennen Gott sienen Jefaulen fa emma velieren. Deejanja wudd kjennen soo wiet wajchkomen von Jehowa, daut dee nich mea een Leetsennen haben kunn un daut Gott am nich mea vejäwen kunn. Daut Goode wia, daut et bie de Hebräa nich soo wiet kjeem (Heb. 6:4-9). Oba waut es met soone, waut sikj vondoag dän Dach vonne Vesaumlunk trigjjetrocken haben ooda utjeschloten sent, oba lota een Leetsennen haben? Daut dee een Leetsennen haben wiest, daut dee aundasch sent, aus soone, wuavon Paulus hia schreef. Oba wan dee trigjkomen no Jehowa, dan motten dee uk de Help aunnämen, waut hee äant jeft (Hes. 34:15-16). De Eltestasch woaren veleicht eenen erfoarnen Christ froagen, aus dee dänjanjen halpen kaun, em Jeisteljen wada stoakjt to woaren.

19. Waut saust du die väanämen?

¹⁹ Du kaust riep woaren, wan du die aunstrenjst! Lia wieda deepe Lieren von de Bibel un proow emma dolla soo to denkjen, aus Jehowa deit. Un wan du aul een riepa Christ jeworden best, dan doo dien Bastet, daut du doabie blifst.