17. ARTIKJEL FA DAUT STUDIUM
LEET 111 Wie haben väl Jrind, ons to freien
Velot daut jeistelje Paradies kjeenmol
“Freit junt un siet en eent wajch schaftich, äwa daut waut ekj moak” (JES. 65:18)
OM WAUT DAUT JEIT
En disen Artikjel woa wie lieren, woo ons daut jeistelje Paradies togood kjemt un woo wie aundre daut enjankren kjennen, doa uk nenntokomen.
1. (a) Waut es daut jeistelje Paradies? (b) To waut sell wie ons eenich sennen?
VONDOAG dän Dach es doa een bilteljet Paradies oppe Ieed, wua een deel Menschen bennen sent un drock sent met Goodet doonen. Doa sent uk millionende Menschen, waut doa werkjlich Fräd haben. Dee, waut en dit Paradies bennen sent, sent sikj eenich, daut kjeenmol to veloten. Dee wellen uk soo väl Menschen aus mäajlich halpen, daut dee met äant toop doa sent. Waut es daut fa een Paradies? Daut es daut jeistelje Paradies! a
2. Waut es soo besonda von daut jeistelje Paradies?
2 Opp eene besondre Wajch haft Jehowa eene biltelje Städ jemoakt, wua siene Deena Fräd un Eenichkjeit haben, wan dee uk en Soton siene schlajchte un jefäadelje Welt läwen, wua Menschen eena dän aundren haussen (1. Joh. 5:19; Opb. 12:12). Ons leeftolja Voda sitt, woo de Menschen en dise Welt lieden motten, un hee sorcht doafäa, daut siene Deena sikj secha feelen, soo daut dee am wieda kjennen met Freid deenen. Sien Wuat sajcht, daut dit jeistelje Paradies soo es aus eene “Tooflucht” un “aus een jewessada Goaden” (Jes. 4:6, JHF; 58:11). Wiels Jehowa dee säajent, kjennen dee, waut en dit Paradies läwen, schaftich sennen un sikj secha feelen en dise latste, schwoare Doag (Jes. 54:14; 2. Tim. 3:1).
3. Woo erfeld sikj Jesaja, Kapitel 65 ieeschtemma?
3 Jehowa säd derch dän Profeet Jesaja, woo daut Läwen en daut biltelje Paradies wudd sennen fa dee, waut doa wudden wonen. En Jesaja, Kapitel 65 rät daut äwa dit. Daut ieeschte Mol erfeld sikj dise Profezeiunk en daut Joa 537 v.Chr. De Juden, waut don een Leetsennen hauden, worden von Babel friejemoakt un kunnen trigj no äa Launt gonen. Jehowa säajend sien Volkj un holp dee, de Staut Jerusalem wada opptobuen, waut doa vestieet wia. Hee holp dee uk, dän Tempel opptofiksen, soo daut de Tempel wada de wichtichste Städ wia, wua see Jehowa en Israel aunbäden kunnen (Jes. 51:11; Sach. 8:3).
4. Woo erfelt sikj Jesaja, Kapitel 65 en onse Tiet?
4 De Profezeiunk von Jesaja funk aune 1919 n.Chr. aun, sikj toom tweede Mol to erfellen, aus Jehowa siene Deena en onse Tiet von daut Groote Babel friejemoakt worden. Dan funk daut jeistelje Paradies aun, sikj äwa de gaunze Ieed to vespreeden. Flietje Breeda un Sestren, waut daut Kjennichrikj bekauntmuaken, stalden väle Vesaumlungen opp un brochten em Jeisteljen Frucht verendach. Mana un Frues, waut ea een sea grausomet un onmoralischet Läwen fieeden, trocken sikj “de niee Natua aun, dee tru, no Gott sienen Wellen . . . jemoakt worden es” (Efs. 4:24, NW). Väle von dee Säajnungen, wua Jesaja von rät, woaren sikj ieescht lota enne niee Welt erfellen. Oba daut jeistelje Paradies kaun ons nu aul opp veschiedne Wäaj togood komen. Well wie mol seenen, woo krakjt un wuarom wie doa kjeenmol veloten sellen.
