1. Wuarom bewundaden de Babelonia dän Profeet Daniel?

 DE Profeet Daniel wia een junga Maun, aus de Babelonia am met no Babel neemen, waut wiet auf von Jerusalem wia. Wan Daniel uk junk wia, musten de Babelonia am oba bewundren. Dee sagen, woo am leet, un daut hee een jesunda, schmocka Jung wia un von eene aunjeseene Famielje aufstaumd (1. Sam. 16:7). Doawäajen deeden de Babelonia am utlieren toom em Paulaust deenen (Dan. 1:3-4, 6).

2. Woo docht Jehova äwa Daniel? (Hesekiel 14:14).

² Jehova leewd Daniel nich bloos, wiels am schmock sach ooda wiels hee väl Väarajchten em Paulaust haud, oba wiels hee jewäsen haud, waut fa een Mensch hee wia. Daniel wia veleicht rom 20 Joa, aus Jehova säd, daut hee krakjt soo jerajcht wia aus Noah un Hiob, waut am fa väle Joaren tru jedeent hauden (1. Mo. 5:32; 6:9-10; Hiob 42:16-17; läs Hesekiel 14:14). Daniel haud een langet un intressauntet Läwen, un Jehova wees am emma, daut hee am leewd (Dan. 10:11, 19).

3. Waut woa wie en disen Artikjel seenen?

³ En disen Artikjel woa wie von twee Ieejenschoften räden, waut Daniel haud, un wuawäajen Jehova am sea jleicht. Ieeschtens woa wie doaräwa räden, woo Daniel jieda Ieejenschoft bewees, un dan woa wie seenen, waut am holp, dee to bewiesen. Tolatst woa wie doavon räden, woo wie am nodoonen kjennen. Dis Artikjel es besonda fa junge Menschen jeschräwen, oba wie aula kjennen waut von Daniel sien Biespel lieren.

4. Woo wees Daniel, daut hee äwanäment wia? Jeff een Biespel.

⁴ Menschen, waut äwanäment sent, haben veleicht uk eenjemol Angst, oba dee hieren doawäajen nich opp, daut rajchte  to doonen. Daniel wia een junga äwanämenda Maun. See wie mol, woo hee opp twee Sauz wees, daut hee äwanäment wia. Daut ieeschte mol wia daut ojjefäa twee Joa nodäm, aus de Babelonia Jerusalem venicht hauden. De Kjennich Nebukadnezar haud eenen Droom von een grootet Stauntbilt. Dis Droom gruld am sea. Hee wull aule weise Mana dootmoaken, wua uk Daniel met en wia, wan dee am nich wudden kjennen sajen, waut am jedreemt haud un waut dee bedied (Dan. 2:3-5). Daniel must sea bosich waut doonen, wiels wan nich, wudden väle stoawen motten. Dan “jinkj Daniel direkjt nom Kjennich nenn, un kunn am beräden, daut hee wudd Tiet jäwen, soo daut Daniel am dän Droom utlajen kunn” (Dan. 2:16). Daut bewees, daut Daniel äwanäment wia un Gloowen haud. Doa es noanich jeschräwen, daut Daniel aul ea mol Dreem utjelajcht haud. Hee fruach siene Poatna – Schadrach, Meschach un Abed-Nego b – aus dee kunnen to “däm Gott em Himmel bäden fa Jnod, daut hee daut Jeheemnis, woont de Kjennich wull opjedakjt haben, am wudd wiesen kjennen” (Dan. 2:18). Jehova beauntwuad dee äare Jebäda, un met siene Help kunn Daniel Nebukadnezar sienen Droom utlajen. Doaderch worden Daniel un uk de aundre äare Läwes veschoont.

5. En waut vonne Loag must Daniel noch äwanäment sennen?

⁵ Een Stoot lota aus Daniel dän Droom von daut groote Bilt utjelajcht haud, must hee noch een mol wiesen, daut hee äwanäment wia. Nebukadnezar haud wada eenen Droom, waut am sea gruld. Dis Droom haundeld sikj von eenen grooten Boom. Daniel wia äwanäment un säd dän Kjennich daut, waut dee bedied. Hee säd, daut de Kjennich wudd onkluak woaren un fa eene jewesse Tiet nich wudd rejieren kjennen (Dan. 4:22). De Kjennich wudd leicht haben kunt sajen, daut dise Norecht jäajen siene Rejierunk wia un Daniel dootmoaken. Oba Daniel wia äwanäment un säd am daut doawäajen.

