1. Waut vonne Oppgow haft Jehova de Elren jejäft?

JEHOVA muak de ieeschte Menschen soo, daut dee wullen Kjinja haben. De Schreft sajcht: “Kjinja sent een Säajen vom HARN” (Psa. 127:3). Waut bediet daut? Stal die mol väa, daut een Frint die een deel Jelt jeft un sajcht, daut du no sien Jelt oppaussen saust. Woo wurscht du die feelen? Secha wurscht du die freien, daut dee opp die vetrud. Oba du wurscht die uk Sorjen moaken, woo du dit Jelt beschitzen kust. Jehova es ons basta Frint un hee haft de Elren waut äwajäft, waut noch väl mea wieet es aus Jelt. See sellen doano oppaussen, daut äare Kjinja daut goot jeit un daut dee schaftich sent.

2. Äwa woone Froagen woa wie nu räden?

² Wäa saul daut entscheiden, aus Befriede sellen Kjinja haben un wanea see dee sellen haben? Un waut kjennen Elren doonen, daut äare Kjinja een tofrädnet Läwen haben? Well wie mol eenje Gruntsauzen ut Gott sien Wuat seenen, waut christelje Ehepoaren halpen kjennen, goode Entscheidungen to moaken.

3. (a) Wäa saul daut entscheiden, aus eene Lied sellen Kjinja haben? (b) Aun waut fa eenen biblischen Gruntsauz saul daut Frintschoft un de Frind denkjen, wan sikj wäa befriet?

³ En eenje Jäajenden denkjen de Menschen, daut een Poa Lied fuaz Kjinja haben sellen, wan dee sikj ieescht befriet haben. Veleicht port daut Frintschoft ooda aundre  dee uk no. Jethro, een Brooda, waut en Asien wont, sajcht: “En de Vesaumlunk wellen eenje Elren aundre beräden, daut dee uk sellen Kjinja haben.” Jeffrey, een aundra Brooda en Asien, sajcht: “Eenjemol sajen se to soone Lied, waut nich Kjinja haben, daut sikj doa lota kjeena om an kjemren woat, wan see ieescht oolt sent.” Oba rajcht jesajcht saul jieda Ehepoa selfst entscheiden, aus dee wellen Kjinja haben. Daut es dee äare Sach un dee äare Veauntwuatunk (Gal. 6:5). Daut Frintschoft un de Frind wellen secha, daut deejanje daut scheen jeit, waut sikj befrieen. Oba aule motten em Denkj hoolen, daut jieda Ehepoa daut selfst weeten mott, aus see wellen Kjinja haben (1. Tess. 4:11).

4-5. Äwa woone twee Froagen saul eena räden, un wanea? Laj daut ut.

⁴ Wan doa wäa Kjinja haben well, dan saul dee met sienen Poatna äwa twee wichtje Froagen räden. Ieeschtens: “Wanea well wie Kjinja haben?” Un tweedens: “Woo väl well wie haben?” Wanea wudden dee sikj sellen soont beräden? Un wuarom es daut soo wichtich?

⁵ Jeweenlich es daut daut baste, wan eena sikj soont berät, ea eena sikj befriet. Wuarom? Wiels daut wichtich es, daut eene Lied sikj en dise Sach eenich sent. Un dee motten uk äwalajen, aus dee aul reed sent fa dise groote Veauntwuatunk. Eenje Ehepoaren worden sikj eenich, daut see oppet weinichste eent ooda twee Joa wachten wullen toom Kjinja haben. Dee wullen dise Tiet brucken toom sikj fein toopwanen un noch bätre Frind woaren, wiels dee wisten, daut see lota wudden väl Tiet un Krauft fa äare Kjinja brucken (Efs. 5:33).

