• “Ekj feeld mie soo, aus wan mien Maun mie emma wada ontru wia.”

• “Ekj feeld mie tonuscht, wieetloos un aus wan mie nich schmock leet.”

• “Ekj kunn met kjeenem doaräwa räden un ekj must gaunz auleen doarunja lieden.”

• “Ekj feeld mie soo, aus wan Jehova nich mol waut om mie romjeef.”

Waut daut hia bowen sajcht, wiest, woo eene Fru sikj feelt, wan äa Maun sikj Pornografie aunkjikjt (daut meent schwiensche Bilda un Videos). Un wan hee daut aul fa Moonaten ooda Joaren plietsch jedonen haft, feelt see sikj veleicht soo, daut see am nich mea vetruen kaun. Eene Fru säd: “Ekj kjand mienen Maun nich mea. Un ekj wundad, aus doa noch aundre Dinj wieren, waut hee fa mie vestuak.”

Dis Artikjel es fa soone Fru jeschräwen, dee äa Maun sikj Pornografie aunkjikjt. a Doa sent biblische Gruntsauzen bennen to finjen, waut ar Troost jäwen un de Sechaheit, daut Jehova ar leeft un ar halpen well, daut see wada kaun mea Fräd haben un sikj Jehova no aun feelen. b

Du kaust dienen Maun nich väasajen, waut dee doonen saul, oba du kaust waut doonen, om daut du mea Fräd hast. Denkj mol äwa dit no.

Doo die nich selfst beschuljen. Eene Fru kaun veleicht denkjen, daut et äare Schult es, daut äa Maun sikj Pornografie aunkjikjt. Alice c docht, daut see nich soo wia, aus äa Maun daut jleicht. See wundad: “Wuarom jleicht mien Maun dolla no aundre Frues to kjikjen, enne Städ no mie?”. Aundre Frues beschuljen sikj selfst fa daut, woo see sikj feelen, un jleewen, daut see äaren Ehestaunt bloos noch schlemma moaken. Danielle sajcht: “Wäajen ekj soone Wutt haud, waut nich mol mea rajcht wia, feeld ekj mie soo aus eene vebettade Fru, waut äaren Ehestaunt tweibruak.”

Wan die daut uk soo jeit, dan hool em Denkj, daut du no Jehova no nich veauntwuatlich best fa daut, waut dien Maun deit. Jakobus 1:14 sajcht: “Een Mensch woat vesocht wan hee von siene ieejne beese Lost metjeräten woat” (Reem. 14:12; Filip.  2:12). Jehova deit die nich beschuljen un räakjent daut väl, daut du am soo tru best (2. Chr. 16:9).

Eene Fru kaun veleicht denkjen, daut äa Maun sikj schwienschet aunkjikjt, wiels see nich soo es, aus hee daut jleicht. Oba daut es nich soo. Forscha haben rutjefungen, daut dee, waut sikj Pornografie aunkjikjen, soon stoakjet Velangen kjrieen, waut kjeene Fru tofrädstalen kaun.

Moak die nich too väl Sorjen. Catherine säd, daut see meist nich aun waut aundret denkjen kunn, aus daut äa Maun sikj schwienschet aunkjikjt. Frances säd: “Wan ekj nich wist, wua mien Maun wia, muak ekj mie groote Sorjen. Ekj muak mie daut dän Dach äwa schwoa doamet.” Aundre Frues sajen, daut see sikj sea schämen, wan see met Breeda un Sestren toop sent, waut om disen Trubbel veleicht omweeten. Un aundre sajen, daut see sikj sea auleen feelen, wiels see denkjen, daut an kjeena vestonen kaun.

Sikj soo to feelen, es gaunz jeweenlich. Oba wan du emma aun dise Sachen denkjst, woat die daut bloos noch schwanda woaren. Enne Städ daut denkj dolla aun dien Veheltnis met Jehova. Daut woat die halpen, ennalich stoakj to woaren (Psa. 62:3; Efs. 6:10).

En de Schreft finj wie biblische Jeschichten von Frues, waut daut schwoa hauden un to Jehova bäden un jetreest worden. Dee to läsen un doaräwa notodenkjen, kaun die uk halpen. Jehova neem dee nich emma dän Trubbel wajch, oba hee jeef an Fräd. Hana biejlikj wia en eene Loag, wua see sikj “sea jeschloagen” feeld. Oba aus see “ver däm HARN bäd”, kjrieech see Fräd, wan see uk noch nich wist, woo sikj daut met äare Loag wudd romnämen (1. Sam. 1:10, 12, 18; 2. Kor. 1:3-4).

Sieekj bie de Eltestasch no Help. Dee kjennen soo sennen aus “Schulinj em Storm, ooda een Dak, wan de Räajen prosselt” (Jes. 32:2). Dee woaren die veleicht uk tooroden, met eene jewesse Sesta to räden, waut opp to vetruen es un waut die biestonen kaun (Spr. 17:17).

Wurscht du dienen Ehemaun veleicht halpen kjennen, von de Jewanheit loostokomen, Pornografie to kjikjen? Veleicht jo. De Bibel wiest, daut “twee sennen, es bäta aus auleen sennen”, wan daut doarom jeit, eenen Trubbel to leesen ooda eenen stoakjen Fient to jewennen (Liera 4:9-12). Forscha haben rutjefungen, daut een Maun  leichta von Pornografie looskomen kaun, wan dee aus Ehelied toopschaufen, un de Fru kaun dan uk leichta wada opp am vetruen.