WOO JEIT DEE DAUT, WAUT EN DAUT JEISTELJE PARADIES SENT?
5. Waut fa Goodet haben deejanje, waut en daut jeistelje Paradies sent no Jesaja 65:13 no?
5 Dee sent jesunt un feelen sikj goot. Jesaja siene Profezeiungen wiesen eenen grooten Unjascheet tweschen deejanje, waut en daut jeistelje Paradies sent, un deejanje, waut doa nich sent (läs Jesaja 65:13). Jehowa jeft siene Deena aules, waut dee em Jeisteljen brucken. Wie haben sienen heiljen Jeist, sien Wuat de Bibel un een deel Bieekja, waut sikj oppe Schreft stetten, soo daut wie “äten, . . . drinkjen . . . [un] schaftich sennen” kjennen (see uk Openboarunk 22:17). Bie deejanje, waut nich en daut jeistelje Paradies sent, es daut krakjt aundasch; dee “hungren . . . , darschten . . . [un motten sikj] schämen”. Dee haben nuscht von daut, waut äant em Jeisteljen fält (Amos 8:11).
6. (a) Woo wiest Joel 2:21-24, daut wie woaren jenuach em Jeisteljen haben? (b) Woo kjemt ons daut jeistelje Äten togood?
6 Joel räd en siene Profezeiunk von needje Sachen soo aus Jeträajd, Wien un Olieweneelj toom wiesen, daut Jehowa fa aules sorcht, waut siene Deena fält, wua uk daut jeistelje Äten met en es (Joel 2:21-24). Biejlikj jeft hee ons de Bibel, onse Bieekja, waut sikj oppe Bibel stetten, onse Websied un uk onse Toopkomes un Kongressen. Wie kjennen von aul dise Sachen jieda Dach eenen Nutzen haben. Woo kjemt daut ut? Wie sent em Jeisteljen jesunda un feelen ons bäta.
7. Wuarom kjenn wie ons “soo goot feelen em Hoat”? (Jesaja 65:14).
7 Dee sent schaftich un tofräd. Gott siene Deena sent soo dankboa, daut dee “fa Freid juchen” (läs Jesaja 65:14, NW). Wuarom kjenn wie ons “soo goot feelen em Hoat”? Wäajen wie eene Hopninj haben derch Jesus Christus sien Leesjelt, wäajen de Lieren ut Gott sien Wuat ons em Gloowen stoakjen un wäajen Gott siene Vespräakjungen ons treesten. Wan wie met onse jeistelje Breeda un Sestren äwa dise Dinja räden, moakt ons daut werkjlich schaftich! (Psa. 34:9; 133:1-3).
8. Woont sent de twee wichtichste Sachen, waut en daut jeistelje Paradies uttieekjnen?
8 De Leew un de Eenichkjeit mank Jehowa siene Zeijen sent de twee Sachen, waut en daut jeistelje Paradies daut Dolste uttieekjnen. Derch dise “Eenichkjeit” kjenn wie ons een bät väastalen, woo daut Läwen en de niee Welt sennen woat, wua Jehowa siene Deena noch mea Leew un Eenichkjeit haben woaren, aus dee vondoag dän Dach haben (Kol. 3:14). Eene Sesta vetalt, waut see mank Jehowa siene Deena jeseenen haft, aus see dee toom ieeschte Mol troff. See sajcht: “Ekj wist nich, woo ekj kunn schaftich sennen, nich mol en miene Famielje. Daut ieeschte Mol aus ekj sach, daut Menschen sikj woare Leew unjarenaunda weesen wia, aus ekj daut ieeschte Mol met Jehowa siene Zeijen toop wia.” Jieda eena, waut doa well werkjlich schaftich un tofräd sennen, mott en daut jeistelje Paradies sennen. Krakjt endoont waut dise Welt äwa Jehowa siene Deena denkjt, dee haben eenen gooden Nomen bie Jehowa un bie aul dee, waut am deenen (Jes. 65:15).