6. To waut worden eenje Lied sikj eenich, wäajen wie nu en soone schwoare Tieden läwen?

⁶ Aundre Christen wellen Noah siene dree Säns un dee äare Frues nodoonen, waut nich fuaz Kjinja hauden (1. Mo. 6:18; 9:18-19; 10:1; 2. Pet. 2:5). Jesus vejlikjt onse Tiet met “Noah siene Tiet”, un wie weeten je, daut wie nu en “jreslich schwoare Tieden” läwen (Mat. 24:37; 2. Tim. 3:1). Doawäajen worden eenje sikj eenich, daut see nu opp Stekjen nich wullen Kjinja haben un leewa mea Tiet brucken toom Jehova deenen.

7. Waut kaun een Ehepoa von de Gruntsauzen en Lukas 14:28-29 un Spricha 21:5 lieren?

 ⁷ Weise Ehepoaren woaren sikj “de Kosten äwaräakjnen”, wan see äwalajen, aus see Kjinja haben wellen ooda woo väl see wellen (läs Lukas 14:28-29). Soone, waut aul Kjinja haben, weeten, daut et dia kjemt un väl Tiet un Krauft brukt, Kjinja opptotrakjen. Doawäajen mott een Ehepoa nodenkjen: “Wudd wie beid motten schaufen, daut onse Famielje jenuach to läwen haud? Denkj wie äwareen, woo väl wie toom läwen brucken? Wan wie beid wudden schaufen motten, wäa wudd sikj dan om de Kjinja kjemren? Von wäm wudden dee dan lieren un wäm wudden dee nodoonen?” Wan een Ehepoa ruich äwa dise Froagen rät, dan komen dee daut no, waut Spricha 21:5 sajcht (läs).

8. Met waut fa Schwierichkjeiten motten Elren foadich woaren, un waut woat een leeftolja Ehemaun doonen?

⁸ Wan doa Kjinja sent, dan motten beid Elren sikj om jieda eent von dee kjemren, un daut brukt väl Tiet un Krauft. Wan eene Lied een deel Kjinja hinjarenaunda haben, dan es daut fa de Elren schwoa, sikj om jieda Kjint soo to kjemren, aus daut Kjint daut vedeent. Eenje, waut eene Häad kjliene Kjinja hauden, säden, daut daut bieaun sea schwoa wia. Soone Mame kaun leicht mol aules too väl woaren. Daut kaun dee uk schwoa faulen pinkjlich to studieren, to bäden un em Deenst to gonen. Un veleicht kaun dee uk bie de Toopkomes nich mea soo fein oppaussen ooda waut venämen. Een feina Ehemaun woat siene Fru secha soo goot aus mäajlich tus ooda bie de Toopkomes met de Kjinja halpen. Hee kunn siene Fru biejlikj met de Husoabeit halpen. Hee woat sikj uk sea aunstrenjen, daut see pinkjlich Famieljenstudium haben un aula doa waut bie lieren kjennen. Un hee woat räajelmässich met siene Famielje toop prädjen gonen.

9-10. Waut motten Elren doonen toom äare Kjinja halpen?

⁹ Woo kjennen Elren äare Kjinja halpen, Jehova to leewen? Woo kjennen see dee en dise schlajchte Welt fa Jefoaren schitzen? Well wie mol eenjet seenen, waut Elren doonen kjennen.

¹⁰ Bät Jehova om Help. Waut deeden Manoach un siene Fru, ea see Simson hauden? Aus Manoach hieed, daut see eenen Sän haben wudden, prachad hee Jehova om Help, daut see dän rajcht lieren kunnen.

11. Woo kjennen Elren sikj daut toom Väabilt nämen, waut Manoach en Rechta 13:8 deed?

 ¹¹ Nihad un Alma von Bosnien un Herzegowina neemen sikj Manoach toom Väabilt. Dee sajen: “Krakjt soo aus Manoach prachad wie Jehova om Help, daut wie kunnen goode Elren sennen. Un Jehova beauntwuad onse Jebäda, biejlikj derch de Schreft, derch onse biblische Bieekja, de Toopkomes un de Kongressen” (läs Rechta 13:8).

