1. Waut vonne Iea hab wie?

DAUT es eene groote Iea, daut wie to Jehova siene Vesaumlunk jehieren kjennen! Wie kjennen met een deel frädelje un schaftje Menschen toop en een jeisteljet Paradies sennen. Oba waut kaust du fa de Christenvesaumlunk doonen?

2. Waut fa een Jlikjnis brukt de Apostel Paulus en miere von siene Breew?

² De Apostel Paulus brukt en miere von siene Breew een Jlikjnis, waut ons halpen kaun, onse Oppgow en de Vesaumlunk bäta to vestonen. Doa sajcht Paulus, daut de Vesaumlunk soo es aus een Kjarpa. Un de Menschen, waut to de Vesaumlunk jehieren, sent soo aus de veschiedne Poat von dän Kjarpa (Reem. 12:4-8; 1. Kor. 12:12-27; Efs. 4:16).

3. Von woone dree Sachen woa wie nu räden?

³ En disen Artikjel woa wie dreeatlei seenen, waut wie von Paulus sien Jlikjnis lieren kjennen. Ieeschtens woa wie seenen, daut jieda eena von ons eene Oppgow * en Jehova siene Vesaumlunk haft. Tweedens woa wie lieren, waut wie doonen kjennen, wan wie nich krakjt weeten, waut wie fa de Vesaumlunk doonen kjennen. Un dreddens  woa wie unjasieekjen, wuarom wie flietich sellen daut doonen, waut Gott ons oppjejäft haft.

4. Waut lia wie von Reema 12:4-5?

⁴ Daut ieeschte, waut wie von Paulus sien Jlikjnis lieren kjennen, es, daut jieda eena eene wichtje Oppgow haft en Jehova siene Famielje. Hee sajcht: “Soo aus wie aun eenen Kjarpa väl Jläda haben, un dee Jläda oba nich aula daut selwje to doonen haben, soo sent wie väle, een Kjarpa en Christus, un uk unjarenaunda sent wie Jläda aun eenen Kjarpa” (Reem. 12:4-5). Waut lia wie doavon? Onse Oppgowen en de Vesaumlunk sent veleicht veschieden, oba wie sent aula väl wieet.

5. Waut vonne “Gowen” haft Jehova de Vesaumlunk jejäft?

⁵ Wan wie aun dee denkjen, waut eene Oppgow en de Vesaumlunk haben, dan denkj wie woomäajlich fuaz aun de aunjestalde Breeda (1. Tess. 5:12; Heb. 13:17). Jehova haft siene Vesaumlunk derch Christus “Gowen” jejäft (Efs. 4:8). Dise “Gowen” sent biejlikj de Breeda vom Väastaunt un dee äare Helpa, de Breeda von daut Betelkommitee, de Kjreisoppsechtasch, de Lierasch von onse Bibelschoolen, de Eltestasch un de Deenstaumthelpa. Aul dise Breeda sent derch dän heiljen Jeist aunjestalt, om fa Jehova siene wieetvolle Schop to sorjen un de Vesaumlunk to stoakjen (1. Pet. 5:2-3).

6. Waut wellen de aunjestalde Breeda no 1. Tessalonicha 2:6-8 no doonen?

⁶ De Breeda sent derch dän heiljen Jeist aunjestalt, om sikj veschiednet to äwanämen. Daut, waut de veschiedne Poat von onsen Kjarpa doonen, biejlikj de Henj ooda de Feet, kjemt dän gaunzen Kjarpa togood. Krakjt soo kjemt aul dee Oabeit, waut de aunjestalde Breeda doonen, de gaunze Vesaumlunk togood. Dise Breeda sieekjen nich no Iea fa sikj, oba dee wellen aundre oppbuen un stoakjen (läs 1. Tessalonicha 2:6-8). Woo dankboa sent wie Jehova nich fa dise feine Breeda, waut aundre wellich halpen wellen!

