1. Woo wort Josef aufjeprooft un waut deed hee?

 JAKOB sien Sän Josef wort aufjeprooft. Eene Fru säd to am: “Laj die met mie dol.” See wia sienen Wieet Potifar siene Fru. Josef säd daut oba gaunz auf. Eenje denkjen vondoag veleicht: “Wuarom deed Josef dise Proow wadastonen?” Potifar wia je nich doa. Josef wia dee äa Sklow un dise Fru haud Josef sien Läwen kunt sea schwoa moaken, wan hee ar aufsäd. Oba Josef säd daut emma wada auf, wan see am uk unja Druck sad. Wuarom? Hee säd: “Woo kunn ekj dan bloos soon schlajchtet doonen un jäajen Gott sindjen?” (1. Mo. 39:7-12).

2. Woo wist Josef, daut Ehebruch eene Sind jäajen Gott wia?

² Woo wist Josef, daut sien Gott Ehebruch fa waut “schlajchtet” tald? Daut Jesaz Moses, wua daut Jeboot bennen wia, “doot nich Ehebruch begonen”, wort je ieescht tweehundat Joa lota oppjeschräwen (2. Mo. 20:14). Oba doch kjand Josef Jehova soo goot, daut hee wist, daut Jehova Ehebruch jäajenaun wia. Josef wist secha, woo Jehova de Ehe enjerecht haud, un daut wia tweschen eenen Maun un eene Fru. Un hee woat secha uk doavon jehieet haben, woo Jehova aul ea wäm von Ehebruch beschizt haud. Biejlikj don aus siene Uagroosmame Sara en de Jefoa wia, daut doa een aundra Maun wull ar to Fru nämen. Un sea soo deed Gott uk Isaak siene Fru Rebecka beschitzen (1. Mo. 2:24; 12:14-20; 20:2-7; 26:6-11). Secha docht Josef äwa dit no, un hee kunn seenen, waut en Gott siene Uagen rajcht un orrajcht wia. Wäajen Josef Jehova leewd, wia hee sikj gaunz eenich, daut to doonen, waut Jehova von am haben wull.

3. Waut woa wie en disen Artikjel seenen?

³ Leefst du Jerajchtichkjeit? Secha deist du. Oba wie sent  aula onvolkomen un doawäajen mott wie oppaussen, daut wie nich äwa de Jerajchtichkjeit soo denkjen, aus de Welt deit (Jes. 5:20; Reem. 12:2). Wie woaren seenen, waut Jerajchtichkjeit es un woo ons dee togood kjemt, wan wie dee leewen. Dan woa wie von dreeatlei räden, waut ons halpen woat, daut to leewen, waut Jehova fa rajcht talt.

4. Waut denkjen väle, waut Jerajchtichkjeit es?

⁴ Eenje denkjen veleicht, wan Menschen jerajcht sent, daut et dautselwje es, aus selfstjerajcht sennen, un daut soone stolt sent ooda bie aundre emma waut finjen uttobätren. Oba Gott jleicht daut nuscht, wan Menschen soo sent. Aus Jesus oppe Ieed wia, deed hee de Gloowesleidasch jlikjtoo sajen, daut see bloos daut deeden, waut see fa rajcht talden (Liera 7:16; Luk. 16:15). Een Mensch, waut daut deit, waut Jehova well haben, denkjt kjeenmol, daut hee bäta es aus aundre.

5. No de Schreft no, waut es Jerajchtichkjeit? Jeff Biespels.

⁵ Jerajcht sennen es waut feinet. Eefach jesajcht meent daut, daut eena daut deit, waut ver Jehova Gott rajcht es. En de Bibel jeft daut Wuat Jerajchtichkjeit de Iedee, daut eena soo läft, aus Jehova daut fa rajcht talt. Jehova säd biejlikj, daut eena biem Schacharieen driewen sull “een rajchtet Jewicht haben” (5. Mo. 25:15). Daut hebräische Wuat fa “opprechtich” kaun uk aus “jerajcht” äwasat woaren. Un doawäajen mott een Christ, waut ver Gott siene Uagen well jerajcht sennen, bie aul siene Oabeit opprechtich sennen. Een jerajchta Mensch leeft Jerajchtichkjeit un hee kaun daut nich lieden, wan doa wäm onopprechtich behaundelt woat. Eena, waut opp iernst jerajcht sennen well, äwalajcht: Woo denkjt Gott äwa daut, waut ekj entscheiden doo? Un hee deit daut, wiels hee “Gott to jefaulen läwen” well (Kol. 1:10).

