1. Woo feelen eenje sikj, wan dee aundre em Deenst aunräden sellen? (See uk daut Bilt.)

 WIE aus Jehowa siene Deena gonen prädjen, wiels wie onsen himlischen Voda leewen un wiels wie wellen, daut aundre Menschen am uk kjanen lieren. Een deel Vekjindja jeit daut sea scheen em Prädichtdeenst; aundre wada nich. Wuarom nich? Eenje sent veleicht sea bleed un denkjen, daut see aundre nich goot lieren kjennen. Aundre feelen sikj ommaklich, no de Menschen äare Hiesa to gonen, wan see nich enjelot sent. Noch aundre haben Angst, daut de Menschen woaren jäajenaun sennen. Eenje haben jelieet, daut see sikj nich strieden sellen. Dise Breeda leewen Jehowa aula sea, wan dee daut uk schwoa es, met aundre äwa de goode Norecht to räden. Oba dee weeten, woo wichtich dit Woakj es un doawäajen moaken dee räajelmässich met. Jehowa es werkjlich schaftich äwa dee!

2. Wuarom sell wie nich mootloos woaren, wan ons daut schwoa es, Freid to haben em Deenst?

² Es die daut eenjemol schwoa, Freid to haben em Deenst, wiels du die soo aus dit feelst? Wan jo, dan woa oba nich mootloos. Wan du denkjst, daut du aundre nich goot lieren kaust, kaun daut wiesen, daut du deemootich best un nich too väl Oppmoakjsomkjeit haben west ooda daut du met aundre nich strieden west. Un kjeena well aufjewäsen woaren, besonda nich, wan wie proowen, aundre Goodet to doonen. Ons himlischa Voda weet daut krakjt, wan wie ons soo feelen un well ons de Help jäwen, waut ons fält (Jes. 41:13). En disen Artikjel woa wie fief Sachen seenen, waut ons halpen woaren, Freid em Deenst to haben, wan wie ons soo aus dit feelen.

 GOTT SIEN WUAT KAUN DIE KRAUFT JÄWEN

3. Waut holp dän Profeet Jeremia, aundre to prädjen?

³ Waut Gott to siene Deena säd, haft dee noch emma Krauft jejäft, wan dee eene schwoare Oppgow hauden. See wie mol, woo daut bie dän Profeet Jeremia wia. Aus Jehowa am de Oppgow jeef to prädjen, wia hee sikj onsecha. Hee säd: “Ekj sie nich toom räden to brucken; ekj sie noch mau bloos een Jung” (Jer. 1:6). Waut holp Jeremia, sikj nich soo onsecha to feelen? Hee kjrieech Krauft derch daut, waut Jehowa to am säd. Jeremia säd: Daut wia “aus een Fia en mien Hoat, un aus wan miene Knoakes daut nich hoolen kunnen. Ekj bemieej mie emsonst stell to sennen, un kaun daut nich lenja uthoolen” (Jer. 20:8-9). De Norecht, waut Jeremia prädjen sull, jeef am de Krauft, waut am fäld, wan de Menschen doa uk nuscht von hieren wullen ooda soogoa jäajen am wieren.

4. Waut deit daut aun ons, Gott sien Wuat to läsen un doaräwa notodenkjen? (Kolossa 1:9-10).

⁴ Christen kjrieen Krauft derch daut, waut Jehowa en sien Wuat haft loten oppschriewen. Aus de Apostel Paulus aun de Vesaumlunk en Kolossä schreef, säd hee, daut mea äwa Jehowa lieren äant halpen wudd, “derch goode Woakjen Frucht [to] brinjen” un opp dee Wajch “Gott to jefaulen läwen” (läs Kolossa 1:9-10). Bie dee goode Woakjen es uk daut Prädichtwoakj met en. Soo, wan wie Gott sien Wuat läsen un doaräwa nodenkjen, woat ons Gloowen aun Jehowa stoakja un wie kjennen bäta vestonen, wuarom daut soo wichtich es, aundre von sien Kjennichrikj to prädjen.

