1-2. (a) Waut fa een Fast fieren eenje, un waut wia daut Entlotungsjoa? (See dän Kausten “ Waut wia daut Entlotungsjoa?”) (b) Von waut räd Jesus en Lukas 4:16-18?

EN EENJE Lenda jeft et een besondret Fast, wan de Kjennich ooda de Kjennijin ieescht 50 Joa rejieet haft. Soone Fasten dieren eenjemol eenen Dach, eene Wäakj ooda noch lenja, oba irjentwanea sent dee to Enj un dan vejäten de Menschen fuaz wada von dee.

² Nu woa wie von een besondret Fast räden, waut soogoa noch bäta es aus daut Entlotungsjoa, waut de Israeliten ieeschtemma aule 50 Joa hauden. Dit Entlotungsjoa brocht dee Frieheit. Wuarom intressieet ons daut? Wiels daut ieeschtemmasche Entlotungsjoa sikj met daut wundascheene likjent, waut Jehova fa ons jedonen haft, om ons fa emma frie to moaken. Von dise Frieheit räd uk Jesus un dee kjemt ons nu aul togood (läs Lukas 4:16-18).

3. Woo kjeem de Israeliten daut Entlotungsjoa togood, soo aus 3. Mose 25:8-12 sajcht?

³ Daut wie bäta vestonen kjennen, von woone Frieheit Jesus räd, well wie mol daut Entlotungsjoa unjasieekjen, waut Gott siene Deena ieeschtemma fieren sullen. Jehova säd to de Israeliten: “Jie sellen daut 50. Joa heiljen un eene Entlotunk fa aule bekauntmoaken, waut em Launt wonen. Daut saul een Entlotungsjoa fa junt sennen. Dan saul jieda eena bie junt wada to sien Launt un no siene Volkjsgrupp [ooda Famielje] komen” (läs 3. Mose 25:8-12). En dän väajen Artikjel hab wie jeseenen, woo de Israeliten daut togood kjeem, jieda Wäakj dän Sabat to hoolen. Oba woo kjeem dee daut Entlotungsjoa togood? Saj wie mol, een Israelit  haud sikj deep enne Schult enjedukt un must sien Launt vekjeepen. Dan kjrieech hee daut em Entlotungsjoa trigj. Soo kunn dee “wada to sien Launt . . . komen” un siene Kjinja kunnen daut lota oawen. Ooda wan een Maun soo väl Schult haud, daut hee eent von siene Kjinja ooda mau rajcht sikj selfst aus Sklow vekjeepen must, dan kunn dee Sklow en daut Entlotungsjoa wada trigj no siene Famielje komen. Soo hauden aule eene Hopninj un kjeena durf fa emma een Sklow sennen. Daut wiest, woo sea Jehova om sien Volkj bekjemmat wia!

4-5. Wuarom sell wie ons vondoag dän Dach fa daut Entlotungsjoa intressieren?

⁴ Waut brocht daut Entlotungsjoa noch fa goodet? Jehova säd: “De HAR jun Gott woat junt säajnen en daut Launt woont hee junt aus een Oafgoot jeft, un doa woaren kjeene nootliedende mank junt sennen” (5. Mo. 15:4). Es daut nich gaunz aundasch aus vondoag dän Dach, wua de Rikje foaken emma rikja woaren un de Oame emma oama?

⁵ Wie Christen sent nich unja daut Jesaz Moses. Doawäajen hab wie kjeen Entlotungsjoa, wua de Sklowen friekomen un de Schult jestrikjt woat un wua de Menschen daut jeorwne Launt trigjkjrieen (Reem. 7:4; 10:4; Efs. 2:15). Wuarom intressieet ons dan daut Entlotungsjoa? Wäajen Jehova ons uk friemoakt, biejlikj soo aus de Israeliten ieeschtemma.

6. Von waut mott wie friejemoakt woaren?

⁶ Wie aula motten von eene sea schlemme Sklowarie friejemoakt woaren. Wiels wie aun de Sind veskloft sent, woa wie oolt, krank un motten stoawen. Väle sent daut aul enjeworden, wan see em Spieejel kjikjten ooda nom Dokta foaren musten. Un wan wie eene Sind begonen, dan feel wie ons schlajcht doaräwa. De Apostel Paulus säd, daut hee “aun daut sintelje Jesaz veskloft” wia, waut noch en am wia. Hee säd uk: “Wäa woat mie älendjet Wrak von dän doodjen Kjarpa friemoaken?” (Reem. 7:23-24).

