1. No waut sträwen väle, wiels dee mea fa Jehova doonen wellen?

 DAUT Enj von dise Welt kjemt emma noda un wie haben väl to doonen (Mat. 24:14; Luk. 10:2; 1. Pet. 5:2). Wie aula wellen Jehova soo goot aus mäajlich deenen. Väle proowen, mea em Deenst to doonen. Eenje wellen Pionia woaren ooda em Betel methalpen ooda bie ons Buwoakj. Un een deel Breeda wudden wellich aus Deenstaumthelpa ooda Eltesta deenen (1. Tim. 3:1, 8). Woo schaftich Jehova nich sennen mott, wan hee sitt, daut siene Deena wellich reed sent, fa am waut to doonen! (Psa. 110:3; Jes. 6:8).

2. Woo feel wie ons woomäajlich, wan wie eenjet nich doonen kjennen, waut wie wudden wellen?

² Wie kunnen mootloos woaren, wan wie Jehova aul lenja deenen un doch eenjet noch emma nich doonen kjennen, waut wie wudden wellen. Veleicht sent wie uk truarich, wiels wie wäajen ons Ella ooda wäajen sestwaut jewesse Oppgowen nich doonen kjennen (Spr. 13:12). Soo wia daut bie Melissa. * See wudd wellich em Betel methalpen ooda no de School fa Kjennichrikjsvekjindja gonen, oba see sajcht: “Ekj sie aul too oolt. Nu woa ekj daut nich mea kjennen. Doawäajen feel ekj mie bieaun mootloos.”

3. Waut mott eena doonen, daut eena jratre Veauntwuatunk em Deenst fa Jehova kjrieen kaun?

 ³ Eenje, waut junk un jesunt sent, motten veleicht noch erfoarna woaren un jewesse Ieejenschoften kjrieen, ea dee mea Veauntwuatunk kjrieen kjennen. Veleicht sent dee kluak, flietich un kjennen haustich waut entscheiden. Oba dee motten noch lieren, jeduldja to sennen, mea Respakjt to haben un de Oabeit krakjta to doonen. Wan du die sea aunstrenjst, aun de Ieejenschoften to schaufen, waut die noch fälen, dan kjrichst du veleicht onverhofs jratre Oppgowen em Deenst fa Jehova. Soo wia daut uk bie Nick. Aus hee 20 Joa wia, wia hee sea truarich, wiels hee nich een Deenstaumthelpa wort. Hee sajcht: “Ekj docht, daut met mie irjentwaut orrajcht wia.” Oba Nick jeef nich opp. Hee deed en de Vesaumlunk un em Prädichtwoakj sien bastet. Un nu kaun hee en een Betelkommitee deenen.

4. Waut woa wie en disen Artikjel seenen?

⁴ Best du mootloos, wiels du die em Deenst fa Jehova waut väajenomen hast un daut noch nich doonen kaust? Dan räd met Jehova doaräwa (Psa. 37:5-7). Du kaust uk erfoarne Breeda froagen, woo du die em Deenst fa Gott noch vebätren kaust, un die dan bemieejen, äaren Rot notokomen. Daut kaun die halpen, daut du daut doonen kaust, waut du die väajenomen hast. Oba veleicht jeit die daut soo aus Melissa, wua wie ea von räden, un du weetst, daut du daut nu nich doonen kaust, waut die wudd jankren. Waut kaust du dan doonen? Woo kaust du diene Freid hoolen? Daut woa wie en disen Artikjel seenen. Wie woaren seenen, (1) waut ons Freid jäwen kaun, (2) woo wie noch mea Freid haben kjennen un (3) no waut wie sträwen kjennen, daut wie noch schaftja sent.

