1. Waut hast du äwa dän Schepfa jelieet?

WIEREN diene Elren aul Jehova siene Zeijen? Dan haben dee die secha von kjlien aun äwa Jehova jelieet. Dee haben die secha jelieet, daut hee aules jemoakt haft un väl goode Ieejenschoften haft un sikj väl goodet fa de Menschen väajenomen haft (1. Mo. 1:1; Apj. 17:24-27).

2. Woo denkjen eenje äwa soone, waut aun dän Schepfa jleewen?

² Väl Menschen jleewen daut goanich, daut et eenen Gott jeft ooda daut hee aules jemoakt haft. Dee jleewen eefach, daut aules von veselfst jekomen es un daut et von eene eefache Sort Läwen met de Tiet de aundre Sorten jejäft haft. Eenje von dee, waut daut sajen, sent huach utjelieet. Dee sajen woomäajlich, daut de Forscha Bewies haben doafäa, daut daut, waut de Schreft sajcht, nich soo es un daut bloos soone aun Gott jleewen, waut nich soo huach utjelieet sent, waut nich soo kluak sent ooda waut sikj leicht waut loten enbillen.

3. Wuarom es daut needich, onsen Gloowen to stoakjen?

³ Woat daut, waut eenje huach Utjelieede sajen, ons oppem Twiewel brinjen, daut Jehova ons leeftolja Schepfa es? Daut es krakjt doano, wuarom wie jleewen, daut Jehova ons Schepfa es. Es daut bloos, wiels aundre ons daut jesajcht haben, ooda es daut, wäajen wie ons de Tiet jenomen haben, ons daut selfst to unjastonen? (1. Kor. 3:12-15). Wie aula motten onsen Gloowen stoakjen, krakjt endoont woo lang wie aul eent von Jehova siene Zeijen sent. Dan woa wie ons nich veleiden loten derch “huage Rädensoaten wua nuscht doarhinja es” un nich met de Schreft tooppaussen (Kol. 2:8; Heb. 11:6). Dis Artikjel woat ons halpen to vestonen, (1) wuarom väle nich aun dän Schepfa jleewen, (2) woo wie ons daut secha moaken kjennen, daut Jehova aules jemoakt haft, un (3) woo wie eenen stoakjen Gloowen hoolen kjennen.

4. Wuarom hab wie no Hebräa 11:1 no Gloowen?

⁴ Eenje denkjen, daut soone, waut aun Gott jleewen, eefach irjentwaut jleewen onen eenen Bewies. Oba daut es nich soo. De Schreft moakt dietlich, daut et Bewies fa daut jeft, waut wie jleewen (läs Hebräa 11:1, NTR *). Wie kjennen Jehova, Jesus un daut Kjennichrikj nich seenen, oba wie twiewlen nich doaraun, daut et dee werkjlich jeft, wiels wie doa Bewies fäa haben (Heb. 11:3). Een Forscha, waut eent von Jehova siene Zeijen wort, säd: “Wie haben Bewies fa daut, waut wie jleewen, un wie unjastonen ons uk, waut de Forscha rutjefungen haben.”

5. Wuarom jleewen soo väle daut nich, daut Gott aules jemoakt haft?

⁵ Veleicht denkj wie soo: “Wuarom jleewen väl Menschen nich, daut Gott aules jemoakt haft, wan daut doa doch soo väl Bewies fäa jeft?” Eenje haben sikj disen Bewies noch kjeenmol unjastonen. Robert es nu eent von Jehova siene Zeijen un sajcht: “Enne School säden se kjeenmol, daut Gott aules jemoakt haud, un doawäajen jleewd ekj daut uk nich. Oba aus ekj enne 20 Joa wia, räd ekj met Jehova siene Zeijen un wort en, daut et en de Schreft väl Bewies doafäa jeft, daut Gott aules muak.” * (See dän Kausten “ Waut wichtjet fa de Elren”.)

