34. ARTIKJEL FA DAUT STUDIUM
LEET 107 Soone Leew bewiesen aus Jehowa
Woo de Eltestasch soone Leew un Metleet wiesen, waut eene groote Sind begonen haben
“Gott prooft die leeftolich to halpen, een Leetsennen to haben” (REEM. 2:4)
OM WAUT DAUT JEIT
Woo de Eltestasch soone en de Vesaumlunk proowen to halpen, waut eene groote Sind begonen haben.
1. Waut prooft Jehowa bie soone, waut eene groote Sind begonen haben?
EN DÄN väajen Artikjel hab wie jeseenen, waut vonne Aunwiesunk de Apostel Paulus de Vesaumlunk en Korint jeef, waut see met eenen Brooda doonen sullen, waut eene groote Sind begonen haud. Wiels dee nich een Leetsennen haud, must dee ut de Vesaumlunk rutjesat woaren. Oba soo aus de Teemavarsch wiest, kaun Jehowa wäm halpen, waut eene groote Sind begonen haft, een Leetsennen to kjrieen (Reem. 2:4). Woo brukt hee de Eltestasch toom soonen halpen?
2-3. Waut sell wie doonen, wan wie enwoaren, daut een Gloowesbrooda eene groote Sind begonen haft, un wuarom?
2 Wan de Eltestasch daut nich weeten, daut doa wäa eene groote Sind begonen haft, dan kjennen see dän nich halpen. Soo, waut sell wie doonen, wan wie enwoaren, daut een Gloowesbrooda eene groote Sind begonen haft, wuafäa dee kunn ut de Vesaumlunk rutjesat woaren? Wie sellen dän tooroden, de Eltestasch no Help to froagen (Jes. 1:18; Apj. 20:28; 1. Pet. 5:2).
3 Oba waut es, wan deejanja nich well de Eltestasch daut sajen? Dan woa wie no de Eltestasch gonen un dee daut sajen, soo daut dee de Help kjricht, waut am fält. Soo wies wie, daut wie dän leewen un daut wie dän nich wellen aus onsen Gloowesbrooda velieren. Wie weeten, daut wan deejanja nich opphieet met Schlajchtet doonen, dan woat dee noch wieda von Jehowa aufkomen un woat de Vesaumlunk veleicht uk eenen schlajchten Nomen moaken. Doawäajen saj wie de Eltestasch daut, wan ons daut uk schwoa es, wiels wie Jehowa un dänjanjen leewen (Psa. 27:14, NW).
WOO HALPEN DE ELTESTASCH DEEJANJE, WAUT EENE GROOTE SIND BEGONEN HABEN?
4. Waut es de Eltestasch äa Ziel, wan dee sikj met eenen Sinda trafen?
4 Wan doa wäa von de Vesaumlunk eene groote Sind bejeit, dan wälen de Eltestasch von mank äant dree Stekj, waut sikj daut Baste om de Sach kjemren kjennen – dit woat een Eltesta-Kommitee a jenant. Dise Mana motten bescheiden un deemootich sennen. Dee proowen, dänjanjen to halpen, een Leetsennen to haben, oba dee denkjen doaraun, daut dee kjeenem daut bemotten kjennen, sikj to endren (5. Mo. 30:19). De Eltestasch weeten daut, daut nich aule mootwelje Sinda een Leetsennen haben woaren soo aus de Kjennich David (2. Sam. 12:13). Eenje Sinda woaren eefach nich no Jehowa sienen Rot horchen (1. Mo. 4:6-8). Oba de Eltestasch haben doawäajen daut Ziel, dän Sinda to halpen, een Leetsennen to haben, wan daut afens mäajlich es. No waut vonne biblische Gruntsauzen rechten dee sikj, wan dee sikj met dän Sinda trafen?
5. Woo behaundlen de Eltestasch dän Sinda, wan dee met dän toop sent? (2. Timotäus 2:24-26). (See uk daut Bilt.)
5 De Eltestasch seenen dän Sinda aus een wieetvollet Schop, waut sikj vebiestat haft (Luk. 15:4, 6). Soo, wan de Eltestasch dan met dän Sinda toop sent, räden dee nich hunjsch to am un behaundlen am uk nich schlajcht. Dee denkjen uk nich, daut see bloos motten Froagen stalen, om ruttofinjen, waut doa passieet es. Enne Städ daut wiesen dee de Ieejenschoften, wua 2. Timotäus 2:24-26 von rät (läs). De Eltestasch haben eene ruje Enstalunk un behaundlen dän Sinda leeftolich, wiels dee dän wellen to Hoaten räden.