7. Waut säd Jesaja äwa Frieheit verut?

 ⁷ Es daut nich scheen, daut Gott doano jeseenen haft, daut wie kjennen jerat ooda von de Sind friejemoakt woaren? Hee muak daut derch Jesus mäajlich. Äwa 700 Joa ea Jesus no de Ieed kjeem, säd de Profeet Jesaja verut, daut de Menschen lota noch mol eene Frieheit kjrieen wudden, waut väl mea goodet brinjen wudd aus de Frieheit, waut de Israeliten bie daut Entlotungsjoa kjrieejen. Jesaja schreef: “Gott däm HARN sien Jeist es opp mie jekomen, daut ekj daut doonen kaun, wuatoo de HAR mie jesaulft haft. Hee schekjt mie no dee, dee lieden, daut ekj an eene goode Norecht brinj; no dee, dee derch waut schwoaret gonen, daut ekj an Moot toospräakj; daut ekj de faustjenomne saj, see kjennen looskomen un friewoaren” (Jes. 61:1). Derch wäm sull dise Profezeiunk sikj erfellen?

8. Derch wäm erfeld Jesaja siene Profezeiunk sikj, waut sikj von Frieheit haundelt?

⁸ Dise wichtje Profezeiunk funk aun sikj to erfellen, nodäm daut Jesus met sienen Deenst aunfunk. Aus Jesus en siene Heimatstaut Nazaret en de Judenschool wia, läsd hee doa krakjt daut väa, waut Jesaja säd: “Dän Harn sien Jeist rut opp mie, wiels hee haft mie jewält, de oame daut Evangelium to prädjen. Hee haft mie jeschekjt, dee met een jebroaknet Hoat to heelen, de faustjenomne to prädjen daut see frie un loos sent, un de blinje, daut see seenen kjennen, un dee, dee unjadrekjt sent, frie to stalen, un to sajen, daut Gott sien Jnodenjoa jekomen es” (Luk. 4:16-19). Jesus säd to de Juden doa, daut dise Wieed sikj derch am erfelden. Oba woo?

9. Von waut wullen en Jesus siene Tiet väle friejemoakt woaren?

⁹ Von Jesus siene Tiet aun kjrieejen de Menschen de Frieheit, waut Jesaja verutjesajcht haud un wua Jesus von väaläsd. Jesus muak daut dietlich, aus hee säd: “Vondoag es dise Schreft erfelt, soo aus jie jehieet haben” (Luk. 4:21). Secha hopten väle, waut daut hieeden, daut sikj met de Rejierunk waut endren wudd, aulsoo daut see wudden von de Reema looskomen. Veleicht dochten dee krakjt soo aus de beid Mana, waut säden: “Wie oba hopten, daut hee dee wia, dee Israel friemoaken wudd” (Luk. 24:13, 21). Oba wie weeten, daut Jesus siene Nofolja nich toorod, sikj jäajen  de Reema äare strenje Rejierunk to stalen. Enne Städ daut säd hee: “Jäft dän Kjeisa waut sient es” (Mat. 22:21). Woo muak Jesus to jane Tiet de Menschen dan frie?

10. Von waut muak Jesus de Menschen frie?

¹⁰ Gott sien Sän kjeem, om de Menschen von tweeatlei frietomoaken. Ieeschtens holp hee dee, von de Gloowesleidasch äare faulsche Lieren frietokomen. Een deel Juden ieeschtemma wieren veskloft aun Menschenjebooten un orrajchte Glooweslieren (Mat. 5:31-37; 15:1-11). Un deejanje, waut säden, daut see aundre em jeisteljen holpen, wieren rajcht jesajcht blint. Dee wullen nuscht weeten von dän Messias un von daut jeistelje Licht, waut hee an brinjen wull. Doawäajen bleewen dee soo to sajen blint un äare Sinden worden nich vejäft (Joh. 9:1, 14-16, 35-41). Jesus lieed de Woarheit un jeef een goodet Biespel, un doaderch wees hee de deemootje Menschen, woo see friekomen kunnen von faulsche Lieren (Mar. 1:22; 2:23–3:5).

11. Von waut muak Jesus de Menschen noch frie?

¹¹ Tweedens muak Jesus daut mäajlich, daut de Menschen nich mea aun de Sind veskloft wieren, waut dee metjeorwen hauden. Derch Jesus sien Opfa kunn Gott deejanje de Sinden vejäwen, waut Gloowen aun daut Leesjelt beweesen, wua hee fäa sorjd (Heb. 10:12-18). Jesus säd: “Wan de Sän junt frie moakt, sent jie werkjlich frie” (Joh. 8:36). Dise Frieheit wia väl bäta aus dee Frieheit, waut de Israeliten bie daut Entlotungsjoa kjrieejen! Een Maun, waut en daut Entlotungsjoa friekjeem, kunn biejlikj lota wada een Sklow woaren, un tolatst wudd hee doch stoawen motten.