6. Wuarom jleewen eenje nich, daut et eenen Schepfa jeft?

⁶ Eenje jleewen nich aun eenen Schepfa, wiels dee sajen, daut see bloos aun daut jleewen, waut see seenen kjennen. Oba  en Werkjlichkjeit jleewen dee uk, daut et Sachen jeft, waut nich to seenen sent, biejlikj dän Wint, wiels dee doa Bewies fäa haben. Bie dän Gloowen, wua de Schreft von rät, es daut krakjt soo. Daut jeft doa Bewies fa “daut, waut wie nich seenen” kjennen (Heb. 11:1). Daut brukt Tiet un es uk aunstrenjent, sikj disen Bewies to unjastonen, un doawäajen doonen väle daut nich. Un dan denkjen dee eefach, daut et kjeenen Gott jeft.

7. Strieden aule huach Utjelieede doajäajen, daut Gott Himmel un Ieed muak? Laj daut ut.

⁷ Eenje Forscha haben sikj dän Bewies unjastonen un sent sikj nu secha, daut Gott Himmel un Ieed muak. * Bie dee wia daut woomäajlich krakjt soo aus bie Robert, von dän wie aul ea räden. Dee dochten, daut et kjeenen Schepfa jeef, wiels dee bie de Uniwersität  noch kjeenmol von soont jehieet hauden. Oba väl Forscha haben Jehova kjanen jelieet un räakjnen dän nu väl. Krakjt soo aus dee mott wie aula uk onsen Gloowen aun Gott stoakjen, krakjt endoont woo huach wie utjelieet sent. Daut kaun kjeen aundra fa ons doonen.

8-9. (a) Waut vonne Froag woa wie ons nu unjastonen? (b) Woo woat ons daut togood komen, wan wie ons met de Natua aufjäwen?

⁸ Woo kaust du die daut secha moaken, daut Jehova aules jemoakt haft? See wie mol veatlei.

⁹Lia mea äwa de Natua. Dien Gloowen woat stoakja woaren, wan du de Tieren, Plaunten un de Stierns beoobachst (Psa. 19:2; Jes. 40:26). Je mea du die met soont aufjefst, je sechra woascht du die sennen, daut Jehova aules jemoakt haft. En onse Bieekja sent foaken Artikjels bennen, waut veschiedne Eenselheiten äwa de Natua utlajen. Lot dee nich ut, bloos wiels du denkjst, daut dee too schwoa to vestonen sent. Proow doa soo väl aus mäajlich von to lieren. Un vejät nich, noch eemol opp onse Websied jw.org de schmocke Videos äwa de Natua to kjikjen, waut wie de latste poa Joa bie de dreedoagsche Kongressen hauden.

10. Woo es daut aun de Natua to seenen, daut et eenen Schepfa jäwen mott? Jeff een Biespel (Reema 1:20).

¹⁰ Wan du die met de Natua aufjefst, dan äwalaj, waut du doaderch von onsen Schepfa lieren kaust (läs Reema 1:20). De Sonn biejlikj jeft ons Licht un woamt ons, daut doa oppe Ieed waut läwen kaun. Oba veleicht weetst du uk, daut dee jewesse Strolen haft, waut jefäadlich sennen kjennen un wua wie Menschen motten fäa beschizt woaren. Sent wie dan uk beschizt? Jo, wiels rom onse Ieed es eene Schicht Gauss, waut Ozon heet un ons fa dise jefäadelje Strolen beschizt. Un je stoakja dise Strolen sent, je mea Ozon jeft et doa. Bewiest daut nich, daut daut wäm jäwen mott, waut daut soo enjerecht haft, un daut dee sea leeftolich un kluak es?

11. Wua kaust du waut finjen toom die daut secha moaken, daut Gott aules jemoakt haft? (See dän Kausten “ Waut onsen Gloowen stoakjen kaun”.)

¹¹ Opp jw.org un em Index der Wachtturm-Publikationen kaust du väl finjen toom die daut secha moaken, daut Gott aules jemoakt haft. Veleicht west du die daut ieeschte met de Artikjels un Videos aufjäwen “Wort daut jemoakt?” ooda “Wer hat es erfunden?” Dee sent nich lank un doa sent intressaunte Eenselheiten äwa Tieren un Plaunten bennen. Doa rät daut uk von Biespels, woo de Wissenschoftla jeprooft haben daut notomoaken, waut see en de Natua jeseenen haben.

