1. Woo wiet sent väle junge Menschen aul jekomen?

 JIEDA Joa loten sikj dusende junge Christen deepen. Best du eena von dee? Wan jo, dan freien de Breeda un Sestren sikj sea doaräwa un Jehova moakt daut uk sea schaftich! (Spr. 27:11). Denkj mol een bät doaräwa no, woo wiet du aul jekomen best. Du hast veleicht aul fa Joaren flietich de Schreft studieet. Studieren haft die jeholpen, die secha to sennen, daut de Bibel Gott sien Wuat es. Oba daut es nich aules. Du hast uk dän, waut dit heilje Buak haft loten oppschriewen, kjanen un leewen jelieet. Diene Leew fa Jehova haft die bat doa jebrocht, daut du die am hanjeefst un aus eent von siene Deena deepen leetst. Du hast eene sea goode Entscheidunk jemoakt!

2. Waut woa wie en disen Artikjel seenen?

 ² Dien Gloowen wort secha opp veschiedne Wäaj aufjeprooft, ea du die deepen leetst. Wan du ieescht ella woascht, woascht du secha noch opp aundre Wäaj aufjeprooft woaren. De Soton woat die wellen bat doa kjrieen, daut du opphieescht, Jehova to leewen un to deenen (Efs. 4:14). Du motst die gaunz eenich sennen, daut nich tootoloten. Waut kaun die halpen, Jehova tru to bliewen un dien Vespräakjen notokomen, am to deenen? Du motst die sea aunstrenjen, fa wieda een stoakja Christ to woaren (Heb. 6:1). Woo kaust du daut doonen?

3. Waut sellen aule Christen no äare Doop doonen?

³ No onse Doop sell wie aula dän Rot nokomen, waut de Apostel Paulus de Christen en Efesus jeef. Hee root dee too, daut see sullen “volstendje”, ooda utjewosne, Christen woaren (Efs. 4:13). Waut hee doamet meend, wia, daut dee sullen  wieda veraunkomen. Paulus vejlikjt em jeisteljen veraunkomen uk doamet, woo een Kjint waust. Fa Elren es äa Bäbe soo väl wieet un see sent soo brow met daut. Oba daut kaun nich fa emma een Bäbe bliewen. Met de Tiet mott daut daut “kjinjrich” sennen auflajen (1. Kor. 13:11). Un soo es daut uk fa Christen. No de Doop motten dee uk wieda waussen. Well wie mol eenjet seenen, waut ons halpt, daut to doonen.

4. Waut kaun die halpen, em jeisteljen verauntokomen? Laj daut ut (Filippa 1:9).

⁴ Leew Jehova emma dolla. Du leefst Jehova aul sea. Oba diene Leew fa am kaun noch emma jrata woaren. Woo? En Filippa 1:9 (läs) räd de Apostel Paulus von eent, woo daut schauft. Paulus bäd, daut de Christen äare Leew en Filippi emma dolla “toonämen kunn”. Soo, onse Leew kaun toonämen. Daut es mäajlich, wan wie “weeten un vestonen lieren”. Je bäta wie Jehova kjanen lieren, je mea räakjen wie am, un uk woo hee es un waut hee deit. Ons Wunsch, am schaftich to moaken, woat dan jrata un wie wellen kjeenmol waut doonen, waut am truarich moakt. Wie strenjen ons sea aun to vestonen, waut sien Wellen es un doonen ons bastet, daut notokomen, waut hee von ons velangt.

5-6. Woo kaun onse Leew fa Jehova jrata woaren? Laj daut ut.

⁵ Jesus deit sienen Voda Jehova en aules krakjt no. Wan wie Jesus bäta kjanen lieren, dan woa wie Jehova uk dolla leewen (Heb. 1:3). De basta Wajch, Jesus kjanen to lieren, es, de vea Evangelien to studieren. Wan du noch nich jieda Dach de Schreft läst, wuarom wurscht dan nich nu aunfangen un mol Jesus siene gaunze Jeschicht läsen? Un acht besonda doaropp, woo hee wia. De Menschen jleichten daut, met Jesus toop to sennen un met am to vetalen. Un hee neem mau rajcht leeftolich de Kjinja oppem Oarm (Mar. 10:13-16). Jesus wia leeftolich un frintlich, un siene Jinja feelden sikj gaunz jeloten met am toop un kunnen frie äare Meenunk sajen (Mat. 16:22). Wie weeten, daut Jesus soo wia aus sien Voda, un doawäajen weet wie, daut eena met Jehova uk äwa aules räden kaun. Wie kjennen to Jehova bäden un ons Hoat gaunz utschedden bie am. Wie weeten, daut hee ons nich rechten woat, wiels hee leeft ons un sorcht fa ons (1. Pet. 5:7).