12. Wäa wieren de ieeschte, waut de Frieheit togood kjeem, wua Jesus von räd?

¹² Aum Pinjstdach aune 33 n. Chr. deed Jehova de Apostel un aundre true Mana un Frues met dän heiljen Jeist saulwen. Hee neem dee aus siene Kjinja aun, un lota wudden dee vom Doot oppjewakjt woaren toom met Jesus toop em Himmel rejieren (Reem. 8:2, 15-17). Daut wudden de ieeschte sennen, waut de Frieheit wudd togood komen, wua Jesus en Nazaret en de Judenschool von räd. Dise Mana un Frues wieren nich lenja aun de faulsche Glooweslieren un Jewanheiten veskloft, waut nich met Gott sien Wuat stemden. Fa Gott to beseenen wieren dee uk frie von de Sind, waut toom Doot fieed. Daut jratre Entlotungsjoa funk aun, aus Christus siene Nofolja aune 33 met dän heiljen Jeist jesaulft worden, un daut woat to Enj sennen, wan de dusent Joa äwa sent, wua Jesus  harschen woat. Waut fa goodet woat en dise Tiet passieren?

13-14. Wäm kjemt de Frieheit noch togood, wua Jesus von räd, buta de Jesaulwde?

¹³ Vondoag dän Dach jehieren millionende Menschen von aule Velkja to de “aundre Schop” (Joh. 10:16). Gott haft dee nich utjeläst toom met Jesus toop em Himmel rejieren. Oba no de Schreft no haben dee de Hopninj, noch mol fa emma oppe Ieed to läwen. Best du uk mank dee?

¹⁴ Dan kaust du nu aul eenje Säajnungen beläwen, waut de Jesaulwde uk haben. Wäajen du aun Jesus sien Opfa jleefst, kaust du Jehova doano froagen, daut hee die togood helt. Doaderch kaun hee die fa jerajcht talen un du kaust een frieet Jewessen haben (Efs. 1:7-8; Opb. 7:14-15). Un du hast je uk väl Säajnungen jekjräajen, wiels du nich mea aun faulsche Lieren veskloft best. Jesus säd: “Jie [woaren] weeten waut Woarheit es, un de Woarheit woat junt frie moaken” (Joh. 8:32). Es daut nich eene groote Freid?

15. Waut fa eene Frieheit un waut fa goodet kjenn wie lota noch mol beläwen?

¹⁵ Un de Frieheit woat noch jrata woaren. Boolt woat Jesus de faulsche Gloowes un de schlajchte menschelje Rejierungen venichten. Gott woat “eene [groote] Häad” beschitzen, waut am deenen, un hee  woat dee em Paradies oppe Ieed väl goodet beläwen loten (Opb. 7:9, 14). Doa woaren uk een deel Menschen vom Doot oppstonen un de Jeläajenheit haben, von aul daut schlajchte frietokomen, waut Adam siene Sind äwa an jebrocht haft (Apj. 24:15).

16. Waut fa besondret woaren de Menschen lota beläwen?

¹⁶ Wan Jesus fa dusent Joa rejieet, woaren hee un siene Metharscha de Menschen halpen, kjarpalich un em jeisteljen volkomen jesunt to woaren. Dise Tiet woat biejlikj soo sennen aus daut Entlotungsjoa en Israel. Un no daut woaren aule, waut Jehova tru deenen, gaunz un goa volkomen un frie von Sind sennen.

17. Waut woaren Gott siene Deena no Jesaja 65:21-23 no beläwen? (See daut Bilt oppe väaschte Sied.)

¹⁷ Jesaja 65:21-23 sajcht, woo daut Läwen oppe Ieed lota noch mol sennen woat (läs). Doa woa wie nich bloos setten un kjikjen un nuscht doonen. De Schreft jeft auntovestonen, daut Gott siene Deena dan eene Oabeit haben woaren, waut an Freid moakt un waut enhelt. Wan de dusent Joa ieescht äwa sent, dan woat “de Kjreatua selfst von äare Sklowarie, dee daut vedoawen äwa an brinjt,” loosjekomen sennen un “de Gotteskjinja äare Frieheit un Harlichkjeit” haben (Reem. 8:21).

18. Wuarom kjenn wie ons doaropp veloten, daut wie väl goodet em Verhop haben?

¹⁸ Jehova sach doano, daut de Israeliten jenuach Tiet toom schaufen un toom vereiwen hauden un krakjt soo woat daut uk lota en daut dusentjoasche Rikj sennen. Secha woa wie doa Tiet haben fa jeisteljet. Vondoag dän Dach mott wie Gott aunbäden, daut wie kjennen schaftich sennen, un en de niee Welt woat daut uk soo sennen. Aule true Menschen woaren sea schaftich sennen, wan Christus fa dusent Joa rejieet, wiels doa aule Gott deenen un eene scheene Oabeit haben woaren.