1. Wuarom fruach Jesus Jehova doano, daut dee sull no siene Nofolja oppaussen?

 EN DEE Nacht ea Jesus storf, fruach hee sienen himlischen Voda no waut gaunz besondret. Hee fruach Jehova, aus hee wull no siene Nofolja oppaussen (Joh. 17:15, 20). Jehova haft noch emma no siene Deena oppjepaust, fa dee jesorcht un dee beschizt. Oba Jesus wist, daut siene Nofolja wudden sea Jäajenstaunt haben von dän Soton. Un Jesus wist uk, daut dee wudden Jehova siene Help brucken, daut dee dän Soton wadastonen kunnen, wan dee an aunjriepen wudd.

2. Wuarom bruck wie no Psalm 33:18-20 no fa nuscht Angst haben?

² Wäajen de Soton äwa dise Welt harscht, haben de woare Christen väl Trubbels. Daut kaun ons mootloos moaken un mau rajcht oppe Proow stalen, aus wie Jehova tru bliewen woaren. Oba soo aus wie en disen Artikjel seenen woaren, bruck wie fa nuscht Angst haben. Jehova paust no ons opp; hee sitt, waut wie fa Schwierichkjeiten haben un hee es emma reed to halpen, daut wie met dee foadich woaren kjennen. Well wie mol twee biblische Biespels seenen, waut wiesen, daut Jehova “dee em Uag [helt], dee am ferchten” (läs Psalm 33:18-20).

3. Wanea feel wie ons auleen?

³ Wan wie uk een deel Breeda un Sestren enne Vesaumlunk haben, kjenn wie ons oba eenjemol auleen feelen. De junge Menschen feelen sikj biejlikj auleen, wan dee ver äare Schoolpoatna sellen erkjläaren, waut see jleewen, ooda wan dee en eene niee Vesaumlunk sent. Eenje von ons feelen sikj truarich ooda kjamfen jäajen Mootloosichkjeit un denkjen, daut wie gaunz auleen doamet foadich woaren motten. Wie wäaren ons eenjemol, met aundre doaräwa to räden, woo wie ons feelen, wäajen wie Angst haben, daut dee ons nich woaren vestonen  kjennen. Veleicht wunda wie, aus doa noch irjentwäa waut om ons romjeft. Krakjt endoont wäajen waut wie ons auleen feelen, daut kaun ons Angst moaken un sikj soo späaren, daut ons kjeena doamet halpen kaun. Jehova well nich, daut wie ons soo feelen. Wuarom kjenn wie daut sajen?

4. Wuarom säd de Profeet Elia: “Ekj auleen sie äwajebläwen”?

⁴ See wie mol daut Biespel von dän truen Maun Elia. Hee rand fa 40 Doag toom sikj vestäakjen, wäajen Isebel jeschwuaren haud am doottomoaken (1. Kjen. 19:1-9). Tolatst, aus hee dan auleen en eene Heel wia, säd hee to Jehova: “Ekj auleen sie [von de Profeeten] äwajebläwen” (1. Kjen. 19:10). Doa wieren oba noch aundre Profeeten en daut Launt. Obadja haud 100 Profeeten vestoaken, daut Isebel dee nich dootmoaken kunn (1. Kjen. 18:7, 13). Wuarom feeld Elia sikj dan auleen? Docht hee, daut de Profeeten, waut Obadja vestoaken haud, nu uk aula doot wieren? Feeld hee sikj veleicht auleen, wäajen de aundre nich aunjefongen hauden, Jehova to deenen, nodäm daut Jehova opp dän Karmel-Boajch jewäsen haud, daut hee de woara Gott wia? Haud hee daut Jefeel, daut kjeena wist, en waut fa eene Jefoa hee wia? Ooda docht hee, daut kjeena waut om am romjeef? De Bibel sajcht daut nich krakjt, woo Elia sikj feeld. Oba wie weeten gaunz secha, daut Jehova vestonen kunn, wuarom Elia sikj auleen feeld un daut hee krakjt wist, woo hee dän halpen kunn.

