1. Woo kjennen Christen dän Rees fa daut Läwen batem Enj ranen?

WIE Christen sent en eenen Rees fa daut Läwen. Endoont, aus wie jroz aunjefongen haben ooda aul joarenlank ranen, wie motten wiedamoaken, bat de Rees derch es. Paulus sien Rot fa de Christen en Filippi kaun ons Moot jäwen, batem Enj uttohoolen. Eenje en Filippi deenden Jehova aul Joaren tru, oba Paulus holp an derch sienen Breef doawäajen noch denkjen, daut see aunhoolent ranen musten. Hee wull, daut dee uk wieda “opp daut Ziel” loosjuagen, krakjt soo aus hee (Filip. 3:14).

2. Wuarom wia Paulus sien Rot paussent fa de Filippa?

² Paulus sien Rot wia paussent fa de Christen en Filippi, wiels de Vesaumlunk doa wia von Aunfank aun sea vefolcht worden. Woo kjeem daut? Ojjefäa aune 50 n. Chr. kjeemen Paulus un Silas no Filippi, Mazedonien, wäajen Gott an doa hanjeschekjt haud (Apj. 16:9). Doa fungen see eene Fru, waut Liedia heet un “horchen deed . . .; däa muak de Har daut Hoat op”, daut see de goode Norecht aunneem (Apj. 16:14). Nich lang no daut leeten see un äare Famielje sikj dan deepen. Oba de Soton schleep nich. De Mana von de Staut schlapten Paulus un Silas ver de Stautsrechta un säden, dee wudden äare Staut en Orru brinjen. Paulus un Silas worden vekjielt, enjestopt un sullen dan de Staut veloten (Apj. 16:16-40). Jeewen see opp? Nich mol veleicht! Un woo jinkj daut met de niee Vesaumlunk wieda? Daut wia sea scheen, daut de Breeda un Sestren doa tru bleewen. Secha holp an daut goode Biespel von Paulus un Silas.

3. (a) Waut haud Paulus oppem kloaren? (b) Waut fa Froagen woa wie nu derchgonen?

³ Paulus wia sikj gaunz eenich, nich mootloos to woaren, ooda opptojäwen (2. Kor. 4:16). Un hee wist, daut hee wudd motten daut Ziel em Uag hoolen, daut hee sienen Rees batem Enj ranen kunn. Waut kjenn wie von Paulus lieren?  Waut fa Biespels ut onse Tiet wiesen, daut eena uk en schwoare Tieden tru bliewen kaun? Un woo kaun de Hopninj ons halpen, daut wie ons eenich sent, kjeenmol opptojäwen?

4. Woo bleef Paulus em Deenst drock, wan hee uk nich von tus kunn?

⁴ Waut deed Paulus, aus hee sienen Breef no de Filippa schreef? Hee wia en Room en een Hus faust un kunn nich rutgonen prädjen. Oba hee hilt sikj doamet drock, deejanje Zeichnis to jäwen, waut am besochten, un Breew no Vesaumlungen to schriewen, waut wiet auf wieren. Vondoag dän Dach nutzen uk väl Christen, waut nich von tus kjennen, jieda Jeläajenheit ut toom deejanje von de goode Norecht vetalen, waut no an komen. Un dee schriewen uk Breew toom soone Zeichnis jäwen, waut wie em Deenst nich trafen.

5. Waut holp Paulus no Filippa 3:12-14 no, sien Ziel em Uag to hoolen?

⁵ Paulus leet sikj derch daut goode ooda derch de Fäla, waut hee ea jemoakt haud, nich von sienen Deenst auflenkjen. Hee säd: “Ekj vejät, waut hinja mie licht, un rakj mie ut no daut, waut ver mie es” (läs Filippa 3:12-14). Daut holp am, sienen Rees batem Enj to ranen. Waut haud Paulus biejlikj kunt auflenkjen? Daut ieeschte wia, daut hee sea aunjeseenen wia, ea hee een Christ wort. Oba hee sach daut aules “aus Schoden un aus Drakj” aun (Filip. 3:3-8). Tweedens feeld hee sikj woomäajlich schlajcht doaräwa, daut hee de Christen ea vefolcht haud. Oba hee hieed doawäajen nich opp, Jehova to deenen. Un dreddens docht hee nich, daut hee aul jenuach fa Jehova jedonen haud. Paulus wia flietich em Deenst, wan hee uk enjestopt, vekjielt un jesteenicht wort un eenjemol weinich Kjleeda ooda Äten haud ooda metem Schepp veojjlekjt (2. Kor. 11:23-27). Hee wist, daut hee Jehova wieda deenen must, wan hee uk aul väl jedonen un utjehoolen haud. Krakjt soo es daut uk bie ons.