7. Waut fa goodet beläwen väl Voltietdeena?

⁷ Veleicht jeft daut en onse Vesaumlunk Missionoaren, Sondapionieren ooda Pionieren. Väl Breeda un Sestren oppe gaunze Welt brucken aul äare Tiet toom prädjen un Jinja moaken. Un dee haben aul väle kunt halpen, Jesus Christus notofoljen. Dise Voltietdeena haben jeweenlich nich väl em tieteljen, oba Jehova jeft dee väl goodet (Mar. 10:29-30). Wie schazen dise leewe Breeda un Sestren sea väl un freien ons, daut dee to de Vesaumlunk jehieren!

8. Wuarom es jieda Vekjindja bie Jehova väl wieet?

⁸ Sent bloos de aunjestalde Breeda un de Voltietdeena väl wieet fa de Vesaumlunk? Nä! Jieda eena, waut de goode Norecht bekauntmoakt, es wichtich fa Gott un fa de Vesaumlunk (Reem. 10:15; 1. Kor. 3:6-9). Eent von daut wichtichste, waut de Vesaumlunk doonen saul, es je, Jinja von Jesus Christus to moaken (Mat. 28:19-20; 1. Tim. 2:4). Un aule jedeepte un ojjedeepte Vekjindja wellen, daut dit Woakj bie an daut ieeschte kjemt (Mat. 24:14).

9. Wuarom räakjen wie onse Sestren väl?

⁹ Jehova jeft uk de Sestren eene wieetvolle Oppgow en de Vesaumlunk. Dise Ehefrues, Mames, Wätfrues un onbefriede Sestren, waut am tru deenen, räakjent  hee väl. En de Schreft rät daut von een deel feine Frues, wua Gott eenen Jefaulen aun haud. Dee wieren een goodet Väabilt, wiels dee väl Weisheit un Gloowen hauden un sea flietich, äwanäment un friejäwrich wieren un goodet deeden (Luk. 8:2-3; Apj. 16:14-15; Reem. 16:3, 6; Filip. 4:3; Heb. 11:11, 31, 35). Wie sent Jehova sea dankboa, daut et en de Vesaumlunk väl Sestren jeft, waut krakjt soo sent aus dee!

10. Wuarom räakjen wie de Elre väl?

¹⁰ Wie sent uk schaftich doaräwa, daut wie väl Elre en de Vesaumlunk haben. En eenje Vesaumlungen jeft daut elre Breeda un Sestren, waut Jehova aul äa Läwen lank tru deenen. Aundre, waut aul ella sent, haben de Woarheit mau lota kjanen jelieet. Väl von dee haben woomäajlich aul Trubbel met de Jesuntheit un kjennen nich mea soo väl en de Vesaumlunk un em Prädichtdeenst doonen. Oba dee jäwen doawäajen em Deenst äa bastet un brucken aul äare Krauft toom aundre Moot toospräakjen un utlieren. Un wiels dee aul väl Erfoarunk haben, kjenn wie väl von dee lieren. Dee sent bie Jehova un bie ons väl wieet! (Spr. 16:31).

11-12. Woo haben de junge Menschen von diene Vesaumlunk die Moot jemoakt?

¹¹ Un woo es daut met onse junge Menschen? Dee haben daut nich leicht, wiels dee en dän Soton siene Welt oppwaussen, wua daut väl orrajchte Iedeeen jeft (1. Joh. 5:19). Jeft ons daut nich väl Moot, wan wie seenen, woo dee bie de Toopkomes Auntwuaten jäwen un em Deenst sent un äwanäment fa äaren Gloowen enstonen? De junge Menschen sent werkjlich väl wieet en Jehova siene Vesaumlunk! (Psa. 8:3).

¹² Oba eenje Breeda un Sestren beduaren, aus see waut fa de Vesaumlunk doonen kjennen. Waut kaun ons dan halpen, daut wie ons secha sent, daut jieda eena von ons väl wieet es en de Vesaumlunk? Well wie mol seenen.

13-14. Wuarom beduaren eenje woomäajlich, aus see waut fa de Vesaumlunk doonen kjennen?

