34. ARTIKJEL FA DAUT STUDIUM
Von biblische Profezeiungen lieren
“De Weise woaren vestonen” (DAN. 12:10)
LEET 98 De Schreft es von Gott jejäft
WAUT WIE SEENEN WOAREN a
1. Woo denkjst du äwa biblische Profezeiungen studieren?
EEN junga Brooda, waut Ben heet, sajcht: “Ekj jleich daut, Profezeiungen to studieren”. Jeit die daut uk soo? Ooda denkjst du, daut Profezeiungen too schwoa to vestonen sent ooda daut et toom enoolent woaren es, dee to studieren? Veleicht woascht du oba aundasch denkjen, wan du mea doaräwa lieescht, wuarom Jehova dee en sien Wuat oppschriewen leet.
2. Von waut haundelt dis Artikjel sikj?
2 En disen Artikjel jeit daut nich bloos doarom, wuarom wie biblische Profezeiungen studieren sellen, oba uk woo wie daut doonen kjennen. Wie woaren uk kort äwa twee Profezeiungen von daut Buak Daniel räden, un wie woaren seenen, woo ons daut nu aul togood kjemt, dee to vestonen.
WUAROM SELL WIE PROFEZEIUNGEN STUDIEREN?
3. Waut mott wie doonen, om biblische Profezeiungen to vestonen?
3 Wan wie biblische Profezeiungen vestonen wellen, dan mott wie no Help froagen. See wie mol een Biespel. Denkj mol han, du foascht opp eene Städ, waut du nich kjanst. Oba du hast eenen Frint met, waut met dise Omjäajent goot bekaunt es. Hee weet krakjt, wua du best un wua jieda Wajch hanjeit. Gaunz secha best du schaftich, daut dien Frint reed wia, met die mettokomen. Krakjt soo weet Jehova, en waut vonne Tiet wie läwen un waut noch ver ons es. Om Profezeiungen to vestonen, mott wie aulsoo deemootich sennen un Jehova no Help froagen (Dan. 2:28; 2. Pet. 1:19-20).
De Profezeiungen studieren kaun ons halpen, ons reedtomoaken fa daut, waut noch kjemt (See Varsch 4)
4. Wuarom leet Jehova en sien Wuat Profezeiungen oppschriewen? (Jeremia 29:11).
4 Krakjt soo aus aule goode Elren well Jehova, daut siene Kjinja eene scheene Hopninj haben (läs Jeremia 29:11). Oba waut Elren nich doonen kjennen es, verutsajen, waut noch komen woat; oba Jehova kaun daut gaunz krakjt. Doawäajen haft hee en sien Wuat loten Profezeiungen oppschriewen, daut wie weeten kjennen, waut vonne wichtje Sachen lota komen woaren (Jes. 46:10). De Profezeiungen sent werkjlich een Jeschenkj von onsen himlischen Voda. Oba woo kjenn wie ons secha sennen, daut et uk krakjt soo romkomen woat, aus enne Bibel verutjesajcht woat?
5. Waut kaun een junga Mensch von Max lieren?
5 Enne School sent onse junge Menschen foaken met soone toop, waut weinich ooda nuscht om de Bibel romjäwen. Daut, waut dee sajen un doonen, kaun onse junge Menschen bat doa brinjen, daut dee doaraun twiewlen, waut see jleewen. See wie mol, woo eenen Brooda daut jinkj, waut Max heet. Hee sajcht: “Aus ekj en miene Schooljoaren wia, funk ekj aun to twiewlen, aus miene Elren mie daut rajchte lieeden un aus de Bibel werkjlich von Gott enjejäft wia.” Waut deeden siene Elren dan? Hee sajcht: “Ekj weet, daut dee besorcht wieren, oba dee bleewen doawäajen ruich.” Max siene Elren brukten de Bibel, om siene Froagen to beauntwuaten. Max deed selfst uk waut doatoo. Hee sajcht: “Ekj studieed selfst waut Profezeiungen un vetald met aundre junge Menschen von de Vesaumlunk doaräwa, waut ekj jelieet haud.” Woo kjeem daut ut? Max sajcht: “Nodäm wia ekj mie gaunz secha, daut de Bibel von Gott enjejäft wia!”
6. Waut motst du doonen, wan du Twiewel hast, un wuarom?
6 Wan du aunfangst to twiewlen, aus de Bibel de Woarheit sajcht, soo aus Max deed, dan feel die nich schuldich. Oba du motst waut doamet doonen. Twiewel es soo aus Rosta. Wan du doa nich fuaz waut met deist, dan kaun waut sea wieetvollet tweigonen. Daut du kaust aulen Twiewel oppem kloaren brinjen, kaust du mol äwa dit nojreblen: “Jleew ekj daut, waut de Bibel äwa daut sajcht, waut noch komen woat?” Wan du die nich secha best, dan kaust du soone Profezeiungen studieren, waut sikj aul erfelt haben. Woo kaust du daut doonen?