6. Waut haft Daniel woomäajlich jeholpen, äwanäment to sennen?

⁶ Waut haft Daniel woomäajlich jeholpen, emma äwanäment to sennen? Wie  sent ons secha, daut Daniel siene Elren een goodet Biespel wieren fa am, aus hee noch junk wia. Dee jehorchten de Aunwiesungen, waut Jehova de Israeliten jeef, un dee lieeden äare Kjinja uk Gott siene Jesazen (5. Mo. 6:6-9). Doawäajen wist Daniel nich bloos de wichtichste Jesazen, soo aus de Tieen Jebooten, oba uk de Eenselheiten, biejlikj waut de Israeliten äten sullen un waut nich (3. Mo. 11:4-8; Dan. 1:8, 11-13). c Daniel wist uk de Jeschicht von Gott siene Deena un waut met dee passieed, wan dee nich no Jehova siene Jebooten horchten (Dan. 9:10-11). Aul dit, waut Daniel beläft haud, haft am de Sechaheit jejäft, daut Jehova un siene stoakje Enjel am unjastetten deeden (Dan. 2:19-24; 10:12, 18-19).

7. Waut holp Daniel noch, äwanäment to sennen? (See uk daut Bilt.)

⁷ Daniel studieed daut, waut Gott siene Profeeten oppjeschräwen hauden, wua uk de Profezeiunk von Jeremia met en wia. Doaderch wort Daniel en, daut de Jefangenschoft von de Juden en Babel meist to Enj wia (Dan. 9:2). To seenen, daut de Profezeiungen sikj krakjt erfelden, haft Daniel secha Moot jejäft, opp Jehova to vetruen. Un deejanje, waut faust opp Gott vetruen, kjennen sea äwanäment sennen (see uk Reema 8:31-32, 37-39). Daut wichtichste wia, daut Daniel foaken to sienen himlischen Voda bäden deed (Dan. 6:11). Hee bekjand siene Sinden un säd Jehova krakjt, woo hee sikj feeld. Un Daniel fruach uk no Help (Dan. 9:4-5, 19). Hee wia krakjt soon Mensch aus wie, un wia uk nich äwanäment jebuaren. Oba hee kjrieech dise Ieejenschoft doaderch, daut hee studieed, bäd un opp Jehova vetrud.

8. Woo kjenn wie äwanäment woaren?

⁸ Waut mott wie doonen, daut wie kjennen äwanäment woaren? Veleicht sent onse Elren äwanäment un dee sajen, daut wie daut uk sellen. Oba doavon woa wie nich äwanäment woaren. Äwanäment woaren es soo, aus sikj waut nieet lieren. Wan wie waut lieren wellen, dan woa wie onsen Liera goot tookjikjen un am dan nodoonen. Un krakjt soo es daut uk, wan wie wellen äwanäment sennen: Wie woaren aundre goot tookjikjen un dee proowen notodoonen. Waut hab wie von Daniel jelieet? Wie wellen Gott sien Wuat uk soo goot kjanen, aus hee deed. Wie motten goode Frind sennen met Jehova, doaderch daut wie gaunz op un foaken met am räden. Un wie sellen uk opp Jehova vetruen un ons secha sennen, daut hee ons biesteit. Wan ons Gloowen dan aufjeprooft woat, dan woa wie äwanäment sennen.

9. Wuarom es daut goot, wan wie äwanäment sent?

⁹ Ons kjemt daut opp veschiedne Wäaj togood, wan wie äwanäment sent. See wie mol, waut Ben beläwd. Hee wia en eene School en Dietschlaunt, wua aule aun de Ewoluzion jleewden un dochten, daut daut nich soo es, waut en de Bibel von de Schepfunk jeschräwen es. Eenen Dach haud Ben de Jeläajenheit, väaren to stonen un de gaunze Klauss daut uttolajen, wuarom hee aun de Schepfunk jleewd. Hee wia äwanäment un säd krakjt, waut hee jleewd. Woo kjeem daut ut? Ben sajcht: “De Liera horcht sea oppmoakjsom too un deed sikj dän Artikjel aufdachen, waut ekj brukt toom daut utlajen, un jeef aule  Schoolkjinja eent doavon.” Waut deeden Ben siene Schoolpoatna? Hee sajcht wieda: “Väle von dee horchten no mie un säden, daut see sikj doaräwa freiden.” Soo aus Ben siene Jeschicht wiest, woaren aundre ons foaken respakjten, wan wie äwanäment sent. Dee kjennen doaderch mau rajcht aunfangen, Jehova kjanen to lieren. Doawäajen es daut emma goot, wan wie äwanäment sent.

