1-2. (a) Waut es Sind, un woo kjenn wie gaunz von dee friekomen? (See uk “Wieed utjelajcht”.) (b) Waut woa wie en disen un en de aundre Artikjels von disen Woaktorm seenen? (See uk “Aun de Läsa” en disen Woaktorm.)

 WEST du weeten, woo sea Jehowa Gott die leeft? Woo kaust du daut weeten? Wan du die daut krakjt unjasteist, waut hee jedonen haft toom die von Sind un Doot friemoaken. De Sind a es een schrakjelja Fient, waut du nich auleen jewennen kaust. Wie aula sindjen jieda Dach un doawäajen mott wie stoawen (Reem. 5:12). Oba daut jeft Hopninj: Met Jehowa siene Help woa wie gaunz secha von Sind un Doot friekomen.

² Rom 6,000 Joa haft Jehowa Gott de Menschen aul jeholpen, siene Frind to sennen, wan dee uk Sinda sent. Woosoo? Wäajen hee dee leeft. Hee haft de Menschen von Aunfank aun jeleeft un doawäajen haft hee een deel jedonen, daut wie kjennen siene Frind woaren. Gott weet, daut de Sind toom Doot fieet, oba hee well nich, daut wie stoawen. Hee well, daut wie fa emma läwen (Reem. 6:23). Daut wenscht hee sikj uk fa die. En disen Artikjel well wie äwa dreeatlei räden. (1) Woo muak Jehowa daut mäajlich, daut de sindje Menschen Hopninj hauden? (2) Waut deeden onvolkomne Menschen enne Bibeltiet, om Jehowa to jefaulen? (3) Waut deed Jesus, om ons von Sind un Doot frietomoaken?

 WOO MUAK JEHOWA DAUT MÄAJLICH, DAUT DE SINDJE MENSCHEN HOPNINJ HAUDEN?

3. Wuarom deeden Adam un Eva sindjen?

³ Aus Jehowa de ieeschte Menschen muak, muak hee aules soo, daut dee kunnen schaftich sennen. Hee jeef dee een wundascheenet Tus, dän Ehestaunt un eene feine Oppgow. Dee sullen Kjinja haben un de Ieed voll moaken un met de Tiet de gaunze Ieed soo schmock moaken, aus de Goaden Eden wia. Hee jeef dee bloos een eefachet Jesaz. Un hee säd äant, waut doa passieren wudd, wan see dit Jesaz nich hoolen wudden un sikj mootwellens jäajen am stalen wudden: Dise Sind wudd toom Doot fieren. Un woo jinkj daut wieda? Een beesa Enjel, waut kjeene Leew fa Gott un uk nich fa dee haud, veleid Adam un Eva toom sindjen, un dee jeewen bie. Dee vetruden nich opp daut, waut äa leeftolja Voda jesajcht haud, un sindijden. Un daut neem sikj krakjt soo rom, aus Jehowa jesajcht haud. Von dan aun musten dee met de Foljen von äare Sind foadich woaren. Dee fungen aun, ella to woaren, un schlieslich storwen dee (1. Mo. 1:28-29; 2:8-9, 16-18; 3:1-6, 17-19, 24; 5:5).

4. Wuarom haust Jehowa de Sind, un wuarom halpt hee ons, am noda to komen? (Reema 8:20-21).

⁴ Jehowa leet daut oppschriewen, waut em Goaden Eden passieed, soo daut wie vestonen kjennen, wuarom hee de Sind soo sea haust. De Sind trant ons von onsen Voda un fieet toom Doot (Jes. 59:2). Dauts, wuarom de Soton de Sind jleicht, un doawäajen proowd hee, Adam un Eva toom Sindjen to brinjen, un hee deit daut noch emma met aule Menschen. Aus hee em Goaden Eden de ieeschte Menschen toom Sindjen veleit haud, docht hee secha, daut hee Gott sien Väanämen tonuscht jemoakt haud. Oba hee wist daut nich, woo groot Jehowa siene Leew wia. Gott endad sien Väanämen fa Adam un Eva äare Nokomen nich. Hee leeft de Menschen un socht fuaz no eenen Utwajch (läs Reema 8:20-21). Jehowa wist, daut eenje von Adam un Eva äare Nokomen sikj daut wälen wudden, am to leewen un to jehorchen. Un krakjt fa deejanje haft Jehowa daut mäajlich jemoakt, daut dee am noda komen kjennen un von Sind un Doot friekomen. Woo muak Jehowa daut mäajlich?

5. Wanea jeef Jehowa de Menschen Hopninj? Laj daut ut (1. Mose 3:15).

⁵ Läs 1. Mose 3:15. Soofroo aus Jehowa dän Beesen Fient veuadeeld, jeef hee de Menschen Hopninj. Hee säd fuaz verut, daut doa een “Nokomen” de Menschen raden wudd. Dis Nokomen wudd dän Soton lota gaunz venichten un met aule Trubbels een Enj moaken, waut dee veuasoakt haud (1. Joh. 3:8). Oba ieescht wudd de Soton dän Nokomen vewunden, daut meent, dän ombrinjen. Daut wudd Jehowa sea toosaten. Oba aul dit Lieden wudd sikj loonen, wäajens daut een deel Menschen von Sind un Doot friemoaken wudd.