6. Wuarom kjenn wie ons opp daut veloten, waut Jehova sajcht, waut rajcht un orrajcht es? (Jesaja 55:8-9).

⁶ De Schreft sajcht, daut Jerajchtichkjeit von Jehova kjemt un doawäajen woat hee “de Wonunk [von] de Jerajchtichkjeit” jenant (Jer. 50:7, JHF). Wäajen Jehova de Schepfa es, es hee de eensja, waut daut rajcht haft ons väatosajen, waut rajcht un orrajcht es. Wäajen wie onvolkomne Sinda sent, weet wie nich emma krakjt, waut rajcht un orrajcht es. Oba Jehova weet daut, wiels hee volkomen es (Spr. 14:12, JHF; läs Jesaja 55:8-9). Un wäajen wie soo jemoakt sent, daut wie Gott likjnen, kjenn wie soo läwen, aus hee daut fa rajcht talt (1. Mo. 1:27). Onse Leew fa onsen himlischen Voda brinjt ons bat doa, daut wie am nodoonen wellen, soo goot aus wie kjennen (Efs. 5:1).

7. Wuarom es daut goot, ons no Väaschreften to rechten, waut opp to veloten sent? Met waut jeit daut to vejlikjen?

⁷ Wan wie ons no daut rechten, waut Jehova fa rajcht un orrajcht talt, es ons daut toom gooden. Weetst du wuarom? Stal die mol väa, waut passieren wudd, wan jieda Bank wudd selfst entscheiden, waut daut Jelt wieet wia. Ooda wan jieda Bu-Kompanie veschieden mäten deed. Dan wudd aules derchenaunda sennen, nich soo? Ooda wan een Dokta ooda eene Nurs daut nich nokjeem, waut von dee velangt wort, kunn daut mau rajcht eenen Mensch sien Läwen kosten. Wan daut irjent Väaschreften jeft, dan es daut uk een Schutz dee notokomen. Krakjt soo beschizt ons daut uk, waut Gott fa rajcht un orrajcht talt.

8. Waut vonne Säajnungen woaren dee kjrieen, waut daut leewen to doonen, waut rajcht es?

 ⁸ Jehova säajent dee, waut soo läwen, aus hee daut fa rajcht talt. Hee vesprakjt: “De jerajchte woaren daut Launt oawen un eewich doabennen bliewen” (Ps. 37:29). Kaust du die daut väastalen, woo daut sennen woat, wan ieescht aule Menschen soo läwen, aus Jehova daut well? Woo dee woaren en Eenichkjeit un Fräd toop läwen un woo schaftich dee woaren sennen? Jehova well, daut du soon scheenet Läwen hast. Secha hab wie aula gooden Grunt, daut to leewen, waut rajcht es. Woo kjenn wie Jerajchtichkjeit noch dolla leewen? Wie woaren nu dreeatlei seenen.

9. Waut woat ons halpen, Jerajchtichkjeit to leewen?

⁹ Ieeschtens: Leew dän, waut bestemt, waut rajcht un orrajcht es. Wan wie wellen Jerajchtichkjeit leewen, mott onse Leew fa Jehova noch jrata woaren, dee waut sajcht, waut rajcht un orrajcht es. Je dolla wie Jehova leewen, je leichta woat ons daut sennen, soo to läwen, aus hee daut haben well. Wan Adam un Eva Jehova biejlikj jeleeft hauden, wudden dee am nienich sennen ojjehuarsom jewast (1. Mo. 3:1-6, 16-19).