6. Woone Sachen, waut hinja ons ligjen, mott wie veleicht vejäten?

⁶ Woo kjenn wie daut vejäten, waut hinja ons licht, soo aus Paulus? Veleicht hab wie daut noch emma met de Sinden schwoa, waut wie ea mol deeden. Dan wudd wie kjennen mea von Christus sien Leesjelt studieren. Wan wie daut doonen un doaräwa nodenkjen un bäden, dan kaun ons daut väl Moot jäwen un halpen, ons nich mea soo schuldich to feelen. Un ons Jewessen woat ons woomäajlich nich mea wäajen soont baudren, waut Jehova ons aul togood jehoolen haft. Waut kjenn wie noch von Paulus lieren? Eenje leeten eene Oabeit toch, wua see hauden kunt väl Jelt vedeenen, daut see mea fa Jehova doonen kunnen. Wan daut bie ons soo wia, dan wudd wie kjennen Paulus nodoonen, wan wie nich daut beschoden, waut wie ons woomäajlich haben derchgonen loten (4. Mo. 11:4-6; Liera 7:10). Bie daut, “waut hinja . . . [ons] licht”, kaun uk daut met en sennen, waut wie ea aul fa Jehova deeden ooda derchmuaken. Wan wie trigjdenkjen, woo Jehova ons aul jesäajent un jeholpen haft, dan kjenn wie dän noda komen. Oba wie wellen kjeenmol denkjen, daut wie ons nu nich mea aunstrenjen brucken, wäajen wie ea aul soo väl jedonen haben (1. Kor. 15:58).

7. Waut mott wie no 1. Korinta 9:24-27 no doonen, om dän Rees fa daut Läwen to jewennen? Met waut jeit daut to vejlikjen?

⁷ Paulus wist, daut Jesus lieed, daut eena sikj em Deenst fa Gott aunstrenjen  must (Luk. 13:23-24). Un hee wist uk, daut hee daut batem Enj doonen must, soo aus Jesus. Doawäajen vejlikjt hee daut Christenläwen met eenen Rees (läs 1. Korinta 9:24-27). Deejanje, waut en eenen Rees ranen, hoolen daut Ziel em Uag un loten sikj nich auflenkjen. Wan dee biejlikj derche Staut ranen, dan jeft et doa väl Stuasch un aundret, wua eena no kjikjen kaun. Kaust du die väastalen, daut eena von dee mol stonen blift un ieescht mol kjikjt, waut de Stuasch auntobeeden haben? Nich, wan dee jewennen well! En onsen Rees fa daut Läwen mott wie uk oppaussen, daut wie ons nich auflenkjen loten. Un wan wie ons Ziel em Uag hoolen un ons krakjt soo aunstrenjen aus Paulus, dan woa wie dän Pries jewennen!

8. Von woone dree Schwierichkjeiten woa wie nu räden?

⁸ Well wie nu mol von dreeatlei räden, waut ons en onsen Rees brikjen kunn. Wie kjennen mootloos woaren, wäajen daut lenja dieet, aus wie denkjen, ooda wäajen daut met onse Jesuntheit boajauf jeit ooda wäajen onse Trubbels schia nich een Enj nämen. Wan wie seenen, woo aundre met soone Schwierichkjeiten foadich worden, dan kaun ons daut eene Help sennen (Filip. 3:17).

9. Waut kaun daut aun ons doonen, wan doa waut nich soo romkjemt, aus wie denkjen?

⁹ Wan daut lenja dieet, aus wie denkjen. Wie aula freien ons to daut goode, waut Jehova vesproaken haft. Aus de Profeet Habakuk to Jehova säd, woo sea hee sikj wenscht, daut Jehova aul daut schlajchte en Juda oppriemd, säd Jehova to am: “Wacht doaropp” (Hab. 2:3). Oba wie kunnen leicht de Freid velieren un mau rajcht mootloos woaren, wan sikj daut soo späat, daut daut siemt, wua wie opp wachten (Spr. 13:12). Krakjt daut beläwden väl jesaulwde Christen rom daut Joa 1914. Dee dochten, daut see dit Joa nom Himmel komen wudden. Oba waut deeden dee, aus daut dan nich soo romkjeem?