12. Waut sell wie ons unjastonen, wan wie de Bibel studieren?

¹²Studia de Bibel. De Forscha, wua wie en Varsch 4 aul von räden, jleewd ieeschtlich nich, daut et eenen Schepfa jeef. Oba met de Tiet wia hee sikj secha, daut Gott aules muak. Hee sajcht: “Daut ekj toom Gloowen kjeem, wia nich bloos, wiels ekj mie met de Wissenschoft aufjeef. Daut wia uk, wiels ekj deep de Bibel studieed.” Veleicht weetst du aul krakjt om de biblische Lieren om, oba daut du een Vetruen opp onsen Schepfa kjrichst, motst du wieda Gott sien Wuat studieren (Jos. 1:8; Psa. 119:97). Du kaust die biejlikj unjastonen, woo krakjt de Schreft daut sajcht, woo daut ieeschtemma wia. Ooda du kaust kjikjen, woo de biblische Profezeiungen sikj erfelt haben un daut daut, waut de veschiedne Bibelbieekja sajen, krakjt tooppaust. Wan du daut deist, dan woascht du die noch sechra  sennen, daut een leeftolja, weisa Schepfa ons jemoakt haft un daut de Schreft von am kjemt (2. Tim. 3:14; 2. Pet. 1:21). *

13. Waut es eent, waut wiest, waut von gooda Rot en Gott sien Wuat bennen es?

¹³ Wan du Gott sien Wuat studieescht, dan kjikj doano, waut von gooda Rot doa bennen es. De Schreft säd biejlikj lang trigj aul, daut “Jiez”, ooda Jelt leewen, ons schot un “väl Weedoag” brinjt (1. Tim. 6:9-10; Spr. 28:20; Mat. 6:24). Es daut noch emma soo? Een Buak, waut sikj doavon haundelt, woo de Menschen vondoag dän Dach jesonnen sent, sajcht: “Jeweenlich sent deejanje, waut nom tieteljen hinjaraun sent, nich soo schaftich un sent betriepta aus aundre. Mau rajcht, wan eena sikj eefach bloos mea Jelt wenscht, dan es eena aul nich soo schaftich un haft mea Trubbel met de Jesuntheit” (The Narcissism Epidemic). Es daut nich goot, daut de Schreft ons doafäa woarnt, nich daut Jelt to leewen? Kjanst du noch aundre biblische Gruntsauzen, waut die jeholpen haben? Je mea wie dän Rot ut de Schreft räakjnen, je dolla woa wie ons opp de Weisheit von onsen leeftoljen Schepfa veloten (Jak. 1:5). Un wie woaren dan uk väl schaftja sennen (Jes. 48:17-18).

14. Waut woascht du äwa Jehova lieren, wan du de Bibel studieescht?

¹⁴Studia de Bibel doaropp, daut du Jehova bäta kjanen lieren west (Joh. 17:3). Biem studieren woascht du lieren, woo Jehova es un waut vonne Ieejenschoften hee haft. Daut sent deeselwje Ieejenschoften, waut die uk oppfaulen, wan du die met de Natua aufjefst. Wan du mea äwa Jehova siene Ieejenschoften lieescht, woascht du die gaunz secha sennen, daut et am werkjlich jeft (2. Mo. 34:6-7; Psa. 145:8-9). Je bäta du Jehova kjanen lieescht, je jrata woat dien Gloowen un diene Leew fa am woaren un je noda woascht du am komen.

15. Woo woat die daut togood komen, wan du met aundre äwa dienen Gloowen rätst?

¹⁵Räd met aundre doaräwa, daut du aun Gott jleefst. Soo woat dien ieejna Gloowen stoakja woaren. Waut kaust du doonen, wan doa wäa nich jleeft, daut et eenen Gott jeft, un du weetst nich, waut du to dänjanjen sajen saust? Dan proow, die en eent von onse biblische Bieekja waut notosieekjen, un räd met dänjanjen doaräwa (1. Pet. 3:15). Du wurscht uk kjennen eenen erfoarnen Gloowesbrooda no Help froagen. Wan du die waut nosieekjst, dan woat die daut emma togood komen, endoont aus deejanja, waut du jeprädicht hast, doano horchen well ooda nich. Dien Gloowen woat stoakja woaren un du woascht die nich soo leicht von soone oppem Twiewel brinjen loten, waut doa sajen, daut et kjeenen Schepfa jeft, endoont woo huach utjelieet ooda kluak dee woomäajlich sent.