WOO WIE KJENNEN BIBLISCHE PROFEZEIUNGEN STUDIEREN
Wan wie de Profezeiungen studieren, mott wie daut utem rajchten Senn doonen, deemootich sennen un uk nosieekjen. Dan woa wie soo opp Jehova vetruen kjennen aus Daniel (See Varsch 7)
7. Waut holp Daniel, de Profezeiungen to studieren? (Daniel 12:10).
7 Daniel es een goodet Biespel doarenn, woo wie de Profezeiungen studieren kjennen. Hee deed daut utem rajchten Senn, wiels hee wull de Woarheit kjanen lieren. Daniel wia uk deemootich. Hee wist, daut Jehova am halpen wudd, dee to vestonen, wan hee wudd dicht bie am bliewen un am jehorchen (Dan. 2:27-28; läs Daniel 12:10). Hee bewees, daut hee deemootich wia, wiels hee Jehova no Help fruach (Dan. 2:18). Daniel deed sikj uk waut nosieekjen. Hee studieed goot, soo wiet aus hee de Schreften to dee Tiet haud (Jer. 25:11-12; Dan. 9:2). Woo kaust du Daniel nodoonen?
8. Ut waut von Grunt studieren eenje de Profezeiungen, oba waut sell wie doonen?
8 Doo utem rajchten Senn studieren. Studieescht du de Profezeiungen, wiels du werkjlich west de Woarheit kjanen lieren? Wan daut soo es, dan woat Jehova die halpen (Joh. 4:23-24; 14:16-17). Eenje Menschen studieren de Profezeiungen doaropp, daut dee wellen Bewies finjen, daut de Bibel nich von Gott staumt. Dee jleewen, daut wan de Bibel nich von Gott kjemt, dan kjennen dee selfst sajen, waut doa rajcht un orrajcht es, un no daut no läwen. Oba wie wellen dee utem rajchten Senn studieren. Waut vonne Ieejenschoft mott wie haben, wan wie biblische Profezeiungen studieren?
9. Waut vonne Ieejenschoft es needich toom de Profezeiungen vestonen? Laj daut ut.
9 Sie deemootich. Jehova vesprakjt, de Deemootje to halpen (Jak. 4:6). Daut meent, wie motten am no Help froagen toom de biblische Profezeiungen vestonen. Wie motten uk aunerkjanen, daut de Help derch dän truen, weisen Kjnajcht kjemt, waut Jehova enjesat haft, ons to de rajchte Tiet daut jeistelje Äten to jäwen (Luk. 12:42). Un wäajen Jehova een Gott von Ordnunk es, es daut uk dietlich, daut hee bloos eene bestemde Wajch brukt toom ons halpen, de Woarheit ut sien Wuat to vestonen (1. Kor. 14:33; Efs. 4:4-6).
10. Waut kaust du von Esther äare Erfoarunk lieren?
10 Doo nosieekjen. Läs die eene Profezeiunk ut, waut die intressieet, un doo dee daut ieeschte studieren. Daut es krakjt, waut eene Sesta deed, waut Esther heet. See jleicht de Profezeiungen, waut von dän Messias sien Komen räden. See sajcht: “Aus ekj 15 wia, funk ekj aun, mie dän Bewies to unjastonen, daut dise Profezeiungen werkjlich ver Jesus siene Tiet jeschräwen worden.” Waut ar sea holp wia, äwa de Schreftrollen von daut Doodje Mäa to läsen. See sajcht: “Eenje von dee wieren ver Christus siene Tiet oppjeschräwen. Soo de Profezeiungen, waut doabennen stonen, musten von Gott komen.” Esther sajcht noch: “Ekj must eenjet ieremol läsen, bat ekj daut ieescht kunn vestonen.” Oba see es schaftich, daut see daut deed, wiels daut loond sikj. Nodäm daut see miere Profezeiungen studieet haud, sajcht see: “Ekj kunn daut selfst kloa seenen, daut de Bibel de Woarheit sajcht!”
11. Woo kjemt ons daut togood, ons doaräwa secha to sennen, daut de Schreft de Woarheit sajcht?
11 Wan wie lieren, woo eenje Profezeiungen von Gott sien Wuat sikj aul erfelt haben, woa wie ons gaunz eenich sennen, Jehova tru to bliewen un siene Aunwiesungen notokomen. De biblische Profezeiungen halpen ons uk, onse Hopninj to bewoaren, krakjt endoont waut fa schwoaret wie nu beläwen. Well wie nu mol von twee Profezeiungen räden, waut Daniel oppschreef, un waut sikj nu erfellen. Dee to vestonen kaun ons halpen, goode Entscheidungen to moaken.