10. Waut sajcht de Schreft äwa tru sennen?

¹⁰ De Schreft rät foaken doavon, daut Gott “tru” es ooda daut hee siene Frind “truhoatje Leew” wiest. Oba dee sajcht uk, daut Gott siene Deena sikj unjarenaunda sellen tru sennen (2. Sam. 9:6-7). Met de Tiet kaun ons tru sennen stoakja woaren. See wie mol, woo daut bie Daniel wia.

11. Woo wees Daniel, daut hee tru wia, aus hee aul ella wia? (See daut Bilt oppe väaschte Sied.)

¹¹ Daniel wort foaken aufjeprooft, aus hee Jehova wudd tru bliewen ooda nich. Eent von daut schwanste, waut hee beläwd, wia, aus hee aul enne 90 wia. To dee Tiet hauden de Meeda un Persa Babel enjenomen, un Darius wia de Kjennich. Eenje von dän Kjennich siene Deena kunnen Daniel schlajcht lieden un achten Jehova nuscht. Doawäajen dochten dee sikj waut ut toom Daniel dootmoaken. Dee brochten dän Kjennich bat doa, een Jesaz to moaken, waut daut oppe Proow stalen wudd, aus Daniel Gott ooda dän Kjennich tru wia. Daniel brukt bloos fa 30 Doag nich to Jehova bäden. Doamet wudd hee wiesen, daut hee dän Kjennich tru wia, krakjt soo aus de aundre. Oba Daniel wull Jehova tru bliewen, un doawäajen wort hee en eene Leiwheel jeschmäten. Wiels Daniel Jehova tru wia, beloond Jehova am un rad am von de Leiws (Dan. 6:13-16, 21-23). Woo kjenn wie Jehova krakjt soo tru sennen aus Daniel?

12. Waut holp Daniel, Jehova tru to bliewen?

¹² Wan wie eene groote Leew fa Jehova haben, dan woa wie am tru bliewen. Daniel bleef sienen himlischen Voda tru, wäajen hee am sea leewd. Secha docht Daniel äwa Jehova siene Ieejenschoften no un uk doaräwa, woo hee dee wees (Dan. 9:4). Daniel jrebbeld uk doaräwa no, waut Jehova aul aules fa am un sien Volkj jedonen haud,  un wia dankboa doafäa (Dan. 2:20-23; 9:15-16).

13. (a) Woo woaren de junge Menschen aufjeprooft? Jeff een Biespel. (See uk daut Bilt.) (b) Waut kjenn wie sajen, wan doa wäa frajcht, aus Jehova siene Zeijen dee unjastetten, waut een homoseksuellet Läwen fieren? (See daut Video.)

¹³ Krakjt soo aus Daniel läwen de junge Menschen vondoag dän Dach mank Menschen, waut nuscht om Jehova ooda siene Jesazen romjäwen. Dise Menschen kjennen jeweenlich soone schlajcht lieden, waut doa sajen, daut see Gott leewen. Eenje proowen, dee mau rajcht unja Druck to saten, om daut dee Jehova ontru woaren. Räd wie mol doavon, waut een junga Maun beläwd, waut Graeme heet un en Australien wont. Hee beläwd waut sea schwoaret, aus hee no de Huachschool jinkj. De Schoolliera fruach de Klauss, waut see wudden doonen, wan een Frint to an säd, daut dee een homoseksuellet Läwen fieed. De Liera säd, daut aul dee, waut soonen Frint unjastetten wudden, no eene Kaunt gonen sullen un de aundre no de aundre Kaunt. Graeme sajcht: “Aule en de Klauss jinjen no dee Kaunt, wua se dän Frint unjastetten wudden; bloos ekj un een aundra Brooda nich.” Waut nodäm passieed, stald daut werkjlich oppe Proow, aus Graeme wudd Jehova tru bliewen. Hee sajcht: “Fa meist eene Stund deeden onse Schoolpoatna un soogoa de Liera ons vespotten un dommsajen. Ekj proowd, ruich to bliewen un soo goot aus mäajlich fa mienen Gloowen entostonen, oba dee horchten nich no een Wuat, waut ekj säd.” Waut deed dit aun Graeme? Hee sajcht: “Ekj jleicht daut nich, daut dee äwa mie spotten, oba ekj sie schaftich, daut ekj Jehova tru bleef un fa mienen Gloowen enstunt.” d

