Danièle wia emma sea schneiw un see fuscheld mie fuaz em Ua: “Du brukst de Poliezen nich mol fonen; dee sent aul hia!” Dan hilt doa ver daut Hotel uk aul een Foatich stell, un een poa Minuten lota neemen se ons met. Oba wäajen Danièle mie jewoarnt haud, kunn ekj ea noch schwind eenen Brooda waut wichtje Papieren jäwen.

Aus se ons no de Poliezen-Offiz brochten, docht ekj doaräwa no, woo goot daut wia, daut ekj soone äwanämende un jeistelje Fru haud. Un dit wia nich daut eensje Mol, daut ekj un Danièle fein toopschauften. Lot mie junt mol vetalen, woo daut kjeem, daut wie no soone Lenda reisden, wua ons Prädichtwoakj nich frie wia.

Ekj wort aune 1930 jebuaren en Croix; daut es eene kjliene Staut em Nuaden von Frankreich. Miene Famielje wia sea katoolsch un wankten jieda Sindach no de Kjoakj un mien Voda deed väl fa de Kjoakj. Oba aus ekj meist 14 Joa wia, jinjen mie de Uagen op äwa daut Jeheichel, waut et doa jeef.

En dän Tweeden Weltkjrich hauden de dietschlendsche Soldoten Frankreich en. Ons Priesta räd en de Kjoakj pinkjlich doavon, daut wie de Vichy-Rejierunk unjastetten sullen, waut opp de Nazis äare Sied wia. Wie grulden ons fa daut, waut dee säd. Soo aus väle en Frankreich horcht wie uk plietsch daut enjlische Rädio-Stäschen BBC, wua Norechten äwajebrocht worden, woo daut met dän Kjrich stunt. En Septamba 1944, aus de Soldoten von de aundre Sied dan fein veraunkjeemen, stald de Priesta sikj haustich opp dee äare Sied un hilt eene Dankprädicht fa dee. Ekj kunn daut nich jleewen! Un von doa aun vetrud ekj nich mea opp de Priestasch.

Korz no dän Kjrich storf mien Voda. Wäajen miene elre Sesta aul befriet wia un en Belgien wond, wull ekj mie om miene Mutta kjemren. Ekj kjrieech Oabeit en eene Zeichkompanie. Mien Wieet un siene Säns wieren sea katoolsch. Daut sach soo, daut ekj en de Kompanie wiet komen wudd, oba boolt wort ekj aufjeprooft.

Miene Sesta Simone wia eent von Jehova siene Zeijen jeworden un kjeem aune 1953 no ons spazieren. See wees ons en äare Bibel, daut daut nich soo wia, waut de katoolsche Kjoakj lieed äwa de Hal, äwa de Dree-Eenichkjeit un äwa de onstoafelje Seel.  Ieescht jleicht ekj daut nich, daut see nich eene katoolsche Bibel brukt, oba boolt wort ekj en, daut see de Woarheit säd. Lota brocht see mie elre Woaktorms, waut ekj zeowes en miene Stow läsd. Ekj wort bosich en, daut et de Woarheit wia, oba ekj haud Angst, daut ekj miene Oabeit velieren wudd, wan ekj fa Jehova enstunt.

Fa een poa Moonat studieed ekj auleen de Bibel un de Woaktorm-Artikjels. Oba dan wort ekj mie eenich, no een Vesaumlungshus to wanken. Daut jinkj mie sea to Hoaten, woo leeftolich dee doa aula wieren. Aus een erfoarna Brooda met mie fa sas Moonat de Bibel studieet haud, leet ekj mie en Septamba 1954 deepen. Boolt no daut haud ekj de Freid, daut miene Mutta un miene jinjre Sesta uk Jehova siene Zeijen worden.

Aune 1958 wia een internazionala Kongress en New York. Een poa Wäakj ea storf miene Mutta un daut muak mie sea truarich. Aus ekj von dän Kongress trigjkjeem, brukt ekj mie nich mea om wäm enne Famielje kjemren. Doawäajen säd ekj miene Oabeit auf un wort Pionia. Äwadäm vespruak ekj uk eene flietje Pionia-Sesta, waut Danièle Delie heet, de Ehe un en Mei 1959 befried wie ons.

Danièle haud wiet auf von tus met dän Voltietdeenst aunjefongen, en de Jäajent von de Bretagne. See must mootich sennen toom en dise katoolsche Jäajent prädjen un met äaren Beisikjel doa no de Darpa foaren. Krakjt soo aus mie wia ar daut prädjen sea wichtich, wiels wie nich wisten, woo dicht bie daut Enj wia (Mat. 25:13). Daut see soo tofräd un flietich wia, holp ons em Voltietdeenst to bliewen.