12. Waut fa een Biespel wieren Josef un Maria fa de Kjinja? Laj daut ut.

¹² Siet een goodet Biespel. June Wieed sent wichtich, oba june Woakjen kjennen noch väl mea aun de Kjinja doonen. Wie kjennen ons secha sennen, daut Jesus siene Elren, Josef un Maria, een goodet Väabilt fa äare Kjinja wieren. Josef deed sea schaufen toom fa siene Famielje sorjen un lieed dee uk, jeisteljet väl to räakjnen (5. Mo. 4:9-10). Hee un siene Famielje “reisden aule Joa no Jerusalem toom Passafast”, wan daut Jesaz uk nich velangd, daut hee dee aula metnämen sull (Luk. 2:41-42). Eenje Vodasch en siene Tiet neemen äare Famieljes veleicht nich met, wäajen an daut too dia kjeem un too klopportich wia un too lang dieed. Oba Josef räakjend jeistelje Sachen sea väl un lieed de Kjinja daut uk. Un Maria kjand de Schreft uk goot. Secha lieed see de Kjinja derch äare Woakjen un Wieed, Gott sien Wuat to leewen.

13. Woo deeden eene Lied Josef un Maria no?

¹³ Nihad un Alma, wua wie ea aul von räden, wullen Josef un Maria nodoonen. Woo holp an daut, aus see äaren Sän lieren wullen, Gott to leewen un to deenen? Dee sajen: “Wie wullen onsen Sän daut derch ons Läwen wiesen, woo goot daut utkjeem, sikj no Jehova siene Gruntsauzen to rechten.” Nihad sajcht noch: “Siet selfst soo, aus jun Kjint sennen saul.”

14. Wuarom motten de Elren daut weeten, met wäm äare Kjinja Frind sent?

¹⁴ Halpt june Kjinja, sikj goode Frind to sieekjen. De Mame un uk de Pape motten daut weeten, met wäm de Kjinja toop sent un waut dee doa doonen. Doa es uk met en, daut dee weeten, met wäm de Kjinja derch Fon ooda äwa Internet räden, wiels daut kaun väl doaraun doonen, woo de Kjinja denkjen un haundlen (1. Kor. 15:33).

15. Waut kjennen Elren von Jessie lieren?

¹⁵ Waut kjennen de Elren doonen, wan dee nich väl von Komputasch, Fons ooda Tablets weeten? Een Voda en de Filippinen, waut Jessie heet, sajcht: “Wie wisten nich väl von Fons ooda Tablets. Oba wie deeden onse Kjinja doawäajen fa de Jefoaren woarnen, waut et doa jäwen kunn.” Jessie säd de Kjinja daut nich auf, Fons ooda Tablets to brucken, bloos wiels hee sikj doa nich met vestunt. Hee sajcht: “Ekj rod onse Kjinja too, daut see dee brucken sullen, om eene niee Sproak to lieren un sikj fa de Toopkomes reedtomoaken un jieda Dach de Bibel to läsen.” Elren, hab jie aul jeläst, waut et opp jw.org^® bie “Jugentliche” doaräwa sajcht, wan eena äwa Internet ooda Fon met aundre schriewen un Bilda wajchschekjen well? Un hab jie met june Kjinja äwa disen gooden Rot jerät? Hab jie met dee toop äwa de Videos jerät Hast Frind em Internet? Nemm dien Vestaunt uk met! un Wäa haft de Kontroll: du ooda dien Fon? * Aul daut es eene groote Help toom june Kjinja lieren,  woo see de Fons un Tablets rajcht brucken kjennen (Spr. 13:20).

16. Waut haben väl Elren jedonen, un woo kjeem daut ut?

¹⁶ Väl Elren seenen doano, daut äare Kjinja met soone kjennen toop sennen, waut Gott flietich deenen un een goodet Biespel fa an sent. Daut Ehepoa N’Déni un Bomine biejlikj, waut en Côte d’Ivoire wont, hauden foaken dän Kjreisoppsechta to Nacht. N’Déni vetalt: “Daut wia sea goot fa onsen Jung. Hee funk met dän Pioniadeenst aun un es nu de Veträda vom Kjreisoppsechta.” Wudd jie uk kjennen doano seenen, daut june Kjinja met soone flietje Breeda toop sent?

