1. Wuarom jleichst du soone Menschen, waut jeduldich sent?

 WIE aula jleichen soone Menschen, waut jeduldich sent. Wuarom? Wie räakjnen daut väl, daut doa wäa no waut luaren kaun, onen fuaz doll to woaren. Wie räakjnen daut väl, daut aundre jeduldich bliewen, wan wie Fäla moaken. Un wie sent uk onsen Bibelliera dankboa, daut dee jeduldich wia, wan ons daut schwoa wia, waut ut de Schreft to vestonen, auntonämen ooda notokomen. Un daut dolste frei wie ons doaräwa, daut Jehova Gott met ons jeduldich es! (Reem. 2:4).

2. Wanea kaun ons daut schwoa sennen, jeduldich to sennen?

² Wie jleichen daut, wan aundre jeduldich sent, oba veleicht es ons daut schwoa, selfst jeduldich to sennen. Veleicht es ons daut schwoa, ruich to bliewen, wan wie opp eenen Wajch sent, waut gaunz voll Foatieja es un meist nich wiedakomen, un aul too lot sent. Wie kjennen uk sea doll woaren, wan aundre ons baudren. Un eenjemol kaun ons daut schwoa sennen, no Jehova siene vesproakne niee Welt to luaren. Wurscht du jleichen, jeduldja to sennen? En disen Artikjel woa wie seenen, waut doa met en es, jeduldich to sennen, un wuarom daut soo wichtich es. Wie woaren uk doaräwa räden, waut ons halpen kaun, jeduldja to sennen.

3. Waut deit een jeduldja Mensch, wan aundre dän oajren?

³ Hia es veatlei, waut bie jeduldich sennen met en es. Ieeschtens: Een jeduldja Mensch woat nich leicht doll. Hee prooft, ruich to bliewen un sikj nich to rajchnen, wan aundre am oajren ooda wan hee unja Stress es. Daut ieeschte mol, wua wie de Wieed “nich leicht doll” enne Schreft finjen, rät daut von Jehova. Un daut sajcht, daut hee “metliedent, voll Jnod, nich leicht doll, un sea leeftolich un truhoatich” es (2. Mo. 34:6).

4. Waut deit een jeduldja Mensch, wan dee luaren mott?

 ⁴ Tweedens: Een jeduldja Mensch kaun ruich luaren. Wan hee lenja no waut wachten mott, aus hee docht, dan prooft hee, nich ojjeduldich ooda doll to woaren (Mat. 18:26-27). Daut jeft veschiedne Omstend, wua wie motten ruich luaren. Biejlikj mott wie wäm jeduldich toohorchen, wan dee rät, un dän nich fuaz mankräden (Hiob 36:2). Un wie motten uk jeduldich sennen, wan wie eenen Bibelschiela halpen, waut ut de Schreft to vestonen ooda eene schlajchte Aunjewanheit tochtoloten.

5. Waut es bie jeduldich sennen noch met en?

⁵ Dreddens: Wäa jeduldich es, moaracht nich fuaz too, onen to äwalajen. Daut stemt, daut jeft Loagen, wua eena haustich waut doonen mott. Oba wan een jeduldja Mensch eene wichtje Oppgow haft, dan deit dee daut nich too bosich, bloos om daut hinja sikj to haben. Dee nemt sikj leewa goot Tiet un plont, waut dee doonen well. Un dan nemt dee sikj de Tiet, waut doa needich es, toom daut doonen.

6. Waut deit een jeduldja Mensch, wan dee Schwierichkjeiten haft?

⁶ Vieedens: Een jeduldja Mensch prooft, de Schwierichkjeiten uttohoolen un nich to jaumarieren. Doa es nuscht met orrajcht, wan eena sikj to eenen Frint utschett. Oba een jeduldja Mensch woat sikj aunstrenjen, wieda uttohoolen un Jehova met Freiden to deenen. En disen Stekj jehieren jeduldich sennen un uthoolen toop (Kol. 1:11). Aus Christen mott wie en aul dise vea Sachen wiesen, daut wie jeduldich sent. Wuarom? Well wie mol seenen.

7. Wuarom es jeduldich sennen soo wichtich no Jakobus 5:7-8 no? (See uk daut Bilt.)

⁷ Wie motten jeduldich sennen, om daut eewje Läwen to kjrieen. Krakjt soo aus  Gott siene Deena von ieeschtemma mott wie jeduldich luaren, daut Gott siene Vespräakjungen erfelt (Heb. 6:11-12). En de Bibel woa wie met eenen Bua, ooda Foarma, vejlikjt (läs Jakobus 5:7-8). Een Foarma strenjt sikj aun to seien un to wesren, oba wiels hee nich krakjt weet, woo un wanea daut waussen woat, mott hee jeduldich luaren un doaropp vetruen, daut et eene Arnt jäwen woat. Krakjt soo es daut uk bie ons – wie motten ons em jeisteljen drock hoolen, wiels wie “weeten nich woon Dach [ons] Har komen woat” (Mat. 24:42). Wie luaren jeduldich un sent ons secha, daut Jehova to de rajchte Tiet aules erfellen woat, waut hee vesproaken haft. Oba wan wie ojjeduldich woaren, dan kunn wie meed woaren un soo bie sacht von de Woarheit aufkomen. Ooda wie kunnen veleicht no Sachen hinjaraun sennen, wua wie denkjen, daut dee ons nu aul Freid jäwen. Oba wan wie jeduldich bliewen, dan woa wie bat aum Enj uthoolen kjennen un jerat woaren (Micha 7:7; Mat. 24:13).