10. Waut deed Abraham toom Jehova bäta vestonen?

¹⁰ Wie wellen secha nich dänselwjen Fäla moaken, dän Adam un Eva muaken. Wie kjennen daut utem Stich gonen, wan wie emma mea von Jehova lieren, siene Ieejenschoften väl räakjnen un proowen to vestonen, woo hee denkjt. Wan wie daut doonen, dan woa wie Jehova noch dolla leewen. Räd wie nu mol äwa Abraham. Hee leewd Jehova opp iernst. Mau rajcht uk dan, wan hee nich Jehova siene Entscheidungen vestonen kunn. Abraham wort nich ojjehuarsom; enne Städ daut, proowd hee, Jehova bäta kjanen to lieren. Biejlikj aus hee daut enwort, daut Jehova Sodom un Gomorra venichten wull, haud Abraham ieeschtlich Angst, daut de “Rechta fa de gaunze Ieed” de Jerajchte met de Ojjerajchte toop venichten wudd. Abraham kunn daut nich bejriepen, un doawäajen stald hee Jehova deemootich Froagen. Jehova bleef gaunz jeduldich met Abraham un auntwuad am. Schlieslich wort Abraham daut kloa, daut Jehova no jiedrem eenen sien Hoat kjikjt un daut hee nienich wudd de Jerajchte met de Ojjerajchte toop bestrofen (1. Mo. 18:20-32).

11. Woo wees Abraham, daut hee Jehova leewd un opp am vetrud?

¹¹ Dee Vetal, waut Abraham met Jehova äwa de Städa Sodom un Gomorra haud, deed väl aun am. Daut es secha, daut Abraham Jehova no daut noch dolla leewd un respakjt. Joaren lota wort Abraham sien Vetruen aufjeprooft. Jehova säd, daut hee sienen leewen Sän Isaak opfren sull. Oba Abraham kjand Jehova nu aul bäta. Soo, dit Mol stald hee am kjeene Froagen. Abraham deed eefach daut, waut Jehova jesajcht haud. Oba stal die mol väa, woo wee daut mott jedonen haben, aus hee sikj reedmuak, dit to doonen. Abraham mott secha sea doaräwa nojedocht haben, waut hee aul von Jehova jelieet haud. Hee wist, daut Jehova kjeenmol waut doonen wudd, waut ojjerajcht ooda nich leeftolich wia. No dän Apostel Paulus siene Wieed no docht Abraham doaräwa no, daut Jehova sienen Sän Isaak vom Doot wudd oppwakjen kjennen (Heb. 11:17-19). Jehova haud je doch vesproaken, daut Isaak wudd een Voda sennen von een grootet Volkj. Oba to dee  Tiet haud Isaak noch kjeene Kjinja. Abraham leewd Jehova, soo hee vetrud gaunz doaropp, daut sien Voda bloos daut doonen wudd, waut jerajcht wia. Derch sienen Gloowen jehorcht hee Jehova, wan daut uk schwoa wia (1. Mo. 22:1-12).

12. Woo kjenn wie Abraham nodoonen? (Psalm 73:28).

¹² Woo kjenn wie Abraham nodoonen? Wie motten wieda von Jehova lieren krakjt soo aus hee. Wan wie daut doonen, woa wia am noda komen un am noch dolla leewen (läs Psalm 73:28). Ons Jewessen woat dan soo oppjeschoapt sennen, daut wie wiesen, daut wie soo denkjen, aus Gott deit (Heb. 5:14). Wan ons dan wäa well bat doa brinjen, waut orrajchtet to doonen, woa wie daut nich doonen. Wie wudden nich mol wellen waut doonen, waut onsen Voda truarich muak un ons von am aufbrinjen kunn. Woo kjenn wie noch wiesen, daut wie Jerajchtichkjeit leewen?