5. Woo vesechad Jehova Elia, daut hee nich auleen wia?

⁵ Jehova holp Elia opp veschiedne Wäaj. Hee foddad am opp to räden. Tweemol fruach hee Elia: “Waut deist du hia?” (1. Kjen. 19:9, 13). Jiedatsmol horcht Jehova am too, aus hee sien Hoat utschedd. Jehova jeef am de Auntwuat doaderch, daut hee am wees, daut hee doa wia un daut hee väl Macht haud. Hee vesechad Elia uk, daut doa noch een deel aundre wieren, waut am deenden (1. Kjen. 19:11-12, 18). Onen Twiewel feeld Elia sikj nu väl leichta, aus hee sikj ieescht to Jehova utjeschett haud un jehieet haud, waut hee  säd. Jehova jeef Elia eenje wichtje Oppgowen. Hee säd to am, daut hee Hasael aus Kjennich äwa Aram ensaulwen sull, Jehu aus Kjennich äwa Israel, un Elisa aus Profeet (1. Kjen. 19:15-16). Doaderch, daut Jehova Elia dise Oppgowen jeef, holp hee am, äwa goodet notodenkjen. Hee jeef am uk eenen Helpa, waut am biestunt, un daut wia Elisa. Woo kaust du von Jehova Help kjrieen, wan du die auleen feelst?

6. Om waut kaust du bäden, wan du die auleen feelst? (Psalm 62:9).

⁶ Jehova well, daut du to am bätst. Hee sitt daut, met waut du to kjamfen hast un vesechat die, daut hee emma no diene Jebäda horcht (1. Tess. 5:17). Jehova jleicht daut, no de Jebäda von siene Deena to horchen (Spr. 15:8). Om waut kaust du bäden, wan du die auleen feelst? Schedd dien Hoat to Jehova ut, soo aus Elia deed (läs Psalm 62:9). Vetal am, äwa waut du die Sorjen moakst un woo du die doaräwa feelst. Froag Jehova no Help, daut du doamet foadich woaren kaust. Wan du die biejlikj auleen feelst un Angst hast, enne School Zeichnis to jäwen, dan froag Jehova, aus hee die dän Moot jäwen well, daut du daut sajen kaust, waut du die väajenomen hast. Du kaust am mau rajcht no Weisheit froagen, daut du daut leeftolich sajen kaust, waut du jleefst (Luk. 21:14-15). Wan du met Mootloosichkjeit to kjamfen hast, dan froag Jehova, daut du met eenen erfoaren Brooda räden kaust. Du kaust Jehova uk froagen, daut hee dänjanjen halpt, daut dee die toohorcht un die vestonen kaun. Schedd dien Hoat to Jehova ut, un see, woo hee diene Jebäda beauntwuaten woat, un nemm von aundre Help aun. Dan woascht du die nich soo auleen feelen.

7. Waut kaust du von Mauricio lieren?

⁷ Jehova jeft ons aula eene sea wieetvolle Oabeit. Du kaust die secha sennen, daut hee aul daut sitt un uk väl räakjent, waut du fa dän Deenst un fa de Vesaumlunk deist (Psa. 110:3). Wan du die auleen feelst, woo kaun die daut dan halpen, en dit drock to bliewen? See wie mol daut Biespel von eenen jungen Brooda, waut Mauricio heet. b Een Stootje nodäm daut hee sikj haud deepen loten, veleet sien gooda Frint soo bie sacht de Woarheit. Mauricio sajcht: “Daut to seenen, woo dee soo bie sacht emma wieda auf kjeem, brocht mie selfst oppem Twiewel. Ekj wundad, aus ekj daut Vespräakjen, waut ekj Jehova jejäft haud, wudd hoolen kjennen un Poat von siene Famielje bliewen. Ekj feeld mie auleen un docht, daut kjeen aundra vestonen kunn, woo ekj mie feeld.” Waut holp Mauricio? Hee sajcht: “Ekj deed mea em Deenst. Daut holp mie, opptohieren bloos aun mie to denkjen un woo ekj mie feeld. Ekj feeld mie  bäta un nich soo auleen, wan ekj met aundre toop prädjen deed.” Wan wie veleicht uk nich perseenlich met aundre toop prädjen gonen kjennen, jeft ons daut oba Moot, met aundre toop Breew to schriewen ooda äwa Fon Zeichnis to jäwen. Waut holp Mauricio noch? Hee sajcht wieda: “Ekj hilt mie uk drock enne Vesaumlunk. Ekj deed mien bastet, om mie fa de Schielaoppgowen reed to moaken. Doaderch, daut ekj dise Oppgowen kjrieech, späad ekj, daut aundre, un uk Jehova, mie waut räakjenden.”