9. Waut vesprakjt Jesaja 65:16-17 ons äwa daut Schwoare, waut wie nu beläwen?
9 Dee sent jeloten un ruich. Jesaja 65:14 rät von dee, waut nich wellen en daut jeistelje Paradies sennen. Daut sajcht: “Jie oba woaren schrieen, wäajen junt daut Hoat soo wee deit, un jie woaren jaumarieren, wäajen jie junt gaunz bedrekjt feelen.” Oba woo woat daut met dee Sachen sennen, wuaderch Gott siene Deena nu soo väl Weedoag un Lieden haben? Met de Tiet woaren dee Sachen gaunz “vejäten sennen; daut woat fa [Gott] siene Uagen vestoaken sennen” (läs Jesaja 65:16-17, NW). Jehowa woat met onse Trubbels een Enj moaken, un met de Tiet woaren ons de Weedoag nich mea em Senn komen, wiels dee woaren gaunz veschwungen sennen.
10. Wuarom talst du daut fa eenen Säajen, daut du kaust met de Breeda un Sestren toop sennen? (See uk daut Bilt.)
10 Mau rajcht nu feel wie ons aul väl ruja, wan wie bie onse Toopkomes sent. Doa feel wie ons jeloten un denkjen nich soo väl aun daut Schwoare, waut wie enne Welt beläwen. Wie halpen onse Breeda un Sestren uk, ruja to sennen, wan wie dee soone Ieejenschoften wiesen, waut to dän Jeist siene Frucht jehieren. Daut sent biejlikj Leew, Fräd, Freid, Frintlichkjeit un Jelindichkjeit (Gal. 5:22-23). Es daut nich een groota Säajen, daut wie kjennen to Jehowa siene Organisazion jehieren? Dee, waut en daut jeistelje Paradies bliewen, woaren uk noch seenen, woo sikj daut gaunz erfellen woat, waut Gott vespruak, daut hee wudd “niee Himmel un eene niee Ieed” moaken.
Dauts een Säajen, Poat von Gott siene Famielje to sennen en daut jeistelje Paradies (See Varsch 10) c
11. Woo jeit ons daut en daut jeistelje Paradies no Jesaja 65:18-19 no?
11 Dee sent dankboa un oppjebrocht. Daut Näakjste räd Jesaja doavon, wuarom wie ons freien sellen un “en eent wajch schaftich” sennen en daut jeistelje Paradies. Jehowa selfst haft dit biltelje Paradies reedjemoakt (läs Jesaja 65:18-19). Doawäajen wundat eenem daut nich, daut hee siene Deena brukt, om de Menschen to halpen, von de veschiedne Gruppen en dise Welt, waut nich de Woarheit äwa Gott lieren, to veloten un en daut scheene, jeistelje Paradies nenntokomen! Wäajen wie en de Woarheit sent, sent wie sea jesäajent. Doawäajen sent wie schaftich un haben dän Wunsch, aundre von dise Säajnungen to vetalen (Jer. 31:12).
12. Woo feelst du die, wan du äwa de Vespräakjungen en Jesaja 65:20-24 nodenkjst, un wuarom feelst du die soo?
12 Wie sent uk dankboa un oppjebrocht äwa de Hopninj, waut wie haben, wäajen wie to daut jeistelje Paradies jehieren. Denkj bloos mol äwa aul daut no, waut wie seenen un doonen woaren enne niee Welt! De Bibel sajcht: “Daut woat nich mea passieren, daut een Kjint mau een poa Doag läft; un de elre woaren kjennen äare Joaren utläwen.” Wie “woaren Hiesa buen un en dee wonen; . . . Wiengoades aunplaunten un von de Frucht äten.” Onse “Oabeit woat nich vejäfs sennen”, wiels wie “woaren unja . . . [Jehowa sienen] Säajen sennen”. Hee vesprakjt, daut wie ons woaren secha feelen un tofräd sennen un daut ons Läwen werkjlich waut enhoolen woat. Hee säd uk: “Ea see bäden”, woat hee aul weeten, waut jieda eena brukt, un “dee woat die jäwen, waut dien Hoat sikj wenscht” (Jes. 65:20-24; Psa. 37:4).