5. Woo kjenn wie werkjlich eenen Nutzen haben, wan wie de Bibel läsen un dee studieren?

⁵ Daut Gott sien Wuat ons werkjlich togood kjemt, mott wie nich bosich sennen, wan wie daut läsen, studieren un doaräwa nodenkjen. Nemm die goot Tiet doafäa. Wan du eenen Bibelvarsch läst un dän nich fein vestonen kaust, dan lot dän nich bloos toch. See leewa, waut se en dän Index der Wachtturm-Publikationen ooda de Help toom nosieekjen fa Jehova siene Zeijen äwa disen Bibelvarsch utjelajcht haben. Wan du die goot Tiet nemst toom studieren, dan woascht du dien Vetruen doaropp stoakjen, daut Gott sien Wuat de Woarheit sajcht (1. Tes. 5:21). Je sechra du die doaräwa best, je scheena woat die daut gonen,  aundre von dee Sachen to vetalen, waut du jelieet hast.

MOAK DIE FEIN FA DÄN DEENST REED

6. Wuarom sell wie ons fein fa dän Deenst reedmoaken?

⁶ Wan du die fein reedmoakst fa dän Deenst, woascht du die sechra feelen, wan du met aundre rätst. Jesus holp siene Jinja, sikj fein reedtomoaken, ea hee dee utschekjt toom prädjen (Luk. 10:1-11). Wiels dee daut nokjeemen, waut Jesus äant jelieet haud, kunnen dee mea Goodet doonen un dee jinkj daut scheen (Luk. 10:17).

7. Woo kjenn wie ons fa dän Prädichtdeenst reedmoaken? (See uk daut Bilt.)

⁷ Woo kjenn wie ons fa dän Prädichtdeenst reedmoaken? Wie kjennen doaräwa nodenkjen, woo wie von de Woarheit räden kjennen un woo wie daut met onse ieejne Wieed sajen kjennen. Daut kaun uk sea halpen, wan wie doaräwa nodenkjen, waut de Menschen en onse Jäajent veleicht sajen un doonen woaren, un waut wie dan doonen kjennen. Wan wie dan met wäm räden, kjenn wie proowen, ruich un leeftolich to sennen un schaftich to kjikjen.

8. En waut fa Stekjen sent wie soo aus de ieedne Jefässa en dän Apostel Paulus sien Jlikjnis?

⁸ De Apostel Paulus säd to siene Breeda un Sestren: “Wie haben disen Schauz oba en ieedne Jefässa” (2. Kor. 4:7). Waut es dis Schauz? Daut Prädichtwoakj von daut Kjennichrikj, waut Läwes rat (2. Kor. 4:1). Waut bedieden de ieedne Jefässa? Dee stalen Gott siene Deena väa, waut aundre de goode Norecht prädjen. En Paulus siene Tiet brukten de Schachaschmana ieedne Krucken toom wieetvolle Sachen opp un dol fieren, soo aus Äten, Wien un Jelt. Krakjt soo haft Jehowa ons de wieetvolle Norecht von daut Kjennichrikj aunvetrut. Met Jehowa siene Help hab wie de Krauft, wieda de goode Norecht to prädjen.

BÄD OM MOOT

9. Woo kjenn wie met Menschenforcht foadich woaren? (See uk daut Bilt.)

⁹ Veleicht hab wie eenjemol Menschenforcht. Waut kaun ons halpen, doamet foadich to woaren? See wie mol, om waut de Apostel bäden deeden, aus äant daut aufjesajcht wort to prädjen. Enne Städ sikj enenjsten to loten, bäden see Jehowa doarom, daut see “wieda sea driest von  [sien] Wuat räden” kunnen. Jehowa beauntwuad dee äa Jebäd fuaz (Apj. 4:18, 29, 31). Wan du eenjemol Menschenforcht hast, dan saust du Jehowa uk om Help bäden. Froag am doano, daut diene Leew fa de Menschen stoakja sennen kaun aus diene Angst fa dee.