14. Waut kaun ons halpen, Jehova gaunz tru to bliewen?

¹⁴ Krakjt soo aus Daniel kjenn wie Jehova gaunz tru bliewen, wan wie eene groote Leew haben fa am. Wie kjennen soone Leew kjrieen, wan wie mea äwa Jehova siene Ieejenschoften lieren. Wie kjennen ons biejlikj doa nennloten, waut Jehova aules jemoakt haft (Reem. 1:20). Wan du Jehova dolla leewen un respakjten west, dan kaust du dän korten Artikjel läsen bie “Wort daut jemoakt?” ooda de Videos kjikjen. Du kaust uk de Hefta Das Leben: Reiner Zufall? un Der Ursprung des Lebens: Fünf Fragen kritisch beleuchtet studieren. See wie mol, waut Ester, eene junge Sesta von Dänemark, äwa dise Hefta sajcht: “Woo de Sachen doabennen utjelajcht woaren, es werkjlich scheen. Dise Hefta sajen die nich, waut du jleewen saust, oba dee sajen, woo daut es, un loten die de Entscheidunk moaken.” Ben, von dän wie ea aul räden, sajcht: “Dise Hefta haben mienen Gloowen werkjlich jestoakjt. Dee beweesen mie kloa, daut Gott daut Läwen jemoakt haft.” Nodäm du dise Hefta studieet hast, woascht du die secha sennen, wan de Bibel sajcht: “Du best daut wieet, oo Har, Harlichkjeit un Iea un Krauft to nämen, wiels du aules jemoakt hast” (Opb. 4:11). e

15. Waut kaun die noch halpen, enj met Jehova vebungen to sennen?

¹⁵ Jesus sien Läwen goot to studieren, kaun die halpen, eene groote Leew fa Jehova to haben. Eene junge Sesta, waut Samira heet un en Dietschlaunt wont, haft krakjt dit jedonen. See sajcht: “Derch Jesus kunn ekj Jehova bäta kjanen lieren.”  Aus see noch kjlien wia, kunn Samira daut nich vestonen, daut Jehova Jefeelen haud. Oba see kunn daut vestonen, woo Jesus wia. See sajcht: “Ekj jleicht daut, daut Jesus leeftolich wia un de Kjinja väl räakjend.” Je mea see äwa Jesus lieed, je dolla feeld see sikj met Jehova vebungen. Wuarom? See sajcht: “Soo bie sacht kunn ekj vestonen, daut Jesus Jehova krakjt nodeed un daut dee daut äwareen haben. Nu weet ekj, daut Jehova Jesus uk doawäajen no de Ieed schekjt, daut de Menschen Jehova bäta kjanen lieren kunnen” (Joh. 14:9). Wan du die noch dolla west met Jehova vebungen feelen, wuarom wurscht du dan nich mol soo väl aus mäajlich von Jesus lieren? Wan du daut deist, dan woascht du Jehova emma dolla leewen un die eenich sennen, am emma tru to bliewen.

16. Woo kjemt ons daut togood, wan wie tru sent? (Psalm 18:26; Micha 6:8).

¹⁶ Wan wie aundre tru sent, dan hab wie jeweenlich uk soone Frind, waut ons tru sent (Rut 1:14-17). Un wan wie Jehova tru sent, dan feel wie ons leicht un tofräd. Wuarom? Wiels Jehova vesprakjt, daut hee deejanje tru es, waut am tru sent (läs Psalm 18:26; Micha 6:8, NW). Denkj mol han, dee waut aules jemoakt haft, well met ons enj vebungen sennen! Un wan wie soo enj met Jehova vebungen sent, dan kaun kjeen Trubbel, kjeen Jäajna, nich mol de Doot ons von am uteneenrieten (Dan. 12:13; Luk. 20:37-38; Reem. 8:38-39). Daut es aulsoo sea wichtich, daut wie Daniel nodoonen un Jehova emma tru bliewen!

17-18. Waut kjenn wie noch von Daniel lieren?

¹⁷ En disen Artikjel hab wie ons twee Ieejenschoften unjastonen, waut Daniel haud. Oba doa es noch väl mea, waut wie von am lieren kjennen. Biejlikj leet Jehova Daniel miere Visionen un Dreem haben, un holp am uk, daut hee Profezeiungen utlajen kunn. Väle von dise Profezeiungen haben sikj aul erfelt. Aundre haundlen sikj von Sachen, waut noch komen woaren un waut met jieda Mensch oppe Ieed to doonen haben.

¹⁸ En dän näakjsten Artikjel woa wie ons twee Profezeiungen unjastonen, waut Daniel oppschreef. Dee to vestonen, woat jiedrem eenen halpen, aus junk ooda oolt, nu aul weise Entscheidungen to moaken. Daut woat ons uk halpen, äwanämenda to sennen un ons noch eenja to sennen, Jehova emma tru to bliewen. Dan woa wie reed sennen fa daut, waut boolt komen woat.