13. Met waut vejlikjt Jesaja 65:25 de Endrungen, waut de Menschen moaken, wan dee aunfangen, Jehowa to deenen?
13 Dee sent frädlich un secha. Väle, waut ea een bät soo wieren aus Tieren, wäajen dee biejlikj grausom un nich opp to veloten wieren, haben äa Läwen gaunz jeendat met de Help von Gott sienen Jeist (läs Jesaja 65:25). Dee haben sikj sea aunjestrenjt, von äare schlajchte Ieejenschoften loostokomen (Reem. 12:2; Efs. 4:22-24). Secha, Gott siene Deena sent noch onvolkomen un doawäajen woa wie emma wada Fäla moaken. Oba Jehowa haft doawäajen “aule [Sorten] Menschen” derch de Leew veeenicht, un dee haben nu woaren Fräd (Tit. 2:11). Dauts werkjlich een Wunda, waut bloos de aulmajchtja Gott doonen kaun!
14. Woo es daut aun eenen Brooda siene Erfoarunk to seenen, daut et soo es, waut Jesaja 65:25 sajcht?
14 Kjennen Menschen werkjlich äa Läwen endren? Doatoo mol eene Erfoarunk. Een junga Maun, waut een sea onmoralischet un grausomet Läwen fieed, wia aul foaken em Jefenkjnis jewast, aus hee 20 Joa wia. Hee kjeem em Jefenkjnis nenn wäajen Foatieja stälen, sikj en Menschen äare Hiesa nennbräakjen un aundre schlemme Sachen. Hee wia uk emma reed, met aundre to feiten. Oba aus hee daut enwort, waut de Bibel lieed, un aunfunk, no de Toopkomes von Jehowa siene Zeijen to wanken, wia hee sikj secha, daut hee daut nu wist, waut daut Läwen fa eenen Senn haud – daut es, Jehowa en daut jeistelje Paradies to deenen. Nodäm hee sikj deepen leet, docht hee foaken doaräwa no, waut Jesaja 65:25 met am to doonen haud. Ea wia hee soo jefäadlich aus een Leiw, oba hee endad sikj un es nu frädlich aus een Laum.
15. (a) Wuarom lod wie aundre en, en daut jeistelje Paradies nenntokomen? (b) Woo doo wie daut?
15 Jesaja 65:13 fangt soo aun: “Doawäajen sajcht Gott de HAR”. Varsch 25 hieet met de Wieed opp, “sajcht de HAR”. Daut, waut Jehowa vesprakjt, erfelt sikj emma (Jes. 55:10-11). Biejlikj jeft daut vondoag dän Dach aul daut jeistelje Paradies. Jehowa haft doafäa jesorcht, daut siene Deena en eene veeende Famielje sent, waut werkjlich besonda es. En dise Famielje feel wie ons secha un haben soo väl Fräd, aus en dise schlajchte Welt mäajlich es (Psa. 72:7). Doawäajen well wie soo väl aus mäajlich halpen, en de Famielje von Jehowa siene Deena nenntokomen. Daut kjenn wie doaderch, daut wie ons gaunz doahinja lajen, Jinja to moaken (Mat. 28:19-20).
WOO KJENN WIE AUNDRE DAUT ENJANKREN, TO DAUT JEISTELJE PARADIES TO JEHIEREN?
16. Woo kjennen Menschen sikj no daut jeistelje Paradies hanjetrocken feelen?
16 Jieda eena von ons kaun waut doatoo doonen, daut aundre uk wellen to daut jeistelje Paradies jehieren. Wie kjennen daut doonen, wan wie Jehowa nodoonen. Hee schlapt kjeenen Mensch en siene Organisazion nenn. Enne Städ daut “trakjt” hee dee leeftolich no sikj (Joh. 6:44; Jer. 31:3). Menschen met een goodet Hoat kjennen nich aundasch, aus sikj Jehowa hanjetrocken feelen, wan dee äwa siene feine Ieejenschoften lieren un woo goot hee es. Woo kjenn wie met onse goode Ieejenschoften un doamet, woo wie ons vehoolen, aundre daut enjankren, daut dee uk wellen to daut jeistelje Paradies jehieren?