10. Waut deeden eene Lied, aus doa waut nich soo romkjeem, aus see dochten?

¹⁰ See wie mol, waut twee true Breeda beläwden.  Brooda Royal Spatz wia 20 Joa, aus hee sikj aune 1908 deepen leet. Hee wia sikj gaunz secha, daut hee boolt wudd nom Himmel komen. Aus hee siene Mejal Pearl aune 1911 fruach, aus see sikj met am befrieen wull, säd hee to dee: “Du weetst je, waut aune 1914 sennen woat. Wan wie ons befrieen wellen, dan wudd wie fuaz sellen!” Jeewen dise Lied opp, aus see aune 1914 nich em Himmel kjeemen? Nä, dee deeden nich. An wia daut wichtja, Gott tru to deenen, aus äaren Loon to kjrieen. Dee wieren sikj gaunz eenich, bie äaren Rees nich opptojäwen. Un Royal un Pearl bleewen tru un drock em Deenst, bat äa Läwen oppe Ieed väl Joaren lota to Enj wia. Secha frei wie ons aul to dee Tiet, wua Jehova sienen Nomen reinmoaken woat un wiesen woat, daut hee daut Rajcht haft to harschen un daut hee aules doonen woat, waut hee vesproaken haft. Wie kjennen ons doaropp veloten, daut aul daut to dee Tiet komen woat, waut Jehova bestemt haft. Un bat dan well wie em Deenst fa Gott drock bliewen un nich mootloos woaren ooda brikjen, wan daut uk lenja dieet, aus wie denkjen.

11-12. Kjenn wie em jeisteljen veraunkomen, wan wie uk nich mea soo väl doonen kjennen aus ea? Jeff een Biespel.

¹¹ Wan daut met de Jesuntheit boajauf jeit. Wäa en eenen Rees rant, brukt väl Krauft. Oba mau rajcht eena, waut nich mea väl Krauft haft, kaun doawäajen em jeisteljen stoakja woaren. Väle, waut Trubbels met de Jesuntheit haben, sent sikj gaunz eenich, wieda em jeisteljen verauntokomen (2. Kor. 4:16). Soo wia daut biejlikj bie Brooda Arthur Secord. * Hee wia 88 Joa un kjrenkjlich un haud aul 55 Joa em Betel jedeent. Oba hee veleet sikj nich opp daut, waut hee ea jedonen haud. Eenen Dach kjikjt de Nurs, waut am besorjen deed, am aun un säd leeftolich: “Brooda Secord, du hast aul soo väl fa Jehova jedonen.” Brooda Secord kjikjt de Nurs schaftich aun un säd: “Jua, daut wudd noch soo sennen. Oba daut kjemt dolla doaropp aun, waut wie von nu wieda doonen, aus doaropp, waut wie ea jedonen haben.”

¹² Veleicht deenst du Jehova aul Joaren un kaust nu wäajen diene Jesuntheit nich mea soo väl doonen. Dan velia nich dän Moot! Du kaust die secha sennen, daut Jehova daut sea väl räakjent, waut du ea fa am jedonen hast (Heb. 6:10). Un vejät nich, daut Jehova nich bloos no daut kjikjt, waut du aules deist, oba uk no daut, woo du enjestalt best. Diene Leew fa Jehova es doaraun to seenen, daut du aules deist, waut en diene Krauft  steit (Kol. 3:23). Jehova weet, woo väl wie doonen kjennen, un velangt nich too väl von ons (Mar. 12:43-44).

13. (a) Waut muaken Anatoli un Lidija aules derch? (b) Woo halpt äare Jeschicht ons, Jehova wieda tru to deenen, wan wie uk väl derchmoaken?