WAUT HABEN DE FEET VON IESA UN LEEM MET DIE TO DOONEN?
12. Waut stalen de Feet von “Iesa un jebrenda Leem” väa? (Daniel 2:41-43).
12 Läs Daniel 2:41-43. En dän Droom, waut Daniel dän Kjennich Nebukadnezar utläd, wieren de Feet von daut Stauntbilt von “Iesa un jebrenda Leem”. Wan wie dise Profezeiunk met aundre Profezeiungen en daut Buak Daniel un Openboarunk vejlikjen, kjenn wie seenen, daut de Feet de Weltmacht Enjlaunt un Stäts väastalen, waut nu de stoakjste Rejierungen sent. Daniel säd, daut “dit Rikj toom Deel stoakj, un toom Deel broklich sennen” wudd. Wuarom wudd daut broklich sennen? Wiels äare Menschen wudden sikj “nuscht bäta eenjen aus Iesa un Leem sikj eenjen”. b
13. Waut weet wie, wiels wie dise Profezeiunk vestonen kjennen?
13 Von daut, waut Daniel äwa daut Stauntbilt säd, un besonda von de Feet, kjenn wie väl wichtjet lieren. Ieeschtens, daut Enjlaunt un Stäts äare Macht opp veschiedne Wäaj jewäsen haben. Biejlikj wieren Enjlaunt un Stäts mank dee Lenda, waut dän Ieeschten un dän Tweeden Weltkjrich jewonnen. Oba äare Macht es schwaka jeworden, wiels de Menschen doa unjarenaunda feiten un sikj jäajen de Rejierunk stalen. Tweedens, daut woat de latste Weltmacht sennen, waut rejieren woat, ea Gott sien Rikj met aule menschelje Rejierungen een Enj moaken woat. Daut woat nich eene fresche Weltmacht jäwen, wan aundre Lenda uk jäajen dee komen. Wie weeten daut, wiels “de Steen”, waut Gott sien Kjennichrikj väastalt, jäajen de Feet däwren woat, waut de Weltmacht Enjlaunt un Stäts väastalt (Dan. 2:34-35, 44-45).
14. Woo kaun ons daut halpen, weise Entscheidungen to moaken, Daniel siene Profezeiunk to vestonen?
14 Best du die secha, daut Daniel siene Profezeiunk von de Feet, waut von Iesa un jebrenden Leem jemoakt sent, werkjlich soo es? Wan jo, dan woat daut waut aun die doonen. Du woascht nich no Jelt ooda no tietelje Sachen hinjaraun sennen, wiels du weetst, daut dise Welt boolt woat venicht woaren (Luk. 12:16-21; 1. Joh. 2:15-17). Dan woascht du uk seenen, woo wichtich daut es, to prädjen un Jinja to moaken (Mat. 6:33; 28:18-20). Nu, daut wie dise Profezeiunk studieet haben, äwalaj mol: “Es daut aun miene Entscheidungen to seenen, daut ekj mie secha sie, daut Gott sien Kjennichrikj met aule Rejierungen een Enj moaken woat?”
WAUT HAFT DE KJENNICH VOM NUADEN UN DE KJENNICH VOM SIEDEN MET DIE TO DOONEN?
15. Wäa es vondoag dän Dach “de Kjennich vom Nuaden” un “de Kjennich vom Sieden”? (Daniel 11:40).
15 Läs Daniel 11:40. En Daniel, Kapitel 11 rät daut von twee Kjennichs, ooda Rejierungen, waut eena jäajen dän aundren strieden toom de Macht äwa de Welt haben. Wan wie dise Profezeiunk met aundre ut de Schreft vejlikjen, kjenn wie rutfinjen, wäa “de Kjennich vom Nuaden” es: Russlaunt un dän siene Poatna. Un “de Kjennich vom Sieden” es: de Weltmacht Enjlaunt un Stäts. c
Wie woaren onsen Gloowen stoakjen un ons weinja Sorjen moaken, wan wie daut enseenen, daut de Jäajenstaunt von dän “Kjennich vom Nuaden” un dän “Kjennich vom Sieden” biblische Profezeiungen erfelt (See Varsch 16-18)
16. Waut fa Schwierichkjeiten beläwen dee, waut unja de Macht von dän “Kjennich vom Nuaden” läwen?
16 Gott siene Deena, waut unja de Rejierunk von dän “Kjennich vom Nuaden” läwen, woaren von disen Kjennich sea vefolcht. Eenje worden vekjielt un kjeemen wäajen äaren Gloowen em Jefenkjnis. Oba onse Breeda loten sikj nich engrulen von daut, waut dis “Kjennich vom Nuaden” deit. Enne Städ daut woat äa Gloowen stoakja. Wuarom? Wiels dee weeten, daut de Vefoljunk von Gott sien Volkj krakjt daut erfelt, waut Daniel verutsäd (Dan. 11:41). d Daut to weeten, kaun ons uk halpen, onse Hopninj stoakj to hoolen un Jehova fa wieda tru to bliewen.