WAUT DEEDEN ONVOLKOMNE MENSCHEN ENNE BIBELTIET, OM JEHOWA TO JEFAULEN?

6. Waut deeden Abel un Noah un aundre true Mana, om Jehowa noda to komen?

⁶ Met de Tiet wees Jehowa, woo onvolkomne Menschen am noda komen kunnen. De ieeschta Mensch, waut no Adam un Eva äare Sind Gloowen aun Jehowa haud, wia dee äa tweeda Sän, Abel. Wiels hee Jehowa leewd, wull hee am jefaulen un noda komen. Doawäajen opfad Abel waut fa am. Hee wia een Schopshoad, un soo neem hee waut von siene kjliene Schopkjes, schlacht  dee un opfad dee fa Jehowa. Woo docht Jehowa doaräwa? Daut sajcht: “Am jefoll daut Opfa, waut hee jeef” (1. Mo. 4:4). Jehowa jleicht uk aundre Opfa von Menschen, waut am leewden un opp am vetruden, biejlikj Noah (1. Mo. 8:20-21). Doaderch, daut hee dise Opfa aunneem, wees Jehowa, daut sindje Menschen am jefaulen un noda komen kjennen. b

7. Waut lieet ons daut von Jehowa, daut Abraham reed wia, sienen Sän to opfren?

⁷ Abraham haud eenen sea stoakjen Gloowen. Jehowa fruach Abraham, aus hee wudd reed sennen, sienen Sän Isaak aus Opfa to jäwen. Fa Abraham wia daut daut schwanste, waut et fa am jeef. Un doch wia hee reed, daut to doonen. Oba jroz ea hee sienen Sän opfad, hilt Jehowa am doavon auf. Dit Biespel wees, waut Jehowa lota fa ons doonen wudd: Hee wudd reed sennen, sienen leewen Sän aus Opfa to jäwen. Soo sea leewd Jehowa de Menschen (1. Mo. 22:1-18).

8. Waut wull Jehowa dietlich moaken met de Opfa, waut daut Jesaz velangd? (3. Mose 4:27-29; 17:11).

⁸ Aus Jehowa de Israeliten daut Jesaz jeef, velangd hee emma wada Tierenopfa, daut dee äare Sinden kunnen vejäft woaren (läs 3. Mose 4:27-29; 17:11). Waut wull Jehowa doamet dietlich moaken? Daut hee fa een jratret Opfa sorjen wudd – eent, waut de Menschen äare Sinden gaunz wajchnämen wudd. Hee leet siene Profeeten oppschriewen, daut de vesproakna Nokomen, waut een besondra Sän von Gott wia, wudd lieden un stoawen motten. Dee wudd soo aus een Schop sennen, waut jeopfat woat (Jes. 53:1-12). Denkj mol han: Jehowa wudd sienen leewen Sän aus Opfa jäwen toom de Menschen von Sind un Doot raden – uk die!

WAUT DEED JESUS, OM ONS TO RADEN?

9. Waut säd Johanes de Deepa äwa Jesus? (Hebräa 9:22; 10:1-4, 12).

⁹ En daut Joa 29 säd Johanes de Deepa äwa Jesus von Nazaret: “Kjikjt, dits Gott sien Laum, dee de Welt äare Sinden wajchnemt” (Joh. 1:29). Derch dise Wieed wort dietlich, daut Jesus de besondra Nokomen wia, waut sien Läwen opfren wudd, soo aus Gott daut verutjesajcht haud. Dit jeef de Menschen mea Hopninj aus jeemols ea, wiels dis Nokomen dee gaunz von Sind un Doot friemoaken wudd (läs Hebräa 9:22; 10:1-4, 12).

10. Woo wees Jesus, daut hee besonda om de Sinda bekjemmat wia?

¹⁰ Jesus wia besonda om soone Menschen bekjemmat, waut sikj wäajen äare Sinden schlajcht feelden. Hee wist, daut de Sind en Werkjlichkjeit de jratste Uasoak wia, daut de Menschen lieden musten. Doawäajen deed hee besonda soone halpen, waut aus Sinda bekaunt wieren. Hee vetald dit Jlikjnis: “Jesunde Menschen fält daut nich aun eenen Dokta, oba de Kranke jo.” Un dan säd hee noch: “Wiels ekj kjeem toom de Sinda oppfodren, een Leetsennen to haben, un nich de jerajchte Menschen” (Mat. 9:12-13). Jesus kjeem dit selfst no, waut hee säd. Hee wees daut doaderch, daut hee leeftolich met de Fru räd, waut am de Feet met äare Tronen wosch, un ar äare Sinden vejeef (Luk. 7:37-50). Hee lieed uk de samaritische Fru biem Borm wichtje Sachen, wan hee uk wist, daut see en Sinden läwd (Joh. 4:7, 17-19, 25-26). Gott jeef Jesus mau rajcht de Krauft, de Menschen von daut Schlemste frietomoaken,  waut von de Sind kjemt – aulsoo de Doot. Derch dise Krauft brocht hee Mana, Frues un Kjinja wada toom Läwen (Mat. 11:5).

