1. Woo kjemt ons daut togood, wan wie doaräwa räden, woo wie “de Woarheit” kjanen lieeden?

 “WOO hast du de Woarheit kjanen jelieet?” Secha hab wie dise Froag aul foaken beauntwuat. Daut es eent von daut ieeschte, waut wie eenen Brooda ooda eene Sesta froagen, wan wie dee bäta kjanen lieren wellen. Wie jleichen daut, wan aundre Breeda un Sestren ons vetalen, woo see Jehova kjanen un leewen jelieet haben, un wie jleichen daut uk to vetalen, woo wie enne Woarheit kjeemen (Reem. 1:11). Wan wie ons doavon unjahoolen, dan woat ons emma wada kloa, woo wieetvoll de Woarheit es. Wie sent ons dan noch eenja, “no de Woarheit … [to] läwen”, daut bediet, soo to läwen, daut wie Jehova jefaulen un daut hee ons säajnen kaun (3. Joh. 4).

2. Von waut haundelt dis Artikjel sikj?

² En disen Artikjel woa wie äwa eenje Jrind räden, wuarom wie de Woarheit soo väl räakjnen. Wie woaren uk seenen, woo wie wieda onse Dankboakjeit wiesen kjennen fa dit wieetvolle Jeschenkj. Gaunz secha woat ons dis Artikjel halpen, daut wie noch dankboara doafäa sent, waut Jehova jedonen haft, om ons enne Woarheit to brinjen (Joh. 6:44). Dee woat ons uk halpen, daut ons daut noch dolla jankat, met aundre äwa de Woarheit to räden.

3. Waut es de wichtichsta Grunt, wuarom wie de Woarheit soo väl räakjnen?

³ Daut jeft välet, wuarom wie de Woarheit soo väl räakjnen. De wichtichsta Grunt es, wäajen wie Jehova Gott leewen, von dän de Woarheit kjemt. Derch sien Wuat, de Schreft, hab wie am aus dän Aulmajchtjen kjanen jelieet, waut Himmel un Ieed jemoakt haft, un uk aus onsen leeftoljen, himlischen Voda, waut sea om ons bekjemmat es (1. Pet.  5:7). Wie weeten, daut ons Gott “metliedent, voll Jnod, nich leicht doll, un sea leeftolich un truhoatich” es (2. Mo. 34:6). Jehova jleicht de Jerajchtichkjeit (Jes. 61:8). Am deit daut wee, wan hee ons lieden sitt. Un hee well un es reed, aulet Lieden wajchtonämen, wan de Tiet ieescht bat doa es (Jer. 29:11). Doatoo frei wie ons aul sea! Doawäajen jroz leew wie Jehova soo sea.

4-5. Wuarom vejlikjt de Apostel Paulus onse Hopninj met eenen Anka?

⁴ Waut es noch een Grunt, wuarom wie de Woarheit väl räakjnen? De Woarheit brinjt ons väl goodet. See wie mol een Biespel doatoo. Bie de biblische Woarheit es onse Hopninj met en, waut wie haben. Toom wiesen, woo wieetvoll dise Hopninj es, schreef de Apostel Paulus: “Dise Hopninj hab wie aus eenen fausten, sechren Anka fa onse Seel” (Heb. 6:19). Krakjt soo aus een Anka een Schepp fausthelt, soo kaun de Hopninj en de Schreft ons halpen, daut wie kjennen ruich bliewen, wan doa Trubbels oppkomen.

⁵ Paulus räd hia von de himlische Hopninj, waut de jesaulwde Christen haben. Oba siene Wieed paussen uk fa aul deejanje, waut de Hopninj haben, eewich hia oppe Ieed em Paradies to läwen (Joh. 3:16). Mea äwa de Hopninj von daut eewje Läwen to lieren, jeft ons onen Twiewel eenen Senn em Läwen.

6-7. Woo holp Yvonne de Woarheit äwa daut, waut noch komen woat?

⁶ Räd wie mol äwa eene Sesta, waut Yvonne heet. See lieed de Woarheit nich von kjlien aun kjanen, un aus see een natet Mejalkje wia, haud see sea Angst fa dän Doot. See weet noch, aus see eemol waut läsd, waut see nich mea vejäten kunn. “Eenen Dach woat doa nich mea een morjen sennen.” See sajcht: “Wäajen dise Wieed must ekj de Nacht waka ligjen un doaräwa nodenkjen, waut nochmol komen wudd. Ekj docht soo: ‘Es dit Läwen aules? Wuarom läw ekj verheipts?’ Ekj wull nich stoawen!”

