En dän Artikjel lieed wie, daut doa rajcht jesajcht eene eensje Sach es, waut aule Menschen un Enjel betraft, un daut es: Daut Jehova sien groota Nomen heilich jehoolen woat. Un doatoo jehieren uk dise twee Froagen: Es Jehova sien Wajch to harschen werkjlich de basta? Un woaren de Menschen Gott tru bliewen?

Wuarom räd wie nu dolla doavon, daut et daut wichtichste es, daut Jehova sien Nomen jeheilicht woat? Well wie doatoo mol dreeatlei seenen.

Ieeschtens, de Soton muak Jehova eenen schlajchten Nomen em Goaden Eden. Aus de Soton met Eva räd, jeef dee hinjalestich auntovestonen, daut Jehova jiezich wia un daut de Aunwiesungen, waut hee Adam un Eva jeef, ojjerajcht wieren. Un dan muak dee Gott to eenen Läajna, wiels dee krakjt daut Jäajendeel säd, aus waut Jehova ea jesajcht haud. Soo muak dee Jehova eenen schlajchten Nomen, un wort de beesa Fient, waut “Läajna” bediet (Joh. 8:44). Wäajen Eva dän Soton siene Läajes jleewd, wort see Gott ojjehuarsom un wees, daut see Gott nich aus äaren Harscha wull (1. Mo. 3:1-6). Bat vondoag dän Dach vespreet de Soton Läajes äwa Jehova sienen Nomen un woo hee es. Soone, waut dise Läajes jleewen, dreien sikj leichta von Jehova wajch. Daut jäajen Jehova sienen heiljen Nomen jelastat woat, es fa Jehova siene Deena daut gaunz schlemste. Daut es de jratste Uasoak, wuarom daut soo väl lieden un schlajchtet opp dise Welt jeft.

Tweedens, Jehova woat sienen Nomen reinjen un von aule Läajes friemoaken. Daut es fa Jehova daut gaunz wichtichste un daut kjemt de gaunze Schepfunk un besonda de Menschen un de Enjel togood. Hee selfst säd: “Ekj woa wada bewiesen daut mien heilja Nomen … heilich es” (Hes. 36:23). Un Jesus muak daut dietlich, daut daut fa Jehova siene true Deena uk sull daut wichtichste sennen, wan dee bäden. Hee säd: “Dien Nomen saul heilich jehoolen woaren” (Mat. 6:9). De Bibel moakt daut emma wada dietlich, woo wichtich daut es, Jehova sienen Nomen heilich to hoolen. See wie mol een poa Biespels: “Brinjt däm HARN de Iea, waut sienen Nomen traft” (1. Chr. 16:29; Psa. 96:8). “Sinjt lowent sienen Nomen to ieren” (Psa. 66:2). “Ekj woa … eewich dienen Nomen veharlichen” (Psa. 86:12). Eemol aus Jesus en Jerusalem em Tempel wia, säd hee: “Voda, veharlich dienen Nomen!” Opp dise Sauz räd Jehova selfst von utem Himmel un säd: “Ekj hab dän aul veharlicht un woa dän wada veharlichen” (Joh. 12:28). a

Dreddens, Jehova sien Väanämen woat emma met sienen Nomen to doonen haben aulsoo doamet, woo hee aunjeseenen es. Denkj mol han: Waut woat no de latste Proow, aum Enj von Jesus sien dusentjoaschet Rikj, passieren? Woo woaren de Enjel un de Menschen to dee  Tiet äwa Jehova sienen Nomen denkjen? Denkj wie doatoo mol aun dee Sachen, waut doa met en sent: Aus de Menschen Jehova woaren tru bliewen un aus hee oppe rajchte Wajch harschen deit. Äwalaj mol: Woat daut dan noch needich sennen, daut de Menschen bewiesen, daut see tru bliewen kjennen? Nä. Dee woaren dan aul volkomen sennen, un daut aul volstendich bewäsen haben. Dee woaren daut eewje Läwen jekjräajen haben. Woat sikj daut noch een mol utwiesen motten, aus Jehova opp de baste Wajch harschen deit? Nä. Dan woaren aule em Himmel un oppe Ieed veeent sennen un aunerkjanen, daut Jehova de basta Harscha es. Oba waut es dan met Jehova sienen Nomen?

Jehova sien Nomen woat dan jeheilicht sennen un von aule Läajes friejemoakt sennen. Oba dee woat wieda daut wichtichste sennen fa Jehova siene Deena em Himmel un uk oppe Ieed. Wuarom? Wiels dee woaren seenen, daut Jehova wieda butajeweenelje Sachen deit. Denkj mol han: Jesus woat Jehova de gaunze Harschoft trigjjäwen, soo daut Jehova wada “aules en aulem es” (1. Kor. 15:28). No daut woaren aule Menschen sikj to “de Gotteskjinja äare Frieheit un Harlichkjeit” freien (Reem. 8:21). Dan woat sikj daut erfellen, waut Jehova sikj aul lang väajenomen haud un daut es, daut hee em Himmel un oppe Ieed eene groote veeende Famielje haft (Efs. 1:10).

Woo woat Jehova siene groote Famielje em Himmel un oppe Ieed sikj dan feelen? Secha woa wie ons nich mol kjennen trigjhoolen, Jehova sienen grooten Nomen to lowen un to preisen. De Psalmenschriewa David schreef: “Loft dän HARN . . . sien harlicha Nomen saul eewich jeloft woaren” (Psa. 72:18-19). Fa aule Eewichkjeit woa wie emma niee un intressaunte Sachen finjen, Jehova sienen Nomen to lowen.

Wan wie dän Nomen Jehova hieren, dan denkj wie aun aules, woo hee es un besonda aun siene Leew (1. Joh. 4:8). Soo wie woaren doa kjeenmol von vejäten, daut Jehova ons ut Leew muak, daut Leesjelt ut Leew jeef un daut ut Leew wees, daut hee oppe rajchte Wajch harschen deed. Oba wie woaren wieda Jehova siene Leew späaren kjennen un am fa de gaunze Eewichkjeit wellen noda komen un sienen grooten Nomen derch Leeda preisen un lowen (Psa. 73:28).