Secha haft daut uk väl doamet to doonen, aus dien Poatna werkjlich met Pornografie kjikjen opphieren well, un uk reed es, sien Poat to doonen. Haft hee Jehova iernstlich no Krauft jefroacht un bie de Eltestasch no Help jesocht? (2. Kor. 4:7; Jak. 5:14-15). Haft hee aul goot äwalajcht, waut dee doonen kaun, om von Vesieekjungen wajchtobliewen? Paust hee biejlikj bäta opp, woo hee sien Fon un Tablet brukt, un jeit hee soone Loagen utem Stich, wua hee kunn aufjeprooft woaren? (Spr. 27:12). Nemt hee diene Help aun un rät hee to die de Woarheit? Wan jo, dan woascht du dän veleicht halpen kjennen.

Well wie ons doatoo mol een Biespel beseenen: Felicia befried sikj met Ethan, waut bie sea junk aul von Pornografie aufhenjich wia. Wan hee wada dän Wunsch haft, sikj soont to beseenen, dan kaun hee gaunz frie met Felicia doaräwa räden. Ethan sajcht: “Ekj kaun gaunz opprechtich met miene Fru räden. See halpt mie leeftolich, de Vesieekjungen utem Stich to gonen un see frajcht mie pinkjlich, woo mie daut doamet jeit. Un see halpt mie uk, daut ekj nich too väl daut Internet bruck.” Felicia deit daut wee, daut Ethan verheipts soone Wenschen haft. Oba see sajcht: “Wan mie daut uk wee deit un ekj doll woa, halpt am daut oba nich, von daut wajchtobliewen. Wan wie ieescht äwa siene Jefeelen jerät haben, dan es hee uk reed, mie to halpen, met mien schwoaret foadich to woaren.”

Wan beid Poatna toop doaräwa räden, kaun dän Maun daut halpen, sikj von Pornografie wajchtohoolen, un de Fru kaun uk wada een Vetruen opp am kjrieen. Wäajen wan de Maun reed es, gaunz frie to sajen, waut hee denkjt, waut hee deit un wua hee es, dan es je doa uk nuscht plietschet mea.

Jleefst du, daut du dienen Maun halpen kaust? Dan wudd jie kjennen krakjt disen Artikjel toop derchläsen. Hee mott sikj väanämen, opptohieren met schwienschet kjikjen, un die to halpen, daut du wada kaust opp am vetruen. Enne Städ äwa die doll to woaren, wiels du äwa daut räden west, sull hee proowen to vestonen, waut sien Trubbel aun die deit. Un du motst am doarenn unjastetten, met dise Aunjewanheit opptohieren, un am de Jeläajenheit jäwen, die to wiesen, daut du wada kaust opp am vetruen. Jie motten uk beid mea doaräwa lieren, waut Menschen bat doa brinjt, daut dee Pornografie kjikjen un waut dee doonen kjennen, om disen Trubbel to äwakomen. d

 Wan du denkjst, daut jie junt strieden woaren, dan wudd jie veleicht kjennen eenen Eltesten froagen, dän jie vetruen, aus hee doa wudd kjennen met bie sennen, wan jie doaräwa räden. Denkj doaraun, daut wan dien Maun uk doamet opphieet, Pornografie to kjikjen, daut kaun een Stoot dieren, ea du wada opp am vetruen deist. Jeff nich opp! Kjikj doano, woo june Ehe sikj vebätat, wan uk en kjliene Stekjen. Velot die doaropp, daut june Ehe met de Tiet wada woat stoakja woaren, wan jie beid jeduldich bliewen (Liera 7:8; 1. Kor. 13:4).

Waut, wan dien Maun sikj wada Pornografie aunkjikjt? Meent daut, daut am daut nich leet es un daut hee doa kjeenmol woat von looskomen? Nich onbedinjt. Besonda wan hee doavon aufhenjich es, kaun daut sennen, daut hee sien Läwen lank doajäajen kjamfen mott. Wan hee daut uk fa väl Joaren tochjeloten haft, kaun hee oba doch trigjfaulen. Daut am daut nich passieet, woat hee wieda sea oppaussen motten, wan sikj daut uk soo späat, daut hee doavon loosjekomen es (Spr. 28:14, NW; Mat. 5:29; 1. Kor. 10:12). Hee woat sikj motten “jäajen daut beese” stalen. Doa es nich bloos Pornografie met en, oba uk aundre schwiensche Sachen, soo aus sikj selfst tofrädstalen. Un dan mott hee uk doaropp schaufen, en sien “denkjen” niejemoakt to woaren (Psa. 97:10; Efs. 4:23, NW; Reem. 12:9). Es hee reed, aul dit to doonen? Wan hee es, dan kaun hee enne Lenjd gaunz doavon looskomen. e

Oba waut, wan dien Maun doa nich mol well von looskomen? Daut es nich toom wundren, wan du die enteischt, doll un aunjeschmäat feelst. Schmiet diene Sorjen opp Jehova, soo woascht du kjennen ennalichen Fräd haben (1. Pet. 5:7). Komm Jehova emma noda doaderch, daut du bätst, studieescht un doaräwa nodenkjst, waut du lieescht. Un sie die secha, daut hee die uk emma noda komen woat. Soo aus Jesaja 57:15 sajcht, es sien Plauz bie dee, “dee sikj nich mea weeten, un jleewen, daut et nuscht met an meent”. Un Jehova halpt dee uk, daut dee wada kjennen Freid haben. Strenj die sea aun, een christeljet Läwen to fieren. Froag de Eltestasch doano, daut dee die unjastetten. Un jeff nich Hopninj opp, daut dien Maun sikj eenen Dach endren kaun (Reem. 2:4; 2. Pet. 3:9).