16. Wuarom mott wie wieda doaropp schaufen, daut ons Gloowen stoakj blift?

¹⁶ Endoont woo lang wie Jehova aul deenen, wie motten onsen Gloowen wieda stoakj hoolen. Wuarom? Wiels dee leicht schwak woaren kaun, wan wie nich oppaussen. Soo aus wie jeseenen haben, bediet Gloowen haben, daut wie Bewies haben fa daut, waut nich to seenen es. Oba waut wie nich seenen, wudd wie leicht vejäten kjennen. Daut eena nich jenuach Gloowen haft, es no Paulus no eene “Sind . . ., dee ons soo leicht aunhenjt” (Heb. 12:1). Woo kjenn wie dan onsen Gloowen stoakj hoolen? (2. Tess. 1:3).

17. Waut woat ons halpen, em Gloowen stoakj to bliewen?

 ¹⁷Pracha Jehova foaken no dän heiljen Jeist. Wuarom? Wiels de Gloowen to dän Jeist siene Frucht jehieet (Gal. 5:22-23). Onen de Help von dän heiljen Jeist kjenn wie nich aun eenen Schepfa jleewen un em Gloowen stoakj bliewen. Wan wie Jehova emma wada doano froagen, dan woat hee ons sienen Jeist jäwen (Luk. 11:13). Wie kjennen soogoa bäden: “Stoakj ons dän Gloowen!” (Luk. 17:5).

18. Fa waut kjenn wie no Psalm 1:2-3 no dankboa sennen?

¹⁸Doo pinkjlich Gott sien Wuat studieren (läs Psalm 1:2-3). Aus dis Psalm oppjeschräwen wort, hauden weinich Israeliten de gaunze Schreftrollen met Gott sien Jesaz tus. Oba de Kjennich un de Priestasch kunnen daut läsen un aule säwen Joa wort “de Mana, de Frues, de Kjinja, un de framde” en Israel Gott sien Jesaz väajeläst (5. Mo. 31:10-12). En Jesus siene Tiet hauden uk nich väl Menschen Schreftrollen tus. De mieeschte worden en de Judenschoolen oppbewoat. Oba vondoag dän Dach kjennen de mieeschte Menschen jewesset ooda aules von Gott sien Wuat läsen. Es daut nich eene groote Iea? Woo kjenn wie wiesen, daut wie doafäa dankboa sent?

19. Waut mott wie doonen, daut wie em Gloowen stoakj bliewen?

¹⁹ Wie wiesen, daut wie fa Gott sien Wuat dankboa sent, wan wie doa pinkjlich bennen läsen. Daut schauft nich, daut wie bloos dan fa ons selfst studieren, wan wie jleewen, daut wie Tiet haben. Wan wie ons daut aunwanen, pinkjlich to studieren, dan woa wie em Gloowen stoakj bliewen.

20. To waut sell wie ons eenich sennen?

²⁰ Wie sent aundasch aus “de weise un jelieede” en dise Welt, wiels wie eenen fausten Gloowen haben, waut sikj opp Gott sien Wuat stett (Mat. 11:25-26). Wiels wie dit besondre Buak studieren, weet wie, wuarom daut oppe Ieed emma schlemma woat un waut Jehova doamet doonen woat. Well wie ons gaunz eenich sennen, ons em Gloowen to stoakjen un soo väle aus mäajlich to halpen, uk aun onsen Schepfa to jleewen (1. Tim. 2:3-4). Un frei wie ons wieda to dee Tiet, wan aule oppe Ieed daut sajen woaren, waut en Openboarunk 4:11 steit: “Du best daut wieet, oo Har, Harlichkjeit . . . to nämen, wiels du aules jemoakt hast.”