17. Woo kjenn wie aundre daut enjankren, to daut jeistelje Paradies to jehieren?
17 Eene Wajch, woo wie aundre daut enjankren kjennen, to daut jeistelje Paradies to jehieren es, wan wie onse Breeda un Sestren Leew wiesen un dee frintlich behaundlen. De Onjleewende, waut no de Toopkomes kjeemen ieeschtemma, säden: “Gott [es] werkjlich mank junt” (1. Kor. 14:24-25; Sach. 8:23). Wie wellen uk, daut soone, waut toom ieeschte Mol no onse Toopkomes komen, dautselwje denkjen. Doawäajen mott wie wieda dän Rot nokomen: “Läft frädlich met eenaunda” (1. Tes. 5:13).
18. Woo kjennen Menschen sikj to onse Organisazion hanjetrocken feelen?
18 Wie sellen onse Breeda un Sestren emma soo seenen, aus Jehowa dee sitt. Wie kjennen daut doonen, wan wie no dee äare goode Sieden kjikjen un nich no dee äare schlajchte Sieden, waut dee boolt aulmols nich mea woaren haben. Wan doa Trubbels oppkomen, dan kjenn wie dee opp eene goode Wajch oppem kloaren brinjen, wan wie dän Rot nokomen: Siet “von Hoaten leeftolich eena toom aundren. Vejäft junt unjarenaunda” (Efs. 4:32). Dan woaren soone, waut sikj dautselwje wenschen, uk wellen to daut jeistelje Paradies jehieren. b
BLIEW EN DAUT JEISTELJE PARADIES
19. (a) Waut säden eenje, nodäm dee trigj no daut jeistelje Paradies kjeemen? (See daut Hock “ Dee veleeten un kjeemen trigj”.) (b) To waut sell wie ons eenich sennen? (See uk daut Bilt.)
19 Sent wie nich sea dankboa fa daut jeistelje Paradies? Dauts noch kjeenmol ea soo scheen jewast aus nu, un doa sent nu noch mea Deena von Jehowa bennen aus jeemols ea. Well wie fa emma dankboa sennen fa daut Paradies, waut Jehowa fa ons jemoakt haft. Aule, waut sikj wellen goot un secha feelen un tofräd un ruich sennen, motten en daut jeistelje Paradies nennkomen un doa newers veloten. Oba wie wellen sea oppaussen, wäajen de Soton aules prooft, waut dee kaun, om ons doa wajchtolocken (1. Pet. 5:8; Opb. 12:9). Wie wellen daut nich tooloten, daut dee daut doonen kaun. En dit biltelje Paradies jeit daut scheen un doa es daut rein un frädlich. Well wie ons sea aunstrenjen, daut et soo blift!
Dee, waut en daut jeistelje Paradies bliewen, woaren uk daut werkjelje Paradies oppe Ieed beläwen (See Varsch 19)
WAUT WURSCHT DU SAJEN?
-
Waut es daut jeistelje Paradies?
-
Waut fa Säajnungen beläw wie en daut jeistelje Paradies?
-
Woo kjenn wie aundre daut jankrich moaken, daut dee doa uk nennkomen wellen?
LEET 144 Hool dienen Loon faust em Uag!
a WIEED UTJELAJCHT: Daut “jeistelje Paradies” es eene biltelje Städ, wua wie Jehowa en Fräd un Eenichkjeit deenen kjennen. En dit jeistelje Paradies kjenn wie Frind sennen met Jehowa un uk unjarenaunda.
b Kjikj daut Video Waut doonen dee nu? Alena Žitníková: Mien Wunsch haft sikj erfelt opp jw.org un see, woo dise Sesta jesäajent wort en daut jeistelje Paradies.
c BILTBESCHRIEWUNK: Väl Breeda sent toop un vetalen en een Toopkomen, oba een Brooda trakjt sikj trigj.