13. Woo kjenn wie no Jerajchtichkjeit sträwen? (Spricha 15:9).

¹³ Tweedens: Sträw jieda Dach doano, Jerajchtichkjeit to leewen. Wan wie wellen, daut onse Musklen sellen stoakj sennen, mott wie jieda Dach ekserseisen. Un krakjt soo mott wie ons aunstrenjen, daut to leewen, waut Jehova sajcht, waut rajcht es. Daut es nich too schwoa un wie kjennen daut jieda Dach doonen. Jehova es utjejlikjt un hee velangt kjeenmol, daut wie mea doonen sellen, aus wie kjennen (Psa. 103:14). Hee sajcht: “Am jefaulen dee, dee jerajcht sent” (läs Spricha 15:9). Wan wie en Jehova sienen Deenst waut doonen wellen, strenj wie ons uk sea aun, daut to volbrinjen. Un krakjt soo es daut uk, wan wie no Jerajchtichkjeit sträwen. Jehova woat ons jeduldich halpen, daut wie wiedakomen un daut wie ons met de Tiet vebätren (Psa. 84:6, 8).

14. Waut es daut Brostschilt von de Jerajchtichkjeit, un wuarom fält ons daut?

¹⁴ Jehova halpt ons leeftolich denkjen, daut et nich eene Laust es, daut rajchte to doonen (1. Joh. 5:3). Enne Städ daut beschizt ons daut, un ons fält daut aun disen Schutz aule Dach. Denkj wie uk mol aun  daut jeistelje Kjrichsjereetschoft von waut de Apostel Paulus räd (Efs. 6:14-18). Woon Poat von daut Jereetschoft beschizt dän Soldot sien Hoat? Daut wia, daut Brostschilt von de Jerajchtichkjeit. Dit stalt daut väa, waut Jehova fa rajcht un orrajcht talt. Daut kaun ons jeisteljet Hoat, aulsoo dän ennalichen Mensch, krakjt soo beschitzen, aus een Brostschilt daut Hoat beschizt. Doawäajen es daut soo wichtich, daut bie dien Kjrichsjereetschoft uk daut Brostschilt von de Jerajchtichkjeit met en es! (Spr. 4:23).

15. Woo kaust du die daut Brostschilt von de Jerajchtichkjeit auntrakjen?

¹⁵ Woo kaust du die daut Brostschilt von de Jerajchtichkjeit auntrakjen? Du kaust daut, wan du doaräwa nodenkjst, waut Gott wudd wellen von die haben, wan du Entscheidungen moakst. Wan du äwalajchst, von waut du räden west, waut von Spell du horchen west, waut von Tietvedrief du kjikjen west ooda waut vonne Bieekja du läsen west, dan denkj aun dit: “Met waut moak ekj miene Jedanken un Hoat voll? Es daut soont, waut Jehova jefelt? Ooda kunn mie daut dan jankren, een schwienschet Läwen to fieren, Jewault to eewen, bejierich to sennen ooda bloos aun mie selfst to denkjen?” Daut sent aules soone Sachen, waut Jehova fa orrajcht talt (Filip. 4:8). Wan du soont deist, waut Jehova jefelt, dan woascht du dien Hoat fa schlajchtet beschitzen.

16-17. Woo wiest Jesaja 48:18, daut wie fa emma kjennen soo läwen, aus Jehova daut fa rajcht talt?

¹⁶ Moakst du die eenjemol Sorjen, aus du woascht kjennen Dach fa Dach soo läwen, aus Jehova daut fa rajcht talt? Well wie mol een Biespel seenen, waut Jehova brukt en Jesaja 48:18 (läs). Jehova vesprakjt, daut onse Jerajchtichkjeit kaun soo sennen “aus de Walen oppem Mäa”. Stal die mol väa, du steist aune Kaunt Mäa un kjikjst, woo de Walen eene no de aundre, onen Enj, aune Kaunt naunspeelen. Du feelst die gaunz ruich. Wurscht du die dan sorjen, daut de Walen eenen Dach opphieren wudden met aune Kaunt speelen? Nä! Du weetst, daut de Walen aul haben fa dusende Joa emma doa aune Kaunt Mäa naunjespeelt, un dee woaren daut uk fa wieda.

¹⁷ Diene Jerajchtichkjeit kaun krakjt soo sennen aus de Walen oppem Mäa! Woo? Wan du ieescht äwalajchst, waut Jehova wudd von die haben wellen, ea du eene Entscheidunk moakst un daut dan uk deist. Krakjt endoont woo schwoa daut uk kunn sennen, waut du entscheiden motst, dien leeftolja Voda woat die emma biestonen un die jieda Dach halpen, daut to doonen, waut rajcht es (Jes. 40:29-31).