¹³ Wan de Trubbels schia nich een Enj nämen. Eenje von Jehova siene Deena worden joarenlank vefolcht ooda hauden groote Schwierichkjeiten. Anatoli Melnik * biejlikj wia mau 12 Joa, aus sien Voda faustjenomen, enjestopt un no Sibirien jeschekjt wort. Daut wia äwa 7 000 Kilomeeta (4 000 Miel) auf von siene Famielje en Moldawien. Een Joa lota schekjten se Anatoli un siene Mutta un siene Grootelren uk no Sibirien. Met de Tiet kunnen see doa no de Toopkomes wanken, oba daut see doa hankjeemen, musten see en sea koldet Wada 30 Kilomeeta (20 Miel) derch dän Schnee gonen. Un aus Anatoli dan befriet wia un een eenjoaschet Mejalkje haud, wort hee fa dree Joa enjestopt un kunn nich bie siene Famielje sennen. Anatoli un siene Famielje deenden Jehova tru, wan dee uk joarenlank schwoaret derchmuaken. Nu es Anatoli 82 Joa un deend en Zentral-Asien en een Betelkommitee. Well wie krakjt soo aus hee un siene Fru Lidija wieda soo väl aus mäajlich fa Jehova doonen un nich oppjäwen (Gal. 6:9).

14. Waut must Paulus doonen, daut hee sienen Loon kjrieech?

¹⁴ Paulus wia sikj secha, daut hee sienen Rees batem Enj ranen kunn un sienen Loon kjrieen wudd. Hee wia een jesaulwda Christ un freid sikj aul, “dän Pries to kjrieen”, wuatoo Gott am vom Himmel jeroopt haud. Oba hee wist uk, daut hee doatoo “opp daut Ziel loos[joagen]” must (Filip. 3:14). Un hee brukt een feinet Jlikjnis, om de Filippa to halpen, äa Ziel em Uag to hoolen.

15. (a) Waut fa een Jlikjnis brukt Paulus? (b) Woo holp dit Jlikjnis de Filippa, sikj auntostrenjen un “opp daut Ziel loos[tojoagen]”?

¹⁵ Paulus holp de Filippa denkjen, daut see een Birjarajcht em Himmel hauden (Filip. 3:20). Wuarom wia daut soo wichtich? Ieeschtemma wia daut reemische Birjarajcht sea väl wieet. * Oba de jesaulwde  Christen hauden een väl bätret Birjarajcht, waut an noch väl mea goodet brocht aus daut reemische Birjarajcht. Doawäajen rod Paulus de Filippa too: “Seet bloos doano [ooda: “Stalt junt aus Birja soo opp”, NW, Fn.], daut jun Waundel met Christus sien Evangelium stemt” (Filip. 1:27). De jesaulwde Christen vondoag dän Dach sent een goodet Biespel fa ons, wäajen dee sikj sea aunstrenjen, noch mol daut eewje Läwen em Himmel to kjrieen.

16. Waut mott wie no Filippa 4:6-7 no doonen, endoont aus wie hopen, noch mol em Himmel to läwen ooda oppe Ieed?

¹⁶ Wie motten opp daut Ziel loosjoagen, endoont woo onse Omstend sent ooda aus wie hopen, eewich em Himmel to läwen ooda em Paradies oppe Ieed. Wie sellen nich no daut kjikjen, waut hinja ons licht, un ons von nuscht aufhoolen loten, em jeisteljen verauntokomen (Filip. 3:16, NW). Woomäajlich wacht wie aul lang doaropp, daut Jehova siene Vespräakjungen erfelt, ooda daut jeit met onse Jesuntheit boajauf. Ooda wie haben aul joarenlank Schwierichkjeiten ooda woaren vefolcht. Oba de Schreft rot ons aulem too: “Sorcht junt om nuscht.” Enne Städ daut sell wie Gott met bäden un prachren aules weeten loten, waut ons fält. Dan woat hee ons sienen Fräd jäwen, waut ons mea halpen kaun, aus wie denkjen (läs Filippa 4:6-7).

17. Waut woa wie en dän näakjsten Artikjel seenen?

¹⁷ Je noda deejanje, waut en eenen Rees ranen, nom Enj komen, je dolla strenjen dee sikj aun. Wie wellen ons uk aunstrenjen, onsen Rees fa daut Läwen batem Enj to ranen. Wie wellen aules doonen, waut wie kjennen, un de wundascheene Vespräakjungen em Uag hoolen, waut Gott ons jeft. Waut mott wie doonen, daut wie en de rajchte Rechtunk ranen un uthoolen kjennen? En dän näakjsten Artikjel woa wie seenen, waut en ons Läwen daut ieeschte komen saul un woo wie fauststalen kjennen, “waut daut aulabaste es” (Filip. 1:9-10).