10. Woo halpt Jehowa ons, von am Zeichnis to jäwen? (Jesaja 43:10-12).

¹⁰ Jehowa haft ons utjewält, von am Zeichnis to jäwen un hee vesprakjt, ons to halpen, äwanäment to sennen (läs Jesaja 43:10-12, NW). Hia es veatlei, woo hee daut deit. Ieeschtens: Jesus es emma met ons, wan wie de goode Norecht prädjen (Mat. 28:18-20). Tweedens: Jehowa haft eenje Enjel aunjestalt toom ons halpen (Opb. 14:6). Dreddens: Jehowa jeft ons eenen Helpa, de heilja Jeist, waut ons aun daut denkjen halpt, waut wie aul jelieet haben (Joh. 14:25-26). Vieedens: Jehowa jeft ons Breeda un Sestren, waut met ons toop em Prädichtdeenst gonen. Met Jehowa siene Help un de Unjastettunk von onse leewe Breeda un Sestren hab wie aules, waut ons fält, om äwanäment to sennen un wieda to prädjen.

PAUSS DIE DE MENSCHEN AUN UN BLIEW GOOT JESONNEN

11. Woo kaust du veleicht mea Menschen trafen, wan du prädjen jeist? (See uk daut Bilt.)

¹¹ Woascht du eenjemol mootloos, wäajen du nich väl Menschen tus trafst? Denkj mol äwa no: “Wua sent de Menschen en mien Jebiet nu jroz?” (Apj. 16:13). “Sent dee veleicht oppe Oabeit ooda biem Enkjeepen?” Wan daut soo es, wurscht du dan mea Menschen trafen, wan du oppe Gaussen prädjen deetst? Een Brooda, waut Josua heet, sajcht: “Ekj haud mea Jeläajenheiten, met de Menschen to räden, aus ekj doa prädjen deed, wua de Menschen enkjeepen un opp soone Städen, wua väl Menschen hankomen”. Hee un siene Fru Bridget haben uk mea Menschen tus jetroffen, wan see jäajen Owent ooda aum Sindach no Meddach prädjen deeden (Efs. 5:15-16).

12. Woo kaust du rutfinjen, waut de Menschen jleewen ooda äwa waut dee sikj Sorjen moaken?

¹² Wan du met wäm rätst, waut ieeschtlich nich sea fein horcht, dan proow ruttofinjen, waut dee jleeft un äwa waut dee sikj Sorjen moakt. Josua un Bridget  brucken de Froag, waut väaren opp een Zeichnisblaut es. Biejlikj brucken see daut Zeichnisblaut Waut es de Schreft fa die? un sajen: “Eenje Menschen jleewen, daut de Bibel een Buak von Gott es; aundre jleewen daut nich soo sea. Waut denkjst du doaräwa?” Derch dit kjennen see foaken eene Vetal aunfangen.

13. Wuarom haft sikj de Deenst doawäajen jeloont, aus de Menschen horchen ooda nich? (Spricha 27:11).

¹³ Wuarom kjenn wie sajen, daut sikj de Deenst doawäajen jeloont haft, aus de Menschen horchen ooda nich? Wäajen wie daut jedonen haben, waut Jehowa un sien Sän Jesus haben wellen – wie haben Zeichnis jejäft (Apj. 10:42). Mau rajcht wan wie met kjeenem räden ooda wan dee de goode Norecht aufwiesen, kaun ons daut doawäajen scheen gonen, wiels wie weeten, wie moaken onsen himlischen Voda froo (läs Spricha 27:11).