8. Woo halpt ons daut, met aundre delenjd to komen, wan wie jeduldich sent? (Kolossa 3:12-13).

⁸ Jeduldich sennen halpt ons, met aundre delenjd to komen, wiels wie dan goot toohorchen, wan aundre räden (Jak. 1:19). Daut halpt ons uk, met aundre Fräd to hoolen. Wan wie jeduldich sent, woa wie nich fuaz doll un sajen uk nich waut, waut aundre beleidjen kaun, wiels wie Stress haben. Un wie woaren uk nich leicht doll, wan aundre ons beleidjen. Enne Städ ons auftorajchnen, woa wie ons unjarenaunda vedroagen un vejäwen (läs Kolossa 3:12-13).

9. Woo kjenn wie eene goode Entscheidunk trafen, wan wie jeduldich sent? (Spricha 21:5).

⁹ Jeduldich sennen kaun ons halpen, bätre Entscheidungen to trafen. Enne Städ daut wie ons fuaz wua nennjäwen, woa wie ons de Tiet nämen toom waut nosieekjen un seenen, waut daut baste wudd sennen (läs Spricha 21:5). Wan wie biejlikj no Oabeit sieekjen, kunn wie veleicht fuaz de ieeschte Oabeit aunnämen, waut ons aunjeboden woat, mau rajcht wan ons Deenst fa Jehova doarunja lieden kunn. Oba wan wie jeduldich sent, woa wie ons de Tiet nämen toom doaräwa nodenkjen, woo wiet wie wudden foaren motten, woo väl Stund wie wudden schaufen motten un aus onse Famielje daut em jeisteljen wudd kjennen toosaten. Wan wie jeduldich sent, kjenn wie daut utem Stich gonen, eene schlajchte Entscheidunk to moaken.

10. Woo kjenn wie jeduldja woaren un uk bliewen?

¹⁰ Bäd om mea Jedult. De Jedult jehieet to dän heiljen Jeist siene Frucht (Gal. 5:22-23). Wie kjennen Jehova no heiljen Jeist froagen un uk no Help, daut wie kjennen dise Ieejenschoften verendach brinjen. Wan onse Jedult oppe Proow jestalt woat, mott wie fa wieda no heiljen Jeist froagen, daut wie kjennen jeduldich bliewen (Luk. 11:9, 13). Wie kjennen Jehova uk doano froagen, aus hee ons well halpen, aun de Sachen soo nauntokjikjen, aus hee deit. Un wan wie ieescht jebät haben, mott wie ons uk aunstrenjen, jieda Dach jeduldich to sennen. Je mea wie om Jedult bäden un ons aunstrenjen, je ea woa wie opp iernst jeduldje Menschen woaren.

11-12. Woo wees Jehova siene Jedult?

¹¹ Denkj äwa Biespels ut de Schreft no. Enne Schreft finj wie een deel Jeschichten von Menschen, waut jeduldich wieren. Wan wie doaräwa nodenkjen, kjenn wie lieren, woo wie kjennen jeduldich sennen. Oba ea wie ons eenje von dise Biespels unjastonen,  well wie von dänjanjen räden, waut daut baste Biespel en jeduldich sennen es – Jehova.

¹² Em Goaden Eden muak de Soton Jehova eenen schlajchten Nomen un jeef auntovestonen, daut Jehova nich een jerajchta un leeftolja Harscha wia. Enne Städ disen Läajna fuaz to venichten, wees Jehova, daut hee jeduldich wia un sikj unja Kontroll haud. Hee wist, daut doa Tiet vegonen must, om to bewiesen, daut hee de basta Harscha wia. Un en dise Tiet must hee daut uthoolen, daut soo väl Läajes äwa sienen Nomen vebreet worden. Oba Jehova haft uk doawäajen jeduldich jewacht, soo daut noch mea Menschen de Jeläajenheit fa daut eewje Läwen kjrieen (2. Pet. 3:9, 15). Un millionende Menschen haben am kunt kjanen lieren. Soo wan wie doaraun denkjen, woo väl goodet daut haft, daut Jehova jeduldich es, woat ons daut uk leichta sennen to luaren, bat hee daut Enj brinjen woat.

