1. Waut mott wie no Hebräa 12:1 no doonen, om onsen Rees fa daut Läwen batem Enj to ranen?

 DE Bibel vejlikjt ons christeljet Läwen met eenen Rees. Soone, waut bat aum Enj ranen, woaren daut eewje Läwen kjrieen (2. Tim. 4:7, JHF; 4:8). Wie motten aules doonen, waut wie kjennen, om en disen Rees wiedatoranen, besonda wiels daut Enj von dän Rees aul sea dicht bie es. De Apostel Paulus rand selfst sienen Rees fa daut Läwen batem Enj, un doawäajen weet hee, waut doatoo needich es. Hee sajcht, daut wie sellen “jieda Laust auflajen . . . un en dän Rees aunhoolent ranen, dee ver ons es” (läs Hebräa 12:1, NW).

2. Waut meent daut, “jieda Laust auflajen”?

² Wan Paulus schreef, daut wie “jieda Laust auflajen” motten, meend hee dan, daut wie aus Christen kjeen schwoaret to droagen haben? Nä. Met dit meend hee, daut wie jieda onneedje Laust auflajen sellen. Soone Sachen kjennen ons langsom un meed moaken. Om uttohoolen, mott wie fuaz enwoaren, aus wie irjenteene onneedje Laust methaben un dee dan auflajen. Oba daut jeft uk noch aundre Lausten, waut wie metdroagen motten. Wan wie dee nich metnämen, kjenn wie nich en disen Rees bliewen (2. Tim. 2:5). Waut sent daut fa Lausten?

3. (a) Waut mott wie no Galata 6:5 no metnämen? (b) Waut woa wie en disen Artikjel seenen, un wuarom?

³ Läs Galata 6:5. Paulus schreef von eenje Sachen, waut wie metnämen motten. Hee schreef, daut “een jiedra woat siene ieejne Laust droagen motten”. Paulus meend hia dee Laust ooda Veauntwuatunk, waut wie ver Gott haben. Daut es waut, waut kjeen aundra fa ons droagen kaun. En disen Artikjel woa wie eenjet seenen, waut met onse “ieejne Laust” jemeent  es, un woo wie dee droagen kjennen. Wie woaren uk seenen, woont onneedje Lausten sent, waut wie veleicht droagen, un woo wie dee auflajen kjennen. Onse ieejne Veauntwuatunk droagen un de onneedje Lausten auflajen, woat ons halpen, onsen Rees fa daut Läwen batem Enj to ranen.

4. Wuarom es daut nich too schwoa, ons Vespräakjen to hoolen, aus wie ons Jehova hanjeewen? (See uk daut Bilt.)

⁴ Onse Hangow. Aus wie ons Jehova hanjeewen, vespruak wie, am auntobäden un sienen Wellen to doonen. Dit Vespräakjen mott wie hoolen. Daut to doonen, waut wie Jehova vesproaken haben, es eene groote Veauntwuatunk, oba daut es nich too schwoa fa ons. Jehova haft je ons jemoakt toom sienen Wellen doonen (Opb. 4:11). Un hee haft ons uk soo jemoakt, daut wie een Velangen no daut jeistelje haben, un wie sent uk no sien Bilt jemoakt. Doawäajen kjenn wie am noda komen un ons jeft daut Freid, sienen Wellen doonen (Psa. 40:9). Bowenenn woa wie “Ru finjen”, wan wie Gott sienen Wellen doonen un sienen Sän nofoljen (Mat. 11:28-30).

5. Waut kaun die halpen, daut to doonen, waut du Jehova vesproaken hast? (1. Johanes 5:3).

 ⁵ Woo kaust du dise Veauntwuatunk droagen? Hia es tweeatlei, waut die halpen woat. Ieeschtens: Doo diene Leew fa Jehova emma wieda stoakjen. Daut kaust du, wan du äwa daut goode nodenkjst, waut hee fa die aul jedonen haft un waut hee fa die noch doonen woat. Je jrata diene Leew fa Gott woat, je leichta woat die daut sennen, am to jehorchen (läs 1. Johanes 5:3). Tweedens: Doo Jesus no. Hee kunn Gott sienen Wellen doonen, wiels hee Jehova emma no Help fruach un aun daut goode docht, waut ver am lieech (Heb. 5:7; 12:2, NW). Krakjt soo aus Jesus froag Jehova no Help un vejät kjeenmol von daut eewje Läwen, waut ver die licht. Wan diene Leew fa Jehova emma jrata woat un du Jesus nodeist, woascht du daut nokomen kjennen, waut du Jehova mol vesproaken hast.