⁶ Jesus haud Metjefeel met de Menschen. De Apostel Matäus schrift: “Un aus hee daut Volkj sach, jaumad am daut äwa an, wiels see wieren vejoacht un helploos, soo aus Schop onen Hoad” (Mat. 9:36). Un woo denkjt Jehova? Jesus säd: “Soo es daut uk nich mien Voda sien Wellen, daut von dise kjliene eent veloaren jeit” (Mat. 18:14). Jäwen ons dise Wieed nich eene groote Freid? Wan wie Jesus bäta kjanen lieren, dan woat onse Leew fa Jehova uk jrata.

7. Woo kaun die daut halpen, met Christen toop to sennen, waut jeistlich jesonnen sent?

⁷ Du kaust uk lieren, leeftolja to sennen un aus Christ verauntokomen, wan du met Breeda un Sestren von diene Vesaumlunk toop best, waut jeistlich jesonnen sent. Acht doaropp, woo väl Freid dee haben. Dee es daut noch kjeenmol leet jeworden, daut dee sikj eenich worden, Jehova to deenen. Froag dee, aus dee die nich wellen äare Erfoarungen vetalen, waut see em Deenst fa Jehova beläft haben. Wan du eene wichtje Entscheidunk moaken motst, dan froag dee no Rot. Wiels “wua väl Rotjäwa sent, jeit daut goot too” (Spr. 11:14).

8. Waut kaust du doonen, wan du mol twiewelst äwa daut, waut de Schreft sajcht?

⁸ Brinj dienen Twiewel oppem kloaren.  Soo aus wie em  Varsch 2 aul säden, woat de Soton proowen, die doavon auftohoolen, em jeisteljen wiedatokomen. Dee well die veleicht bat doa brinjen, daut du twiewelst, aus daut, waut du ut de Schreft jelieet hast, werkjlich soo es. Biejlikj woaren eenje Menschen die veleicht proowen to äwaräden, daut wie derch de Ewoluzion hia sent. Aus du noch een Kjint wieescht, hast du veleicht nich mol aun de Ewoluzion jedocht, oba nu lieren se die daut woomäajlich enne School. Veleicht hieet sikj die daut soo, daut kunn mau rajcht noch soo sennen, waut de Lierasch doaräwa sajen. Dee haben sikj daut selfst woomäajlich noch newers unjastonen, aus daut soo es, daut et kjeenen Schepfa jeft. Denkj aun dän Gruntsauz, waut en Spricha 18:17 steit. Doa sajcht daut: “Daut sitt emma soo aus wan de ieeschta, dee siene Sach väastalt, rajcht es, bat een aundra kjemt un Froagen stalt.” Enne Städ bloos aules to jleewen, waut du en de School lieescht, wurscht du Gott sien Wuat sellen krakjt studieren. Unjasto die daut en onse Bieekja, räd met Breeda un Sestren, waut ea aun de Ewoluzion jleewden un froag dee, waut dee bat doa brocht, nu aun eenen Schepfa to jleewen, waut ons leeft. Soone Unjahoolungen kjennen die halpen, Bewies to finjen, daut et eenen Schepfa jeft.

9. Waut kjenn wie von Melissa lieren?

⁹ Eene Sesta, waut Melissa heet, studieed äwa de Schepfunk un daut holp ar, äaren Twiewel oppem kloaren to brinjen. b See sajcht: “De Lierasch lajen de Ewoluzion enne School soo ut, daut väl Menschen jleewen, daut daut soo es. Ieeschtlich wull ekj mie daut nich unjastonen, wiels ekj haud Angst, daut ekj wudd enwoaren, daut de Ewoluzion werkjlich soo wia. Oba ekj funk doawäajen aun, mie daut to unjastonen, wiels ekj weet, daut Jehova daut nich well, daut wie am bloos blint deenen. Ekj läsd daut Buak Gibt es einen Schöpfer, der an uns interessiert ist? un de Hefta Das Leben: Reiner Zufall? un Der Ursprung des Lebens: Fünf Fragen kritisch beleuchtet. Ekj wensch, ekj haud daut aul ea jedonen, wiels daut wia krakjt daut, waut mie fäld.”

10-11. Waut kaun die halpen een reinet Läwen to fieren? (1. Tessalonicha 4:3-4).