17-18. Wanea sellen Elren aunfangen, äare Kjinja to lieren?

¹⁷ Fangt soo schwind aus mäajlich aun, de Kjinja to lieren. Je ea jie daut doonen, je bäta woat daut utkomen (Spr. 22:6). Daut es bie Timotäus to seenen, waut lota met dän Apostel Paulus toop reisd. Siene Mame Eunike un siene Groosmame Lois lieeden am “von Kjint aun” (2. Tim. 1:5; 3:15).

¹⁸ Jean-Claude un Peace, een aundret Ehepoa en Côte d’Ivoire, kunnen äare sas Kjinja aula lieren Jehova to leewen un to deenen. Waut wia an eene Help? Dee neemen sikj Eunike un Lois toom Väabilt. See sajen: “Wie schoapten onse Kjinja von kjlien aun met Gott sien Wuat opp. Wie fungen doamet aun, aus dee noch gaunz kjliene Bäbekjes wieren” (5. Mo. 6:6-7).

19. Woo kjenn jie june Kjinja met Gott sien Wuat oppschoapen?

¹⁹ Waut bediet daut, de Kjinja met Jehova sien Wuat opptoschoapen? “Oppschoapen” bediet “wäm emma wada waut to lieren un dän denkjen to halpen”. Toom daut doonen motten Elren sikj foaken Tiet nämen fa äare Kjinja. Eenjemol kaun dee daut mootloos moaken, wan see de Kjinja jewesset emma wada sajen motten. Oba dan kjennen dee doaraun denkjen, daut see äare Kjinja opp dee Wajch halpen kjennen, Gott sien Wuat to vestonen un notokomen.

20. Waut kaun eena von Psalm 127:4 lieren äwa Kjinja opptrakjen?

²⁰ Lieet june Kjinja goot kjanen.  Psalm 127 sajcht, daut Kjinja biejlikj soo sent aus Feilen (läs Psalm 127:4). Krakjt soo aus nich aule Feilen jlikjen groot ooda äwareen jemoakt sent, sent uk de Kjinja aula veschieden. Doawäajen motten de Elren sikj äwalajen, woo see jieda Kjint lieren kjennen. Een Ehepoa en daut Launt Israel, waut twee Kjinja haben, vetalen, waut an holp, dee soo opptotrakjen, daut dee Jehova deenen. See sajen: “Wie deeden met jieda Kjint oppoat de Bibel studieren.” Oba aus daut mäajlich ooda needich es, daut to doonen, woat daut Haupt von de Famielje entscheiden.

21. Woo halpt Jehova de Elren?

²¹ Eenjemol späat sikj de Elren daut veleicht soo, daut see eene sea schwoare Oppgow haben. Oba Kjinja sent een Jeschenkj von Jehova un hee es emma reed de Elren to halpen. Hee horcht wellich no dee äare Jebäda un beauntwuat dee derch de Schreft un derch onse Bieekja un derch dän Rot un daut goode Biespel von erfoarne Elren en de Vesaumlunk.

22. Waut jehieet to daut baste, waut eena fa de Kjinja doonen kaun?

²² Eenje sajen, daut et 20 Joa dieet Kjinja opptotrakjen. Oba en Werkjlichkjeit woat eena emma om de Kjinja bekjemmat sennen. Un eent von daut baste, waut Elren fa de Kjinja doonen kjennen, es, dee to leewen, sikj Tiet fa dee to nämen un dee met de Schreft to lieren. Daut deit nich bie aule Kjinja äwareen. Oba väle, waut gottesferchtje Elren hauden, jeit daut soo aus eene Sesta en Asien, waut Joanna Mae heet. See sajcht: “Wan ekj trigjdenkj, woo miene Elren mie jelieet haben, dan sie ekj sea dankboa, daut dee mie trajchtjewäsen haben un mie jelieet haben Jehova to leewen. Dee jeewen mie nich bloos daut Läwen, oba lieeden mie soo to läwen, daut et waut enhilt” (Spr. 23:24-25). Millionende Breeda un Sestren denkjen krakjt soo äwa äare Elren.