6. Wuarom mott wie ons om onse Famielje kjemren? (See uk daut Bilt.)

⁶ Veauntwuatunk fa de Famielje. En onsen Rees fa daut Läwen mott wie Jehova un Jesus dolla leewen aus ons ieejnet Frintschoft (Mat. 10:37). Dit meent oba nich, daut wie ons nich brucken om de Famielje kjemren. Em Jäajendeel: Om Gott un Christus to jefaulen, mott wie onse Veauntwuatunk en de Famielje nokomen (1. Tim. 5:4, 8). Wan wie daut doonen, dan jeit ons daut bäta. Jehova weet, daut de Famieljes schaftich sent, wan de Maun un siene Fru sikj Leew un Respakjt wiesen, wan Elren äare Kjinja leewen un dee belieren, un wan de Kjinja no äare Elren horchen (Efs. 5:33; 6:1, 4).

7. Woo kaust du diene Veauntwuatunk enne Famielje nokomen?

⁷ Woo kaust du dise Veauntwuatunk droagen? Endoont aus du een Ehemaun, eene Ehefru ooda een Kjint best, vetru opp de Weisheit ut de Schreft. Doo nich bloos daut, waut du jleefst, waut rajcht es, ooda waut aundre doonen ooda waut Jelieeda sajen, waut du doonen saust (Spr. 24:3-4). Onse Bieekja wiesen veschiedne Wäaj, woo du de biblische Gruntsauzen nokomen kaust. Doawäajen nutz dee goot ut! Biejlikj en de Artikjels “Help fa de Famielje” es uzhent soon Rot bennen, waut Ehelied, Elren un Jugentliche halpen kaun, met de Schwierichkjeiten foadich to woaren, waut daut vondoag dän Dach jeft. b Sie die eenich, daut to doonen, waut de Schreft lieet, mau rajcht wan aundre en diene Famielje daut nich doonen. Daut woat diene Famielje togood komen un Jehova woat die säajnen (1. Pet. 3:1-2).

8. Waut kjennen onse Entscheidungen aun ons doonen?

⁸ Foljen von onse Entscheidungen. Jehova haft ons dän frieen Wellen jejäft un hee well, daut wie de Freid beläwen, waut doavon kjemt, goode Entscheidungen to moaken (Gal. 6:7-8). Oba wan wie schlajchte Entscheidungen moaken, beschizt hee ons nich fa de Foljen. Wan wie eene schlajchte Entscheidunk moaken, ooda onbedocht waut sajen ooda doonen, dan mott wie met de Foljen läwen. Doano waut wie jedonen haben, kaun daut sennen, daut ons Jewessen ons ploacht. Oba to weeten, daut wie veauntwuatlich sent fa onse Entscheidungen, kaun ons daut bat doa brinjen, onse Sinden to bekjanen, onse Fäla trajchttostalen un ons auntostrenjen, nich dänselwjen  Fäla wada to moaken. Aul dit kaun ons halpen, en dän Rees fa daut Läwen to bliewen.

9. Waut kaust du doonen, wan du eene schlajchte Entscheidunk jemoakt hast? (See uk daut Bilt.)

⁹ Woo kaust du dise Veauntwuatunk droagen? Wan du eene schlajchte Entscheidunk jemoakt hast un daut nich fiksen kaust, dan nemm de Loag nu soo aun, aus dee es. Du kaust daut nich endren, waut vebie es. Bruck nich diene Tiet un Krauft toom wiesen, daut du rajcht wieescht ooda daut et eenen aundren siene Schult wia. Enne Städ daut sto diene Fäla too un doo daut baste, waut du nu doonen kaust. Wan du die schuldich feelst, wiels du waut schlajchtet jedonen hast, saj Jehova daut em Jebäd. Sto diene Fäla too un froag am om Vejäwunk (Psa. 25:11; 51:5-6). Froag uk dee om Vejäwunk, dee du velatst hast, un froag de Eltestasch no Help, wan daut fält (Jak. 5:14-15). Lia von diene Fäla un proow, dee nich wada to doonen. Dan kaust du die secha sennen, daut Jehova die woat Metleet wiesen un die biestonen (Psa. 103:8-13).