Wie wieren mau een poa Doag befriet, aus ekj Kjreisoppsechta wort. Wie fieeden een eefachet Läwen. De ieeschte Vesaumlunk, waut wie besochten, haud 14 Vekjindja. Daut wia nich mäajlich, daut wie bie de Breeda kunnen bliewen. Doawäajen schleep wie opp Madrauzen oppem Plautform em Vesaumlungshus. Daut wia nich sea maklich, oba daut wia sea goot fa dän Rigjen!

Wie wieren sea drock em Kjreisdeenst, oba Danièle wand sikj doa fein too. Foaken jeef daut onverhofs een Eltestatoopkomen un see must en onse kjliene Koa luaren, oba see bekloagd sikj nienich. Ekj wia mau twee Joa Kjreisoppsechta un en dee Tiet lieed wie, woo needich daut wia, daut wie aus Ehepoa frie unjarenaunda räden un fein toopschauften (Liera 4:9).

Aune 1962 word wie enjelot no de 37. Klauss von de Gilead-School en Brooklyn, New York, to gonen. Dee dieed tieen Moonat un mank de 100 Schiela doa wieren mau 13 Ehepoaren. Wie wieren sea froo, daut wie toop no de School kunnen. Daut wia sea scheen, met soone true Breeda aus Frederick Franz, Ulysses Glass un Alexander H. Macmillan toop to sennen.

Bie de School lieeden se ons, daut wie fein beoobachten un nodenkjen sullen. Eenjemol wia doa met en, daut wie ons Sinowent no Meddach no de School veschiednet en New York City besagen. Un Mondach must wie dan eenen Test von daut schriewen, waut wie jeseenen hauden. Foaken kjeem wie Sinowent zeowes gaunz meed trigj, oba de Betelbrooda,  waut ons en de Staut romwees, stald ons dan noch Froagen, daut wie daut bäta em Denkj hoolen kunnen, waut se ons lota bie dän Test froagen wudden. Eenen Sinowent jinj wie dän Nomeddach äwa en de Staut rom. Wie wieren bie eene Städ, wua wie väl äwa de Stierns lieeden, un doa läden se ons väl ut äwa Meteore un Meteoriten. Bie daut American Museum of Natural History lieed wie, waut de Unjascheet wia tweschen de veschiedne Sorten Kruckedellen. Aus wie ieescht trigj em Betel wieren, fruach de Brooda ons: “Waut es dan de Unjascheet tweschen de Meteore un de Meteoriten?” Danièle wia soo meed, daut see säd: “Na, de Meteoriten haben lenjre Tänen!”

Aus de School derch wia, wia wie äwarauscht, daut se ons no daut Betel en Frankreich schekjten, wua wie dan fa äwa 53 Joa toop deenden. Aune 1976 wort ekj de Leida von daut Betelkommitee un ekj kjrieech uk de Oppgow, no veschiedne Lenda en Afrika un aundatwäajen to reisen, wua ons Prädichtwoakj veboden ooda nich en aule Stekjen frie wia. Doawäajen reisd wie no Gabon, wua wie daut beläwden, wua ekj aum Aunfank von räd. Rajcht jesajcht kjrieech ekj eenjemol onverhofs eene Oppgow, waut mie schwierich scheen. Oba Danièle wia mie emma eene groote Help.

Von Aunfank aun jleicht wie daut Läwen em Betel. Danièle haud en fief Moonat Enjlisch jelieet, ea wie no de Gilead-School jinjen, un lota wort see eene feine Äwasatarin fa onse Bieekja. Ons jinkj de Oabeit em Betel sea scheen, oba met de Vesaumlunk tooptoschaufen muak onse Freid noch jrata. Ekj weet noch, woo scheen daut emma jinkj, wan ekj un Danièle en Paris lot zeowes met dän Zuach no Hus fuaren. Wie wieren meed, oba sea schaftich, daut wie toop hauden kunt soone feine Bibelstudiums fieren. Oba dan wort Danièle met eenst krank un kunn nich mea soo väl doonen, aus ar jankad.

Aune 1993 säden se ons, daut Danièle Brostkjräft haud. De Doktarie wia sea schwoa, wiels se ar opperieren musten un ar must uk sea stoakje Medizien enjelakjt. Feftieen Joa lota kjrieech see wada Kjräft un ditmol wia daut noch schlemma. Oba see jleicht äare Oppgow aus Äwasata soo sea, daut see soo schwind, aus see afens kunn, trigj aun äare Oabeit wia.

Wan Danièle uk dise schlemme Krankheit haud, docht wie nienich äwa daut Betel veloten. Oba daut es nich leicht, wan eena em Betel krank es, besonda wan de aundre nich weeten, woo schlemm daut werkjlich es (Spr. 14:13). Mau rajcht aus Danièle meist 80 Joa wia, jinkj ar daut nich auntoseenen, woo schlajcht ar daut jinkj. See bejaumad sikj nich selfst. Enne Städ daut holp see leewa aundre. See wist, woo väl wieet daut wia, wan eena wäm toohorcht, waut daut schlajcht jinkj (Spr. 17:17). Derch daut, waut Danièle beläft haud, kunn see aundre Moot toospräakjen, waut Angst fa Kjräft hauden.