¹³ Waut es daut tweede, waut wie von Paulus sien Jlikjnis lieren kjennen? Daut haft met eenen Trubbel to doonen, waut väle en onse Tiet haben. Dee beduaren, aus see fa de Vesaumlunk waut doonen kjennen. Paulus schreef: “Wan de Foot sajen wudd: Wiels ekj nich eene Haunt sie, sie ekj nich een Poat aum Kjarpa, doawäajen wudd dee emma noch een Poat aum Kjarpa sennen. Un wan daut Ua sajen wudd: Wiels ekj nich een Uag sie, sie ekj nich een Poat aum Kjarpa, doawäajen wudd daut noch emma een Poat aum Kjarpa sennen” (1. Kor. 12:15-16). Waut meend Paulus doamet?

¹⁴ Wan wie ons met aundre von de Vesaumlunk vejlikjen, dan hab wie veleicht daut Jefeel, daut et met ons nuscht enhelt. Eenje kjennen veleicht fein plonen ooda sent goode Lierasch ooda feine Hoads. Un wie denkjen dan woomäajlich, daut wie daut kjeenmol woaren soo fein kjennen aus dee. Daut wiest, daut wie deemootich sent un de aundre hecha achten aus ons selfst (Filip. 2:3). Oba wie motten uk oppaussen. Wan wie ons emma met soone vejlikjen, waut sikj met väl vestonen, dan woat ons daut mootloos moaken. Veleicht späat sikj ons daut dan mau rajcht soo, daut wie daut nich mol wieet sent, Poat von de Vesaumlunk to sennen, soo aus Paulus säd. Woo kjenn wie met soont foadich woaren?

15. Aun waut sell wie no 1. Korinta 12:4-11 no denkjen?

¹⁵ Wie kjennen doaraun denkjen, daut Jehova ieeschtemma eenje Christen derch dän heiljen Jeist veschiedne Gowen jeef (läs 1. Korinta 12:4-11). Dee kunnen nich aula deeselwje Wunda doonen, oba doawäajen wia jieda Christ väl wieet. Vondoag dän Dach kjenn wie nich Wunda doonen, oba wie kjennen doa waut von lieren. Wie kjennen nich aula  dautselwje doonen, oba bie Jehova sent wie aula väl wieet.

16. Waut sell wie doonen, soo aus Paulus säd?

¹⁶ Well wie ons nich met aundre Breeda vejlikjen, oba daut doonen, waut Paulus säd. Hee schreef: “Lot eenem jiedren sien ieejnet Woakj unjasieekjen, un seenen, auf hee doa waut finjt sikj to lowen, un sikj nich aun sienen Noba mäten” (Gal. 6:4).

17. Woo kjemt Paulus sien Rot ons togood?

¹⁷ Wan wie Paulus sienen Rot nokomen un ons ieejnet Woakj unjasieekjen, dan woa wie woomäajlich seenen, daut wie waut doonen kjennen, waut aundre nich kjennen. Een Eltesta kaun veleicht nich soone feine Räden hoolen, oba hee kaun em Deenst fein de Woarheit lieren. Ooda hee kaun nich soo fein plonen aus de aundre Eltestasch en siene Vesaumlunk, oba hee es een leeftolja Hoad un de Vekjindja komen wellich no am, wan an Rot von de Schreft fält. Ooda hee es doafäa bekaunt, daut hee wellich Jast oppnemt (Heb. 13:2, 16). Wan wie onse goode Sieden kjanen, dan woa wie ons secha sennen, daut wie waut fa de Vesaumlunk doonen kjennen. Un wie woaren nich soo leicht soone Breeda aufjenstich sennen, waut jewesset bäta doonen kjennen aus wie.

18. Woo kjenn wie ons em Deenst vebätren?

¹⁸ Jieda eena von ons saul doano sträwen, sikj em prädjen un lieren to vebätren, endoont waut vonne Oppgow dee en de Vesaumlunk haft. Jehova halpt ons doabie un deit ons derch siene Organisazion sea fein utlieren. Bie ons Toopkomen enne Wäakj lia wie biejlikj, woo wie em Deenst noch bäta woaren kjennen. Woa wie ons daut to Hoaten nämen, waut wie doa lieren?