10. Wuarom es daut eene schwoare Laust, wan sikj ons daut soo späat, daut wie kjeenmol jenuach doonen? (Galata 6:4).

¹⁰ Daut Jefeel, kjeenmol jenuach to doonen. Daut kaun eene schwoare Laust sennen, wan wie ons emma met aundre vejlikjen un jleewen, daut wie kjeenmol jenuach doonen (läs Galata 6:4). Wan wie emma wada doano kjikjen, waut aundre doonen, dan kaun daut bat doa komen, daut wie bäta sennen wellen aus dee un aufjenstich woaren (Gal. 5:26). Wan wie krakjt soo väl doonen wellen aus aundre, oba daut nich kjennen, kaun ons daut schoden. Daut sajcht: “Eene Hopninj dee sikj vetrakjt, moakt eenem krank”. Oba noch väl schlemma wudd daut sennen, wan wie ons soont väaneemen, waut wie aulmols kjeenmol woaren doonen kjennen (Spr. 13:12). Daut kaun onse Krauft utzoppen un dan woa wie en onsen Rees fa daut Läwen langsoma woaren (Spr. 24:10, NW).

11. Waut kaun die halpen, daut du nich daut Jefeel hast, kjeenmol jenuach to doonen?

¹¹ Woo kaust du dise Laust auflajen? Velang nich mea von die, aus Jehova deit. Hee velangt kjeenmol mea von die, aus du jäwen kaust (2. Kor. 8:12). Du kaust die uk secha sennen, daut Jehova die nich met aundre vejlikjt (Mat. 25:20-23). Hee räakjent daut väl, daut du am von Hoaten deenst, daut du tru best un daut du uthelst. Sie bescheiden un denkj doaraun, daut du wäajen dien Ella, diene Jesuntheit ooda diene Omstend veleicht nich soo väl doonen kaust, aus du west. Soo aus Barsillai motst du veleicht uk een Väarajcht aufsajen, wan daut wäajen diene Jesuntheit ooda dien Ella schwoa sennen wudd, daut to doonen (2. Sam. 19:36-37). Nemm Help aun, soo aus Moses deed, un jeff aundre von diene Veauntwuatunk, wan daut paussent es (2. Mo. 18:21-22). Wan du bescheiden best, woat die daut halpen, daut du nich daut Jefeel hast, kjeenmol jenuach to doonen. Dan woascht du nich utporren en dän Rees fa daut Läwen.

12. Wuarom kjenn wie sajen, daut wie nich veauntwuatlich sent, fa de schlajchte Entscheidungen, waut aundre moaken?

¹² Sikj veauntwuatlich feelen, wan aundre schlajchte Entscheidungen moaken. Wie kjennen nich fa aundre waut entscheiden un wie kjennen dee uk nich emma von de Foljen bewoaren, waut doavon komen, wan dee schlajchte Entscheidungen moaken. Biejlikj kaun daut bat doa komen, daut een Sän ooda Dochta nich mea well Jehova deenen. Daut kaun de Elren sea toosaten. Oba wan de Elren sikj schuldich feelen fa de  Entscheidunk, waut äa Kjint jemoakt haft, dan droagen dee eene sea schwoare Laust met sikj. Jehova velangt nich, daut dee dise Laust droagen motten (Reem. 14:12).

13. Waut kjennen Elren doonen, wan äare Kjinja schlajchte Entscheidungen moaken?

¹³ Woo kaust du dise Laust auflajen? Daut es sea wichtich, em Denkj to hoolen, daut Jehova ons aula dän frieen Wellen jeef. Jieda Mensch kaun siene ieejne Entscheidungen moaken, un doa es met en, aus dee am deenen well. Jehova weet, daut jie aus Elren nich volkomen sent; hee velangt bloos, daut jie jun bastet doonen. De Entscheidunk, waut jun Kjint moakt, es siene Veauntwuatunk, nich june (Spr. 20:11). Oba veleicht feel jie junt schuldich äwa Fäla, waut jie aus Elren mol jedonen haben. Wan daut soo es, lot Jehova daut weeten un froacht am om Vejäwunk. Hee weet goot, daut jie daut nich endren kjennen, waut aul vebie es. Oba hee velangt uk nich, daut jie june Kjinja daut wajchnämen, daut dee selfst Veauntwuatunk droagen fa daut, waut dee doonen. Un hoolt em Denkj, daut wan jun Kjint sikj aunstrenjt, trigj no Jehova to komen, dan woat Jehova am sea wellich oppnämen (Luk. 15:18-20).