⁷ Lota, aus Yvonne dan eene Jugentliche wia, lieed see Jehova siene Zeijen kjanen. See sajcht: “Dan funk ekj daut uk aun to jleewen, daut ekj kunn fa emma en een Paradies oppe Ieed läwen.” Woo haft de Woarheit onse Sesta jeholpen? See sajcht wieda: “Nu ligj ekj nich mea waka em Bad un sorj mie äwa daut, waut lota komen woat ooda äwa dän Doot.” Wie kjennen seenen, daut de Woarheit fa Yvonne sea wieetvoll es, un ar moakt daut sea tofräd, met aundre äwa dise scheene Hopninj to räden (1. Tim. 4:16).

8-9. (a) Woo väl räakjend een Maun dän Schauz, waut hee funk, en eent von Jesus siene Jlikjnisen? (b) Woo wieetvoll es de Woarheit fa die?

⁸ To de biblische Woarheit jehieet uk de goode Norecht äwa Gott sien Kjennichrikj. Jesus vejlikjt de Woarheit äwa daut Kjennichrikj met eenen vestoaknen Schauz. En Matäus 13:44 säd Jesus: “Met daut Himmelrikj es daut soo aus met een Schauz, dee opp de Stap vegroft es, dän een Maun funk un dan vestuak un en siene Freid jinkj un aules vekoft, waut hee haud, un daut Stekj Launt koft.” Es ons oppjefollen, daut de Maun goanich no dän Schauz socht? Oba aus hee dän funk, wia hee reed, väl opptojäwen, om dän to kjrieen. Hee vekoft mau rajcht aules, waut hee haud. Wuarom? Wäajen hee wist, woo wieetvoll dis Schauz wia. Dee wia väl wieetvolla aus aulet aundre, waut hee oppjeef.

⁹ Es de Woarheit fa die uk soo wieetvoll aus daut? Gaunz secha es dee. Wie weeten, daut nuscht enne Welt soo wieetvoll es aus  de Freid, daut wie Jehova deenen kjennen, un uk de Hopninj haben, noch mol eewich to läwen, wan Gott sien Kjennichrikj rejieet. Endoont waut wie oppjäwen, daut es daut goot wieet, daut wie kjennen Jehova siene Frind sennen. Onse jratste Freid es, daut wie “Gott to jefaulen läwen kjennen” (Kol. 1:10).

10-11. Waut brocht Michael bat doa, sien Läwen to endren?

¹⁰ Väle von ons haben een deel oppjejäft, om Jehova to jefaulen. Eenje haben äare aunjeseene Oabeit oppjejäft. Aundre haben oppjehieet, no Rikjtum to sträwen. Noch aundre haben äa gaunzet Läwen jeendat, aus see Jehova kjanen lieeden. Daut es, waut Michael deed. Hee kjand de Woarheit nich von kjlien aun. Aus junga Maun leet hee sikj utlieren toom feiten. Hee sajcht: “Fa mie wia daut sea wichtich, daut ekj mie kjarpalich stoakj hilt. Eenjemol feeld ekj mie soo stoakj, daut kjeena wudd jäajen mie kjennen.” Oba aus Michael aunfunk, de Bibel to studieren, lieed hee, woo Jehova äwa Jewault denkjt (Psa. 11:5, JHF). Michael sajcht äwa de Zeijen, waut met am de Bibel studieeden: “Dee säden kjeenmol to mie, daut ekj sull opphieren, mie em feiten to eewen. Dee lieeden mie eefach wieda de Woarheit ut de Schreft.”

¹¹ Je mea Michael äwa Jehova lieed, je jrata wort siene Leew fa am. Am jinkj daut besonda to Hoaten, to seenen, woo väl Metleet Jehova met siene Deena haft. Met de Tiet wort am kloa, daut hee wudd waut wichtjet en sien Läwen entscheiden motten. Hee sajcht: “Ekj wist, daut mie daut wudd sea schwoa faulen, mie nich mea em feiten to eewen. Oba ekj wist uk, daut ekj Jehova doaderch wudd jefaulen kjennen un wia mie dan gaunz secha, daut et daut goot wieet wia, wan ekj Jehova deenen wull.” Fa Michael es de Woarheit sea väl wieet, waut hee jefungen haft, un dise Wieetschazunk haft am bat doa jebrocht, välet en sien Läwen to endren (Jak. 1:25).

12-13. Woo holp Mayli de Woarheit ut de Schreft?

¹² De Bibel vejlikjt de Woarheit met eene Laump, waut em diestren dacht, om to wiesen, woo wieetvoll de Woarheit es (Psa. 119:105; Efs. 5:8). Mayli von Aserbaidschan es sea dankboa doafäa, woo Gott sien Wuat ar jeholpen haft. See woss en eene Famielje opp, wua de Mame un Pape nich dänselwjen Gloowen hauden. Äare Pape wia Moslem, un äare Mame wia judisch. See sajcht: “Ekj twieweld doa nich aun, daut et eenen Gott jeef, oba ekj haud doawäajen väl Froagen. Ekj wundad: ‘Wuarom haft Gott de Menschen jemoakt, daut dee ieescht äa gaunzet Läwen lieden sellen, om lota eewich enne Hal jekjwält to woaren?’ De Menschen säden je emma, daut aules, waut doa passieed, Gott sien Wellen wia. Doawäajen wundad ekj: ‘Deit Gott de Menschen kontrollen, un lota haft hee Freid doabie, wan hee dee lieden sitt?’”