¹⁰ Saj orreinet Vehoolen auf. Wan du een Jugentlicha best, dan kaun de Wensch Sex  to haben sea stoakj sennen, un eenjemol wellen aundre die uk doatoo beräden. De Soton well, daut du dise Wenschen nojeist. Waut kaun die halpen, dise Vesieekjunk to wadastonen? (Läs 1. Tessalonicha 4:3; 4:4, NW. c) Wan du to Jehova bätst, dan saj am krakjt, woo die daut jeit un froag am, daut hee die halpen saul, stoakj to sennen (Mat. 6:13). Hool em Denkj, daut Jehova die halpen well un nich strofen (Psa. 103:13-14). Du kaust uk en Gott sien Wuat no Help sieekjen. Melissa, wua wie aul ea von räden, wia daut schwoa, orreine Jedanken to wadastonen. See sajcht: “Jieda Dach de Schreft to läsen, holp mie, jäajen orrajchte Wenschen to kjamfen un doaraun to denkjen, daut ekj Jehova deenen well” (Psa. 119:9).

¹¹ Proow, diene Trubbels nich auleen to fiksen. Räd met diene Elren doaräwa, met waut du daut schwoa hast. Daut es nich leicht, äwa soone perseenelje Sachen to räden, oba daut es sea wichtich, daut eena daut deit. Melissa sajcht: “Ekj bäd om Moot un dan räd ekj met miene Pape äwa mienen Trubbel. No daut feeld ekj mie väl leichta. Ekj wist, daut Jehova brow met mie wia.”

12. Woo kaust du goode Entscheidungen moaken?

¹² Lot die von biblische Gruntsauzen leiden. Wan du ella woascht, dan woaren diene Elren die loten mea selfst entscheiden. Oba daut jeft noch välet, waut du noch nich weetst. Woo kaust du daut väabieejen, soonen Fäla to moaken, waut die von Jehova aufbrinjen kunn? (Spr. 22:3). Eene Sesta, waut Kari heet, sajcht, waut ar holp, bätre Entscheidungen to moaken. See wort en, daut een stoakja Christ nich eene Räajel fa jieda Sach em Läwen brukt. See sajcht: “Ekj must vestonen, woo Jehova äwa eene Sach denkjt un nich bloos Räajlen nokomen.” Wan du de Bibel läst, dan denkj doaräwa no: “Waut lieet mie dit Poat doaräwa, woo Jehova denkjt? Es doa een Gruntsauz bennen, waut mie halpt, daut rajchte to doonen? Wan jo, woo woat mie daut toom gooden sennen, wan ekj daut nokom, waut daut sajcht?” (Psa. 19:8; Jes. 48:17-18). Wan du de Bibel läst un doaräwa nodenkjst, dan woascht du enwoaren, daut et väl leichta es, soone Entscheidungen to moaken, waut Jehova jefaulen. Je wieda du veraun kjemst, je dolla woascht du enwoaren, daut du nich en jieda Loag eene Räajel brukst. Du woascht lieren to vestonen, woo Jehova äwa de Sachen denkjt.

13. Woo kjennen goode Frind die halpen? (Spricha 13:20).

¹³ Wäl die soone Frind, waut Jehova leewen. Dee Frind, waut du die wälst, kjennen väl doaraun doonen, woo du aus Christ veraunkjemst (läs Spricha 13:20). Eene Sesta, waut Sara heet, haud nich mea soo väl Freid. Oba dan endad sikj waut, waut ar holp, wada mea Freid to kjrieen. Sara vetalt: “Ekj kjrieech krakjt to de paussende Tiet goode Frind. Ekj un eene Sesta fungen aun, jieda Wäakj toop dän Woaktorm to studieren. Ekj funk uk aun, bie de Toopkomes Auntwuaten to jäwen, wiels eene Frindin mie unjastetten deed. Derch de Help von Frind funk ekj uk aun, mien perseeneljet Studium un daut Jebäd iernsta to nämen. Doaderch kjeem ekj Jehova noda un ekj haud wada mea Freid.”

14. Woo kjrieech Julien goode Frind?

¹⁴ Woo kaust du Frind met soone Menschen woaren, waut die toom gooden sent? Julien, waut nu aus een Eltesta deent,  sajcht: “Aus ekj jinja wia, wort ekj goode Frind met dee, met dee ekj toop prädjen deed. Dise Frind wieren flietich un holpen mie to seenen, woo scheen de Deenst gonen kaun. Ekj neem mie väa, em Voltietdeenst to sennen. Ekj wort uk en, daut ekj bloos no soone Frind socht, waut en mien Ella wieren, un doawäajen haud ekj nich väl Frind. Lota kjrieech ekj uk goode Frind em Betel. Dee notodoonen, holp mie, bätren Tietvedrief to haben, un doaderch kjeem ekj Jehova uk noda.”