17. Waut fa Schwierichkjeiten beläwen Gott siene Deena, waut unja de Macht von dän “Kjennich vom Sieden” läwen?
17 De “Kjennich vom Sieden” haft Jehova sien Volkj uk aul foaken vefolcht. Wäajen Jehova siene Zeijen sikj nich en Rejierungssachen nennmischen, worden en de Tiet von dän Ieeschten un dän Tweeden Weltkjrich väle em Jefenkjnis jestopt. Un eenje Kjinja wort veboden, no de School to gonen. De Breeda, waut unja de Rejierunk von disen Kjennich läwen, worden uk nu en de latste Joaren opp veschiedne Wäaj aufjeprooft. Biejlikj en dee Tiet, wan se eene niee Rejierunk wälen, kunn een Christ veleicht jewesse, waut sikj aunjäwen, dolla jleichen aus aundre. Wan dee uk nich wälen jeit, stalt dee sikj oba veleicht en siene Jedanken un en sien Hoat opp eene Sied. Oba daut es sea wichtich, daut wie ons en polietische Sachen opp kjeene Sied stalen – nich mol en onse Jedanken ooda em Hoat! (Joh. 15:18-19; 18:36).
18. Woo denkj wie äwa dän Striet tweschen dise beid Kjennichs?
18 Dee, waut nich aun biblische Profezeiungen jleewen, moaken sikj veleicht groote Sorjen, wan dee seenen, daut “de Kjennich vom Nuaden” un “de Kjennich vom Sieden” soo sea strieden (Dan. 11:40). Beid Kjennichs haben jenuach groote Bommen, daut dee wudden kjennen aule Menschen oppe Ieed venichten. Oba wie weeten, daut Jehova daut opp kjeene Wajch tooloten woat (Jes. 45:18). Soo, enne Städ ons daut doaräwa schwoa to moaken, stoakjt ons daut em Gloowen, daut “de Kjennich vom Nuaden” un “de Kjennich vom Sieden” sikj soo jäajenäwa sent. Daut wiest ons gaunz kloa, daut daut Enj von dise Welt dicht bie es.
ACHT WIEDA OPP PROFEZEIUNGEN
19. Waut mott wie enseenen, wan daut om Profezeiungen jeit?
19 Wie weeten nich, woo eenje biblische Profezeiungen sikj erfellen woaren. Nich mol de Profeet Daniel kunn aules vestonen, waut hee oppschreef (Dan. 12:8-9). Daut meent oba nich, daut eene Profezeiunk sikj nich erfellen woat, bloos wiels wie daut nich krakjt weeten, woo sikj daut romnämen woat. Wie kjennen ons doaropp veloten, daut Jehova ons to de rajchte Tiet aules woat weeten loten, waut doa needich es, krakjt soo aus hee daut ieeschtemma deed (Amos 3:7).
20. Waut fa besondre Profezeiungen woaren sikj boolt erfellen, un waut sell wie fa wieda doonen?
20 Boolt woat doa jesajcht woaren: “Aules es ruich un secha” (1. Tess. 5:3). De Rejierungen woaren de faulsche Gloowes aunjriepen un utroden (Opb. 17:16-17). Dan woaren dee Gott sien Volkj aunjriepen (Hes. 38:18-19). Aul dit woat to dän Kjrich von Harmagedon fieren (Opb. 16:14, 16). Gaunz secha woat dit boolt passieren. Oba bat dan well wie onsen leeftoljen himlischen Voda wieda dankboa sennen un daut doaderch wiesen, daut wie opp de biblische Profezeiungen achten un aundre halpen, daut krakjt soo to doonen.
LEET 95 Daut Licht woat emma dacha
a Endoont woo schlajcht daut enne Welt woat, wie kjennen ons secha sennen, daut et boolt woat bäta woaren, wan wie de biblische Profezeiungen studieren. Dis Artikjel woat ons krakjt wiesen, wuarom wie de Profezeiungen studieren sellen. Wie woaren ons uk twee Profezeiungen unjastonen, waut Daniel oppschreef, un wie woaren seenen, woo ons daut togood kjemt, dee to vestonen.