14. Wuarom mott wie daut auflajen, ons äwamotich schuldich to feelen?

¹⁴ Sikj äwamotich schuldich feelen. Wan wie eene Sind begonen haben, dan es daut jeweenlich, daut wie ons schuldich feelen. Oba Jehova well nich haben, daut wie ons dän Tiet äwa äwamotich schuldich feelen. Dise Laust mott wie auflajen. Oba woo weet wie daut, aus wie ons äwamotich schuldich feelen? Wan wie onse Sind bekjant haben, een Leetsennen hauden un aules doonen, om nich trigjtofaulen, kjenn wie doaropp vetruen, daut Jehova ons vejäft haft (Apj. 3:19, NW). Nodäm wie aul dit jedonen haben, well Jehova nich, daut wie ons wieda schuldich feelen doaräwa. Hee weet, daut ons soon Jefeel bloos schoden woat (Psa. 31:11). Wan wie sea mootloos sent, dan woa  wie met eenst opphieren, en onsen Rees fa daut Läwen to ranen (2. Kor. 2:7).

15. Waut kaust du doonen, wan du die äwamotich schuldich feelst? (1. Johanes 3:19-20). (See uk daut Bilt.)

¹⁵ Woo kaust du dise Laust auflajen? Wan du die äwamotich schuldich feelst, denkj doaraun, waut de woare “Vejäwunk” von Gott meent (Psa. 130:4). Wan Jehova dee vejeft, waut werkjlich een Leetsennen haben, vesprakjt hee, “nich mea aun äare Sinden [to] denkjen” (Jer. 31:34). Wan Jehova die ieescht vejäft haft, woat hee die diene Sinden nich mea väahoolen. Denkj aulsoo nich, daut de Foljen von diene Sinden, een Bewies doafäa sent, daut Jehova die nich vejäft haft. Un oaja die nich too sea äwa die selfst, wan du wäajen dienen Fäla nu jroz veleicht nich soo väl em Deenst fa Jehova doonen kaust. Jehova denkjt nich mea aun diene Sinden un du saust uk nich (läs 1. Johanes 3:19-20).

16. Waut mott wie äwa dän Rees fa daut Läwen vestonen?

¹⁶ Wan wie en onsen Rees fa daut Läwen ranen, mott wie em Denkj hoolen, waut 1. Korinta 9:24 sajcht: “Rant soo, daut jie dän [Pries] kjrieen”. Wie motten dän Unjascheet vestonen tweschen de Veauntwuatungen, waut wie droagen motten un de Lausten, waut wie auflajen motten. En disen Artikjel hab wie mau een poa Biespels doavon jeseenen. Oba daut jeft noch mea. Jesus biejlikj säd, daut wie ons “derch fräten un supen un sorjen äwa dit Läwen, daut Hoat beloden” kunnen (Luk. 21:34). Dise un aundre Bibelvarzhen kjennen die halpen to seenen, wua du veleicht waut endren motst, om wieda en dienen Rees fa daut Läwen to ranen.

17. Wuarom kjenn wie ons secha sennen, daut wie dän Rees fa daut Läwen jewennen woaren?

¹⁷ Wie kjennen ons secha sennen, daut wie dän Rees fa daut Läwen jewennen woaren, wiels Jehova ons de Krauft jäwen woat, waut ons fält (Jes. 40:29-31). Lot aulsoo nich no! Doo dän Apostel Paulus no, waut sikj sea aunstrenjd, dän Pries to kjrieen (Filip. 3:13-14). Kjeena kaun en diene Städ en disen Rees ranen. Oba Jehova woat die halpen, bat aum Enj to komen. Hee kaun die halpen, diene Veauntwuatungen to droagen un de onneedje Lausten auftolajen (Psa. 68:20). Wäajen Jehova die biesteit, woascht du en dän Rees fa daut Läwen kjennen uthoolen un jewennen!