Krakjt soo aus de ieeschtemmasche Schopshoads doonen de Eltestasch aules, waut dee kjennen, om een Schop trigjtokjrieen, waut sikj vebiestat haft (See Varsch 5)
6. Woo sieekjen de Eltestasch Jehowa siene Aunleidunk, ea dee sikj met dän Sinda trafen? (Reema 2:4).
6 De Eltestasch nämen sikj Tiet, om no Jehowa siene Aunleidunk to sieekjen. Dee strenjen sikj aun, dän Sinda emma soo to behaundlen, aus Jehowa daut deit. Dee hoolen daut em Denkj, waut Paulus säd: “Gott prooft die leeftolich to halpen, een Leetsennen to haben” (läs Reema 2:4). De Eltestasch denkjen doaraun, daut see Hoads sent un daut see sikj aun Jesus siene Aunleidunk hoolen motten un soo fa de Breeda sorjen, aus Jesus daut deit (Jes. 11:3-4; Mat. 18:18-20). Ea daut Eltesta-Kommitee sikj met dän Sinda traft, bäden see Jehowa doarom, daut see dänjanjen halpen kjennen, een Leetsennen to haben. Dee sieekjen sikj daut uk no, waut de Bibel un onse Bieekja äwa dee Sind sajen, un bäden doarom, daut Jehowa äant halpen saul, de Persoon un uk de Loag to vestonen. Dee denkjen uk doaräwa no, waut äant von dänjanjen fält to weeten, waut am veleicht bat doa brocht, opp dise Wajch to denkjen un to haundlen (Spr. 20:5).
7-8. Woo kjennen de Eltestasch soo jeduldich sennen aus Jehowa, wan dee met eenen Sinda toop sent?
7 De Eltestasch sent soo jeduldich aus Jehowa. Dee denkjen doaraun, woo Jehowa ieeschtemma met de Sinda omjinkj. Biejlikj wia Jehowa jeduldich met Kain. Hee säd am, woo daut utkomen wudd, wan dee sikj nich endad, un daut dee wudd jesäajent woaren, wan dee wudd jehuarsom sennen (1. Mo. 4:6-7). Jehowa schekjt uk dän Profeet Natan, om David Rot to jäwen, un Natan brukt een Jlikjnis, waut dän Kjennich to Hoaten jinkj (2. Sam. 12:1-7). Jehowa schekjt de Israeliten uk “emma wada” siene Profeeten, wan dee ojjehuarsom wieren (Jer. 7:24-25). Hee luad nich bat siene Deena een Leetsennen hauden toom dee halpen. Enne Städ daut foddad hee dee opp, een Leetsennen to haben, aus dee noch sindjen deeden.
8 De Eltestasch doonen Jehowa no, wan dee wäm proowen to halpen, waut eene groote Sind begonen haft. Dee proowen, dän “met väl Jedult” toom Nodenkjen to brinjen, soo aus daut en 2. Timotäus 4:2 sajcht. Een Eltesta mott emma ruich un jeduldich sennen, daut dee dän Sinda halpen kaun, dän Wunsch to kjrieen, daut Rajchte to doonen. Wan een Eltesta doll ooda vedrislich woat, woat deejanja veleicht nich no dän Rot horchen un uk nich een Leetsennen haben.
9-10. Woo kjennen de Eltestasch dänjanjen halpen, äwa de Entscheidungen notodenkjen, waut am bat de Sind brochten?
9 De Eltestasch proowen ruttofinjen, waut dänjanjen bat doa brocht, de Sind to begonen. Wort dee biejlikj em Jeisteljen schwak, wäajen dee opphieed, pinkjlich to studieren ooda em Deenst to gonen? Haft dee oppjehieet, jieda Dach un von Hoaten to bäden? Leet hee sikj von schlajchte Wenschen unjakjrieen? Wäa sent siene Frind un waut fa Tietvedrief haft dee? Waut haben dise Entscheidungen doaraun jedonen, woo dee denkjt un waut dän jankat? Es dee sikj em Kloaren doaräwa, woo sien himlischa Voda sikj doaräwa feelt, waut dee jedonen haft?
10 De Eltestasch stalen dänjanjen Froagen, daut dee selfst doaräwa nodenkjt, waut am bat doa brocht, em Jeisteljen schwak to woaren un to sindjen. Oba dee doonen daut opp eene leeftolje Wajch un froagen dän kjeenmol perseenelje Sachen, waut äant nich fält to weeten (Spr. 20:5). Krakjt soo aus Natan een Jlikjnis brukt toom David halpen, kjennen de Eltestasch uk Jlikjnisen brucken toom dänjanjen halpen, doaräwa notodenkjen, waut dee jedonen haft un wuarom daut schlajcht wia. Bie daut ieeschte Mol trafen met de Eltestasch, fangt dänjanjen daut veleicht aun, schod to woaren, waut vonne Entscheidungen hee jemoakt haft un woo hee doaräwa docht, ooda hee kjricht soogoa een Leetsennen.