14. Wuarom kjennen aule schaftich sennen, wan een Vekjindja wäm finjt, waut mea weeten well?

¹⁴ Wie kjennen uk schaftich sennen, wan een aundra Vekjindja em Jebiet wäm finjt, waut mea weeten well. De Woaktorm vejlikjt daut Prädichtwoakj mol doamet, wan no een Kjint jesocht woat, waut sikj vebeiselt haft. Een deel sieekjen von eene Städ no de aundre, un wan eena daut Kjint jefungen haft, freit sikj nich bloos dee, oba aule. Krakjt soo es daut uk biem Jinja moaken; doa halpt jieda eena von de Vesaumlunk met. Wie brucken aule von de Vesaumlunk, om daut Jebiet derchtoprädjen, un aule freien sikj, wan eena aunfangt, no de Toopkomes to komen.

DERCH DÄN PRÄDICHTDEENST WIES WIE ONSE LEEW FA JEHOWA UN DE MENSCHEN

15. Woo kjenn wie mea Freid em Deenst haben? (Matäus 22:37-39). (See uk daut Bilt.)

¹⁵ Wie kjennen mea Freid em Prädichtdeenst haben, wan wie doaraun denkjen, daut wie doaderch Jehowa un uk de Menschen onse Leew wiesen (läs Matäus 22:37-39). Stal die mol väa, woo schaftich Jehowa mott sennen, wan hee sitt, daut wie dise Oabeit derchfieren. Denkj uk doaraun, woo schaftich de Menschen woaren sennen, wan dee aunfangen, de Bibel to studieren! Vejät uk nich, daut soone,  waut no ons horchen un sikj eenich woaren, Jehowa to deenen, woaren fa emma läwen kjennen (Joh. 6:40; 1. Tim. 4:16).

16. Woo kjenn wie Freid em Deenst haben, wan wie nich von tus kjennen? Jeff Biespels.

¹⁶ Kaust du wäajen irjenteene Uasoak nich von tus? Wan daut soo es, dan kjikj doano, waut du doonen kaust, daut du diene Leew fa Jehowa un de Menschen wiesen kaust. En de Tiet von de COVID-19-Krankheit kunnen Samuel un Dania nich von tus. En dise schwoare Tiet deeden dee foaken äwa Fon prädjen, dee schreewen Breew un fieeden äwa Zoom Bibelstudiums derch. Samuel prädicht uk to de Menschen, waut hee biem Hospitol troff, wua hee wäajen Kjräft doktren deed. Hee sajcht: “Wan wie derch Schwoaret gonen, dan kjenn wie ons bedrekjt un meed feelen un ons Gloowen kaun oppe Proow jestalt woaren. Doawäajen mott wie Freid em Deenst fa Jehowa haben.” Dan foll dän siene Fru Dania noch han un kjeem fa dree Moonat em Bad nenn. Doahinja wia see fa sas Moonat oppem Foastool. See sajcht: “Ekj deed soo väl aus mäajlich. Ekj kunn biejlikj to eene Nurs prädjen, waut no mie kjeem. Ekj räd uk met dee, waut Sachen no ons brochten, waut wie ons jekoft hauden. Ekj kunn uk mieremol fein äwa Fon met eene Fru räden, waut bie eene Kompanie schauft, wua se veschiednet fa kranke Menschen vekjeepen.” Wan Samuel un Dania uk nich mea soo väl doonen kunnen aus ea, deeden see oba daut, waut see kunnen, un doawäajen hauden see Freid.

17. Woo kjennen de Iedeeen en disen Artikjel die daut Baste halpen?

¹⁷ De Iedeeen en disen Artikjel woaren die daut Baste halpen, wan du dee aula nokjemst. Jieda Iedee es soo aus Eenatlei von een Rezapt. Wan eena de veschiedne Sachen von een Rezapt tooprieren deit, dan jeft daut waut Scheenet. Wan du aul de Iedeeen en disen Artikjel nokjemst, dan woascht du met de Schwierichkjeiten em Deenst bäta foadich woaren kjennen un woascht mea Freid doabie haben.