15. Fa waut vonne Frind woarnd Paulus Timotäus? (2. Timotäus 2:20-22).

¹⁵ Waut, wan du enwoascht, daut wäa von de Vesaumlunk nich een gooda Frint es? Paulus wist, daut eenje Christen en siene Tiet nich jeistlich jesonnen wieren, un doawäajen woarnd hee Timotäus, daut hee von dee sull wajchbliewen (läs 2. Timotäus 2:20-22). Daut wie kjennen Frind sennen met Jehova, es sea wieetvoll. Wie haben ons sea aunjestrenjt, daut wie kjennen met onsen himlischen Voda goode Frind sennen, un doawäajen sell wie nich tooloten, daut irjentwäa daut tonuscht moakt (Psa. 26:4).

16. Waut saust du die väanämen?

¹⁶ Nemm die waut väa, waut die toom gooden es. Nemm die soont väa, waut dienen Gloowen stoakjen woat un waut die woat halpen, een stoakjra Christ to woaren (Efs. 3:16). Biejlikj kaust du die väanämen, de Schreft pinkjelja to läsen un to studieren (Psa. 1:2-3). Ooda du kaust uk proowen, foakna un von Hoaten to bäden. Veleicht motst du uk dolla oppaussen, waut von Tietvedrief du hast un woo du diene Tiet brukst (Efs. 5:15-16). Jehova woat daut jefaulen, wan hee sitt, daut du die aunstrenjst wieda verauntokomen.

17. Woo halpt die daut, wan du aundre halpst?

¹⁷ Du woascht een stoakjra Christ woaren, wan du aundre Menschen halpst. Jesus säd: “Jäwen es seelja [ooda moakt schaftja] aus nämen” (Apj. 20:35). Die woat daut uk sea schaftich moaken, wan du waut von diene Tiet un Krauft brukst toom aundre halpen. Biejlikj kaust du die daut väanämen, de Elre un de Kranke enne Vesaumlunk to halpen. Veleicht kaust du  waut fa dee bestrieden ooda dee met äare ellektroonische Sachen halpen. Wan du een Brooda best, dan nemm die väa, een Deenstaumthelpa to woaren, soo daut du diene Breeda un Sestren deenen kaust (Filip. 2:4). Du kaust uk dee Leew wiesen, waut nich von de Vesaumlunk sent, wan du dee de goode Norecht von daut Kjennichrikj prädichst (Mat. 9:36-37). Wan daut afens mäajlich es, dan proow die daut väatonämen, opp irjenteene Wajch em Voltietdeenst to sennen.

18. Woo kaun die de Voltietdeenst halpen verauntokomen?

¹⁸ Derch dän Voltietdeenst kaust du em jeisteljen veraunkomen. Wan du Pionia best, kaust du veleicht no de School fa Kjennichrikjsvekjindja gonen. Veleicht kaust du uk em Betel deenen ooda bie daut Buwoakj methalpen. Eene junge Pioniasesta, waut Kaitlyn heet, sajcht: “Met erfoarne Breeda un Sestren toop em Deenst to sennen, holp mie sea, em jeisteljen verauntokomen. Dee äa Biespel brocht mie bat doa, daut ekj wull dolla de Schreft studieren un een bätra Liera woaren.”

19. Waut fa Säajnungen woascht du kjrieen, wan du em jeisteljen wieda veraunkjemst?

¹⁹ Jehova woat die väl Säajen jäwen, wan du em jeisteljen veraunkjemst. Un du woascht nich diene Krauft brucken toom Sachen doonen, waut nuscht enhoolen (1. Joh. 2:17). Du woascht die uk väl Weedoag spoaren, waut doavon kjemt, wan du schlajchte Entscheidungen moakst. Enne Städ daut woat daut met dien Läwen goot utkomen un du woascht schaftich sennen (Spr. 16:3). Dien goodet Biespel woat uk aul de Breeda un Sestren Moot toospräakjen (1. Tim. 4:12). Un äwa aules woascht du dän Fräd un de Tofrädenheit haben, Jehova to jefaulen un met am goode Frind to sennen (Spr. 23:15-16).