11. Woo jinkj Jesus met de Sinda om?
11 De Eltestasch nämen sikj Jesus toom Väabilt. Jesus holp Paulus, doaderch daut hee am dise goode Froag stald: “Saulus, Saulus, wuarom vefolchst du mie?” Met dise Froag holp Jesus Paulus entoseenen, daut daut orrajcht wia, waut hee deed (Apj. 9:3-6). Un äwa Isebel b säd Jesus: “Ekj hab . . . [ar] Tiet jejäft omtokjieren” (Opb. 2:20-21).
12-13. Waut kjennen de Eltestasch doonen, daut de Sinda Tiet haft, een Leetsennen to kjrieen? (See uk daut Bilt.)
12 De Eltestasch doonen Jesus no un denkjen nich fuaz, daut de Sinda nich woat een Leetsennen haben. Eenje kjrieen een Leetsennen aul bie daut ieeschte Mol, wan daut Eltesta-Kommitee sikj met dee traft, oba aundre fält veleicht mea Tiet. Waut kjennen de Eltestasch dan doonen? Veleicht plonen dee daut, sikj mea aus een Mol met dän Sinda to trafen. No daut ieeschte Mol fangt de Sinda veleicht aun, doaräwa notodenkjen, waut dee am doa jesajcht haben. Veleicht frajcht dee Jehowa uk om Vejäwunk, un wiest doaderch, daut hee deemootich es (Psa. 32:5; 38:19). Daut näakjstemol, wan de Eltestasch sikj met dän Sinda trafen, haft dee veleicht aul eene aundre Enstalunk, aus waut dee bie daut ieeschte Mol haud.
13 De Eltestasch wiesen dän Sinda Metjefeel un behaundlen dän leeftolich, wiels dee dän halpen wellen, een Leetsennen to haben. Dee bäden doarom, daut Jehowa äare Aunstrenjungen säajnen mucht, un hopen, daut de Brooda wada to Besennunk kjemt un een Leetsennen kjricht (2. Tim. 2:25-26).
De Eltestasch woaren sikj veleicht mea aus een Mol met dän Sinda trafen, daut dee Tiet haft, een Leetsennen to kjrieen (See Varsch 12)
14. Wäm traft de Iea, wan een Sinda een Leetsennen haft, un wuarom?
14 Wan een Sinda een Leetsennen haft, dan frei wie ons sea! (Luk. 15:7, 10). Wäm traft de Iea doafäa? De Eltestasch? Denkj wie mol doaraun, waut Paulus äwa de Sinda schreef: “Veleicht lat Gott dee een Leetsennen haben” (2. Tim. 2:25). Soo, dauts Jehowa, waut eenen Christ halpt, sien Denkjen un siene Enstalunk to endren – un nich een Mensch. Paulus sajcht uk, waut doa fa Goodet bie rutkjemt, wan doa wäa een Leetsennen haft: Dee kaun de Woarheit bäta vestonen, wada to Besennunk komen un ut dän Soton siene Schlenj rutkomen (2. Tim. 2:26).
15. Woo kjennen de Eltestasch wäm wieda halpen, waut een Leetsennen haud?
15 Waut deit daut Eltesta-Kommitee, wan deejanja een Leetsennen haft? Dee seenen doano, daut de Eltestasch bie dän wieda Hoadbesuchs moaken toom dän halpen, em Gloowen stoakja to woaren, wieda jäajen dän Soton siene Vesieekjungen to kjamfen un daut Rajchte to doonen (Heb. 12:12-13). Dauts kloa, daut de Eltestasch aundre daut nich krakjt sajen woaren, waut de Sinda jedonen haft. Oba waut fält de Vesaumlunk veleicht to weeten?
WIES DEE VER DE GAUNZE GRUPP TRAJCHT
16. Wäa sent “de gaunze Grupp”, wua daut en 1. Timotäus 5:20 von rät?
16 Läs 1. Timotäus 5:20. Paulus schreef Timotäus, waut uk een Eltesta wia, daut dee de Sinda “ver de gaunze Grupp” trajchtwiesen sull. Meend Paulus doamet, daut de Sinda must ver de gaunze Vesaumlunk trajchtjewäsen woaren? Nich werkjlich. Enne Städ daut meend hee dee poa, waut von de Sind wieren enjeworden. Daut kjennen soone sennen, waut daut jeseenen haben ooda soone, wäm de Sinda daut vetalt haft. De Eltestasch woaren bloos dee daut sajen, daut see sikj aul om de Sach jekjemmat haben.