11. Wuarom wullen sindje Menschen no Jesus komen?

¹¹ Mau rajcht soone Menschen, waut groote Sinden jedonen hauden, wullen dicht bie Jesus sennen. Dee feelden sikj maklich bie am (Luk. 15:1-2). Dauts uk nich toom Wundren, wäajens hee haud Metjefeel fa dee un kunn dee krakjt vestonen. Un Jesus lowd soone, wiels dee Gloowen aun am hauden (Luk. 19:1-10). Jesus wees sien Metleet derch siene Wieed un doaderch, woo hee de Menschen behaundeld. Daut wiest ons, waut von grootet Metleet sien Voda haft un daut hee onvolkomne Menschen halpen well un dee sea leeft (Joh. 14:9). Derch aul dit holp Jesus de Sinda, dän Wunsch to kjrieen, sikj to endren un am notofoljen (Luk. 5:27-28).

12. Waut vetald Jesus siene Jinja doaräwa, woo hee stoawen wudd?

¹² Jesus wist, waut ver am wia. Hee haud siene Jinja daut mieremol jesajcht, daut hee wudd verot un aun eenen Pol omjebrocht woaren (Mat. 17:22; 20:18-19). Hee wist, daut sien Opfa de Welt äare Sind wajchnämen wudd, krakjt soo aus Johanes daut haud bekauntjemoakt un de Profeeten verutjesajcht hauden. Jesus säd uk, daut hee no sienen Doot wudd “aule  Sorten Menschen no sikj trakjen” (Joh. 12:32). Jehowa wudd eenen Jefaulen aun dee haben, waut aun Jesus jleewen un no am horchen wudden. Doaderch wudden dee entlich kjennen “von de Sind . . . frie” woaren (Reem. 6:14, 18, 22; Joh. 8:32). Jesus wia aulsoo äwanäment un reed, grausom omjebrocht to woaren toom ons raden (Joh. 10:17-18).

13. Woo storf Jesus, un waut wiest ons daut von Jehowa Gott? (See uk daut Bilt.)

¹³ Jesus wort von siene Fiend unjagonen, faustjenomen, tonuscht jemoakt, eenen schlajchten Nomen jemoakt, veuadeelt un mau rajcht jekjwält. Dan brochten de Soldoten am no de Städ, wua am sull omjebrocht woaren, un noagelden am aun eenen Pol. Jesus bleef tru, wan hee uk sea lieden must. Oba daut jeef wäm, waut noch dolla lieden must: Jehowa Gott. Hee haud jenuach Macht toom sienen Sän fuaz raden, oba hee deed daut nich! Wuarom leet hee too, daut sien Sän, waut hee sea leewd, soo väl lieden must? Daut wia ut Leew. Jesus säd: “Wiels Gott leewd de Menschen oppe Welt soo sea, daut hee sienen eensich jemoakten Sän jeef, soo daut jieda eena, dee doa wiest, daut hee Gloowen aun dän haft, nich venicht woat, oba daut eewje Läwen haben kaun” (Joh. 3:16).

14. Waut wiest Jesus sien Opfa ons?

¹⁴ Jesus sien Opfa es de jratsta Bewies doafäa, woo sea Jehowa Adam un Eva äare Nokomen leeft. Daut bewiest uk, woo sea Jehowa die leeft. Hee haft sea väl jedonen un haft sea väl derchjestonen, om die von Sind un Doot to raden (1. Joh. 4:9-10). Hee well jiedrem eenen von ons halpen, am to deenen, wan wie nu uk noch Sinda sent. Un hee well, daut wie noch mol gaunz von de Sind looskomen!

15. Waut mott wie doonen, daut ons daut Leesjelt togood kjemt?

¹⁵ Gott jeef sienen eensjen Sän aus een Leesjelt, un doaderch es daut mäajlich, daut onse Sinden kjennen vejäft woaren. Oba doafäa mott wie uk waut doonen. Waut wudd daut sennen? Johanes de Deepa un Jesus Christus säden krakjt dautselwje: “Habt een Leetsennen, wäajen daut Kjennichrikj vom Himmel es dicht bie” (Mat. 3:1-2; 4:17). Wan wie wellen Jehowa noda komen un daut onse Sinden vejäft woaren, dan es daut onbedinjt needich, daut wie een Leetsennen haben. Oba waut meent daut verheipts, een Leetsennen to haben, un woo halpt ons daut, Jehowa siene Frind to sennen, wan wie uk Sinda sent? De Auntwuat woa wie en dän näakjsten Studium-Artikjel seenen.