19. Waut kjenn wie doonen, daut wie no de School fa Kjennichrikjsvekjindja gonen kjennen?

¹⁹ Eena kaun uk bie de School fa Kjennichrikjsvekjindja sea fein utjelieet woaren. Dise School es fa Breeda un Sestren, waut em Voltietdeenst sent un waut tweschen 23 un 65 Joa sent. Veleicht denkj wie, daut wie kjeenmol woaren no dise School gonen kjennen. Oba enne Städ doaräwa notodenkjen, wuarom wie doa nich wudden kjennen hangonen, sell wie leewa doaräwa nodenkjen, wuarom wie doa wellen hangonen. Un dan sell wie ons daut äwatalen, waut wie doonen kjennen, daut wie ons fa dise School aunjäwen kjennen. Veleicht kjenn wie dan soont doonen, wua wie kjeenmol aun jedocht haben, wiels Jehova ons halpt un wie ons aunstrenjen.

20. Waut kjenn wie von Reema 12:6-8 lieren?

²⁰ Daut dredde, waut wie von Paulus sien Jlikjnis lieren kjennen, es en Reema 12:6-8 to finjen (läs). Hia moakt Paulus noch eemol dietlich, daut jieda eena von de Vesaumlunk veschiedne Gowen, ooda goode Sieden, haft. Oba nu wiest hee, daut wie onse Gowen brucken sellen, om de Vesaumlunk opptobuen un to stoakjen.

21-22. Waut kjenn wie von Robert un Felice lieren?

²¹ See wie mol, waut een Eltesta beläft haft, dän wie Robert nanen. Hee haud em Utlaunt jedeent un wort dan no daut Betel en sien Launt jeschekjt. De Breeda leeten am weeten, daut daut nich doawäajen wia, wiels hee waut orrajchtet jedonen haud. Oba Robert säd: “Ekj wia Moonaten mootloos, wiels ekj docht, daut ekj bie miene väaje Oppgow waut faulsch jemoakt haud. Eenjemol jankad mie bloos  utem Betel rut.” Woo kunn hee wada Freid kjrieen? Een Eltesta holp am denkjen, daut Jehova ons bie jieda Oppgow utlieet, daut wie dee Oppgow, waut wie nu haben, bäta doonen kjennen. Robert wort dan en, daut hee opphieren must, aun siene väaje Oppgow to denkjen, un daut hee leewa aun daut denkjen sull, waut hee nu doonen kunn.

²² Brooda Felice Episcopo beläwd meist krakjt soowaut. Hee un siene Fru wieren aune 1956 met de Gilead-School derch un worden dan aus Kjreisoppsechta no Bolivien jeschekjt. Aune 1964 hauden see dan een Bäbe. Felice säd: “Wie jleichten onse Oppgow sea un ons wia daut schwoa, dee tochtoloten. Bie een Joa hab ekj mie daut emma wada selfst väajeschmäten. Oba Jehova holp mie, mien denkjen to endren un een gooda Voda to sennen.” Jeit die daut uk soo aus Robert ooda Felice? Best du ommootich, daut du nu nich deeselwje Oppgow en Jehova sien Volkj hast aus ea? Wan daut soo es, dan woascht du schaftja woaren, wan du lieescht, aundasch to denkjen un no daut to kjikjen, waut du nu doonen kaust, om Jehova un diene Breeda to deenen. Bliew drock un bruck diene Gowen, om aundre to halpen. Dan woascht du Freid haben un de Vesaumlunk oppbuen.

23. Fa waut sell wie ons Tiet nämen, un waut woa wie en dän näakjsten Artikjel seenen?

²³ Jieda eena von ons es fa Jehova wieetvoll. Hee well, daut wie Poat von siene Famielje sent. Wan wie ons de Tiet nämen un doaräwa nodenkjen, woo wie onse Gloowesbreeda oppbuen kjennen, un daut dan uk doonen, dan woa wie ons en de Vesaumlunk nich soo leicht toom äwajen feelen. Oba woo denkj wie äwa de aundre von de Vesaumlunk? Woo kjenn wie wiesen, daut wie dee waut räakjnen? Daut woa wie en dän näakjsten Artikjel seenen.