Daut wia uk nich leicht, daut Danièle nich mea kunn fa voll em Betel schaufen. Oba see wort sikj dan eenich, mie noch dolla to unjastetten. See deed väl toom mie daut Läwen leichta moaken un soo kunn ekj 37 Joa de Leida von daut Betelkommitee sennen. Toom Biespel muak see emma aules reed,  daut wie en onse Stow kunnen toop Meddach äten un doa jieda Dach een bät toop vereiwen (Spr. 18:22).

Danièle haud emma eene sea goode Enstalunk un haud Freid aum Läwen. Dan kjrieech see toom dredde Mol Kjräft. Wie feelden ons onen Krauft. Von de stoakje Medizien, waut se ar enlakjten, un von de Strolen, waut see kjrieech, wort see soo schwak, daut see eenjemol meist nich mea gonen kunn. Ekj wia sea truarich, aus ekj sach, daut miene leewe Fru, waut soone feine Äwasatarin wia, meist nich mea räden kunn.

Wie wieren sea doljeschloagen, oba wie hilden aun met bäden un wieren ons gaunz secha, daut Jehova daut nich tooloten wudd, daut wie schwandret derchmuaken, aus wie Krauft hauden (1. Kor. 10:13). Wie proowden emma dankboa to sennen fa de Help, waut Jehova ons jeef derch sien Wuat, derch de Gloowesbreeda un derch de Breeda em Betel, waut met Doktarieen schauften.

Wie fruagen Jehova foaken no Help, wan wie entscheiden musten, waut vonne Doktarie daut baste sennen wudd. Oba opp eene Sauz kunn wie verheipts nich doktren, wäajen de Dokta, waut Danièle aul 23 Joa behaundelt haud, nich vestunt, wuarom see jiedatsmol besennungsloos wort, wan se ar de stoakje Medizien enlakjten. Dee wist nich mea, waut dee noch doonen sull. Wie feelden ons auleen un wisten nich, woo daut wiedagonen wudd. Dan säd een aundra Dokta, daut dee ar behaundlen wudd. Daut späad sikj soo, daut Jehova fa eenen Wajch sorjd, daut wie met onse Sorjen foadich worden.

Ons wia daut eene Help, eenen Dach opp eemol to nämen. Jesus säd je: “Jieda Dach haft fa sikj jenuach Trubbel” (Mat. 6:34). Waut ons uk holp, met onse Sorjen foadich to woaren, wia, no de goode Sieden to kjikjen un Spos to haben. Aus se Danièle biejlikj eemol fa twee Moonat nich kunnen de stoakje Medizien enlakjen, schmustad see un säd: “Weetst waut, ekj hab mie noch nienich bäta jefeelt!” (Spr. 17:22). Wan see sikj uk schlajcht feeld, jleicht see daut doawäajen sea, de niee Kjennichrikjsleeda met lude Stemm to eewen.

Äare goode Enstalunk holp mie, met miene ieejne Trubbels foadich to woaren. Rajcht jesajcht kjemmad see sikj en de 57 Joa, waut wie befriet wieren, om aules, waut ekj brukt. See wull mie nich mol lieren, woo eena Eia brod! Aus see dan ieescht too prost auf wia, must ekj lieren opptowauschen un Kjleeda to wauschen un uk eefachet Äten to moaken. Aus ekj daut lieed, kjield ekj een poa Jläsa twei, oba ekj haud eene groote Freid, dit fa ar to doonen. *

Wan ekj soo trigjdenkj, kaun ekj seenen, daut ekj väl jelieet hab derch de Trubbels, waut wie wäajen Krankheiten un wäajen daut Ella hauden. Eent, waut ekj jelieet hab, es, daut eena nienich saul too drock sennen toom eenem sienen Ehepoatna goots doonen. Wie motten de Tiet goot utnutzen, wua wie de Krauft haben, waut fa dee to doonen, waut wie väl räakjnen (Liera 9:9). Un waut ekj noch jelieet hab, es, daut eena sikj nich too sea äwa kjliene Sachen sorjen saul, sest kaun eena leicht aul daut goode äwaseenen, waut eena jieda Dach beläft (Spr. 15:15).

Wan ekj äwa ons Läwen em Voltietdeenst nodenkj, dan sie ekj mie gaunz secha, daut Jehova ons väl dolla jesäajent haft, aus wie ons väastalden. Mie jeit daut biejlikj soo aus dän Psalmenschriewa, waut säd, daut Jehova am väl “goodet [jedonen]” haud (Psa. 116:7).