8. Waut kaun daut aun ons doonen, wan wie schwoaret derchgonen?

⁸ Nu en de latste Doag beläw wie väl schwoaret (2. Tim. 3:1). Oba wan wie daut dan beläwen, dan sent wie doch äwarauscht, besonda wan wie nich met soone Trubbels jeräakjent haben. Veleicht dreit daut met eenst em tieteljen schwoa ooda ons woat jesajcht, daut wie eene schlemme Krankheit haben ooda doa es wäa jestorwen, dän wie väl jeräakjent haben. En soone Tieden sent wie veleicht vetwiewelt un feelen ons äwafoddat, besonda wan daut soo sitt, daut doa een Trubbel no dän aundren kjemt, ooda miere tojlikj. Denkj wie doaraun, daut Jehova no ons kjikjt. Met siene Help kjenn wie met jieda Trubbel foadich woaren.

9. Waut fa schwoaret beläwd Hiob?

⁹ See wie mol, woo Jehova dän truen Maun Hiob holp. Hee beläwd en eene korte Tiet väl schwoaret. En eenen Dach kjrieech hee to hieren, daut aul siene Tieren wieren jestolen ooda dootjemoakt worden, un siene Deena un mau rajcht siene Kjinja wieren todood jekomen (Hiob 1:13-19). Aus Hiob noch äwa aul daut truad, kjrieech hee eene schlemme Krankheit (Hiob 2:7). Fa Hiob wia daut soo schwoa, daut hee säd: “Mie äakjelt mien Läwen; ekj well nich mea läwen” (Hiob 7:16, NW).

10. Waut deed Jehova, daut Hiob siene Trubbels uthoolen kunn? (See daut Bilt oppe väaschte Sied.)

¹⁰ Jehova paust no Hiob opp. Wäajen Jehova Hiob leewd, jeef hee am aules, waut dee brukt toom met siene Trubbels foadich woaren. Jehova räd to Hiob un erinnad am aun de groote Weisheit, waut hee haud, un woo hee sikj om de gaunze Schepfunk kjemmad. Hee räd von väl sea besondre Tieren (Hiob 38:1-2; 39:9, 13, 19, 27; 40:15; 40:25-26). Jehova brukt uk dän truen Maun Elihu, om Hiob to treesten un to stoakjen. Elihu vesechad am uk, daut Jehova deejanje emma beloont, waut staunthauft bliewen. Jehova brocht Elihu uk bat doa, daut dee Hiob leeftolich Rot jeef. Hee holp Hiob, nich soo sea aun sikj to denkjen, un erinnad am doaraun, daut wie mau sea kjlien sent em Vejlikj met Jehova, dee aules jemoakt haft (Hiob 37:14). Jehova jeef Hiob uk de Oppgow, daut hee sull fa de dree Mana bäden, waut jesindicht hauden (Hiob 42:8-10). Woo halpt Jehova ons vondoag dän Dach, wan wie Trubbels haben?

11. Waut von Troost jeft de Bibel ons, wan wie schwoaret beläwen?

¹¹ Jehova rät nich soo to ons, aus hee daut to Hiob deed, oba hee rät to ons derch sien Wuat, de Bibel (Reem. 15:4). Hee treest ons un jeft ons eene scheene Hopninj fa lota. See wie mol een poa Sachen von de Schreft, waut ons treesten, wan wie schwoaret beläwen. En de Schreft vesechat Jehova ons, daut nuscht – nich een Trubbel – “ons von Gott siene Leew scheeden kaun” (Reem. 8:38-39). Hee vesechat ons uk, daut hee “aul dee noaun [es], dee am aunroopen” (Psa. 145:18). Jehova sajcht, wan wie opp am vetruen, dan kjenn wie  met aulet schwoare foadich woaren un mau rajcht noch Freid haben, wan wie uk lieden motten (1. Kor. 10:13; Jak. 1:2, 12). Gott sien Wuat sajcht uk, daut ons schwoaret bloos fa eene jewesse Tiet es un nich fa lang, wan wie daut met de eewje Beloonunk vejlikjen, waut hee ons vesprakjt (2. Kor. 4:16-18). Jehova jeft ons de sechre Hopninj, daut hee dän Soton un aul siene Helpa venichten woat, waut aul onse Trubbels veuasoaken (Psa. 37:10). Hast du die eenje Bibelvarzhen utwendich jelieet, waut die halpen woaren, bie schwoaret uttohoolen?

