Weetst du de Auntwuaten fa de Froagen hia, waut ut de Woaktorms von 2019 jenomen sent?

Waut bediet Gott sien Vespräakjen: “Kjeena kaun soont häastalen, waut junt venichten woat”? (Jes. 54:17).

Wie kjennen ons doaropp veloten, daut Gott ons beschitzen woat, wan biejlikj “de hunjsche Fiend” ons äwafaulen un venichten wellen (Jes. 25:4-5). Onse Fiend woaren ons nuscht aundoonen kjennen, waut ons fa emma schot (w19.01, S. 6-7).

Woo wiest daut, waut Gott met de Kanaanita un met de ontrue Israeliten deed, daut hee jerajcht es?

Gott deed deejanje rechten, waut äakjelje onmoralische Sachen deeden ooda waut helploose Frues un Kjinja unjadrekjten. Oba hee säajend dee, waut am jehorchten un aundre jerajcht behaundelden (w19.02, S. 22-23).

Waut sell wie doonen, wan doa wäa opp ludes bät, waut nich Jehova deent?

Wie kjennen stell sennen un ons doawäajen fein oppstalen, oba wie woaren nich “Amen” sajen un uk nich met de aundre Henj toopfoten. Wie wudden kjennen ons ieejnet Jebäd opp stelles sajen (w19.03, S. 31).

Woo schlemm es Kjinja mesbrucken?

Kjinja mesbrucken es eene Sind jäajen daut Kjint, jäajen de Vesaumlunk, jäajen de Rejierunk un uk jäajen Gott. Wan eena daut en een Launt aunmalden mott, wan doa wäa beschulcht woat, daut dee een Kjint mesbrukt haft, komen de Eltestasch dit Jesaz no (w19.05, S. 9-10).

Woo kaun eena een niea ooda bätra Mensch woaren?

Hia es dreeatlei, waut eenem doabie halpen kaun: Räd met Jehova em Jebäd. Denkj no un doo die selfst unjasieekjen. Sieekj die de rajchte Frind (w19.06, S. 11).

Woo kjenn wie ons nu aul opp Vefoljunk reedmoaken?

Wie motten jratre Frind met Jehova woaren. Sie die gaunz secha, daut Jehova die leeft un daut hee die kjeenmol veloten woat. Läs jieda Dach en de Schreft un bäd pinkjlich. Sie die secha, daut daut Kjennichrikj aul de Säajnungen brinjen woat, waut Gott vesproaken haft. Lia die diene baste Bibelvarzh utwendich un uk Leeda, waut Jehova lowen (w19.07, S. 2-4).

Woo kjenn wie ons Frintschoft halpen, daut dee jerat woaren?

Daut es wichtich, daut wie metfeelent sent un derch onsen Waundel een goodet Zeichnis jäwen un daut wie jeduldich un leeftolich sent (w19.08, S. 15-17).

Waut jeft ons Moot, soo aus Jesus daut en Matäus 11:28 vespruak?

Wie haben leeftolje Oppsechta un de baste Frind un kjennen bie daut baste Woakj metmoaken (w19.09, S. 23).

Woo kaun Jehova ons halpen, daut wie dän Wunsch un de Krauft haben, waut to doonen? (Filip. 2:13).

Wan wie Gott sien Wuat läsen un doaräwa nodenkjen, dan kaun Gott ons halpen, daut wie dän Wunsch un de Krauft haben, sienen Wellen to doonen. Hee kaun ons met sienen heiljen Jeist halpen, daut wie daut, wua wie ons aulmols met vestonen, noch bäta doonen kjennen (w19.10, S. 21).

Waut sell wie doonen, ea wie waut wichtjet entscheiden?

Fief Sachen, waut ons halpen kjennen: Unjasto die daut. Bäd om Weisheit. Äwalaj, wuarom du daut doonen west. Kjikj, woo du daut krakjt doonen west. Sie derchjedocht (w19.11, S. 27-29).

Kjemt de Lia von de onstoafelje Seel von daut, waut de Soton to Eva säd?

Daut sitt doa nich no. De Soton säd to Eva, daut see nich stoawen wudd. Hee säd nich, daut et bloos soo loten wudd, aus wan see stoawen wudd. Aus de Sintflut kjeem, worden aule faulsche Glooweslieren venicht. Daut späat sikj soo, daut de Lia von de onstoafelje Seel oppkjeem, ea de Menschen sikj vestreiden, waut dän Torm von Babel buden (w19.12, S. 15).