17. Waut woat eenjemol en de Vesaumlunk bekauntjemoakt, un wuarom?
17 Eenjemol weeten väle von de Vesaumlunk daut, daut doa wäa eene groote Sind begonen haft, ooda dee woaren daut meist secha enwoaren. Wan daut soo es, dan wudd bie “de gaunze Grupp” de gaunze Vesaumlunk met en sennen. Doawäajen woat een Eltesta daut ver de gaunze Vesaumlunk bekauntmoaken, daut de Brooda ooda de Sesta trajchtjewäsen wort. Wuarom? Paulus säd: “Daut et fa de Äwaje eene Woarnunk es”, nich eene groote Sind to begonen.
18. Waut woaren de Eltestasch doonen, wan een jedeepta Christ, waut noch nich 18 Joa es, eene groote Sind bejeit? (See uk daut Bilt.)
18 Waut doonen de Eltestasch, wan een jedeepta Christ, waut noch nich 18 Joa es, eene groote Sind bejeit? De Eltestasch beräden daut, daut twee Eltestasch sikj met dän Jugentlichen un met dän siene christelje Elren trafen. c De Eltestasch woaren de Elren froagen, waut dee aul jedonen haben, om äa Kjint to halpen, een Leetsennen to haben. Wan daut Kjint de Elren äaren Rot nokjemt un prooft, sien Denkjen un sien Benämen to endren, dan woaren de Eltestasch veleicht entscheiden, daut de Elren wieda selfst äa Kjint halpen. De Eltestasch weeten, daut Jehowa de Elren de Veauntwuatunk jejäft haft, äare Kjinja leeftolich trajchttowiesen (5. Mo. 6:6-7; Spr. 6:20; 22:6; Efs. 6:2-4). De Eltestasch woaren nodäm emma wada mol met de Elren räden, om secha to moaken, daut dee äa Kjint de Help kjricht, waut daut fält. Oba waut es, wan de jedeepta Christ, waut noch nich 18 Joa es, nich opphieet, daut Schlajchte to doonen? Dan woat een Eltesta-Kommitee sikj met dänjanjen un uk met dän siene christelje Elren trafen.
Wan een Jugentlicha, waut noch nich 18 Joa es, eene groote Sind bejeit, dan woaren twee Eltestasch sikj met dän un siene christelje Elren trafen (See Varsch 18)
JEHOWA ES SEA METLIEDENT UN ERBOARMT SIKJ
19. Woo doonen de Eltestasch Jehowa no, wan dee met wäm omgonen, waut eene groote Sind begonen haft?
19 De Eltestasch, waut Poat von daut Eltesta-Kommitee sent, haben de Veauntwuatunk ver Jehowa, de Vesaumlunk reintohoolen (1. Kor. 5:7). Oba dee doonen uk aules, waut dee kjennen, om dän Sinda to halpen, een Leetsennen to haben. Wan dee dänjanjen proowen to halpen, jäwen dee nich de Hopninj opp, daut dee sikj nich endren woat. Wuarom nich? Wiels dee Jehowa nodoonen wellen, waut groote Leew haft un metliedent es (Jak. 5:11). De Apostel Johanes deed daut soo; hee behaundeld siene Gloowesbreeda met Leew. Hee schreef: “Leewe Kjinja, ekj schriew junt dit, daut jie von de Sind wajch bliewen. Wan oba doch wäa sindjen sull, dan hab wie Jesus Christus, dee onen Sind es, un dee bie Gott dän Voda fa ons enstonen deit” (1. Joh. 2:1).
20. Waut woa wie en dän latsten Artikjel seenen?
20 Dauts schod, oba eenjemol haft de Sinda nich een Leetsennen. Wan daut soo es, dan mott dee ut de Vesaumlunk rutjesat woaren. Wan daut soo wiet kjemt, woo gonen de Eltestasch doamet om? Daut woa wie en dän latsten Artikjel seenen.
LEET 103 Hoads sent eene Gow von Gott
a Ea nand wie soone Grupp Eltestasch een “Rechtkommitee”. Oba wäajen rechten bloos een Poat es von aules, waut dee doonen, woa wie daut nu nich mea soo nanen. Nu woa wie soone Grupp een “Eltesta-Kommitee” nanen.
b Dise “Isebel” kunn veleicht eene Fru ooda eene Grupp Frues jewast sennen, waut aundre enne Vesaumlunk veleiden wullen.
c Waut daut hia fa de Elren sajcht, jelt uk fa irjenteene utjewosne, jedeepte Persoon, waut fa eenen Jugentlichen veauntwuatlich es, dee noch nich 18 Joa es.