5. No waut sell wie kjikjen, daut wie kjennen Freid haben? (Liera 6:9).

⁵ Liera 6:9 wiest ons, waut ons halpen kaun Freid to haben (läs). Een Mensch, waut no daut kjikjt, waut ver siene Uagen es, es met daut tofräd, waut hee haft un woo siene Loag nu es. Oba eena, waut sikj emma soont wenscht, waut hee nich haben kaun, woat kjeenmol tofräd sennen. Waut lia wie doavon? Daut wie kjennen Freid haben, mott wie no daut kjikjen, waut wie haben, un no soont sträwen, waut wie uk volbrinjen kjennen.

6. Waut fa een Jlikjnis woa wie nu unjasieekjen, un waut woa wie doa seenen?

⁶ Wie aula jleichen daut, waut nieet to lieren ooda to doonen. Es daut dan werkjlich mäajlich, met daut tofräd to sennen, waut wie nu aul haben? Jo, wie kjennen Freid aun daut haben, waut wie nu doonen kjennen. Daut woa wie seenen, wan wie Jesus sien Jlikjnis von de Talenten unjasieekjen, waut en Matäus 25:14-30 steit. Wie woaren lieren, woo wie ons äwa daut freien kjennen, waut wie nu haben, un woo onse Freid mau rajcht noch jrata woaren kaun.

7. Woo wurscht du Jesus sien Jlikjnis von de Talenten toopfoten?

⁷ En daut Jlikjnis wull een Maun eene Reis moaken. Ea hee veleet, roopt hee siene Deena un jeef jieda eenem Talenten, wua see met wiedaschaufen kunnen. * De Wieet wist, wuatoo siene Deena emstaunt wieren, un doawäajen jeef hee dän ieeschten Deena fief Talenten, dän tweeden twee  un dän dredden eent. De ieeschte beid Deena schauften sea, om mea Jelt fa äaren Wieet to vedeenen. Oba de dredda deed nuscht met daut Jelt, waut hee jekjräajen haud, un doawäajen kunn hee nich lenja fa dän Wieet schaufen.

8. Wuarom kunn de ieeschta Deena en daut Jlikjnis sikj freien?

⁸ Secha wia de ieeschta Deena sea schaftich, daut sien Wieet am fief Talenten aunvetrut haud. Daut wia een deel Jelt un daut wees, woo sea de Wieet opp am vetrud. Oba woo feeld de tweeda Deena sikj? Wia dee mootloos, wiels hee weinja Talenten jekjräajen haud aus de ieeschta? Well wie mol seenen.

9. Waut säd de tweeda Deena en daut Jlikjnis nich? (Matäus 25:22-23).

⁹ Läs Matäus 25:22-23. Jesus säd nich, daut de tweeda Deena beleidicht ooda doll wia, wäajen hee mau twee Talenten jekjräajen haud. Un Jesus räd uk nich doavon, daut dee säd: “Wuarom kjrie ekj nich mea? Ekj schauf doch krakjt soo sea aus dee, waut de fief Talenten kjrieech. Wan mien Wieet mie nich mea räakjent, dan kaun ekj dise twee Talenten uk unjagrowen un fa mie selfst schaufen gonen.”

10. Waut deed de tweeda Deena met de Talenten?

¹⁰ Krakjt soo aus de ieeschta Deena neem de tweeda de Oppgow sea iernst, waut de Wieet am jejäft haud, un schauft sea fa dän. Soo kunn hee von dän Wieet siene Talenten dobbelt soo väl moaken. Hee wort sea doafäa beloont, daut hee soo flietich jeschauft haud. De Wieet freid sikj, un hee jeef am soogoa noch mea Veauntwuatunk!