¹³ Mayli socht wieda no de Auntwuaten fa äare Froagen. Met de Tiet funk see aun, de Bibel to studieren, un kjeem en de Woarheit. See sajcht: “Daut de Schreft soo leicht to vestonen es un daut dee Sachen soo kloa un dietlich utlajcht, holp mie, daut ekj wada mea Freid em Läwen haud un ekj kjrieech ennalich Fräd.” Soo aus Mayli low wie Jehova, dee ons “utem diestren rut jerat, un en sien wundaboaret Licht jestalt haft” (1. Pet. 2:9).

14. Woo kjenn wie de Woarheit noch mea räakjnen? (See uk dän Kausten “ Met waut de Woarheit ut de Schreft noch vejlikjt woaren kaun”.)

¹⁴ Daut sent bloos een poa Biespels, waut  wiesen, woo wieetvoll de Woarheit es. Secha denkj jie noch aun väl aundre Biespels. Wie wudden kjennen perseenlich doaräwa studieren, waut fa Jrind daut noch jeft, wuarom wie de Woarheit väl räakjnen sellen. Je wieetvolla de Woarheit fa ons es, je bäta woa wie dise Wieetschazunk en ons Läwen wiesen kjennen.

15. Waut es eene Wajch, woo wie wiesen kjennen, daut wie de Woarheit väl räakjnen?

¹⁵ Wan wie de Bibel un biblische Bieekja studieren, kjenn wie wiesen, daut wie de Woarheit väl räakjnen, wiels krakjt endoont woo lang wie aul enne Woarheit sent, wie kjennen emma noch mea lieren. En de ieeschte Utgow, waut daut von dän Woaktorm mol jeef, säd daut soo aus dit: “De Woarheit es soo aus eene kjliene Bloom enne Wiltnis, waut mank een deel Onkrut meist nich to seenen es. Wan du dee finjen west, motst du no dee sieekjen. . . . Un wan du dee ieescht jefungen hast, dan motst du die aunstrenjen, dee to kjrieen. Oba sie nich tofräd bloos met eene Bloom. . . . Proow, emma noch mea vonne Woarheit to lieren.” Studieren es aunstrenjent, oba daut loont sikj werkjlich.

16. Woo kaust du de Schreft daut baste studieren? (Spricha 2:4-6).

 ¹⁶ Nich aula jleichen daut, to läsen un to studieren. Oba Jehova well haben, daut du wieda “sieekjst” un “romforschst”, om de Woarheit emma bäta to vestonen (läs Spricha 2:4-6). Wan wie ons aunstrenjen, woat ons daut emma togood komen. Corey sajcht, daut hee emma no eenen Varsch opp eemol kjikjt, wan hee de Bibel läst. Hee sajcht: “Ekj läs jieda Footnoot un jieda Varsch no, waut doa aunjejäft es, un doo uk noch oppoat doaräwa studieren. . . . Doaderch hab ekj väl doavon, wan ekj de Bibel läs!” Aus wie daut nu soo aus dit doonen ooda aundasch, wie wiesen onse Wieetschazunk fa de Woarheit, wan wie ons Tiet nämen un ons aunstrenjen toom studieren (Psa. 1:1-3).

17. Waut bediet daut, no de Woarheit to läwen? (Jakobus 1:25).

¹⁷ Daut es nich jenuach, bloos de Woarheit kjanen to lieren. Daut ons de Woarheit saul togood komen, mott wie uk werkjlich doano läwen, aulsoo daut nokomen, waut wie lieren. Bloos dan woat de Woarheit ons schaftich un tofräd moaken (läs Jakobus 1:25). Woo kjenn wie weeten, aus wie no de Woarheit läwen? Een Brooda jeft dän Rot, daut et goot es, wan eena sikj selfst unjasieekjt toom seenen, waut eena aul fein deit un en waut vonne Stekjen eena sikj noch mott vebätren. De Apostel Paulus säd: “Krakjt endoont woo wiet wie aul sent veraunjekomen, well wie doawäajen ordentlich wieda opp dänselwjen Wajch gonen” (Filip. 3:16, NW).

18. Wuarom strenj wie ons aun, “no de Woarheit … [to] läwen”?

¹⁸ Denkj mol han, woo ons daut togood kjemt, wan wie “no de Woarheit . . . läwen”! Doaderch woat nich bloos ons Läwen bäta, oba wie kjennen uk Jehova un onse Breeda schaftich moaken (Spr. 27:11; 3. Joh. 4). Sent daut nich de baste Jrind, de Woarheit väl to räakjnen un no de Woarheit to läwen?