12. Waut well Jehova von ons haben, daut ons sien Wuat togood kjemt?

¹² Jehova well haben, daut wie ons Tiet nämen toom räajelmässich de Bibel studieren un deep doaräwa nodenkjen. Wan wie daut nokomen, waut wie lieren, dan woa wie onsen Gloowen stoakjen un wie woaren onsen himlischen Voda noda komen. Daut woat ons halpen, daut wie kjennen met onse Schwierichkjeiten foadich woaren. Jehova jeft uk aul deejanje sienen heiljen Jeist, waut opp sien Wuat vetruen. Un dis Jeist kaun ons “de butajeweenelje Krauft” jäwen, daut wie met aul daut schwoare foadich woaren kjennen (2. Kor. 4:7, NW; 4:8-10).

13. Woo halpt ons daut jeistelje Äten, waut de trua, weisa Kjnajcht reedmoakt, met aul daut schwoare foadich to woaren?

¹³ Met Jehova siene Help kaun “de trua, weisa Kjnajcht” een deel Artikjels, Videos un Musikj moaken, waut ons halpen, em Gloowen stoakja to woaren un em jeisteljen waka to bliewen (Mat. 24:45). Wie motten aul dit fein brucken. Eene Sesta vonne Stäts rät doavon, woo väl see daut jeistelje Äten räakjent. See sajcht: “En miene 40 Joa, waut ekj Jehova deend, sie ekj foaken aufjeprooft worden.” See beläwd väl schwoaret. Äa Grootvoda kjeem en een Ojjlekj todood, wäajen eenen bedrunknen Foara. Äare Elren worden krank un storwen, un see haud opp twee Sauz Kjräft. Waut holp ar uttohoolen? See sajcht: “Jehova haft emma fa mie jesorcht. Daut jeistelje Äten, waut hee derch dän truen, weisen Kjnajcht reedmoakt, haft mie jeholpen uttohoolen. Derch aul dit kaun ekj krakjt daut sajen, waut Hiob säd: ‘Bat ekj stoaw, woa ekj tru bliewen!’” (Hiob 27:5, NW).

14. Woo brukt Jehova siene Deena, om ons en schwoare Tieden bietostonen? (1. Tessalonicha 4:9).

¹⁴ Jehova haft siene Deena jelieet, aundre en schwoare Tieden to leewen un to  treesten (2. Kor. 1:3-4; läs 1. Tessalonicha 4:9). Onse Breeda un Sestren sent krakjt soo flietich aus Elihu, om ons to halpen, tru to bliewen (Apj. 14:22). See wie mol daut Biespel von Diane äare Vesaumlunk, waut ar Moot jeef un holp, em jeisteljen stoakj to sennen, nodäm daut äa Maun sea krank wia. See sajcht: “Daut wia schwoa. Oba ekj kunn späaren, woo Jehova mie en dee schwoare Moonaten jeholpen haft. Onse Vesaumlunk deed väl fa ons. Dee besochten ons, fonden ons un pakten ons om, un daut wia krakjt daut, waut wie brukten. Wäajen ekj nich Koa foaren deed, sagen de Breeda un Sestren emma doano, daut ekj wudd no de Toopkomes un em Deenst komen, wan mie daut mäajlich wia.” Woo scheen daut nich es, to soone leeftolje, jeistelje Famielje to jehieren!

15. Wuarom sent wie ons secha, daut wie daut schwoare uthoolen kjennen?

¹⁵ Wie aula woaren mol waut schwoaret derchmoaken. Oba soo aus wie jelieet haben, sent wie kjeenmol auleen, wan wie waut schwoaret derchmoaken. Jehova paust soo aus een leeftolja Voda emma no ons opp. Hee es emma bie ons; reed toom horchen, wan wie bäden, un ons met daut schwoare to halpen (Jes. 43:2). Wie sent ons secha, daut wie met daut schwoare foadich woaren kjennen, wiels hee ons leeftolich aules jeft, waut wie brucken toom uthoolen. Hee haft ons wieetvolle Jeschenkja jejäft, un daut es daut Jebäd, de Bibel, daut jeistelje Äten un de leeftolje Breeda, waut ons en schwoare Tieden halpen.

16. Waut kjenn wie doonen, daut Jehova fa ons sorjen kaun?

¹⁶ Wie sent soo dankboa, daut ons himlischa Voda no ons oppaust! “Ons Hoat freit sikj en am” (Psa. 33:21). Wie kjennen Jehova daut wiesen, woo väl wie daut räakjnen, wan wie aul daut fein utnutzen, waut hee ons jejäft haft. Wie motten ons Poat doonen, daut Gott fa ons sorjen kaun. Daut kjenn wie, wan wie ons aunstrenjen, Jehova to jehorchen un daut rajchte doonen. Dan woat hee ons fa emma em Uag hoolen! (1. Pet. 3:12).