11. Waut kjenn wie doonen, daut wie noch mea Freid haben?

 ¹¹ Wie kjennen uk mea Freid haben, wan wie ons en aules gaunz nenloten, waut wie fa Jehova doonen. Schauf flietich en daut Prädichtwoakj un fa de Vesaumlunk (Apj. 18:5; Heb. 10:24-25). Moak die goot fa de Toopkomes reed, daut du doa feine Auntwuaten jäwen kaust. Nemm jieda Schiela-Oppgow iernst, waut du bie daut Toopkomen enne Wäakj hast. Sie opp to veloten, wan du bie irjentwaut en de Vesaumlunk methalpen kaust, un doo daut enne Tiet. Denkj nich, daut daut vespälde Tiet es, wan du eene Oppgow doonen saust, waut die eefach väakjemt. Strenj die aun, eene feine Oabeit to doonen (Spr. 22:29). Je mea du fa Jehova deist un je dolla du die aunstrenjst, je bosja woascht du veraunkomen un je mea Freid woascht du haben (Gal. 6:4). Die woat daut dan uk emma leichta sennen, die fa aundre to freien, wan dee eene Oppgow kjrieen, waut die wudd jejankat haben (Reem. 12:15; Gal. 5:26).

12. Waut holp twee von Jehova siene Zeijen, mea Freid to haben?

¹² Denkjt die daut noch von Melissa, waut em Betel methalpen wull ooda no de School fa Kjennichrikjsvekjindja gonen? Daut wia fa ar nich mäajlich, oba see sajcht: “Ekj proow em Pioniadeenst mien bastet to doonen un opp veschiedne Wäaj to prädjen. Daut jeft mie väl Freid.” Un waut deed Nick, aus hee soo truarich wia, daut hee nich kunn Deenstaumthelpa woaren? Hee sajcht: “Ekj proowd daut to doonen, waut ekj kunn, soo aus prädjen un bie de Toopkomes feine Auntwuaten jäwen. Ekj jeef mie uk aun toom em Betel schaufen un fuaz daut näakjste Joa neemen se mie dan.”

13. Woo woat daut utkomen, wan du die gaunz en diene Oppgow nenlatst? (Liera 2:24).

¹³ Wan du die nu gaunz en diene Oppgow nenlatst, woascht du dan lota jratre Oppgowen kjrieen? Daut es goot mäajlich, soo aus wie bie Nick jeseenen haben. Oba wan du nich jratre Oppgowen doonen kaust, soo aus Melissa, dan woascht du doawäajen mea Freid haben un sea tofräd met daut sennen, waut du nu fa Jehova doonen kaust (läs Liera 2:24). Un du woascht uk sea schaftich sennen, wiels du weetst, daut Jesus Christus met die tofräd es.

14. Sell wie ons em jeisteljen waut väanämen? Laj daut ut.

¹⁴ Wan wie ons gaunz en de Oppgowen nenloten, waut wie nu haben, sell wie dan goanich mea doaropp schaufen, noch mea fa Jehova to doonen? Jo, wie sellen ons em jeisteljen waut väanämen, daut wie kjennen bäta prädjen un lieren un uk onse Breeda un Sestren noch dolla halpen. Daut woa wie kjennen, wan wie weis un deemootich sent un aundre deenen wellen, enne Städ bloos aun ons to denkjen (Spr. 11:2; Apj. 20:35).

15. No waut wurscht du sträwen kjennen toom noch mea Freid haben?

¹⁵ No waut wurscht du sträwen kjennen? Froag Jehova no Help, daut du die soont väanämen kaust, waut du uk volbrinjen kaust (Spr. 16:3; Jak. 1:5). Wurscht du kjennen eent von de Sachen doonen, wua wie en  dän ieeschten Varsch von disen Artikjel aul von räden, biejlikj Pioniahelpa ooda Pionia woaren ooda em Betel ooda bie ons Buwoakj methalpen? Veleicht wurscht du uk kjennen eene aundre Sproak lieren toom de goode Norecht bekauntmoaken ooda en eene aundre  Jäajent biem prädjen methalpen. En daut 10. Kapitel von daut Buak Organisiert, Jehovas Willen zu tun kaust du die noch mea doaräwa noläsen, un du wurscht uk kjennen met de Eltestasch von diene Vesaumlunk räden. * Wan du no soone Sachen sträfst, dan woaren aundre seenen kjennen, daut du veraunkjemst, un du woascht noch mea Freid haben.