18. Woosoo mott wie nich aundre doano rechten, aus wie denkjen, waut rajcht es?

¹⁸ Dreddens: Lot Jehova rechten. Wan wie uk sea proowen, daut to doonen, waut Jehova fa rajcht talt, sell wie oba nich aundre rechten un denkjen, daut wie bäta sent aus dee. Wie haben nich daut Rajcht to rechten, aus aundre daut doonen, waut Jehova von dee velangt. Wie sellen em Denkj hoolen, daut Jehova “de Rechta fa de gaunze Ieed” es (1. Mo. 18:25). Jehova haft daut nich ons äwaloten to rechten. Jesus säd mau rajcht: “Doot nich rechten, daut jie nich uk jerecht woaren” (Mat. 7:1). b

19. Woo wees Josef, daut hee doaropp vetrud, daut Jehova rajcht rechten wudd?

¹⁹ Räd wie nochmol von dän jerajchten  Maun Josef. Hee deed nich aundre rechten, wan dee am uk schlajcht behaundelt hauden. Siene Breeda wieren schlajcht jewast to am un hauden am aus Sklow vekoft un to äaren Voda jesajcht, daut Josef doot wia. Joaren lota sach Josef siene Famielje wada. Nu wia hee een majchtja Harscha un wudd haben kunt siene Breeda hunjsch rechten un sikj aufrajchnen. Josef siene Breeda hauden Angst, daut hee daut veleicht doonen wudd, wan an daut nu uk opp iernst leet wia, waut see dän aunjedonen hauden. Oba Josef säd to dee: “Enjst junt nich soo. Sie ekj en Gott siene Städ?” (1. Mo. 37:18-20, 27-28, 31-35; 50:15-21). Josef äwaleet daut rechten deemootich Jehova.

20-21. Woo kjenn wie daut väabieejen, selfstjerajcht to sennen?

²⁰ Wie loten uk, daut Jehova rechten deit, krakjt soo aus Josef deed. Biejlikj denkj wie nich, daut wie aul weeten, wuarom onse Breeda un Sestren wesset doonen. Wie kjennen nich seenen, waut em Hoat es, wäajen bloos Jehova “unjasieekjt waut däm Mensch doatoo drift” (Spr. 16:2). Hee leeft aule Sorten Menschen, endoont von wua dee komen un woo dee daut haben. Jehova sajcht to ons: “Moakt june Hoaten wiet op” (2. Kor. 6:13). Wie proowen, aulem en onse jeistelje Famielje to leewen un doonen dee nich rechten.

²¹ Wie sellen uk nich dee rechten, waut nich onse Breeda un Sestren sent (1. Tim. 2:3-4). Du wurscht secha nich wäm von dien Frintschoft rechten, waut nich dänselwjen Gloowen haft aus du un sajen: “Dee woat kjeenmol enne Woarheit komen!” Daut wudd je selfstjerajcht sennen un nich de rajchte Enstalunk. Jehova jeft noch emma “aule Menschen aulawäajen” de Jeläajenheit omtokjieren (Apj. 17:30). Hool emma em Denkj: Selfstjerajcht sennen, es ojjerajcht sennen.

22. Wuarom best du die eenich, Jerajchtichkjeit to leewen?

²² Wan wie daut leewen, waut Jehova sajcht, waut rajcht es, woat ons daut schaftich moaken. Wie woaren fa aundre een goodet Biespel sennen, un dee woaren Gott un ons dolla leewen. Well wie kjeenmol opphieren, “een Hunga un Darscht no Jerajchtichkjeit haben” (Mat. 5:6). Jehova woat daut en un freit sikj, wan wie ons emma dolla aunstrenjen, daut to doonen, waut rajcht es. De Menschen en dise Welt woaren emma ojjerajchta, oba woa doawäajen nich mootloos. Hool emma em Denkj, daut de “HAR . . . de jerajchte goot” es (Psa. 146:8).