13. Woo wees Jesus, daut hee uk soo jeduldich wia aus sien Voda? (See uk daut Bilt.)

¹³ Jesus deit sienen Voda krakjt no un wees uk oppe Ieed, daut hee jeduldich wia. Secha wia daut nich emma leicht fa am, besonda dan, aus hee met de Schreftjelieede un Farisäa to doonen haud, waut Heichla wieren (Joh. 8:25-27). Krakjt soo aus sien Voda wort Jesus uk nich leicht doll. Hee deed sikj nich rajchnen, aus se äwa am spotten un am proowden doll to moaken (1. Pet. 2:23). Jesus hilt Schwierichkjeiten jeduldich ut, onen sikj to bekloagen. Un doawäajen sajcht de Schreft ons uk: “Kjikjt gaunz jeneiw no dänjanjen, waut sikj daut jefaulen leet, daut Sinda am met hunjsche Räd beleidijden”! (Heb. 12:2-3, NW). Met Jehova siene Help kjenn  wie uk irjent Schwierichkjeiten jeduldich uthoolen.

14. Waut kjenn wie von Abraham siene Jedult lieren? (Hebräa 6:15). (See uk daut Bilt.)

¹⁴ Eenje von ons dochten veleicht, daut daut Enj aul lang trigj komen wudd. Un nu denkj wie veleicht, daut wie daut nich mol mea beläwen woaren. Waut kaun ons halpen, wieda jeduldich to wachten? Well wie ons mol Abraham sien Biespel beseenen. Aus Abraham 75 Joa wia un kjeene Kjinja haud, vespruak Jehova am: “Ekj woa von die een grootet Volkj moaken” (1. Mo. 12:1-4). Sach Abraham daut, woo sikj daut erfeld? Nich aules. Nodäm daut hee äwa dän Eufrat-Riefa jinkj, must hee 25 Joa wachten, bat sien Sän Isaak derch een Wunda jebuaren wort. Un dan noch mol 60 Joa lota kjeemen ieescht siene Grootkjinja Esau un Jakob to Welt (läs Hebräa 6:15). Abraham haft daut nich beläft, daut siene Nokomen een grootet Volkj worden un daut vesproakne Launt orwen. Oba dis trua Maun wia doawäajen een gooda Frint met Jehova (Jak. 2:23). Un wan Abraham ieescht vom Doot oppstonen woat, woat hee sea schaftich sennen to seenen, daut wäajen sienen Gloowen un siene Jedult aule Velkja jesäajent worden! (1. Mo. 22:18). Waut es de Lia? Veleicht woa wie nu jroz nich seenen, woo sikj aules erfelt, waut Jehova vespruak. Oba wan wie jeduldich sent, soo aus Abraham, kjenn wie ons gaunz secha sennen, daut Jehova ons nu aul beloonen woat un noch väl dolla enne vesproakne niee Welt (Mar. 10:29-30).

15. Äwa waut wudd wie kjennen studieren?

¹⁵ Enne Schreft finj wie een deel Biespels  von Menschen, waut jeduldich wieren (Jak. 5:10). Wuarom studia wie dee nich mol een bät deepa? b Biejlikj David wort toom Kjennich von Israel jewält, aus hee noch sea junk wia. Oba hee must Joarenlank luaren, bat hee werkjlich aunfangen kunn to rejieren. Simeon un Hana deenden Jehova tru, wäarent dee no dän vesproaknen Messias luaden (Luk. 2:25, 36-38). Wan du soone Jeschichten studieescht, dan acht mol opp dit: “Waut holp dänjanjen woomäajlich, jeduldich to sennen? Woo kjeem dän daut togood? Woo kaun ekj dän nodoonen?” Die kaun daut veleicht uk halpen, mea äwa soone to lieren, waut nich jeduldich wieren (1. Sam. 13:8-14). Denkj mol äwa dise Froagen no: “Wuarom wia deejanja soo ojjeduldich? Woo schlajcht kjeem daut ut?”

16. Woo kaun ons daut togood komen, jeduldich to sennen?

¹⁶ Denkj doaräwa no, woo die daut kaun togood komen, wan du jeduldich best. Wan wie jeduldich sent, dan sent wie schaftja un uk ruja. Un daut halpt uk, daut wie jesunda sent un ons uk bäta feelen. Wan wie met aundre jeduldich sent, woa wie uk bäta met dee foadich woaren. En onse Vesaumlunk woaren sikj uk aule dolla veeent feelen. Un wan ons wäa prooft doll to moaken, kjenn wie daut väabieejen, daut daut nich schlemma woat, wan wie jeduldich bliewen (Psa. 37:8; Spr. 14:29). Oba daut wichtichste es, daut wie onsen himlischen Voda nodoonen un am noch noda komen, wan wie jeduldich sent.

17. Waut well wie ons aula väanämen to doonen?

¹⁷ Jedult es werkjlich eene scheene Ieejenschoft, waut ons aula togood kjemt! Veleicht es daut nich emma leicht, jeduldich to sennen, oba met Jehova siene Help woa wie doa wieda kjennen aun schaufen. Un wäarent wie jeduldich no de niee Welt luaren, kjenn wie ons gaunz secha sennen, daut Jehova “dee em Uag [helt], dee am ferchten, dee met siene truhoatje Leew räakjnen” (Psa. 33:18). Well wie ons aula faust väanämen, wieda doaraun to schaufen, jeduldich to sennen.