16. Waut kaust du doonen, wan du nu jroz nich no eene jewesse Sach sträwen kaust?

¹⁶ Oba waut kaust du doonen, wan du nu nich no soont sträwen kaust, wua wie jroz von jerät haben? Dan nemm die waut aundret väa, waut du uk volbrinjen kaust. Waut kaun daut biejlikj sennen?

17. Waut kunn een Brooda no 1. Timotäus 4:13, 15 no doonen, om een bätra Liera to woaren?

¹⁷ Läs 1. Timotäus 4:13, 15. Wan du een jedeepta Brooda best, dan wurscht du kjennen doaropp schaufen, een bätra Rädna un Liera to woaren. Wuarom? Wiels du diene Toohiera väl bäta halpen kaust, wan du die em räden, läsen un lieren eefst. Nemm die väa, jieda Poat von daut Heft Eew die em läsen un lieren to studieren un daut notokomen. Studia emma een Poat opp eemol, doo daut tus flietich eewen un bemieej die, daut bie diene näakjste Räd notokomen. Froag dän Rotjäwa fa Rädoppgowen ooda aundre Eltestasch no Rot, “dee aum prädjen un lieren schwoa oabeiden” (1. Tim. 5:17). * Strenj die aun, daut notokomen, waut daut Heft sajcht, un halp diene Toohiera uk, em Gloowen stoakja  to woaren un daut notokomen, waut see lieren. Wan du daut deist, woascht du selfst mea Freid haben un dee uk.

18. Waut kaun ons halpen, ons em Prädichtdeenst to vebätren?

¹⁸ Wie aula haben de wichtje Oppgow, to prädjen un Jinja to moaken (Mat. 28:19-20; Reem. 10:14). Wurscht du die doarenn noch wellen vebätren? Dan studia daut Läsen-un-lieren-Heft un nemm die väa, aun waut du krakjt schaufen west. Wie kjrieen uk gooden Rot en daut Schoolheft fa ons christeljet Läwen un Deenst un en de Videos met de Iedeeen toom prädjen, waut wie bie de Toopkomes enne Wäakj seenen. Proow veschiednet toom seenen, woont daut baste schauft. Wan du daut deist, dan woascht du secha bäta prädjen kjennen un noch mea Freid haben (2. Tim. 4:5).

19. Woo kaust du soone Ieejenschoften kjrieen, waut Gott jefaulen?

¹⁹ Waut es eent von daut wichtichste, waut du die wurscht väanämen kjennen? Du wurscht kjennen doano sträwen, soone Ieejenschoften to haben, waut Gott jefaulen (Gal. 5:22-23; Kol. 3:12; 2. Pet. 1:5-8). Woo schauft daut? Saj wie mol, daut du wurscht wellen em Gloowen stoakja woaren. Dan kust du en onse Bieekja soone Artikjels läsen, wua gooda Rot bennen es, om onsen Gloowen to stoakjen. Du wurscht uk kjennen soone Poats von JW Broadcasting^® kjikjen, wua to seenen es, woo veschiedne Breeda un Sestren en schwoare Omstend grooten Gloowen jewäsen haben. Dan kaust du die äwalajen, woo du dee äaren Gloowen wurscht nodoonen kjennen.

20. Waut kjenn wie doonen, daut wie mea Freid haben un nich soo mootloos sent?

²⁰ Secha wensch wie ons aula, daut wie noch mea fa Jehova doonen kjennen. Un en de niee Welt woa wie am dan fa voll deenen kjennen. Bat daut bat doa es, well wie ons bastet em Deenst fa am doonen. Dan woa wie mea Freid haben un ons nich soo mootloos feelen. Un daut wichtichste es, daut wie doaderch onsen “schaftjen Gott” Jehova ieren un lowen kjennen (1. Tim. 1:11, NW). Well wie Freid aun daut haben, waut wie fa Jehova doonen kjennen!